Read Belize Kriol Di Revilayshan 11 Bible Online

Di Revilayshan 11 - Belize Kriol bible

Di Revilayshan 11

¹Afta dat, dehn gi mi wahn stik laik weh dehn yooz fi meja tingz wid. Den dehn tel mi seh, “Yu fi goh meja Gaad templ ahn di alta deh. Ahn yu fi konk di peepl dehn weh di wership Gaad eena ih templ.

²Bot yu noh fi meja di templ yaad, kaa da plays deh da fi dehn wan weh da noh Gaad oan peepl. Ahn da dehn sayhn peepl wahn mash Gaad siti anda dehn fut fi faati-too monts.

³Ah wahn sen too peepl weh wahn tel di peepl di chroot bowt mi. Ah wahn gi dehn powa. Dehn wahn wayr finaral kloaz mek owta krokos, ahn dehn wahn prafesai tu peepl fi wan towzn, too honjrid ahn siksti dayz.”

⁴Dehn too peepl da di too aliv chree ahn di too lampstan dehn weh di stan fronta di Laad weh di rool oava aal di werl.

⁵If sohnbadi chrai fi du dehn too peepl eniting bad, faiya wahn kohn fahn owta dehn mowt ahn wahn bon op di persn ahn dischrai ahn. Soh den enibadi weh chrai fi du dehn eniting bad, dat da how dehn wahn ded.

⁶Dehn too peepl ga powa fi hoal bak di rayn eena di skai soh dat di rayn noh faal joorin di taim wen dehn di prafesai. Ahn dehn ga powa fi mek di waata weh kohn fahn owta di grong ton tu blod. Ahn dehn ga powa fi sen eni kaina bad ting eena di werl, enitaim dehn waahn fi du it.

⁷Now den, wen dehn don tel di peepl Gaad mesij, di wail bees weh kohn fahn owta di deep deep hoal wahn kohn ahn fait dehn. Ih wahn ga vikchri oava dehn ahn kil dehn.

⁸Dehn ded badi wahn lidong eena di mayn schreet a da big siti[17] wehpaa di peepl mi kroosifai dehn Laad. Dehn wahn kaal da siti “Sadam”[18] er “Eejip.” Dat meen dat da siti da jos laik dehn.

⁹Aal kaina peepl weh kohn fahn owta aal di chraib ahn aal di nayshan dehn eena di werl, peepl weh taak aal di difrent langwij, dehn wahn tek chree an a haaf dayz fi paas bai fi luk pahn di ded badi a di too prafit. Ahn joorin da taim dehn noh wahn mek nobadi tek di ded badi dehn ahn beri dehn.

¹⁰Di peepl eena di werl wahn rijais wen di too prafit dehn ded. Dehn wahn selibrayt ahn dehn wahn gi wan anada gif, bikaaz di too prafit dehn mi mek dehn sofa tu moch.

¹¹Bot afta chree an a haaf dayz don paas, Gaad bloa laif eena di too prafit dehn, ahn dehn stan op. Wen aal di peepl si dehn stan op, dehn mi fraitn fi chroo.

¹²Den di too prafit dehn yehr wahn lowd vais weh mi-di kohn fahn owta hevn di tel dehn seh, “Unu kom op ya!” Ahn wail dehn enimi dehn mi-di luk pahn dehn, di too prafit dehn gaan op eena hevn eena wahn klowd.

¹³Jos den, wahn terabl ertwayk hapm. Wan-tent a di siti mi dischrai, ahn sebm towzn peepl mi ded. Di ada peepl dehn weh neva ded, dehn mi frayd bad, soh dehn prayz Gaad weh rool eena hevn.

¹⁴Di sekant chrobl don paas. Bot luk ya now! Di chrobl weh mek nomba chree di kohn soon.

¹⁵Den di aynjel weh mek nomba sebm bloa ih chrompit. An Ah yehr wahn lata vais eena hevn di hala haad seh, “Wi Laad ahn ih Krais,[19] ih ga di powa fi rool now oava di werl. Ahn hihn wahn rool fareva ahn eva!”

¹⁶Den di tweni-foa eldaz, weh di sidong pahn dehn chroan fronta Gaad, dehn get dong wid dehn fays tu di grong ahn dehn wership Gaad.

¹⁷Dehn seh, “Laad Gaad Almaiti, di Wan weh mi deh fareva, ahn weh stil deh now, wi tel yu tanks, kaaz yu di yooz yu powa now, ahn staat fi rool oava di werl!

¹⁸Di peepl weh da noh yu oan, dehn mi beks op fi chroo. Bot di taim now kohn fi yu shoa dehn dat yoo beks bad wid dehn tu. Di taim now kohn wen yu wahn joj dehn wan weh don ded. Da taim now fi gi aal dehn peepl weh mi serv yu dehn riwaad. Yu wahn riwaad yu prafit dehn, ahn aala yu peepl dehn, ahn dehn wan weh gi yu aana, dehn wan weh smaal, ahn dehn wan weh big. Ahn di taim now kohn fi dischrai dehn wan weh dischrai di werl!”

¹⁹Den di doa fi Gaad templ eena hevn oapm op. Ahn eensaid yu kuda mi si di hoali baks weh hoal di agreement weh Gaad mek wid ih peepl. Den Ah si laitnin staat tu flash ahn tonda staat tu roal. Den wahn big ertwayk shayk di ert ahn sohn big haylstoan staat tu jrap.