Read Belize Kriol Filipiyanz 2 Bible Online

Filipiyanz 2 - Belize Kriol bible

Filipiyanz 2

¹Di laif weh unu ga wid Jeezas Krais noh inkorij unu? Ih lov noh komfert unu? Aala unu noh ga di sayhn Hoali Spirit di liv eena unu haat? Unu haat noh saaf? Unu noh kay bowt wan anada?

²Wel den, Ah wuda moa dahn glad if aala unu wuda tink wid wan hed, lov wan anada di saym, ahn agree wid wan anada eena evriting weh unu du.

³Unu mosn du notn owta selfishnis er praid. Unu sopoas tu bee hombl ahn unu noh fi tink dat unu beta dahn enibadi els.

⁴Unu mos luk owt fi wan anada, ahn noh oanli fi unu oanself.

⁵Unu fi tink di sayhn way how Krais Jeezas tink:

⁶Eevn doa hihn mi aalwayz ga Gaad egzak naycha, ahn ih mi deh pahn di sayhn levl wid Gaad, ih neva tink haad fi let goh aala dat.

⁷Bot ih giv op evriting ahn mek ihself bee wahn servant ahn ton hyooman jos laik wee.

⁸Ahn wail ih mi deh ya az wahn hyooman, ih hombl ihself, ahn ih mi soh obeedyant tu Gaad dat ih mi wilin fi ded anaal, eevn if da mi pahn wahn kraas!

⁹Sayka dat, Gaad rayz ahn way op ahn mek ahn grayta dahn enibadi, ahn ih gi ahn di naym weh haiya dahn eni ada naym weh deh.

¹⁰Soh dat wen dehn yehr di naym “Jeezas,” evri singl wan a dehn eena hevn, ahn pahn di ert, ahn anda di ert, wahn hafu jrap dong pahn dehn nee ahn bow dong tu hihn.

¹¹Aala dehn wahn hafu seh wid dehn oan mowt dat Jeezas Krais da Laad oava aal, soh dat Gaad di Faada ku geh aala di gloari.

¹²Mi dyaa fren dehn, jos laik how unu aalwayz du weh Ah tel unu fi du wen Ah deh rong unu, ih eevn moa impoatant fi du weh Ah tel unu wen Ah noh dehdeh. Sayhn way, sayka weh Jeezas Krais sayv unu, unu shuda ga soh moch rispek fi Gaad dat unu wuda frayd fi du eniting weh hihn noh laik.

¹³Unu si, da Gaad weh di werk eena unu haat fi mek unu mek op unu main fi du weh hihn waahn, ahn ih gi unu di powa fi du it tu.

¹⁴Unu fi du evriting widowt di komplayn ahn aagyu,

¹⁵soh dat unu wahn ton owt fi bee di kaina pikni fi Gaad weh wahn bee kleen ahn hoali, widowt eevn wahn singl faalt az unu liv monks disya wikid ahn sik jenarayshan. Unu laif mos bee laik wahn lait tu dehn.

¹⁶Hoal aan tait tu di Werd a Laif soh dat pahn di Day wen di Laad Jeezas Krais kohn bak, Ah wahn ku tek praid eena unu an Ah wahn ku noa dat Ah neva ron di rays in vayn er werk fi notn.

¹⁷Sayka unu fayt, unu di sakrifais unu laif fi serv Gaad. Maybi Ai wahn hafu sakrifais mi oan laif pahn tap a aal weh unu di du. Eevn if dat hapm, Ah wahn oanli glad ahn rijais wid aala unu.

¹⁸Ahn unu shuda bee glad ahn rijais lang wid mee tu.

¹⁹If di Laad Jeezas wilin, Ah wahn soon sen Timoti tu unu, soh dat Ah wahn ku feel beta wen ih kohn bak ahn tel mi how unu di du.

²⁰Ah noh ga nobadi els laik hihn weh reeli inchrestid eena how unu di get lang.

²¹Evribadi els di luk owt fi dehn oanself! Dehn noh eevn kay bowt notn weh kansaan Jeezas Krais.

²²Bot unu noa dat Timoti don proov ihself aredi. Hihn di werk lang wid mi fi spred di Gud Nyooz, jos laik how wahn son werk wid ih pa.

²³Soh Ah hoap dat Ah wahn ku soon sen ahn, az soon az Ah si how tingz di goh wid mi.

²⁴An Ah shoar dat di Laad wahn soon mek Ai kohn tu.

²⁵Bot Ah tink Ah wahn hafu sen bak Epafrodaitos tu unu. Unu mi sen ahn fi tek kayr a mi, ahn hihn reeli werk gud wid mi, az mi brada, ahn mi werk paadna, ahn wahn felo soalja eena Gaad aami.

²⁶Ih oanli di pain weh fi unu, ahn ih di wori bikaa unu mi yehr dat ih mi sik.

²⁷Da chroo, ih mi oanli sik bad. Ih mi nayli ded. Bot Gaad mi sari far ahn; ahn noh oanli fi hihn, bot fi mee tu. Ahn soh ih mi spayr mi saro pahn tap a saro.

²⁸Soh Ah eevn moa eega fi sen ahn tu unu, soh dat wen unu si ahn agen, unu wahn glad, an Ai wahn ga les schres.

²⁹Unu mos welkom ahn gud gud az wahn brada eena di Laad, ahn unu mos aana peepl laik hihn,

³⁰kaa ih mi nayli ded sayka di werk fi Jeezas Krais. Ih mi-di tek chaans wid ih oan laif sayka di chrai mek op fi di lee asistans weh unu wuda mi laik fi gi mi.