Read Belize Kriol Heebrooz 3 Bible Online

Heebrooz 3 - Belize Kriol bible

Heebrooz 3

¹Soh den, mi bradaz ahn sistaz, Gaad kaal unu fi bee fi hihn hoali peepl. Tink bowt Jeezas, weh Gaad sen fi bee fi wee apasl ahn di hai prees weh wi seh wi bileev eena.

²Jeezas mi faytful tu Gaad, weh mi pik hihn, jos laik how Moaziz mi faytful eena how ih mi leed Gaad peepl dehn.

³Bot Jeezas dizerv moa aana dahn Moaziz, jos laik how di persn weh bil wahn hows dizerv moa aana dan di hows ihself.

⁴Kaa evri hows hafu ga sohnbadi weh bil it, bot da Gaad da di Wan weh mek evriting.

⁵Soh den, Moaziz da-mi wahn faytful servant oava Gaad hows, weh da Gaad peepl, ahn ih mi-di shoa aal weh Gaad mi wahn seh eena di fyoocha.

⁶Bot Krais, az Gaad Son, mi in chaaj a Gaad hows. Ahn wee da Gaad hows, weh da Gaad peepl, if wi kip op wi korij ahn ga kanfidens eena di hoap weh wi ga eena Krais.

⁷Soh den, jos laik weh di Hoali Spirit seh, “Tudeh, if unu yehr Gaad vais,

⁸unu noh fi haadn unu haat gens ahn, laik weh unu ansesta dehn mi du wen dehn ton gens Gaad eena di dezert, wen dehn tes Gaad payshens.

⁹Eevn doa dehn si weh aal Gaad mi du fi dehn, dehn tes ih payshens fi faati yaaz.

¹⁰Soh Gaad mi beks bad wid dehn ahn ih seh, ‘Unu aalwayz di ton weh fahn mi. Unu rifyooz fi du weh Ah tel unu.’

¹¹Gaad mi soh beks wid dehn dat ih pramis dehn seh, ‘Unu wahn neva goh eena di lan weh Ah mi wahn gi unu fi res eena!’”

¹²Mi bradaz ahn sistaz, unu kyaaful! Mek shoar dat unu haat noh geh soh eevl ahn ful a dowt, dat ih mek unu ton weh fahn di livin Gaad.

¹³Unu mos inkorij wan anada evri day, wail da stil “tudeh” soh dat sin noh fool non a unu ahn mek unu ton gens Gaad.

¹⁴Kaa if wi faytful tu di en, ahn bileev Gaad jos laik how wi mi bileev eena ahn schrang-wan fahn di biginin, wi wahn ga shayr eena aal weh bilangz tu Krais.

¹⁵Laik weh rait eena di Skripcha seh, “Tudeh, if unu yehr Gaad vais, unu noh fi haadn unu haat gens ahn, laik weh unu mi du wen unu ton gens Gaad.”

¹⁶Da mi hoo dehn peepl weh mi yehr Gaad vais ahn stilyet ton gens ahn? Da neva dehn sayhn wan weh Moaziz mi leed owta Eejip?

¹⁷Ahn da hoo da-mi di peepl dehn weh mi geh Gaad soh beks wid dehn fi faati yaaz? Da neva dehn wan weh mi sin ahn en op di jrap dong ded rait deh eena di dezert?

¹⁸Ahn da hoo Gaad mi-di taak tu wen ih vow seh, “Unu wahn neva goh eena di lan weh Ah mi wahn gi unu fi res eena”? Ih mi-di taak bowt dehn wan weh neva obay ahn.

¹⁹Soh wi si dat Gaad neva mek dehn gaan eena di lan, sayka weh dehn neva bileev ahn.