Read Beembe Nya 20 Bible Online

Nya 20 - Beembe bible

Nya 20

¹Me nyamono mbasi mosi yafumuna ku yulu yasunduka, yaba yakwaata fungula dya lubila, na syeene dyadinene ha kooko kwaandi.

²Yo yakwaata maŋataŋo, nyoko yayikulu, yiri dyabulu na Satana, na yamukaanga mu syeene mu fuunda dya mibvu.

³Mbasi yamutuba ku lubila, yakaanga na yasa kinyemu, mpisi heki maŋataŋo kahele kubweese kwewumuna makaanda, natee kukuka fuunda dya mibvu. Ha mambisa haho, bayelemini kumupatula mu mwaa-ntaangu yantele.

⁴Me nyamono mamboloko, baba badzakala ha yulu mo, babaha lutumu lwa kutsuundisa. Nyamono se miheebulu mya baatu ba bataburi mitu, mu ntoono kimbaangi kya Yesu, na mu ntoono maampu ma Nzaambi, na babo bari basii saambila kibulu na kiteki kyaandi ko, na bari basii taambula bidiimbu mu mambuunsu na mu myooko mya bo ko. Bo bafuluka na batuma kintwaari na Kiristo mu fuunda dya mibvu.

⁵Bafwa bakaka basii fuluka ko, natee fuunda dya mibvu dikukiri. Yiyo ngo mfulukulu yatete.

⁶Bari mu kiminu, na bangisi babo bataambula mfulukulu yatete! Lufwa lwadzoolo ka lubweese kuba na lutumu mu bo ko, ngo kasi bo sa baba bangaanga ba Nzaambi na ba Kiristo, na sa batuma kintwaari na nde mu fuunda dya mibvu.

⁷Fuunda dya mibvu dikukaana, Satana sa bamupalisa mu boroko dyaandi,

⁸na sa kapala mu kwewumuna makaanda, mari mu manto ma butoto mo mana, Ngoongo na Mangoongo, mpisi makutukina mu mudziingu. Lutaangu lwa mo luri bunu munyeenge wa mubu.

⁹Makaanda makutukina ha butoto, badyengekele bula bwa bangisi na bvula dya mutima. Ngo mbaawu yanangukina ku yulu, yasunduka na yabanyeengise.

¹⁰Dyabulu mudziimbisi bo, bamutuba ku dyaanga dya mbaawu ya mile, kukwo kuri kibulu na mubikiri wampya, sa baba bakwaamusu butsuku na mwiini mu bibvu ngo bibvu.

¹¹Me nyamono mboloko yadzaangama yahembeke, na wunde waba wadzakala ha yulu yo. Yulu na butoto byayitika ha busu bwaandi, na ka kwasii bweese kuba kibeendu kuri byo ko.

¹²Me nyamono se bafwa, bakuutu na bilesi, bateleme ha busu bwa mboloko. Nyamono se badzibula mikaanda, na badzibula mukaanda mukimi, wuri mukaanda wamwooyo. Bafwa, babatsuundisa bunu bwaba myatinu mu mikaanda, bunu bwaba biyiriki bya bo.

¹³Mubu wabvutula bafwa baba mu nde. Lufwa na nsi ya bafwa babvutula bafwa baba mu bo. Babatsuundisa muutu-muutu bunu buri biyiriki byaandi.

¹⁴Lufwa na nsi ya bafwa babituba ku dyaanga dya mbaawu. Dyaanga dya mbaawu didyo ngo lufwa lwadzoolo.

¹⁵Mbuti muutu wahele na nkuumbu yatinu mu mukaanda wamwooyo, lo bamutubiri ku dyaanga dya mbaawu.