Read Belize Kriol Heebrooz 1 Bible Online

Heebrooz 1 - Belize Kriol bible

Heebrooz 1

¹Way way bak, Gaad mi taak lata taim ahn eena lata difrent way tu wi ansesta dehn, chroo di prafit dehn.

²Bot now eena dehnya laas dayz, ih taak tu wi chroo ih Son. Gaad mi mek di yoonivers chroo hihn, ahn wan day evriting wahn bilangz tu hihn.

³Gaad Son da di lait weh di shoa wi di brait gloari a Gaad. Wen unu si di Son, unu di si Gaad, kaa di Son da jos di saym az Gaad. Chroo fi hihn oan maiti Werd dehn hihn hoal di hoal yoonivers tugeda. Ahn afta di Son don wash weh wi sin dehn, ih gaahn da hevn gaahn sidong pahn di rait han said[1] a Gaad, weh ga moa powa dahn aal.

⁴Gaad mek ih Son way haiya dan di aynjel dehn, jos laik how di naym weh ih gi ahn faar faar grayta dahn eni ada naym.

⁵Ahn Gaad neva tel non a di aynjel dehn seh, “Yoo da mi Son; tudeh Ai kohn fi bee yu Faada.” Ahn agen, Gaad neva tel non a dehn seh, “Ai wahn bee dehn Faada, ahn dehn wahn bee mi Son.”

⁶Gaad Son mi deh eevn bifoa eniting mi mek, ahn wen ih mi-di sen ahn eena di werl, Gaad tel aala ih aynjel dehn seh, “Aala unu mos wership mi Son.”

⁷Wen Gaad taak bowt di aynjel dehn, ih seh, “Ai mek mai aynjel dehn bee laik breez weh di bloa, ahn mi servant dehn laik faiya weh di blayz op.”

⁸Bot wen Gaad taak tu ih Son, ih seh, “Yoo da Gaad, ahn yu kingdom wahn laas fareva ahn eva! Yu rool yu peepl dehn fyaa-wan.

⁹Yoo lov weh rait ahn yu hayt weh eevl. Dat da wai mee, weh da yu Gaad, pik yoo ahn aana yu moa dahn aala yu fren dehn, ahn weh Ah pik yoo, dat gi yu lata jai.”

¹⁰Dis da weh Gaad seh tu: “Laad, wen notn neva deh, da yoo mek di ert ahn di hevn dehn wid yu oan han dehn.

¹¹Aala dehn wahn kohn tu wahn en, bot yoo wahn aalwayz deh; dehn wahn wayr owt sayhn laik oal kloaz.

¹²Yu wahn foal dehn op laik wahn koat. Yu wahn chaynj dehn sayhn laik how yu chaynj kloaz. Bot yoo wahn neva chaynj; yoo wahn neva geh oal ahn ded.”

¹³Gaad neva tel non a di aynjel dehn seh, “Sidong ya da mi rait han said til Ah put yu enimi dehn anda yu fut laik wahn futstool.”

¹⁴Yu si, di aynjel dehn da spirit ahn dehn dehdeh fi serv Gaad. Gaad di sen dehn fi help dehn wan weh hihn wahn sayv.