Read Beembe Nya 19 Bible Online

Nya 19 - Beembe bible

Nya 19

¹Ha mambisa haho, me nyayuka bunu ti mbeembu yayinene ya mpuumbu baatu yalaka mu mayulu, bari mu kuleele ti: «Aleluya! Mvuukulu, nkeembu na mpinu bya Nzaambi yeetu!

²Nsundusulu dzaandi dziri dzangwanwa na dzasuunguma; bukuri nde watsuundisiri kiyala kya mukyeetu kyakinene, kyabee kweebiiyisa butoto mu buyala bwaandi, na wabvutiri kitete kuri kiyala kikyo, mu ntoono makila ma bisari byaandi.»

³Babweese kuleele lwadzoolo ti: «Aleluya! Mwiisi bvula wuri mu kutoomboko mu bibvu ngo bibvu.»

⁴Makuumi moolo na bina ma binuni, na bibulu bina byasaambila Nzaambi, wadzakala ha mboloko, byaleele ti: «Amene! Aleluya!»

⁵Mbeembu yapala mu mboloko, yaleele ti: «Siikeenu Nzaambi yeetu, beenu bobanso bisari byaandi, bakoomubvumunaa, bakuutu na bilesi.»

⁶Me nyayuka bunu ti mbeembu ya mpuumbu baatu yalaka, na bunu ti kiyomo kya maampa mamanene, bunu ti mbeembu ya banzasi ba makwa yabaleele ti: «Aleluya! Bukuri Mfumu, Nzaambi [yeetu], Mwa-mpuungu wuri mu kutuma!

⁷Tumoneenu kiminu, tukeembeenu na tumuheenee nkeembu, bukuri nkweelulu Mwaana kimeeme yitubukiri, na mukasi waandi weki wayirima.

⁸Nde mwaamuha nsaanda yayibwete yikweseme na yatsyeeme mpisi kalwaata. Nsaanda yayibwete yiyo, ngo biyiriki byasuunguma bya bangisi.»

⁹Mbasi yaleele kuri me ti: «Tina: Kiminu kiri na babo ba bari bateele mbila, mu kudya byandya bya makweele ma Mwaana kimeeme.» Yabweese kuleele kuri me ti: «Mamo ngo Maampu ma Nzaambi mangwanwa.»

¹⁰Me nyayilima ha miilu myaandi, mu kumusaambila. Mbasi yaleele kuri me ti: «Yaa sa bubwo ko; me se kisari nyiri bunu ye, na bunu bampaangi ba ye, bari na kimbaangi kya Yesu. Saambila Nzaambi!» Mukwongo, kimbaangi kya Yesu ngo mpeeve ya mbikululu.

¹¹Me nyamono yulu dyadzibulu, na kavaalu dyahembeke dyapala, waba wadzakala ha yulu dyo, nkuumbu yaandi wakwiikama na wangwanwa. Nde wutsuundisaa na wunwaanaa mudziingu kunsa nsungumunu.

¹²Miisu myaandi miri bunu mule mbaawu, na ha yulu mutu waandi, haba mampu ma lutumu malaka. Nde waba na nkuumbu yatinu, yiri muutu ti mosi wahele kuyaaba, ngo wunu nde-meene wuyiyaari.

¹³Nde waba walwaata kiyuungu kyaluula mu makila. Nkuumbu yaandi «Maampu ma Nzaambi.»

¹⁴Mikaangu mya bayongolo ba ku yulu myaba kwemunama mu makavaalu mahembeke, baba balwaata binkuta byabibwe byahembeke na byatsyeeme.

¹⁵Mu munwa waandi mwapala mbeesi yayila yasekusu, mpisi heki kaseembe makaanda mu yo. Sa kamatwaalisa mu luboto lwa kiseengu, na nde-meene sa katsyaamuna kisa kya malu ma kabala dya nkesi dza Nzaambi, Mwa-mpuungu.

¹⁶Mu kiyuungu na mu kito kyaandi mwatina nkuumbu ti: «Mbyaasi ya bambyaasi, Mfumu ya bamfumu».

¹⁷Me nyamono mbasi mosi yateleme kunsa ntaangu, yabikisa mu mbeembu yayinene, kuri banoni bobanso bakwedumukaa ku nkati-yulu ti: «Waseenu, kutukineenu mu ntoono ndiilu ya yayinene ya Nzaambi,

¹⁸mpisi ludya miswinyi mya bambyaasi, miswinyi mya bakuutu ba bayongolo, miswinyi mya bangaa-makwa, miswinyi mya makavaalu, na mya babo badzakala ha yulu mo, miswinyi mya bobanso: bari na bunsaalisi na bari bankutu, bakuutu na bilesi.»

¹⁹Me nyamono kibulu, bambyaasi ba butoto na mikaangu myaaku mya bayongolo, bakutukuna mu kunwaanisa wunde waba wadzakala ha yulu kavaalu, na mukaangu bayongolo waandi.

²⁰Basiimba kibulu kikyo, ha kimosi na mubikiri wampya, waba kweyirikaa bimaangu ha busu bwa kibulu kikyo, mu kwedziimbisa baba na kidiimbu kya kibulu, na baba saambilaana kiteki kyaandi. Bo boolo babatuba bamwooyo ku lubila lwa mbaawu ya mile.

²¹Babo basiiri, babadzusa mu mbeesi yayila, yaba pala mu munwa wa wunde waba wadzakala ha yulu kavaalu, na banoni bobanso bayukuta mu miswinyi mya bo.