Read Belize Kriol Di Revilayshan 12 Bible Online

Di Revilayshan 12 - Belize Kriol bible

Di Revilayshan 12

¹Den op eena di skai Ah si wahn grayt sain weh mi schraynj fi chroo. Da mi wahn uman, ahn di son mi kova ahn jos laik wahn jres. Ahn di moon mi deh anda ih fut. Ih mi-di wayr wahn krong weh ga twelv staar eena it pahn ih hed.

²Di uman mi pregnant, ahn da mi jos lee bit a taim lef bifoa di baybi fi baan. Soh di uman mi deh eena layba payn ahn ih mi-di baal.

³Den Ah si wahn nada sain op eena di skai. Wahn big red jragan mi deh op deh, ahn ih mi ga sebm hed ahn ten haan. Ahn evri wan a ih sebm hed mi ga wahn krong pan it.

⁴Di jragan tek ih tayl ahn haal dong wan owta evri chree staar fahn owta di skai, ahn ih pich dehn dong pahn di ert. Den di jragan gaahn stan op fronta di uman, soh dat ih ku eet op di baybi sayhn taim wen ih baan.

⁵Wel, di uman ga wahn baybi bwai, weh wahn rool oava aal di peepl dehn weh bilangz tu aal di nayshan a di werl. Hihn wahn rool oava dehn nayshan wid wahn aiyan rad. Gaad mek wahn aynjel goh grab hoal a di pikni, ahn kehr ahn op tu Gaad wehpaat ih di sidong pahn ih chroan fi rool.

⁶Di uman ron eena di dezert da wahn plays weh Gaad mi don mek far ahn. Dehn wahn tek kayr a ahn deh fi wan towzn, too honjrid ahn siksti dayz.

⁷Den wahn waar brok owt eena hevn. Maikl[20] ahn ih aynjel dehn mi-di fait di jragan, ahn di jragan mi-di fait bak wid ih oan aynjel dehn.

⁸Bot Maikl ahn ih aynjel dehn win owt oava di jragan. Soh di jragan ahn ih aynjel dehn neva ga no plays eena hevn nohmoh. Dehn mi hafu lef deh.

⁹Soh Maikl ahn fi hihn aynjel dehn chroa da big jragan fahn owta hevn. Hihn da di oal snayk weh dehn kaal di devl, er Saytan, weh fool op aal di peepl eena di werl. Maikl ahn ih aynjel dehn pich ahn dong pahn di ert, wid aal ih aynjel dehn.

¹⁰Den Ah yehr wahn lowd vais di hala eena hevn seh, “Di taim wen Gaad wahn sayv ih peepl kohn now! Gaad wahn shoa ih powa ahn rool now ahn bee King oava aal di werl! Ahn Krais di Mesaiya weh Gaad sen wahn rool wid atariti! Kaa di wan weh doz stan fronta Gaad day ahn nait, di taak seh dat wee bradaz ahn sistaz du bad tingz, don geh pich dong fahn owta hevn.

¹¹Fi wee bradaz ahn sistaz dehn win owt oava ahn, bikaaz a di blod a di Lam, ahn weh dehn mi tel peepl bowt Gaad. Ahn pahn tap a dat, dehn mi redi fi ded fi Gaad if dehn mi haftu.

¹²Soh den, unu fi rijais, aala unu eena hevn! Unu fi bee hapi, aal unu weh liv deh! Bot ih wahn bee haad taim fi dehn wan weh liv pahn di ert ahn eena di see, kaa di devl kohn dong tu unu! Ih beks bad, kaa ih noa seh dat ih ga jos lee bit a taim lef.”

¹³Wen di jragan si dat dehn don pich ahn dong pahn di ert, ih gaan afta di uman weh mi baan di baybi bwai.

¹⁴Bot sohnbadi gi di uman too wing fahn wahn big eegl soh dat di uman kuda mi flai tu wahn plays eena di dezert. Ahn dehsoh dehn wahn ku tek kayr a di uman fi chree an a haaf yaaz. Ahn di jragan wahn kyaahn du ahn notn.

¹⁵Soh di jragan spit owt wahn lata waata fahn owta ih mowt; da mi laik wahn riva. Di waata rosh dong fi wash weh di uman.

¹⁶Bot di ert help di uman. Ih oapm op ih mowt ahn swala di riva a waata weh mi-di kohn fahn owta di jragan mowt.

¹⁷Kaaz a dat, di jragan mi beks bad bad wid di uman. Soh ih gaahn gaahn fait di uman ada pikni dehn. Dehn da dehn wan weh di du weh Gaad tel dehn fi du ahn weh bileev di chroot weh Jeezas tel dehn, ahn weh fala ahn.

¹⁸Den di jragan gaahn stan op kloas tu di see.