Read Beembe Nya 16 Bible Online

Nya 16 - Beembe bible

Nya 16

¹Me nyayuka mbeembu yayinene yafumuna ku Nzo-nzaambi, yaleele kuri bambasi nsaamu ti: «Yendee na tsaamunee mambasa nsaamu ma nkesi dza Nzaambi ha butoto.»

²Yatete yayende na yatsaamuna mbasa yaandi ha butoto. Munuungu wamubi na wa mpasi wabwiilila baatu baba na kidiimbu kya kibulu na babasaambila kiteki kya kifwaani kya kibulu kikyo.

³Yaboolo yatsaamuna mbasa yaandi mu mubu, mubu wakituka bunu makila ma wafwa; na byobinso bya mwooyo byaba mu mubu byawa kufwa.

⁴Yabatatu yatsaamuna mbasa yaandi mu manyari, na mu manto ma maampa, na maampa makituka makila.

⁵Me nyayuka mbasi ya maampa yaba leele ti: «Ye wuri wasuunguma, wuri, na waba ye wangisi, bukuri ye walalimini bubwo.

⁶Bo batsaamini makila ma bangisi na ma babikiri, mu didyo ye wubanwiisiri mo; bubwo bwayelemene mu bo!»

⁷Me nyayuka dziku dileele ti: «Heehe, Mfumu, ye Nzaambi mpuungu, nsundusulu dzaaku dziri dzangwanwa na dzasuunguma!»

⁸Mbasi yabana yatsaamuna mbasa yaandi ha yulu ntaangu, nde bamuha miswa mya kuyoko baatu mu mbaawu.

⁹Baatu banyeenge mu nyangala yamakwa. Bo basaana nkuumbu Nzaambi, nde wuri na lutumu mu biteesu bya mpasi bi; kasi bahele kuyiinga madyeele mu kuha nkeembu kuri nde.

¹⁰Mbasi yabataanu yatsaamuna mbasa yaandi ha yulu mboloko ya kibulu. Kimfumu kyaandi kyakoto mampimbisi. Baatu batatika ndima dzaaku mu mpasi.

¹¹Bo basaana Nzaambi ya ku yulu, mu ntoono mpasi dzaaku na minuungu; kasi bahele kuyiinga madyeele mu biyiriki byaaku.

¹²Mbasi yabasaamunu yatsaamuna mbasa yaandi mu nyari yayinene ya Efarata; nde wasikisa maampa ma nyari, mu kudzibula nzila kuri babmbyaasi bafumunaa kupalilaa ntaangu.

¹³Me nyamono mampeeve matatu masumuka, mari bunu madzuundu, mapala mu munwa maŋataŋo, mu munwa kibulu, na mu munwa babikiri bampya.

¹⁴Mukwongo, mampeeve mamabi mari, makwesa bidiimbu, makweyende kuri bambyaasi ba nsi yansiina, mu kubakutukisa, mu ntoono mudziingu, wa kiluumbu kyakinene kya Nzaambi mpuungu.

¹⁵«Me nyikwiisa bunu ngaa-kwiibi. Kiminu kiri na muutu wunde wuri naana na wukebaa binkuta byaandi, mpisi kahele kweyende mpene, na baatu bahele kumono nsoni mu nde.»

¹⁶Mbasi yabakutukisa ha kibeendu ki baleelaa mu kihebeleho ti, Armangedoni.

¹⁷Mbasi yansaamu yatsaamuna mbasa yaandi mu maheembele; mbeembu yayinene yafumuna ku mboloko ya mu Nzo-nzaambi yayukukuna na yileele ti: «Ma mwaayirima.»

¹⁸Kwa bakama manseremi, mambeembu, manzasi na ningununu butoto yayinene, mu kiteesu kiri, kuholosono kwa yeki baatu ha butoto, kwabakimini ningununu butoto yayinene na ya makwa mu kiteesu kya bubwo ko.

¹⁹Bvula dyadinene dyakabuka mu bibari bitatu; mabvula ma mansi mabwa. Nzaambi wabaambuka mwooyo mu Babiloni, bvula dyadinene, mu kudiha mbasa malu ya kabala dya nkesi dzaandi.

²⁰Bibuma byobinso byabata, na milaandu myadziimbila.

²¹Mvula ya mindiingi myaminene, miri kuleme makuumi matatu mamakilo, yanokono baatu; bo basaana Nzaambi mu ntoono kiteesu kya mpasi dza mvula ya mindiingi, bukuri kiteesu kya mpasi kikyo, kyaba kyakinene na kyalutila.