Read Belize Kriol 1 Peeta 1 Bible Online

1 Peeta 1 - Belize Kriol bible

1 Peeta 1

¹Dis leta da fahn mee, Peeta, weh da wahn apasl a Jeezas Krais. Ah di rait dis leta tu aala di peepl dehn weh Gaad pik weh di liv laik aylyan aal oava di ayrya weh dehn kaal Pontus, Galaysha, Kapadosha, Aysha ahn Bitinya.

²Gaad di Faada mi don pik unu weh da ih peepl fahn way, way bak, ahn fi hihn Spirit mek unu hoali. Soh, bikaaz a dat, unu obay Jeezas Krais ahn fi hihn blod mek unu kleen eena Gaad sait. Ah pray seh dat Gaad wahn shoa unu moa ahn moa grays ahn pees eena unu haat.

³Mek wi gi tanks tu Gaad, di Faada a wi Laad Jeezas Krais! Da bikaaz a fi hihn grayt mersi wai Gaad mek wi kud bee baan agen ahn ih gi wi wahn hoap weh alaiv sayka weh Jeezas Krais rayz op bak fahn di ded.

⁴Ahn soh wi di luk faawod tu di rich blesin dehn weh Gaad put op fi wee da hevn. Dis blesin wahn kyaahn ratn er spail er fayd weh.

⁵Ahn Gaad wahn protek yu wid ih grayt powa til yu geh dis salvayshan bikaaz yu chros eena ahn. Dis salvayshan wahn redi fi evribadi si pahn di laas Day wen taim en.

⁶Yu wahn glad pahn da Day, bot rait now yu hafu sad bikaaz a aal di chroblz ahn chraiyalz weh yu hafu goh chroo fi wahn lee taim.

⁷Dehn chraiyal da fi proov seh dat yu fayt da di chroo chroo ting. Eevn goal weh kyaahn laas, dehn tes wid faiya, ahn fi unu fayt wot moch moa dahn goal. Soh yu fayt haftu tes wid faiya soh dat ih ku laas lang. Den pahn di Day wen Jeezas Krais kohn bak, yu wahn geh prayz ahn gloari ahn aana.

⁸Aldoa yu neva si Jeezas Krais yet, yu stil lov ahn; ahn aldoa yu no di si ahn now needa, yu bileev eena ahn. Ahn eevn now yu noh ga di werd dehn fi eksplayn di grayt jai weh yu feel eena yu; dis da jai tu nohmoh nohmoh.

⁹Soh, di riwaad fi weh yu put yu fayt eena ahn, da di salvayshan a yu soal.

¹⁰Dis salvayshan da-mi sohnting weh di prafit dehn mi waahn noa moa bowt. Dehn mi prafesai bowt dis gif[1] weh Gaad mi waahn gi unu fahn way bak den ahn dehn mi saach fi fain owt bowt it.

¹¹Dehn mi-di wanda da wat di Spirit a Krais weh deh eena dehn mi-di taak tu dehn bowt. Ih tel dehn fahn bifoa ih hapm bowt weh Krais wuda sofa ahn bowt ih gloari aftawodz. Dehn mi-di wanda da wen aala dis wahn hapm ahn da hoo ih wahn hapm tu.

¹²Bot Gaad tel di prafit dehn seh dat weh dehn di rait bowt da noh fi fi dehn benifit, bot da fi unu. Dehn mi taak bowt dehn tingz weh now unu di yehr fahn dehn wan weh di preech di Gud Nyooz chroo di powa a di Hoali Spirit weh kohn fahn hevn. Dehnya da tingz weh eevn di aynjel dehn wuda laik fi noa bowt.

¹³Soh den, geh yu main redi fi akshan ahn kip yuself anda kanchroal. Set yu hoap pahn da speshal grays weh yu wahn geh wen Krais kohn bak.

¹⁴Obay Gaad bikaaz yoo da ih pikni. Noh goh bak goh liv dehn oal eevl way weh yu mi yoostu. Dehndeh taim yu neva noa no beta.

¹⁵Insteda dat, yu fi liv hoali eena evriting weh yu du, jos laik Gaad weh pik yu fi bee fi hihn pikni, bikaaz hihn hoali.

¹⁶Dat da wai di Skripcha seh, “Unu fi bee hoali, bikaaz Ai hoali.”

¹⁷Unu seh dat Gaad da unu Faada, bot memba seh Gaad noh ga no fayvrit. Hihn wahn joj yu er ih wahn riwaad yu bai weh yu du. Soh den spen di res a yu laif ya pahn ert di aana ahn rispek ahn.

¹⁸Unu noa seh dat Gaad pay wahn prais fi sayv unu fahn di wotlis way a laif weh mi paas dong tu unu fahn unu ansesta dehn. Ahn di prais weh ih pay da neva silva ahn goal weh kyaahn laas.

¹⁹Ih pay fi yu wid di preshos blod a Krais, di Lam a Gaad weh neva ga no sin ahn neva ga no spat er maak pan ahn.

²⁰Gaad mi pik Krais eevn bifoa di werl mi mek, bot now eena dehnya laas dayz, ih sen ahn da ert fi evribadi si. Ahn ih du dis fi unu.

²¹Da bikaaz a Krais unu ku chros eena Gaad. Ahn bikaaz Gaad rayz op bak Krais fahn di ded ahn gi ahn gloari, unu ku put unu fayt ahn hoap wid kanfidens eena Gaad.

²²Now, az bradaz ahn sistaz, yu ku ga chroo chroo lov fi wan anada bikaaz unu obay di Gud Nyooz weh da di chroot, ahn soh now unu kleen fahn sin. Soh si tu it dat unu reeli lov wan anada wid aala unu haat.

²³Unu baan agen chroo di Werd a Gaad weh alaiv ahn wahn laas fareva. Unu noh baan agen fahn wahn ma ahn pa fahn dis ert, bikaaz di laif weh dehn wahn gi yu wahn en op eena det. Bot disya nyoo laif wahn laas fareva bikaaz ih kohn fahn di Werd a Gaad weh alaiv ahn wahn laas fareva.

²⁴Di Skripcha seh, “Hyooman been da jos laik graas weh eezi fi ded; dehn gud luks fayd weh in no taim jos laik wahn priti wail flowaz.

²⁵Bot di Werd a di Laad wahn laas fareva.” Ahn da werd da di Gud Nyooz weh dehn preech tu unu.