Read Beembe Nya 4 Bible Online

Nya 4 - Beembe bible

Nya 4

¹Ha mambisa haho, me nyamono mweelu wadzibulu ku mayulu. Mbeembu yatete yi nyayukiri, yaba dzoonso kuri me, bunu mvumvuri, yaleele ti: «Nwaata hamaha, me nyikusoongo mamo mayirima ha lumbisa.»

²Mu kilookolo kinikyo, Mpeeve yambaka, na nyamono mboloko ku yulu, na ha yulu mboloko muutu mosi waba wadzakala.

³Wunde waba wadzakala, waba semaana bunu matari mantalu ma baleelaa ti yasipi na sardyoni, na mboloko yaba yadyeengukulu mu mungongolo, waba semaana bunu tari dya samaragado.

⁴Mu teteke dya mboloko, mwaba makuumi moolo na mana ma mamboloko, na ha yulu mo binuni makuumi moolo na bina byaba byadzakala, byalwaata binkuta byahembeke na nkoongolo dzawoolo mu yulu mitu.

⁵Mu mboloko mwaba palaana manseremi, mambeembu, na manzasi. Ha mankula ma mboloko, miinda nsaamu myaba lulukaana mu mbaawu, mamo ngo mampeeve nsaamu ma Nzaambi.

⁶Ha mankula ma mboloko, kwaba mubu waba semaana bunu lumweenye, luri lo, biri mpele na mpele bimonokono. Ha kakati dya mboloko, na mu teteke, mwaba bibulu bina byaluula mu miisu ku mankula na ku mambisa.

⁷Kibulu kyatete kyaba kyafwanikina na nkosi, kyabyoolo kyafwanikina na mwaa-mutwaala ngoombo wa mulumi, kyabitatu kyaba na kidziri kya muutu, na kyabina kyafwanikina na ngo-noni yiri mu kuyooko ku yulu.

⁸Mpisi kibulu mu byobina, kyaba na mapaapu masaamunu, maluula mu miisu mpele na mpele. Butsuku na mwiini byo biri mu kuleelaana kwahele kuwuuma ti: «Wangisi, Wangisi, Wangisi, Mfumu Nzaambi, Mwa-mpuungu, waba, wuri na wukwiisa.»

⁹Na mu mpisi ntaangu, yiri bibulu bibyo biha nkeembu, lukiinsu na matoondo kuri wunde wadzakala ha yulu mboloko, wuri mwooyo mu bibvu ngo bibvu,

¹⁰lo makuumi mana ma binuni, bayilimini ha busu bwa wunde, wadzakala ha yulu mboloko, basaambiri wunde wuri mwooyo mu bibvu ngo bibvu, na batubiri nkoongolo dza bo ha mankula ma mboloko, na baleeriri ti:

¹¹«Ye Mfumu na Nzaambi yeetu, wayelemene mu kutaambula nkeembu, lukiinsu na mpinu, bukuri ye wayirika bitotolo byobinso, na mu kutya kwa ye, byo byaba, na biri byayiriku.»