Read Belize Kriol Jan 1 Bible Online

Jan 1 - Belize Kriol bible

Jan 1

¹Bifoa Gaad mi eva mek eniting ataal, di Wan weh dehn kaal di Werd,[1] hihn mi deh rait deh wid Gaad. In fak, hihn da-mi Gaad ihself.

²Yes, di Werd mi deh rait deh lang wid Gaad fahn di biginin.

³Dat da di sayhn Werd weh mek evriting, ahn Gaad neva mek notn widowt hihn.

⁴Di Werd da di Wan weh reel laif kohn fram, ahn da laif da di Lait weh shain pahn peepl fi mek dehn si how fi liv.

⁵Da Lait di shain pahn evriting weh daak wid sin, ahn di daaknis kyaahn owt it ataal.

⁶Now, dehn mi ga dis man weh nayhn Jan[2] weh Gaad mi sen.

⁷Dis man Jan mi kohn fi tel evribadi bowt da sayhn Lait soh dat dehn kuda mi yehr bowt ahn, ahn bileev eena ahn.

⁸Now, Jan ihself da neva di Lait; hihn mi oanli kohn fi tel peepl di chroot bowt di Lait.

⁹Yu si, di Wan weh da di chroo chroo Lait mi-di kom eena di werl ahn shain pahn evribadi.

¹⁰Di Werd mi-di liv eena di sayhn werl weh hihn mek, ahn di peepl dehn eena di werl neva eevn noa seh dat da di Werd ihself mi-di liv monks dehn.

¹¹Ih kohn tu ih oan konchri, ahn ih oan peepl dehn neva aksep ahn.

¹²Bot dehn mi ga som a dehn weh mi did aksep ahn, ahn bileev eena ahn. Soh hihn gi aala dehn wan deh di rait fi bee Gaad pikni.

¹³Bot dehn neva ton Gaad pikni chroo di yoozhwal way, laik how baybi baan, wid wahn ma ahn wahn pa. Da Gaad ihself da di Wan weh mek dehn fi hihn pikni.

¹⁴Wel, di Werd ton hyooman ahn ih kohn kohn liv monks wi. Wee mi si fi hihn gloari, di gloari weh Gaad gi ih wan ahn oanli Son. Hihn lov wi tu nohmoh nohmoh ahn ih shoa wi wahn kainis weh wi noh dizerv, ahn ih mek wi si di reel chroot bowt Gaad.[3]

¹⁵Jan mi tel evribadi bowt ahn. Ih hala seh, “Dis da di Wan weh Ah mi seh mi wahn kohn. Hihn grayta dahn mee, kaa hihn mi deh bifoa mee mi eevn baan.”

¹⁶Sayka weh hihn ful op a soh moch lov ahn kainis, wi geh blesin pahn tap a blesin fahn hihn.

¹⁷Gaad mi gi Moaziz di Laa[4] fi gi wi, bot Jeezas Krais shoa wi fi hihn kainis weh wi neva dizerv, ahn sayka hihn, wi geh fi noa di chroot.

¹⁸Nobadi neva si Gaad yet, eksep ih wan ahn oanli Son weh da Gaad ihself, ahn weh deh kloas kloas tu di Faada. Da hihn mek wi noa how Gaad di Faada stan.

¹⁹Now di Jooish leeda dehn sen sohn prees ahn som a dehn wan weh werk eena di templ[5] fi aks Jan da hoo hihn. Wel, Jan neva frayd fi dehn ataal; ih mek dehn noa playn-wan seh, “Mee da noh di Krais,[6] yu noh.”

²⁰

²¹Soh dehn aks ahn seh, “Wel, da hoo yoo den? Ilaija?”[7] Jan seh, “No, Ai da noh Ilaija.” Den dehn aks ahn seh, “Yoo da di Prafit?”[8] Ih seh, “No.”

²²Dehn tel ahn seh, “Wel, da hoo yoo den? Tel wi soh dat wi ku noa weh fi goh bak goh tel dehn wan weh sen wi. Weh yu ga fi seh fi yuself?”

²³Wel, Jan tel dehn egzakli weh Aizaiya di prafit mi seh bowt hihn. Ih seh, “Ai da di vais weh di hala owt eena di dezert di seh, ‘Mek di road dehn schrayt fi wen di Laad kohn.’”

²⁴Den di Farisee dehn sen sohn man fi aks Jan seh, “Wel, da wai yoo di baptaiz peepl den if yoo da noh di Krais, ner Ilaija, ner di Prafit?”

²⁵

²⁶Jan ansa dehn seh, “Yes, Ai baptaiz peepl wid waata, bot sohnbadi deh rait ya monks unu weh unu noh eevn noa.

²⁷Hihn da di Wan weh wahn kohn afta mee; Ai noh eevn gud nof fi loos fi hihn shooz laysn.”

²⁸Aala dis mi hapm da wahn vilij weh nayhn Betani weh mi deh kraas di neks said a Jaadn Riva wehpaa Jan mi-di baptaiz peepl.

²⁹Di neks day Jan di Baptis si Jeezas di kohn tuwaadz ahn, ahn ih seh, “Luk, si di Wan weh da Gaad Lam[9] deh! Da hihn wahn tek weh di powa weh sin ga oava di peepl dehn a di hoal werl.

³⁰Da hihn Ah mi-di taak bowt wen Ah mi seh, ‘Sohnbadi di kohn weh grayta dahn mee kaa hihn deh fahn bifoa mee mi eevn baan.’

³¹Mee miself neva noa da mi hoo hihn fos. Dats wai Ai mi-di baptaiz peepl wid waata soh dat di hoal a Izrel ku noa da hoo hihn tu.”

³²Den Jan seh, “Mee miself si di Hoali Spirit di kohn dong owta hevn, jos laik how wahn dov wuda kohn dong, ahn ih kohn rait dong pan ahn, ahn stay deh.

³³Az Ah seh, mee neva noa da hoo hihn, bot wen Gaad sen mi fi baptaiz peepl wid waata, ih tel mi seh, ‘Di wan weh yu si mi Spirit kohn dong pan, ahn stay pan, da hihn da di Wan weh ku baptaiz wid di Hoali Spirit.’

³⁴Wel, mee miself mi see't fi chroo, an Ai di tel unu dat dis da Gaad Son.”

³⁵Di neks day Jan mi dehdeh agen di stan op wid too a ih falowa dehn, ahn wen ih si Jeezas di paas, ih bos owt ahn seh, “Unu luk deh! Da Gaad Lam dat!”

³⁶

³⁷Wen di too falowa dehn yehr weh Jan seh, dehn gaahn gaahn fala Jeezas.

³⁸Wen Jeezas ton rong ahn si dehn di fala ahn, ih aks dehn seh, “Da wai unu di fala mi?” Dehn seh, “Rabai, da weh yoo liv?” (Rabai meen teecha eena Heebroo.)

³⁹Jeezas tel dehn seh, “Kohn si noh?” Soh dehn gaahn gaahn si weh ih mi-di stay. Da mi bowt foar aklak da aftanoon wen dehn gaan, ahn dehn stay wid ahn fi di res a di day.

⁴⁰Saiman Peeta breda weh nayhn Anjru da-mi wan a di too falowa dehn weh mi yehr weh Jan mi seh bowt Jeezas. Wel, hihn gaahn gaahn jain op wid Jeezas tu.

⁴¹Di fos ting weh hihn gaahn du da fain Saiman ahn tel ahn seh, “Bwai! Wee fain di Mesaiya, yu noh!” (Mesaiya meen Krais eena di Greek langwij.)

⁴²Anjru kehr Saiman da Jeezas ahn Jeezas luk pan ahn, ahn seh, “Yoo da Saiman weh da Jan son. Fahn ya goh bak yu wahn nayhn Seefas.” (Seefas meen Peeta, weh meen “rak.”)

⁴³Di neks day Jeezas disaid fi goh da Gyalilee. Ih fain wahn man weh nayhn Filip ahn ih tel ahn seh, “Kohn wid mi, kohn bee wan a mi disaipl dehn.”

⁴⁴Filip mi kohn fahn Betsayda weh da di sayhn siti wehpaa Anjru ahn Peeta mi kohn fram.

⁴⁵Afta dat Filip gaahn fain Natanyel ahn tel ahn seh, “Wee fain di Wan weh Moaziz ahn di res a prafit dehn mi rait bowt eena di Skripcha. Ih da Jeezas weh da Joazef son, ahn ih kohn fahn Nazaret.”

⁴⁶Natanyel aks Filip, “Cho! Eniting gud ku kohn fahn Nazaret?” Filip tel ahn seh, “Wel, kohn si fi yuself den.”

⁴⁷Wen Jeezas si Natanyel di kohn tuwaadz ahn, ih seh dis bowt ahn, “Dis da wan Izrelait weh wuda neva lai tu yu!”

⁴⁸Natanyel aks Jeezas seh, “Da weh yoo noa mee fram?” Jeezas tel ahn seh, “Ai si yoo anda di fig chree fahn bifoa Filip gaahn fi yu.”

⁴⁹Natanyel tel Jeezas seh, “Teecha, yoo da Gaad Son fi chroo. Yoo da di king a Izrel.”

⁵⁰Jeezas aks ahn seh, “Yoo bileev mi kaa Ai seh how Ah mi si yu anda di fig chree? Yu wahn si biga ting dan dat.”

⁵¹Den Jeezas seh, “Ah di tel yu di chroot, yu wahn si hevn oapm op ahn yu wahn si Gaad aynjel dehn di goh op ahn dong[10] pahn di Son a Man.”[11]