Read Benabena Galesia 1 Bible Online

Galesia 1 - Benabena bible

Galesia 1

¹Poluita nani aposolo bo nohugo yaꞌma bo moneuba noho melifiꞌehina yabe. To bonaꞌmagi liliꞌnaga meli neteꞌahana yabe. Yesu Kilisito to aimo filiꞌehinaguti leꞌmo ho tiꞌehina bouba, afotifu Huꞌma yaꞌma aiꞌa kagaꞌalo aposolo lolo huꞌohuna yabe.

²To nani nalaluꞌnigihi lugaꞌa maga nehanaꞌa enali hiti moneka nohutoti yaꞌma Yesuhi nagaꞌa Galesia metoga minete biꞌahana bonaꞌi lenali fayahi yaꞌma koyoto nolepunagihe.

³Afotifu, Huꞌmau to Sipi Boti Yesu Kilisito aitogati leheꞌmoseꞌna hiti fulunaꞌa hiti lenalitoga minomo tito mineno.

⁴Yesu ai afotifu Huꞌma ai kagaꞌalo yaꞌma ho tilina kanaꞌalo foipanauba leleꞌmo sibina nohinogo gulu ho letalinaꞌmu yabe luto lali foipanatiꞌmu yabe luto yaꞌma aiꞌa gufaꞌa hꞌemiꞌehina yabe.

⁵Ya huꞌehinaꞌmu Huꞌmamofihi giꞌamu fokehi liba liba huto mino lito buto minalibe. Maꞌnaka. Ka lamanaꞌa fatoꞌi mone meniꞌibe

⁶Lenali yaꞌma Kilisitohi leheꞌmose nasanagu molo emilabe luto elesa molo epiꞌehina bomofitoga mino hepi bati hite meminese lenemegesa hi emilete fato monolugu yaꞌma bite lenegekesa melete kehelilata nehabe. Nani yaꞌmu yaꞌma nehanaꞌamu topa hoto oho luto nolu lepolobe.

⁷Ka lamanaꞌa yaꞌma fato fato ka meniꞌinaya faꞌmene bonaꞌi lugaꞌamagi Kilisitohi kaꞌa yaꞌma li sibina hilupi lite fato mono ka lu lepite komopatini li sibi sibi hite yamofihi suhi hilata nehabe.

⁸Nanifi to kokulumaguti agelo moneubafi ka lamanaꞌa afehaꞌalo lu lepiluta logo hepalugu nagaꞌi lolo hilutaꞌaloko niꞌibe.

⁹Yaꞌma kaga koyapaꞌi luꞌohuta anaꞌago akuꞌi nolube. Moneꞌamagi yaꞌma ka lamanaꞌa afehaꞌalo lu melepiꞌahanamo lu sibi hite fatoꞌmofihi lolo hite lu lepilana yaꞌma logo hepalugu nagaꞌi lolo hilanaꞌmu yabe luto akuꞌi yaꞌma nolube.

¹⁰Ka noluna yaꞌma bonaꞌmagi bu gete lagaꞌa kehelilabe luto nolufihe? Oꞌe. Huꞌmau aiꞌa bu genogo bati hilibe luto yaꞌma nolube. Nani yaꞌma bonaꞌmagi nani kumu kehelinogo tilibe luto foya yaꞌma nolufihe? Oꞌe, to nani bonaꞌmagi nani kumu laga epesilinaꞌmu sa sa nohufiye? Oꞌe, Yaꞌma hutita Kilisitohi kele kele boꞌa lolo huto meminotitaꞌmu yabe. Polu aposolo lolo huꞌehinamofihi hapaꞌa

¹¹Nalaluꞌnigita nani yaꞌma kaga lu lepilugi kehelilo. Ka lamanaꞌa lu lepiꞌohunamo yamofihi bonaꞌmagi enegekesa kehelite yamofihi li huto hiꞌahana meniꞌibe.

¹²To melugu bonaꞌmagitogati meliꞌohube. To bonaꞌmagi menelepiꞌahana. Yesu Kilisitou aiꞌasigo lu hokolo huto huto lu nimiꞌehinamo niꞌibe.

¹³Nani koyapaꞌi Yuta bo nohuto lali folagahatigu minoto anaꞌina lolo huto moloto huꞌohunaꞌa alu lepugo keheliꞌahabe. Nani yaꞌma komopaꞌni uleꞌale huto Yesuhi kaꞌa keheliꞌahana bonaꞌi kalanaꞌi molo epoloto enahalube luto enoho lifi heꞌmito eneleꞌmo sibina sabana huꞌohunamo niꞌibe.

¹⁴Yuta yagapanaꞌi nafaluꞌnigihi enebe ligito itoꞌnigihi afoꞌnigihi to tatatigihi kaꞌani yaꞌma limi lalibe luto ana kauba amuya moloto minalibe luto luloto yaꞌma amuya moloto ya hulata huꞌohunamo niꞌibe.

¹⁵Ya hulata huꞌohunamoya Huꞌmau aiꞌa yaꞌma afehaꞌaga itoꞌnifihi ipagu nohugo bu goloto mehi nimito neleꞌmo eto huloto aiꞌa foyaꞌa lilube luto elesa molo nimiꞌehinamo niꞌibe.

¹⁶Elesa molo nimiꞌehina yaꞌma keheligo tigo kaꞌa yaꞌma fegutoga bonaꞌi enalitoga ka lamanaꞌa lu yege hoto yaꞌma luto lu hofa talane luto panaꞌamofihi hapaꞌa lu huto huto nelepiꞌehina. To ya huꞌehinaya ana kagamuꞌi yaꞌma nani fatoꞌi lu nimilo luto bonaꞌmagihi suhi lolo huto loka meho epoloꞌohunamo niꞌibe.

¹⁷To Yelusale hepatoga aposolo kohe tete lolo hite mineꞌahanaꞌa bu enagalube kagamuꞌi enoloka halube luto metiꞌohunamo niꞌibe. Anaga mebuse ka meꞌi mone Alebia metoga fotoga buto minoto i behe huto Tamasiko hepatoga buto nehetiꞌohuna.

¹⁸Nehetito nohugo yalo kufu kana loebe monebe nobigo Pitahi bu galube luto Yelusale hepatoga nehetugo ai hiti loe salelegu minoꞌohuꞌina yabe.

¹⁹Ya huto nohuꞌigo aposolo bo lugaꞌa bu meenogobe. Sipi Bomofihi gonaꞌa Yemesihi yaꞌma aigo bu goꞌohuna yabe. Yana bonaꞌmagi aposolo neleꞌmo ho metiꞌahanagi Huꞌmau aiꞌago neleꞌmo ho tiꞌehina.

²⁰To yaꞌma nolunaya mone faga menolube. Yaꞌma fayahi nokoyona Huꞌmamofihi bulo lamaꞌnaka luto fayahi nokoyobe.

²¹Yelusale hepatoga ya huto minolotoꞌni yaꞌma Silia metoga to Silisia metoga yaꞌma buto minoꞌohuna yabe.

²²To Yutia melugu Yesuhi panaꞌaloboꞌa yaꞌma nogokabalo bu megeꞌahana yabe.

²³Enali yaꞌma bonaꞌi lugaꞌamagi kagꞌa lago yaꞌma lite keheliꞌahana: Kalanaꞌi molo letoto lohoto ho lifiꞌehina Yesuhi ka li sibina hilube luto huꞌehina bomo akuꞌi i gelehe huto bonaꞌi yaꞌma Yesuhi ka lamanaꞌa lu noepibe.

²⁴Ya lite lilete yaꞌma hapaꞌa kehelite nani kumu yabe lite Huꞌmamofitoga fokehi hete enegelo hiꞌahanamo niꞌibe.