Read Belize Kriol 2 Korintyanz 6 Bible Online

2 Korintyanz 6 - Belize Kriol bible

2 Korintyanz 6

¹Soh den, wee weh di werk tugeda wid Gaad di bayg unu fi mek gud yoos a di grays weh Gaad gi unu.

²Kaa Gaad seh, “Wen di rait taim kohn, Ah lisn tu yu, ahn wen di day fi mek Ah sayv yu kohn, Ah wahn help yu.” Lisn tu mi; now da di rait taim. Tudeh da di day fi mek peepl geh sayv!

³Wi di chrai liv eena wahn way soh dat nobadi kyaahn fain no faalt wid di werk weh wi di du. Wi noh waahn du notn fi kip bak nobadi fahn fain di Laad.

⁴Bot eena evriting weh wi du, wee shoa dat wee reeli di serv Gaad fi chroo, kaa wen wi goh chroo wi chroblz ahn sofarin ahn haad taim, ih mek wi ga payshens.

⁵Sohntaim dehn beet wi, ahn dehn pich wi eena jayl; wi geh hert eena raiyat, ahn wi werk til wi waahn jrap; sohntaim wi eevn hafu goh widowt sleep ahn food.

⁶Bot stil, wi proov dat wee di du Gaad werk bai di kleen laif weh wi liv, ahn bai wi andastandin, ahn payshens, ahn wi kainis ahn wi chroo lov, ahn di powa a di Hoali Spirit.

⁷Wi mi faytful fi preech di chroot, ahn Gaad powa mi-di werk eena wi. Wen wi liv rait wid Gaad, dat da wi wepan weh wi yooz fi atak ahn fi difen wiself.

⁸Weda er nat peepl aana wi er bring wi dong, weda dehn taak bad bowt wi er prayz wi, wee stil serv Gaad. Wee aanis, bot dehn stil seh dat wee noh di tel di chroot.

⁹Evribadi noa wi, bot dehn goh aan laik dehn noh noa wi. Wi fays det evri day, bot si wi ya, wi stil livin. Wi geh sohn bad beetn, bot dehn stil noh kil wi.

¹⁰Wi haat hevi, bot wi stil ku rijais. Wi poa, bot lata peepl geh rich chroo wee. Wee noh oan notn, bot stil evriting bilangz tu wee.

¹¹Wi dyaa bradaz ahn sistaz da Korint, wi di tel di chroot wen wi seh dat wi oapm op wi haat tu unu.

¹²Wee da noh di wan dehn weh shet op wi haat fahn unu; da unu weh hoal bak unu lov fahn wee.

¹³Ah di taak tu unu sayhn laik if unu da-mi mi oan pikni dehn. Oapm op unu haat tu wi noh, jos laik how wee mi du.

¹⁴Unu noh fi jain op wid nobadi weh noh bileev eena Jeezas. How gudnis ahn wikidnis wahn bee paadna? Ahn how lait ahn daaknis wahn ku get lang?

¹⁵How Krais ahn Saytan[6] wahn eva ku gree? Ahn weh sohnbadi weh bileev eena Krais ahn sohnbadi weh noh bileev ga fi du wid wan anada?

¹⁶Eni aidal bizniz fi deh eena Gaad templ? No, kaa da wee da di templ a di livin Gaad. Da laik weh Gaad seh, “Ai wahn liv eena fi mee peepl dehn. Ah wahn waak monks dehn. Ah wahn bee dehn Gaad, ahn dehn wahn bee mai peepl.”

¹⁷Ahn di Laad seh, “Soh den, unu fi kom owt fahn monks dehn wan weh noh bileev. Noh ga notn fi du wid dehn. Unu noh fi ga notn fi du wid notn weh doti. Den Ai wahn welkom unu.”

¹⁸“Ai wahn bee unu Faada, ahn unu wahn bee mi son ahn mi daata dehn. Dat da weh di Laad Almaiti seh.”