Read Belize Kriol Jan 3 Bible Online

Jan 3 - Belize Kriol bible

Jan 3

¹Dehn mi ga dis Jooish rilijos leeda weh da-mi wahn Farisee. Hihn mi nayhn Nikodeemos.

²Wahn nait ih gaahn da Jeezas ahn tel ahn seh, “Teecha, wee noa dat da Gaad ihself sen yoo fi teech wi kaa nobadi kyaahn du di mirakl dehn weh yoo di du, eksep Gaad deh wid dehn.”

³Jeezas ansa ahn seh, “Ah di tel yu di chroot, nobadi kyaahn bee paat a Gaad kingdom if dehn noh baan oava agen.”

⁴Nikodeemos aks Jeezas seh, “How yu meen? Da how sohnbadi wahn baan agen if dehn don oal aredi? Ih kyaahn goh bak eena ih ma beli ahn baan oava agen!”

⁵Jeezas tel ahn seh, “Ah di tel yu di chroot, nobadi kyaahn bee wahn paat a Gaad kingdom eksep ih baan chroo waata ahn chroo di Hoali Spirit.

⁶Flesh ahn blod baan flesh ahn blod, ahn di Hoali Spirit baan spirit.

⁷Soh noh sopraiz wen Ah tel yu, ‘Yu hafu baan oava agen.’

⁸Da oanli Gaad Spirit ku gi nyoo laif. Yu si, di Hoali Spirit da jos laik di breez weh bloa eniway ih waahn, ahn yu ku yehr di song weh ih mek, bot yu noh noa wichpaa ih kohn fram er weh ih gwehn.”

⁹Nikodeemos aks Jeezas seh, “Bot da how dat ku hapm?”

¹⁰Jeezas ansa ahn seh, “Yoo da wahn big taim rilijos teecha da Izrel, soh how kom yoo noh andastan dehn ting deh?

¹¹Ah di tel yu di chroot, wee taak bowt weh wee noa, ahn wi tel evribadi weh wi si, ahn stil non a unu noh bileev wi.

¹²If unu noh bileev wen Ah tel unu bowt ting weh unu noa bowt dong ya pahn ert, den da how unu wahn bileev if Ah tel unu bowt ting weh ga fi du wid Gaad?

¹³Nobadi neva gaan op da hevn yet eksep di Son a Man[14] weh kohn dong fahn hevn.

¹⁴Wen Moaziz mi deh eena di dezert, ih mi lif op wahn braas snayk weh ih mi mek ahn put it pahn wahn poas.[15] Da jos laik dat dehn wahn lif op di Son a Man,[16]

¹⁵soh dat enibadi weh put dehn fayt eena ahn wahn liv wid Gaad fareva.

¹⁶“Yu si, Gaad lov di peepl dehn eena dis werl soh moch dat ih giv op ih wan ahn oanli Son fi dehn, soh dat enibadi weh put dehn fayt eena ahn wahn neva ded; insteda dat, dehn wahn liv wid Gaad fareva.

¹⁷Gaad neva sen ih Son eena di werl fi kandem peepl, bot ih sen ahn fi sayv dehn.

¹⁸Gaad noh wahn kandem non a dehn wan weh put dehn fayt eena ih Son, bot dehn wan weh noh bileev eena ahn don kandem lang taim, kaa dehn neva put dehn fayt eena Gaad wan ahn oanli Son.

¹⁹“Dis da wai Gaad wahn joj dehn: kaa hihn sen di Lait[17] soh dat peepl ku si how fi goh; bot dehn raada di daaknis moa dan di lait, kaa dehn waahn goh hed ahn du dehn wikidnis.

²⁰Kaa aala dehn wan weh laik du wikidnis noh laik it wen lait shain pahn dehn. In fak, dehn hayt it ahn dehn noh waahn kom eena di lait, kaa dehn noh waahn nobadi noa aal di wikidnis weh dehn di du.

²¹Bot dehn wan weh du weh Gaad seh da di rait ting fi du, wahn oanli tu glad fi kom eena di lait, soh dat evribadi ku si dat Gaad deh eena evriting weh dehn du.”

²²Afta dat Jeezas ahn ih disaipl dehn gaahn da wahn neks spat eena Judeeya. Ih spen sohn taim deh wid dehn di baptaiz sohn peepl.

²³Jan di Baptis mi deh da Aynon weh mi deh kloas Saylem di baptaiz peepl tu, kaa lata waata mi dehdeh, ahn peepl stodi mi-di kohn fi geh baptaiz.

²⁴Dat da-mi bifoa dehn lak op Jan eena jayl.

²⁵Now som a Jan falowa dehn mi-di aagyu wid wahn Jooish man bowt di washin serimoni[18] weh di Jooz dehn du.

²⁶Dehn kohn tu Jan ahn seh tu ahn, “Teecha, yu si di man weh mi deh wid yu pahn di neks said a Jaadn, di sayhn wan weh yu aalwayz mi-di tel wi bowt? Wel, ih deh ya di baptaiz tu, ahn evribadi di goh tu hihn.”

²⁷Jan tel dehn seh, “Nobadi kyaahn geh notn eksep weh Gaad gi dehn.

²⁸Unu unuself da mi witnis dat Ah mi seh, ‘Ai da noh di Krais,[19] bot Gaad sen mee hed fi geh peepl redi fi wen hihn kohn.’

²⁹Di groom da di wan weh ga di braid. Di groom fren jos dehdeh di lisn fi wen di groom kohn, ahn ih rijais wen ih yehr ih vais. Wel, da di sayhn way wid mee; dats wai Ai oanli glad.

³⁰Di Krais mos geh moa ahn moa impoatant, bot mee, Ai mos geh les ahn les impoatant.

³¹“Gaad Son kohn fahn hevn ahn ih grayta dahn evribadi; aal laik mee, Ai kohn fahn di ert an Ai bizniz ya, soh Ai oanli ku taak bowt ting weh kansaan dong ya. Di wan weh kohn fahn hevn grayta dahn evribadi els.

³²Hihn taak bowt evriting weh hihn si ahn yehr, bot stilyet, nobadi noh bileev weh ih seh.

³³Evribadi weh bileev weh hihn seh fain owt fi chroo dat Gaad noh di tel lai.

³⁴Di wan weh Gaad sen seh aal weh Gaad waahn ih seh, kaa Gaad gi hihn di ful powa a ih Spirit, ahn ih neva hoal notn bak.

³⁵Di Faada lov ih Son, ahn ih gi ahn powa oava evriting.

³⁶Evribadi weh put dehn fayt eena Gaad Son wahn liv fareva; bot enibadi weh noh du weh di Son seh wahn neva ga da laif deh, ahn Gaad jojment wahn aalwayz di heng oava dehn hed.”