Read Belize Kriol Heebrooz 10 Bible Online

Heebrooz 10 - Belize Kriol bible

Heebrooz 10

¹Laik how di Laa weh Gaad gi Moaziz da-mi oanli wahn picha a di ting dehn weh mi fi kohn, ahn noh di reel ting dehn, di sakrifais weh dehn doz aafa yaa afta yaa, kuda mi neva mek dehn peepl weh doz kohn fi wership Gaad bee weh dehn sopoas tu bee.

²Now if dehn animal sakrifais kuda mi mek dehn peepl kleen fahn dehn sin wans ahn far aal, den dehn neva mi wahn feel gilti bowt dehn sin agen, ahn dehn neva mi wahn haftu aafa dehn sakrifais deh nohmoh.

³Bot insted, di oanli ting weh dehn sakrifais doz du, da rimain peepl a dehn sin evri yaa,

⁴kaa ih impasabl fi mek di blod a bul ahn goat tek weh sin.

⁵Dat da wai, wen Krais kom eena di werl, ih tel ih Faada Gaad seh, “Yu neva waahn no sakrifais, er no gif, bot yu mi mek Ah ga wahn badi.

⁶Yu neva pleez wid animal sakrifais er wen dehn aafa op eniting els fi dehn sin.

⁷Soh den Ah seh, ‘Si, Gaad, Ai kohn fi du weh yoo waahn, jos laik weh rait dong bowt mi eena di Skripcha.’”

⁸Fos, Krais mi seh, “Yoo noh pleez wid no animal sakrifais er no ada aafrin weh dehn bon pahn di alta fi sin,” eevn doa dat da weh di Laa weh Gaad mi gi Moaziz mi seh fi dehn du.

⁹Den Krais seh, “Si, Gaad, Ai kohn fi du weh yoo waahn.” Soh den, Gaad du weh wid di oal sakrifais dehn fi sin, ahn put weh Krais du eena ih plays.

¹⁰Weh Gaad waahn da fi mek wee bee hoali chroo weh Krais aafa op fi hihn badi az wahn sakrifais fi sin, wans an far aal.

¹¹Anda di oal agreement, aal di prees dehn doz stan op fronta di alta day afta day di aafa op sakrifais weh kudn tek weh nobadi sin.

¹²Bot wen Krais don aafa op jos wan sakrifais fi tek weh peepl sin fareva ahn eva, ih gaahn gaahn sidong pahn di rait han said[13] a Gaad.

¹³Ahn Krais deh rait deh di wayt til wen Gaad put aala ih enimi dehn anda ih fut laik wahn futstool.

¹⁴Soh aala dehn wan weh bilangz tu Gaad, Krais mek dehn bee weh dehn shuda bee, chroo di wan sakrifais weh hihn mek fi sin.

¹⁵Ahn di Hoali Spirit taak bowt dis tu wen ih tel wi weh di Laad seh. Ih seh,

¹⁶“Wen da taim kohn, Ai, di Laad, wahn mek wahn agreement wid dehn. Ah wahn put mi laa dehn eena dehn haat, an Ah wahn rait dehn pahn dehn main mek dehn aalwayz memba dehn.”

¹⁷Den di Hoali Spirit seh, “Ah noh wahn memba dehn sin ner aala di eevl ting dehn weh dehn du nohmoh.”

¹⁸Wen Gaad don fagiv peepl a dehn sin, no need noh deh fi no sakrifais fi sin agen.

¹⁹Soh, mi dyaa bradaz ahn sistaz, wi ku goh eena Di Moas Hoali Plays widowt frayd sayka weh Jeezas mi shed ih blod.

²⁰Dis da di nyoo way weh Jeezas oapm op fi wee chroo di kertn, weh da fi hihn oan badi weh hihn aafa op fi wee.

²¹Wee ga wahn grayt hai prees weh in chaaj a Gaad hows op da hevn.

²²Soh den, mek wi goh rait een tu Gaad di chros ahn wid wahn chroo haat; kaa wi eevl kanshans geh sprinkl wid Krais blod fi mek wi kleen eena Gaad sait, ahn wi badi geh wash wid kleen kleen waata.

²³Mek wi stan schrang ahn hoal aan tait tu di hoap weh wi seh wi ga, kaa wi ku chros Gaad fi kip ih pramis.

²⁴Ahn mek wi inkorij wan anada fi shoa lov ahn du gud.

²⁵Ahn noh mek wi mek it wahn habit fi noh meet tugeda laik weh som a dehn du. Insteda dat, wi shuda inkorij wan anada moa, now dat wi si dat di Day wen di Laad fi kohn bak di kohn kloasa ahn kloasa.

²⁶Kaa if wi kip aan di sin ahn sin afta wi don geh fi noa di chroot, den nohmoh sakrifais noh deh weh ku tek weh wi sin dehn.

²⁷Insteda dat, if peepl kip aan di sin laik dat, di oanli ting weh dehn ga fi luk faawod tu, da Gaad terabl jojment ahn di faiya weh wahn bon op aala dehn wan weh kohn gens hihn.

²⁸If too er chree witnis akyooz sohnbadi seh dehn brok di Laa weh Gaad gi Moaziz, den da persn ku geh put tu det widowt no mersi.

²⁹Wel den, tink da humoch wosa di ponishment wahn bee fi dehn wan weh stamp op pahn di Son a Gaad ahn chreet ih blod weh hihn shed az paat a di pramis laik if da sohnting cheep. Peepl weh du dat reeli insolt di Hoali Spirit weh bring Gaad mersi.

³⁰Kaa wee noa dat Gaad seh, “Ai wahn ponish peepl fi di eevl weh dehn du. Ai, di Laad, wahn pay dehn bak fi di eevl tingz weh dehn du.” Ahn wahn nada taim ih seh, “Di Laad wahn joj fi hihn peepl dehn.”

³¹Da wahn fraitnin ting fi faal eena di han a di livin Gaad!

³²Noh faget dehn haad taim weh unu gaahn chroo wen unu mi fos geh fi andastan di Gud Nyooz bowt Jeezas. Memba how unu mi stay faytful eevn doa ih mi meen seh dat unu mi wahn sofa sohn terabl ting.

³³Sohntaim dehn doz tek unu mek papishoh fronta evribadi, ahn sohntaim dehn doz beet unu. Sohn ada taim unu doz redi fi help owt dehn wan weh di sofa di sayhn ting dehn laik weh unu doz goh chroo.

³⁴Unu doz feel fi dehn wan weh mi eena jayl. Ahn unu mi kwait hapi eevn doa peepl mi teef evriting weh unu mi oan. Unu mi noa seh dat unu mi ga beta ting di wayt fi unu, ting weh wahn laas fareva.

³⁵Soh den, unu noh fi stap chros eena di Laad, noh kay weh hapm, kaa memba unu wahn geh wahn big riwaad.

³⁶Bot unu haftu heng een deh, soh dat wen unu don du weh Gaad waahn unu du, unu wahn geh weh ih pramis unu.

³⁷Da laik weh rait eena di Skripcha seh, “Jos wahn lee wail moa, den di Wan weh di kohn wahn kohn. Ih noh wahn tek lang.

³⁸Ai, Gaad, wahn aksep mi peepl dehn weh raichos sayka dehn fayt; bot Ah noh wahn pleez wid nobadi weh ton bak.”

³⁹Bot wee da noh peepl weh ton bak ahn den geh dischrai. Wee da peepl weh chros Gaad, soh hihn sayv wi.