Read Beembe Nya 3 Bible Online

Nya 3 - Beembe bible

Nya 3

¹Tina kuri mbasi ya dibuundu dya Saredeyi: «Wakwaata mampeeve nsaamu ma Nzaambi, na bambwetete nsaamu, bu kari mu kuleele: me nyaari biyiriki bya ye, wuri na mvuumfu ti wuri mwooyo, ngo kasi ye wafwa.

²Ba naana, na syaamisa bari mu kwefwa; mukwongo me nyahele kumono kuri ye, biyiriki byayirima ha busu bwa Nzaambi yaami.

³Hango nkuumbu, baambuka mwooyo mu bu wataambula na bu wayukila, kebe na yiinga dyeele. Mbuti wahele kuba naana, sa nyiisa bunu ngaa-kwiibi, na wuyaaba ko mu nkya kilookolo me nyikwiisa kuri yeenu.

⁴Kasi bantele ba ye ba ku Saredeyi babviimfiri bilwaatu bya bo. Bo sa badyaata na me, mu bilwaatu byahembeke, bukuri bakuka.»

⁵«Wuluuluka se sa kaba mu bilwaatu byahembeke, na nyiyaala nkuumbu yaandi mu mukaanda wa mwooyo ko, na sa nyamuteelile kimbaangi ha busu bwa Taata, na ha busu bwa bambasi baandi.»

⁶«Wuri na makutu, kayuka ma dzoonso Mpeeve kuri mabuundu!»

⁷Tina kuri mbasi ya dibuundu dya Filadelefya: «Wangisi, Wangwanwa, wuri na mafungula ma Davidi, kadzibulaana, wukaanga nde pe, na kakaangaana, wudzibula nde pe, bu kari mu kuleele:

⁸Me nyaari biyiriki bya ye; mono, me nyikusuusiri ha busu bwa mweelu wadzibulu, kuri muutu ti mosi ko wakuka mu kukaanga nde; bukuri ye mwaa-mpinu wuri na dzo, kasi wakebe maampu maami, tumi se wahele kutuna nkuumbu yaami.

⁹Mono ma nyiyirika me kuri bari mu nzo lukutukunu ya Satana, bakweleele ti bo Bayudayo, kasi bari Bayudayo ko, bukuri bari bangaa-mpya. Me tsa sa kuri ti bo biisa na batsukumina hari miilu mya ye, na kuyaaba ti me nyakutya.

¹⁰Mu bukuri ye wakebiri maampu maami mu kifiki, me se sa kebe ye mu ntaangu ya nsindukulu, dziyelemini kutubuka mu nsi yoyinso ya baatu, mu kusindukila babo badzakala mu nsi.

¹¹Me nyikwiisa mu mawasu: kwaata na keketee bi wuri na byo, mpisi heki muutu kahele kuholo mpu yaaku ya ndulukulu.»

¹²«Kuri wunde wuluuluka, me nsa nyamusa kuunsi dya mu Nzo ya Nzaambi yaami, na kabweese kupala ko, na me nsa ntina nkuumbu ya Nzaambi yaami ha yulu nde, na nkuumbu ya bvula dya Nzaambi yaami, Yerusalemi dyamoono, disunduka mu yulu, kuri Nzaambi yaami, na nkuumbu yaami yamoono.»

¹³«Wuri na makutu, kayuka ma dzoonso Mpeeve kuri mabuundu!»

¹⁴Tina kuri mbasi ya dibuundu dya ku Lahodikya: «Amene, mbaangi yakwiikama na yangwanwa, mbandukulu byobinso bya yirika Nzaambi bu kari mu kuleele:

¹⁵Me nyikuyaari mu biyiriki byaaku; ye wahele kyoosi, wahele se mbaawu; habee kwaandi ba ti kyoosi bunu pe mbaawu!

¹⁶Ngo bukuri, ye wuri kyeele, wahele mbaawu, na wahele se kyoosi, me nyeki kulobolo ye mu munwa waami.

¹⁷Bukuri ye wuri mu kweleele ti: "Me nyiri kisina, mwaabaka busina, nyahele na nzala kitotolo ti kimosi". Ngo ye wahele kuyaaba ti ye wuri ngaa-manyoongi, wa kubakila ngebe, wuri muwelu, ye wafwa miisu na wuri mpene.

¹⁸Ndoongi yi nyikuha, yiri ti suumba woolo dyatsyeemusu mu mbaawu kuri me, mpisi heki ye ba kisina, suumba binkuta byahembeke, wubilwaata mpisi sweeke nsoni dza kimpene kyaaku; suumba se mukelu wa kutsoniso mu miisu mpisi ye mono.

¹⁹Me nyiŋaŋanaa na nyiseembaa bobanso bari nyibatiiri; mu didyo, ba na kuheme na yiinga madyeele.

²⁰Mono, me nyateleme ha mweelu na nyikomboto; mbuti muutu yukiri mbeembu yaami, na dzibiri mweelu, me nsa nkoto mu nzo yaandi, nsa dya na nde, na nde sa kadya na me.»

²¹«Wunde wuluuluka, me nsa nyamudzakisa kintwaari na me ha mboloko yaami, bunu buri me se nyalulukiri, na nyadzakala kintwaari na Taata, ha mboloko yaandi.»

²²«Wuri na makutu, kayuka ma dzoonso Mpeeve kuri mabuundu!»