Read Benabena Taitasi 1 Bible Online

Taitasi 1 - Benabena bible

Taitasi 1

¹Poluita nani Huꞌmamofihi koko panaꞌa Yesu Kilisitohi aposolo bo neleꞌmo ho tiꞌehina. Ya huꞌehina Huꞌmau eneleꞌmo eto huꞌehina bonaꞌi enali aimo agoya hu emilabe luto eneheꞌmobo luto to lali monoꞌmofihi ka lamanaꞌa kapogu eneleꞌmo keheli bati hino luto yaꞌma foyaꞌmu neleꞌmo ho tito noho lifiꞌehina yabe.

²Nani ka lamanaꞌamofihi hapaꞌa ma luto niꞌibe. Huꞌmau faga meluse bomofihi koyapaꞌi meꞌi hiti kokuluma hiti huto mehuꞌehina kanaꞌalo yaꞌma amuya lemehi fi hetofa hu letalube luto mino kosaba huseꞌna lelepito luꞌehina fifa ito minolata nohune.

³Ya kagamofihi Huꞌmau yaꞌma kanaꞌamu keheligo bati hulago ai kaꞌa lu huto nehago leꞌmo huto huꞌehina. Huꞌmau lubuto bilata bouba ana foyalo neleꞌmoto kaga lu molo netoꞌehinaꞌmu ana kaꞌa lu yege hoto minolata nohube.

⁴Taitasio, lusi panaꞌni kai hiti nani hiti moneko monoꞌi keheli emito minoꞌohuꞌinamo niꞌibe. Kai yaꞌma fayahiya koyoto nokumuna kehelibo. Afotifu, Huꞌmau to Yesu Kilisitou lubuto bilata bomofitogati leheꞌmoseꞌna fulunaꞌa hiti kaitoga mineno. Kiliti metoga Taitasiu foya lito nominanamofihi kaꞌa

⁵Foya nekisaꞌa niꞌinamofihi li bebe soto li baga ilane luto Kiliti metoga noheꞌmi ketoto foyagaꞌya ya luto lu ketoꞌohunamo niꞌibe. Kai asaga nohi hepalugu mono kaba bo olopa bonaꞌi lugaꞌa eneleꞌmo bo tilane. To yataꞌa ka lu kimiꞌohunamofihi beto hubo.

⁶Olopa bo moneubafi moneuba foipanaꞌa meniꞌilina to aꞌi monekoꞌi liꞌehilina. To ai yagapanaꞌamagi Kilisitotoga agoya hi emiꞌehilana, to heꞌmi hale hilana to kegeiyoꞌnaꞌa meniꞌilina enali bati hite nehilana bonaꞌmagi kehelinogo afoꞌanifihi bati huto leꞌmalane.

⁷To Huꞌmamofihi foyaꞌalo kaba huto nominalina bo ai foipanaꞌa meminenogo minalibe. Ya huloto minoto hipu hapu meilina to meleꞌisi enipakafa mehalina, to bai nagamiꞌi babu luto menalina, luba mehilina, to yogo feꞌno kumu ekesa yigi yigi huto muhi muhi bilina bo meminalibe.

⁸Ya huloto bonoho bonaꞌi eꞌehinogo mehi epito eneleꞌmo malalina, to asaga hetofanaꞌmufi lamanaꞌamufi laga besilina to komopaꞌa gulu gulu linogo minalina, to hapaꞌamuꞌi fu lina bo nohina to komopaꞌa hiti gufaꞌa li bati huto kaba hilinaꞌmu yabe.

⁹Ya huloto lu epi epi nohuta kagamofihi lali kehelutogo uleꞌale nohina kaga yaꞌma li pili koto liloto minalibe. Yaꞌma bouba ai fato bonaꞌi eneleꞌmo hetofa hinogo mono ka legeyaꞌa lamanaꞌa yaꞌma lu epito enegekesa lito eneleꞌmo bati hilibe. To bonaꞌi lugaꞌamagi mono ka enemegesa hu epite nehinogomo yaꞌma kaba bouba enaliꞌi foipanaꞌanimofihi enelepito oꞌe luto ya mehilo luto eneleꞌmo bati hilinaꞌmu yabe.

¹⁰To bonaꞌi lugaꞌamagi yege yegeꞌi ka lamanaꞌa lu epiꞌohutaꞌmu enipakafa nehabe. Faꞌmene kamuꞌi li muyalo malo hite enimiꞌi mololata bonaꞌi nehabe. Yuta bonaꞌi enalitogati Kilisitohi ka lamanaꞌa keheliꞌahana bonaꞌi moneꞌamagi aku i behe hite fato kaga enelepite minete lite ya hilata nehabe.

¹¹Ya hilata nehana bonaꞌi enali fala kite yogo feꞌno kumu yabe lite sefeyehena nasanaꞌmu fi lehe talune lite kehelite bonaꞌi lugaꞌamagihi lihaꞌani yagapanaꞌani eneleꞌmo sibina hilata nehanamo niꞌinaya kai lu laga lu epolobo.

¹²Yaꞌma Kiliti melugu nehana bonaꞌi enalitogati ka hapaꞌa keheli fotogo luꞌehina bo moneuba ma luto luꞌehina: Kiliti bonaꞌi enali yaꞌma fagalo bo lubalo kala legi noseꞌnamu yagauba nohina suhi lolo hilata nehanamofihi faꞌmene fuli minete noseꞌna neba neba nehana liliꞌnaꞌmu koseleꞌi enoholata nohina bonaꞌi nehabe.

¹³Nani yaꞌma kagamuꞌi nokehelugo lamanaꞌa lolo hibe. Yaꞌmu ka babu luto ka epekito enegekesa linogo keheli bati huse kaꞌa yaꞌma ho ti fefe luto minelenogo,

¹⁴to Yuta bonaꞌmagihi kilihe ka faꞌmene ka yaꞌma mekehelilo luto lu epilo. To faꞌmene bonaꞌmagihi kaꞌani lamanaꞌamofihi enemegesa hu emilete faꞌmene kaga lu laga hiꞌahanamofihi mekehelilo luto lu epibo.

¹⁵Komopaꞌani fana tago nehanamagi enali anaꞌinaꞌmu keheligo gulu gulu ligo neminabe. To lugaꞌamagi ka lamanaꞌa keheli meemiꞌahana foipa nasanaꞌmu enegekesaꞌanigu hiti komopaꞌanigu sifolohi gito kolota kolota huꞌehinamo yanaꞌmu enali anaꞌinaꞌmu keheligo ana suhi huto sifolohi gito kolota kolota higo nehabe.

¹⁶Enali Huꞌmamofihi hapaꞌa keheliꞌohune lite enabagaguti lilata nehanamo niꞌinaya ya hite minete lite nehananauba yaꞌma luto lu huto hulata nohina legeyaꞌa meniꞌibe. Enali tuguma bonaꞌi nehana sipi foipanamofihi kaꞌani mekehelise nehana enali foya lamanaꞌa lilanaꞌa meniꞌibe.