Read Beembe Nya 22 Bible Online

Nya 22 - Beembe bible

Nya 22

¹Mbasi yasoongo me nyari ya maampa ma mwooyo, matsyeeme bunu lumweenye, yiri mu kupala mu mboloko Nzaambi, bo na Mwaana kimeeme,

²yo yakuumba ha kakati dya kibeendu kya bvula, ha kutukinaa baatu. Mu mpisi kibari kya nyari, kwamene muti wamwooyo mosi, wuhaanaa bimbutu mbala kuumi na dzoolo mu mubvu, bunu pe mbala mosi mu ngoondo. Makaya ma myo, matsinikisaa makaanda.

³Kubweese kuba mampopi ko. Mboloko Nzaambi bo na Mwaana kimeeme sa yiba ha kakati dya bvula, na bisari byaandi sa bamusaambila.

⁴Sa bamono busu bwaandi, na nkuumbu yaandi sa yiba mu mambuunsu ma bo.

⁵Butsuku bubweese kuba ko; na babweese kuba na nzala buungi bwa mwiinda na bwa ntaangu ko, bukuri Mfumu Nzaambi sa kasa buungi kuri bo, na sa batuma mu bibvu ngo bibvu.

⁶Mbasi yaleele kuri me ti: «Maampu mamama makuka mu kanyi na mangwanwa. Na Mfumu, Nzaambi ya mampeeve ma babikiri, waheeke mbasi yaandi mu kusoongo kuri bisari byaandi, mamo mari bele mu kwiisa.»

⁷«Mono, nyisulu me yeki bele. Kiminu kiri na wunde wukebaa maampu ma mbikukulu, ma mukaanda wumawu!»

⁸Me Yowane, nyayukiri na nyamwiini mimyo. Me manaa kuyuka na kumono mimyo, me nyabwa ha miilu mya mbasi yabansoongo myo, mu kumusaambila.

⁹Nde waleele kuri me ti: «Mono, yaa sa bubwo koono; me mbasi yaaku ya kisalu, na ya bampaangi baaku babikiri, babo bakebaa maampu ma mukaanda wumawu. Nzaambi ye yelemini kusaambila.»

¹⁰Mbasi yaleele kuri me ti: «Yaa sweeke maampu ma mbikukulu ma mukaanda wumawu ko, bukuri ntaangu yeki bebele.

¹¹Ngaa-bubayi kabweese kusalila bubayi; ngaa-mviindu kanamitina kumviimfuka; ngaa-kusuunguma, kabweese kusalila nsungumunu; wangisi kanamitini mu bungisi.»

¹²«Mono, me nyiri mu kwiisa mu mawasu na museendu waami, mu kubvutula kuri muutu-muutu bunu buri biyiriki byaandi.

¹³Me ngo Alafa na Omenga, watete na wansukunu, mbandukulu na manunu.»

¹⁴Kiminu kiri na babo baswaakaa madzweele maaku, mpisi heki baba na miswa mu kudya bimbutu bya muti wa bumwooyo, na mu kukoto mu myeelu kunsa bvula.

¹⁵Bambwa, bangaa-makundu, biyala, badzusi, misaambiri mya biteki, na mpisi wunde wutyaanaa mpya, na wusalilaa mpya, ku mbasi baba.

¹⁶«Me Yesu, nyaheekiri mbasi yaami, mu kuteele beenu kimbaangi mu mi tariri mabuundu. Me nyapalila mu kaanda dya Davidi, mbwetete yisemaa ya minkya.»

¹⁷Mpeeve na ntuumba ya makweele baleele ti: «Wasa!» Hemese wunde wuyuka kaleele ti: «Wasa!» Hemese wuri na mpwiisu kiisa; wunde wutiiri, kaholo maampa ma bumwooyo kwa mungengi.

¹⁸Me Yowane, nyita kimbaangi kuri mpisi wunde wuyuka maampu ma mbikululu, ya mukaanda wumawu: mbuti muutu teetikiri ntoono ha yulu mamo, lo Nzaambi sa kateeteke ha yulu nde, biteesu bya mpasi dzi bari badzoonsolo mu mukaanda wumawu.

¹⁹Na mbuti muutu yisiri maampu ma mukaanda wa mbikululu yimayi, lo Nzaambi sa kayusula kikuuku kya nde kya bimbutu, mu muti wa bumwooyo na mu bvula dyangisi, bi bari badzoonsolo mu mukaanda wumawu.

²⁰Wunde wuri mu kuta kimbaangi mu mimyo, wuleele ti: «Heehe, mwaa-ntaangu yantele yisiiri, me nyiisiri!» Amene! Mfumu Yesu, wasa!

²¹Bweese bwa Mfumu Yesu buba na bobanso.