Read Belize Kriol 1 Korintyanz 5 Bible Online

1 Korintyanz 5 - Belize Kriol bible

1 Korintyanz 5

¹Now, Ah kyaahn bileev di nyooz weh peepl di spred bowt, dat sohn peepl monks unu eena di cherch di liv sohn loos laif weh wos dahn weh dehn wan weh noh noa Gaad di liv. Ai di yehr seh dat wahn man di sleep wid ih oan step-mada!

²Ahn fi si, unu stil prowd a unuself! Insteda dat, unu shuda sari, ahn heng unu hed eena shaym. Unu shuda put owt da man weh di liv laik dat fahn monks unu.

³Eevn doa Ah noh dehdeh wid unu eena badi, Ah wahn dehdeh wid unu eena spirit. Ai don joj di man aredi eena di naym a di Laad Jeezas, sayhn laik Ah mi deh rait deh wid unu.

⁴Wen unu gyada tugeda Ai wahn dehdeh wid unu eena spirit bai di powa a di Laad Jeezas.

⁵Den unu fi han da man oava tu Saytan, eevn if ih badi geh dischrai, soh dat ih spirit ku bee sayv pahn di Day wen di Laad wahn kohn bak.

⁶Ih noh rait fi mek unu boas bowt how unu soh spirichwal. Unu noh noa seh dat jos wahn lee bit a ees mek di hoal bred doa rayz?

⁷Get rid a da oal ees. Den unu wahn kleen laik fresh bred doa weh noh gat een no ees, kaa dat da how unu stay, kaa Krais da fi wee Paasoava Lam weh don sakrifais fi wee.

⁸Soh, noh selibrayt di Paasoava[2] fees wid sin ahn eevl eena unu laif. Dat da laik wen yu di eet bred weh gat een oal ees. Pahn di ada han, wen wi ga di Paasoava fees, wi laif shuda bee kleen ahn aanis, weh da laik bred weh mek widowt ees.

⁹Ah mi don rait eena mi leta tu unu, dat unu noh fi ga notn fi du wid peepl weh liv loos.

¹⁰Now, Ah noh di taak bowt di peepl dehn a dis werl weh noh noa Gaad, weh di liv loos laif, er weh red aiy, er dehn wan weh teef, er weh di wership aidal. If da dehn Ah mi-di taak bowt, den unu mi wahn hafu get owta dis werl fi chroo, fi get weh fahn peepl laik dat.

¹¹Bot now Ai di rait unu fi eksplayn dat unu fi noh ga notn fi du wid nobadi weh kaal dehnself wahn bileeva ahn stilyet di liv loos laif, er ga red aiy, er di wership aidal, er di slanda peepl, er da jronkad, er teef. Unu noh shuda eevn sidong fi eet wid nobadi weh du dehn ting deh.

¹²Da noh mai bizniz fi joj peepl weh noh bilangz tu di cherch; bot unu shuda joj unu oan cherch memba dehn.

¹³Gaad wahn joj aala dehn wan weh noh bilangz tu di cherch. Da laik weh di Skripcha seh, “Unu fi mek di eevl man kom owt fahn monks unu.”