Read Beembe Nya 2 Bible Online

Nya 2 - Beembe bible

Nya 2

¹Tina kuri mbasi ya dibuundu dya Efeso: «Wakwaata bambwetete nsaamu mu kooko kwaandi kwa lubakala, wuri mu kweyende hansa bitetukulu nsaamu bya miinda byawoolo, mimami kari mu kuleele:

²Me nyaari biyiriki bya ye, kisalu na kifiki kyaaku. Me nyaari ti ye wakuunda bababi ko, na ye watsiitsiri babo bakweleele bo-meene ti bo bantumu, ngo bo bari bantumu ko, na ye wamwii ti bangaa-mpya bari.

³Ye wuri na kifiki, ye wakuunda mpasi mu dyaambu dya nkuumbu yaami, ye wahele kuholo-bito.

⁴Ngo kasi di mberiri me mu ye diri: ye wayekele ntiilu yaaku yatete.

⁵Hango, baambuka mwooyo mu ha wuri wabwiilila, yiinga dyeele na bvutukila biyiriki byaaku byatete; mbuti ka bubwo ko, lo me sa nyiisa kuri ye, na sa nyiinga kibeendu kya kitetukulu kya mwiinda waaku, mbuti ye wahele kuyiinga dyeele.

⁶Kasi ye wuri na dimadi se: ye wubelaa biyiriki bya Nikolayiti, biri me se nyabibele.»

⁷«Wunde wuri na makutu kayuka, mamo madzoonsiri Mpeeve kuri dibuundu. Kuri wunde wuluuluka, me sa nyimuha muti wa mwooyo wa kudya, wuri mu paradiso dya Nzaambi.»

⁸Tina kuri mbasi ya dibuundu dya Semirana: «Watete na wampotulu, wafwiiri na wafulukiri, bumabu kari mu kuleele:

⁹Me nyaari mpasi na buwelu bwa ye, kasi wuri kisina, nyaari se nsaanunu dza babo bari mu kweleele ti Bayudayo bari, ngo bari Bayudayo ko, kasi baatu ba nzo-nkutukunu ya Satana.

¹⁰Yaa bata ti kitotolo ti kimosi ko, mu mpasi dzi wubwanikina na dzo. Mono, dyabulu sa katuba bakaka mu beenu munsa boroko, mpisi heki balutsiitsa; sa lwaba lwatsiitsa mu biluumbu kuumi. Ba wakwiikama natee dya lufwa, tumi nyikuha lukoongolo lwamwooyo.»

¹¹«Wunde wuri na makutu kayuka, mamo madzoonsiri Mpeeve kuri mabuundu!» «Wuluulukiri ka kafwa lwadzoolo ko.»

¹²Tina kuri mbasi ya dibuundu dya Peregamo: «Wakwaata mbeesi yayila, yasekusu mu bibari byobyoolo, bu kari mu kuleele:

¹³Me nyaari ku wubaanaa ye, kukwo kuri mboloko Satana, ye wakwaata mu makwa nkuumbu yaami, na wahele kutuna kanyi dya mu me, ti mu biluumbu bya Antipa, mbaangi yaami, mpaangi yaami yakwiikama, wubari badzusa kuri beenu, kwa tuunga Satana.

¹⁴Kasi me nyiri na munyoongi wantele mu ye: bukuri ye wuri na baatu bakaangama mu nyikusulu dza Balaami, waba yikisa kuri Balaki, bwa kubwiisila baala ba Isaheli, mu kudya toongo, twaha mu bikabu kuri biteki na kwesa buyala.

¹⁵Bwobumosi, ye se wuri na baatu bakaangama mu nyikusulu dza bari Nikolayiti.

¹⁶Hango nkuumbu, yiinga dyeele; mbuti ka bubwo ko, lo me sa nyiisa mu mawasu kuri ye, na sa nyibanwaanisa mu mbeesi yayila ya munwa waami.»

¹⁷«Wunde wuri na makutu mu kuyuka, kayuka mamo madzoonsiri Mpeeve kuri mabuundu!» «Kuri wuluuluka, me sa nyamuha maana, yasweeku; na sa nyaha kuri nde tari dyahembeke, na ha yulu tari dyatinu nkuumbu yamoono, yiri muutu ti mosi kayaa ko, mbuti ka wutaambula dyo ko.»

¹⁸Tina kuri mbasi ya dibuundu dya Tyatira: «Mwaana Nzaambi di kari mu kuleele, wuri na miisu myafwanikina na mule mbaawu, na miilu myafwanikina na nsoongo.

¹⁹Me nyaari biyiriki bya ye, ntiilu, kanyi, kisalu na kifiki kyaaku, biyiriki bya ye basyeelele bibvuriri kwalaka na byatete.

²⁰Ngo di nyiri nyabele ye, di wuri wahemese mukyeetu wuri nkuumbu Yedzabele, wu kweleele ti nde mubikiri, wukweyikisa na wukwedziimbisa bisari byaami, kuri bakwesa buyala, na bakwedya toongo twaha mu kikabu kuri biteki.

²¹Me nyimuha ntaangu ya kuyiinga dyeele, ngo wahele kutya kuyiinga dyeele mu buyala bwaandi.

²²Mono nyimuneŋesene, kintwaari na bateeri kimpala na nde, ha yulu mbuka ya manyoongi mamanene, mbuti bahele kuyiinga dyeele ha busu bwa biyiriki bya nde wa mukyeetu,

²³lo me sa nzusa baala ba nde wa mukyeetu. Na mabuundu momanso sa bayaaba ti, me ngo nyikengisaa bitsimi na manzala, na sa bvutula kuri muutu-muutu mu beenu, bunu buri biyiriki byaandi.»

²⁴«Me nyileele kuri beenu na kuri bakaka bari ku Tyatira, kuri bobanso bahele na nyikusulu dzi, babo bahele kuyaaba "musundu Satana", bunu bu bakweleele; me nyahele kutuba ha yulu beenu kinati kikimi;

²⁵ngo mamo ma luyaari, kebeenu natee me nyiisiri.»

²⁶«Kuri wunde wuluulukiri na wukebiri biyiriki byaami natee manunu, me sa nyaha kuri nde, lutumu ha yulu makaanda,

²⁷na sa kamatwaalisa mu luboto ha kooko, sa kakosono mo, bunu bu bakosonaa bisa bya tubuumbu,

²⁸bunu bwo se me nyiri nyataambula lutumu kuri Taata, na me sa nyimuha mbwetete ya minkya.»

²⁹«Wuri na makutu, kayuka ma leele Mpeeve kuri mabuundu!»