Read Belize Kriol Jan 21 Bible Online

Jan 21 - Belize Kriol bible

Jan 21

¹Aftawodz Jeezas apyaa tu di disaipl dehn agen bai Gyalilee Lagoon.[67] Dis da how ih du it:

²Saiman Peeta ahn Tamas, hoofa niknaym da-mi di Twin, ahn Natanyel, weh kohn fahn Kayna da Gyalilee, ahn Zebidee too son dehn,[68] lang wid too moa a Jeezas disaipl dehn, mi meet op deh.

³Saiman Peeta tel dehn seh, “Ai gwehn goh fishin.” Den di res a dehn seh tu ahn, “Mek wi goh wid yu.” Soh dehn gaan owt eena di boat, bot da nait dehn neva kech notn.

⁴Lee bit afta day brok, Jeezas mi-di stan op pahn di shoa, bot di disaipl dehn neva noa dat da mi hihn.

⁵Jeezas hala tel dehn seh, “Mi fren, unu noh kech no fish, noh chroo?” Dehn ansa seh, “No, wi noh kech notn.”

⁶Jeezas tel dehn seh, “Chroa unu net pahn di rait said a di boat, ahn unu wahn kech sohn.” Soh dehn chroa dehn net, ahn dehn kech soh moch fish dat dehn kudn eevn haal it een.

⁷Di disaipl weh Jeezas mi lov tel Peeta, “Bwai, da di Laad!” Wen Saiman Peeta yehr seh dat da mi di Laad, ih hori haal aan di kloaz weh ih mi tek aaf. Den ih jomp eena di waata.

⁸Bot di ada disaipl dehn mi-di kom eena di boat di jreg di net ful a fish bihain dehn, kaa dehn oanli mi deh bowt wahn honjrid yaad fahn shoa.

⁹Wen dehn reech shoa, dehn si fish di kuk pahn faiya koal. Bred mi dehdeh tu.

¹⁰Jeezas tel dehn seh, “Bring som a di fish weh unu jos kech.”

¹¹Soh Saiman Peeta gaahn pahn di boat ahn haal di net pahn shoa. Wahn honjrid ahn fifti-chree big fish mi eena di net, ahn stil di net neva bos.

¹²Jeezas tel dehn seh, “Unu kohn kohn jrink tee.” Non a di disaipl dehn neva dayr aks ahn seh, “Da hoo yoo?” kaa dehn mi noa seh dat da mi di Laad.

¹³Den Jeezas kohn ahn tek di bred ahn gi dehn; den ih gi dehn di fish sayhn way.

¹⁴Dis mi mek chree taim Jeezas apyaa tu ih disaipl dehn afta ih mi rayz op bak fahn di ded.

¹⁵Wen dehn don eet, Jeezas seh tu Saiman Peeta, “Saiman, yoo weh da Jan son, yoo lov mee moa dahn eniting els?” Peeta tel Jeezas seh, “Yes Laad, yoo noa Ai lov yoo.” Jeezas tel ahn seh, “Feed mi lam dehn, den.”

¹⁶Jeezas aks Peeta wahn sekant taim, “Saiman, yoo weh da Jan son, yoo lov mee?” Peeta ansa seh, “Yes Laad, yoo noa Ai lov yoo.” Jeezas seh, “Wel, ten tu mi sheep dehn den.”

¹⁷Den Jeezas aks ahn wahn terd taim seh, “Saiman, yoo weh da Jan son, yoo lov mee?” Peeta mi feel hert kaa Jeezas aks ahn if ih lov ahn chree taim. Peeta tel Jeezas seh, “Laad, yoo noa evriting. Yoo noa Ai lov yoo.” Jeezas seh, “Wel den, feed mi sheep dehn.

¹⁸Ah di tel yu di chroot, wen yu mi yonga, yu yoostu put aan yu oan kloaz, ahn goh weh yu waahn. Bot wen yu get oal, yu wahn schrech owt yu han dehn ahn den sohnbadi els wahn put aan yu kloaz fi yu, ahn kehr yu weh yu noh waahn goh.”

¹⁹Jeezas seh dat fi mek Peeta noa weh kaina det ih mi wahn ded, ahn dat da kaina det mi wahn aana Gaad. Afta dat, Jeezas tel Peeta, “Fala mi.”

²⁰Peeta ton rong ahn si di disaipl weh Jeezas mi lov di fala dehn. Da mi di sayhn disaipl weh mi leen kloas tu Jeezas wen dehn mi-di eet tugeda. Hihn mi aks Jeezas seh, “Laad, da hoo wahn sel yu owt?”

²¹Wel, wen Peeta si da disaipl deh, ih aks Jeezas seh, “Laad, da weh wahn hapm tu hihn?”

²²Jeezas tel ahn seh, “If Ai waahn hihn liv til Ai kohn bak, den weh dat tu yoo? Weh yoo fi du da fala mee!”

²³Soh wahn rooma staat tu spred monks di res a Jeezas falowa dehn seh dat da disaipl deh neva mi wahn ded. Main yu, Jeezas neva did seh dat da disaipl neva mi wahn ded, bot ih mi seh, “If Ai waahn hihn liv til Ai kohn bak, da weh dat tu yoo?”

²⁴Dis da di disaipl weh mi si aala dehn ting ahn rait dehn dong, ahn wee noa dat aal weh ih mi rait dong da-mi chroo.

²⁵Lat moa ting mi deh weh Jeezas mi du, bot if dehn wuda chrai fi rait dong aala dehn, Ai ges di hoal werl wudn a ga spays fi hoal aala di buk dehn weh dehn mi wahn hafu rait eena.