Read Belize Kriol Look 3 Bible Online

Look 3 - Belize Kriol bible

Look 3

¹Now Jan, weh da-mi Zakaraiya son, mi-di liv eena di dezert wen ih geh wahn mesij fahn Gaad. Dis hapm fifteen yaaz afta Taibeeryos mi ton king oava di hoal a Roam. Dehnya da di man dehn weh mi deh anda hihn: Ponchos Pailat, weh da-mi govna a Judeeya; Herod, weh mi-di rool Gyalilee; Herod breda Filip, weh mi-di rool oava Itoorya ahn Chrakonaitis; ahn Lisanaiyas, weh mi-di rool Abileen. Da sayhn taim Anas ahn Kaiyafas da-mi di Jooz dehn hai prees.

³Afta Jan geh di mesij fahn Gaad, ih gaan aal oava di konchrisaid rong Jaadn Riva di tel evribadi, “Unu mos geh baptaiz fi shoa seh dat unu ton fahn unu sin dehn ahn dat Gaad fagiv unu.”

⁴Dis da weh Aizaiya di prafit mi rait bowt wen ih seh, “Hihn da wahn vais weh di hala owt eena di dezert di seh, ‘Unu geh redi fi wen di Laad kohn, ahn mek di road dehn schrayt far ahn.

⁵Evri vali wahn geh ful op, ahn evri mongtin ahn hil wahn geh flatn owt. Aala dehn krukid road wahn geh schraytn owt, ahn di rof plays dehn wahn geh smood.

⁶Den di hoal werl wahn si dat Gaad sayv peepl fahn dehn sin.’”

⁷Wahn krowd a peepl mi-di kohn tu Jan fi geh baptaiz, ahn ih tel dehn seh, “Unu da snayk ahn unu pa dehn da-mi snayk tu! Da hoo waan unu fi ron fahn Gaad jojment weh di kohn?

⁸If unu sari fi unu sin dehn fi chroo, proov it bai di way yu liv. Ahn noh eevn chrai fool unuself ahn tink seh dat bikaa unu kohn fahn Aybraham famili lain, dat mek unu aarait wid Gaad. Ai di tel unu, Gaad ku tek dehnya stoan dong ya ahn mek Aybraham pikni owta dehn.

⁹Unu da jos laik chree, ahn Gaad don ga di aks da di root. Ih wahn chap dong ahn bon op eni chree weh noh di bayr.”

¹⁰Di krowd aks Jan, “Wel den, da weh wi fi du?”

¹¹Jan ansa dehn seh, “Enibadi weh ga too shot, dehn fi shayr wid dehn wan weh noh ga non. Ahn enibadi weh ga ting fi eet, dehn fi shayr wid hoo noh ga.”

¹²Di taks kalekta dehn anaal mi-di kohn fi geh baptaiz, ahn dehn aks ahn seh, “Teecha, da weh wee fi du?”

¹³Ih tel dehn seh, “Noh kalek moa moni fahn peepl dahn weh unu sopoas tu.”

¹⁴Eevn sohn soalja aks ahn seh, “Ahn weh wee fi du?” Jan seh, “Stap di schrang di peepl dehn moni fahn dehn, ahn stap tel lai pahn dehn. Unu mos satisfai wid di pay weh unu geh.”

¹⁵Di peepl dehn mi-di staat tu geh eksaitid ahn mi-di wanda if Jan da-mi di Krais[9] weh Gaad mi pramis fi sen.

¹⁶Soh Jan tel dehn seh, “Ai di baptaiz unu wid waata, bot sohnbadi els weh eevn moa powaful dahn mee wahn soon kohn. Ai noh eevn gud nof fi loos fi hihn shooz laysn. Hihn wahn baptaiz unu wid di Hoali Spirit ahn wid faiya.

¹⁷Jos laik wahn faama, ih don gat ih fan eena ih han, ahn ih redi fi fan aala di chrash owta di weet.[10] Ih wahn gyada op aala di gud paat ahn put it op, bot ih wahn bon op di chrash eena wahn faiya weh kyaahn owt.”

¹⁸Jan tel di peepl dehn wahn lata ada ting fi mek dehn aksep di Gud Nyooz.

¹⁹Wahn nada taim, Jan mi tel King Herod bowt ihself sayka weh mi-di goh aan bitween Herod ahn Heroadyas, weh da-mi Herod breda waif. Ih mi eevn tel ahn bowt aala di ada bad ting dehn weh ih mi-di du.

²⁰Pahn tap a aala di wikidnis weh Herod du, ih pich Jan eena jayl.

²¹Wahn day wen di peepl dehn mi-di geh baptaiz, Jeezas geh baptaiz tu. Wail ih mi-di pray, hevn oapm op,

²²ahn di Hoali Spirit kohn dong eena di shayp a wahn dov ahn pich pan ahn. Sayhn taim wahn vais fahn hevn seh, “Yoo da mi Son weh Ah oanli lov, an Ah oanli pleez wid yu.”

²³Jeezas mi bowt terti yaaz oal wen ih staat di werk weh Gaad sen ahn fi du. Evribadi mi tek it fi grantid dat Jeezas da-mi Joazef son. Joazef da-mi Heli son.

²⁴Heli da-mi Matat son. Matat da-mi Leevai son. Leevai da-mi Melki son. Melki da-mi Janai son. Janai da-mi Joazef son.

²⁵Joazef da-mi Matatayas son. Matatayas da-mi Aymos son. Aymos da-mi Nayhum son. Nayhum da-mi Esli son. Esli da-mi Nagai son.

²⁶Nagai da-mi Maat son. Maat da-mi Matatayas son. Matatayas da-mi Semeyin son. Semeyin da-mi Joasek son. Joasek da-mi Joada son.

²⁷Joada da-mi Joanan son. Joanan da-mi Reesa son. Reesa da-mi Zerubabel son. Zerubabel da-mi Sheyaltyel son. Sheyaltyel da-mi Neri son.

²⁸Neri da-mi Melki son. Melki da-mi Adi son. Adi da-mi Kosam son. Kosam da-mi Elmadam son. Elmadam da-mi Er son.

²⁹Er da-mi Jashwa son. Jashwa da-mi Eliyezr son. Eliyezr da-mi Jorim son. Jorim da-mi Matat son. Matat da-mi Leevai son.

³⁰Leevai da-mi Simiyan son. Simiyan da-mi Jooda son. Jooda da-mi Joazef son. Joazef da-mi Jonam son. Jonam da-mi Elyakim son.

³¹Elyakim da-mi Meli son. Meli da-mi Mena son. Mena da-mi Matata son. Matata da-mi Naytan son. Naytan da-mi Dayvid son.

³²Dayvid da-mi Jesi son. Jesi da-mi Obed son. Obed da-mi Bowaz son. Bowaz da-mi Salmon son. Salmon da-mi Nashon son.

³³Nashon da-mi Aminadab son. Aminadab da-mi Admi son. Admi da-mi Arni son. Arni da-mi Hezron son. Hezron da-mi Perez son. Perez da-mi Jooda son.

³⁴Jooda da-mi Jaykop son. Jaykop da-mi Aizak son. Aizak da-mi Aybraham son. Aybraham da-mi Tera son. Tera da-mi Nayhor son.

³⁵Nayhor da-mi Serog son. Serog da-mi Roo son. Roo da-mi Peleg son. Peleg da-mi Eeber son. Eeber da-mi Sheela son.

³⁶Sheela da-mi Kaynan son. Kaynan da-mi Arfaksad son. Arfaksad da-mi Shem son. Shem da-mi Noawa son. Noawa da-mi Lamek son.

³⁷Lamek da-mi Metoosela son. Metoosela da-mi Eenak son. Eenak da-mi Jared son. Jared da-mi Mahalalel son. Mahalalel da-mi Kenan son.

³⁸Kenan da-mi Eenosh son. Eenosh da-mi Set son. Set da-mi Adam son. Adam da-mi Gaad son.