Read Beembe Nya 5 Bible Online

Nya 5 - Beembe bible

Nya 5

¹Me nyamono ha kooko, kwa lubakala kwa wunde waba wadzakala ha mboloko, mukaanda watinu mbisa na mbisa, wakaangu mu binyemu nsaamu.

²Nyamono mbasi yamakwa yaba bikisaana mu mbeembu yayinene ti: «Na wayelemene mu kudzibula mukaanda, na mu kunyanguna binyemu byaandi?»

³Ngo kuri muutu ti mosi ko ku yulu, ha butoto na ku nsuku butoto waba wakuka mu kudzibula mukaanda, na kutala kunsa-kati.

⁴Me nyadila kwalaka, bukuri kwasii bakama muutu ti mosi ko, waba wayelemene mu kudzibula mukaanda, na kutala kunsa-kati.

⁵Ngo mosi mu binuni waleele kuri me ti: «Yaa dila ko! Mono nkosi ya kaanda dya Yuda, yapalila mu Davidi, nde waluuluka, wakuka mu kudzibula mukaanda, na binyemu nsaamu byaandi.»

⁶Me nyamono Mwaana kimeeme, wuri bunu wu bari bakeke, wateleme ha kakati dya mboloko, ha kakati dya bibulu bina, na ha kakati dya binuni. Nde waba na mampoko nsaamu, na miisu nsaamu, mamo mampeeve nsaamu ma Nzaambi, ma kari kaheeke mu nsi yansiina.

⁷Mwaana kimeeme wayisa, na waholo mukaanda, ha kooko kwa lubakala kwa wunde waba wadzakala ha mboloko.

⁸Bu kaholo mukaanda, bibulu byobina na binuni makuumi moolo na bina, byayilima ha busu bwa Mwaana kimeeme. Mpisi kinuni kyaba na ngoomfi, na mambasa mawoolo maluula mu mananaasi, dzidzo ngo nsaambulu dza bangisi.

⁹Baba yimbilaana mukuunga wamoono ti: «Ye wayelemene kuholo mukaanda, na kudzibula binyemu byaandi, bukuri ye bakukekiri, na mu makila maaku, ye wakuula baatu mu ntoono Nzaambi, ba bitsuumbu byobinso, mandiinga momanso, baatu bobanso, na makaanda momanso.

¹⁰Mu ntoono Nzaambi yeetu, ye wasa bo kimfumu na bangaanga-nzaambi, na bo sa batuma ha butoto.»

¹¹Me nyamono, na nyayuka mbeembu ya fundu-fundu ya bambasi badyengekele mboloko, bibulu na binuni. Lutaangu lwa bo lwaba byaasi mu byaasi na mafuunda ku kifuunda,

¹²baba bikisa mu mbeembu yayinene ti: «Mwaana kimeeme wu bari bakeke wayelemene mu kutaambula mpinu, busina, madyeele na makwa, lukiinsu, nkeembu na ndumusu.»

¹³Biyiriki byobinso biri ku yulu, biri ha butoto, biri ku nsuku butoto, biri mu mubu na byobinso biri mu mo, me nyayuka bibikisa ti: «Kuri wunde wadzakala ha mboloko, na kuri Mwaana kimeeme kuba ndumusu, lukiinsu, nkeembu na makwa mu mibvu ngo mibvu.»

¹⁴Na bibulu byobina byaba taambulaa ti: «Amene!» Na binuni byayilima na byasaambila.