Read Belize Kriol Jan 9 Bible Online

Jan 9 - Belize Kriol bible

Jan 9

¹Az Jeezas mi-di waak lang, ih si wahn man weh mi baan blain.

²Ih disaipl dehn aks ahn seh, “Teecha, da wai dis man baan blain? Da kaa hihn sin, er da kaa ih ma ahn ih pa sin?”

³Jeezas ansa dehn seh, “Fi hihn blainis noh ga notn fi du wid fi hihn sin er ih ma ahn ih pa sin. Bot hihn mi baan blain soh dat Gaad ku shoa ih powa chroo weh ih wahn du fi dis man.

⁴Wi hafu du weh di Wan weh sen mi waahn wi du wail da stil day. Nait di kohn, ahn nobadi kyaahn du notn wen nait kohn.

⁵Az lang az Ai deh ya eena dis werl, Ai da di Lait weh shoa peepl how fi liv.”

⁶Wen Jeezas don seh dis, ih spit pahn di grong ahn den ih miks op di spit ahn di dert ahn mek lee mod. Den ih spred di mod oava di man aiy dehn, ahn ih tel ahn seh, “Goh goh wash aaf yu aiy dehn eena di pool weh nayhn Sailoam.” (Sailoam meen “di Wan weh dehn sen.”) Soh di man gaahn gaahn wash ih aiy dehn, ahn den ih kuda mi si. Afta dat, ih gaahn bak hoahn.

⁸Di man nayba dehn ahn aala dehn wan weh doz noa ahn az wahn bega staat tu aks, “Dis da noh di sayhn man weh doz sidong di bayg?”

⁹Som a dehn mi-di seh, “Da hihn.” Ahn sohn neks wan seh, “No, da noh hihn, da sohnbadi weh oanli luk laik hihn.” Bot di man ihself seh, “Da mee da di sayhn man.”

¹⁰Bot di peepl dehn aks ahn agen, “Den da how yoo ku si now den?”

¹¹Di man ansa dehn seh, “Da man weh nayhn Jeezas miks op sohn mod ahn spred it oava mi aiy dehn ahn tel mi, ‘Goh da di pool weh nayhn Sailoam ahn wash aaf yu aiy dehn.’ Den Ah gaahn gaahn wash mi aiy dehn ahn den Ah kuda mi si.”

¹²Den dehn aks di man, “Da weh hihn deh?” Di man seh, “Ai noh noa.”

¹³Dehn kehr di man weh mi blain fronta di Farisee dehn.

¹⁴Now di day wen Jeezas miks di mod ahn put it pahn di man aiy dehn da-mi di Sabat.

¹⁵Den di Farisee dehn staat tu aks di man aal oava agen da how ih mi geh fi si. Di man tel dehn seh, “Di man put mod pahn mi aiy dehn. Den Ah wash dehn aaf, ahn now Ah ku si.”

¹⁶Som a di Farisee dehn seh, “Dis Jeezas hihn da noh fahn Gaad kaa hihn noh kip di Sabat.” Bot sohn neks wan dehn seh, “Bot how sohnbadi weh da wahn sina wahn ku du mirakl laik dehnya?” Ahn soh dehn mi ga divizhan monks dehnself.

¹⁷Soh dehn aks di man agen, “Wel, weh yoo ga fi seh bowt di man weh heel yu, laik how da fi yoo aiy dehn ih heel?” Di man seh, “Hihn da wahn prafit.”

¹⁸Di Jooish leeda dehn stil neva bileev seh hihn da-mi di man weh mi baan blain ahn now kuda mi si, soh dehn kaal een ih ma ahn ih pa ahn aks dehn seh, “Dis da fi unu son weh mi baan blain? Ahn how kom ih ku si now?”

²⁰Di man ma ahn pa ansa dehn seh, “Wee noa seh dat dis da fi wee son, ahn dat ih mi baan blain.

²¹Bot wee noh noa da how kom hihn ku si now, er da hoo mek ih ku si. Aks hihn noh? Hihn oal nof fi taak fi fi hihnself.”

²²Di man ma ahn ih pa mi seh dat kaa dehn mi frayd fi di Jooish leeda dehn. Yu si, di leeda dehn mi don seh dat enibadi weh seh dat Jeezas da-mi di Krais[37] mi wahn geh kik owta di sinagag.[38]

²³Dats wai di man ma ahn pa seh, “Aks hihn noh? Ih oal nof.”

²⁴Soh di Jooish leeda dehn kaal bak di man weh mi blain wahn sekant taim. Dehn tel ahn seh, “Sway fronta Gaad ahn tel di chroot. Dis man weh heel yu da wahn sina, noh chroo?”

²⁵Di man ansa seh, “Ai noh noa weda ih da sina er nat! Di oanli ting Ai noa, Ai mi blain, ahn now Ah ku si.”

²⁶Dehn tel ahn seh, “Weh ih du tu yu? Da how ih mek yu si?”

²⁷Di man ansa dehn seh, “Ah don tel unu aredi ahn unu neva waahn lisn. Soh wai unu waahn yehr it agen? Unu waahn bee wan a fi hihn falowaz tu den?”

²⁸Di Jooish leeda dehn staat tu insolt di man. Dehn seh, “Yoo da wan a fi hihn falowa dehn, bot wee fala Moaziz.

²⁹Wee noa dat Gaad mi taak tu Moaziz, bot az tu dis man hihn, wee noh noa weh hihn kohn fram.”

³⁰Di man ansa dehn seh, “Yu noa, da wahn foni ting! Unu noh noa weh hihn kohn fram, bot yet hihn mek Ai ku si.

³¹Wi noa dat Gaad noh lisn tu sinaz, bot ih lisn tu dehn wan weh wership ahn, ahn du weh ih seh.

³²Fahn di taim di werl mek, nobadi neva yehr yet bowt enibadi di mek wahn persn weh baan blain ku si.

³³If dis man da neva fahn Gaad, hihn kudn du notn.”

³⁴Dehn ansa ahn seh, “Yoo ful op a wikidnis fahn yu baan, ahn now yoo di chrai teech wee?” Ahn wid dat dehn pich ahn owt.

³⁵Jeezas yehr seh dehn mi pich owt di man owta di sinagag, ahn wen ih fain ahn, ih seh, “Yoo bileev eena di Son a Man?”[39]

³⁶Di man aks ahn seh, “Da hoo da di Son a Man, Sa? Tel mi soh dat Ah ku bileev eena ahn.”

³⁷Jeezas seh, “Yu don si ahn, ahn di Wan weh di taak tu yu, da hihn.”

³⁸Di man seh, “Laad, Ah bileev.” Ahn ih staat tu wership Jeezas.

³⁹Jeezas seh, “Ai kom eena dis werl fi ekspoaz peepl sin. Ah kohn soh dat dehn wan weh blain ku si, ahn fi shoa dehn wan weh tink dehn ku si, dat dehn blain.”

⁴⁰Som a di Farisee dehn weh mi deh kloas yehr weh Jeezas seh, ahn dehn seh tu ahn, “Yoo kyaahn di seh dat wee blain.”

⁴¹Jeezas tel dehn seh, “If unu mi blain, den unu wudn gilti a no sin. Bot laik how unu seh, ‘Wee ku si,’ dat meen unu stil gilti a unu sin.”