Read Berik Markus 13 Bible Online

Markus 13 - Berik bible

Markus 13

¹Yesus Jena Uwa Sanbagirmanaiserem jewer safe gemer totinyelem, angtane daamfenna Jei aa jei ne tikwebaatinennerem Yesus ga aa bala, “Guru, gwanan tuna unggwan-gwana aaiserem jese damtabi! Je waakenfer ge falbili, ane jem ja mese waakenfer ge tenbili!”

²Yesus angtane jeiserem ga bala, “Aamke jena unggwandwasusu aaiserem ke ijes gaarabili? Ton-giri daamfenna afa fas jam falnteyan ton-giri afweraiserem jem sagabe. Ton-giri je seyafter je sege kwirwebitisi, ane onnap ga sege janbisi.”

³Yesus taarenap ga sofna, taarentumu jeiserem bosna ga Saitun. Jes jepserem jep ga aa nwini, Jena Uwa Sanbagirmana ga jem jitefwer fitna. Petrus, Yakobus, Yohanes ane Anderyas jei Yesusminip ga aa ge jalbili, Yesusfar jenfentowai ga aa ge nasbawena. Jei Yesus ga aane tenebana,

⁴“Uwa, gwanan ap se bilipmi, taterisi Ijes bilirim ga fonggalabar se etamwesa? Ane ai bagal bwembwema asa domolsa seyafter aaiserem aa gam etamwesaram?”

⁵Jepga Yesus ga aa tamawolbaabili, “Ga samem-samem jega angtane nensa is jam ne afaf-afaftababiyen.

⁶Angtane unggwanfer jei sege forobisenye bosna Amnaiserem jeme. Ane jei aamei ga isene afaf-afaftababisi, jei enggam jam gam gutenaram, ‘Aiba Angtane Uwa Sanbagiri Jei bunarsus aa Jes balam Jam baftanaf enggalfe angtane gam waakentababisif, aiba jesam.’ Ane jei angtane unggwanfersus sene afaftababisi.

⁷Aamei taterisi jam isa sarbabisneneiserem angtane im gwetmanabe jam sege erabasaram. Ane aamei gamjon ula isa sarbisisi angtane im bijauwer aa jei ge nwinbenerem jei ga sege erabasa. Aamei taterisi seyafter jeiserem ijeba sarbisirim, safnant aamei ijama ereyen jeiserem jem temawer. Seyafter jeiserem se etamwesa, jengga nunu apgal jigal seyafter gemerserem jem ge barwebiliserem je gemerje jam falyan.

⁸Anggwabura afwer jei anggwabura afweraiserem jebar sege erabasa, ane negara afwer jei negara afweraiserem jebar sege erabasa. Ogiribe aaiserem ga sege etamwebisi: Ginirdusa se gwesa ona nafis-nafsiserem jebe. Angtane wisi sege folbamisi, aam temawer tumilgal mese onnap teneserem sege asobisi. Seyafter jeiserem ga jafner towaiwelaiserem tamtamtala angtanemana jeiserem, wini tanna jam gerala jepserem, jei sigini nabal-nabalsusu jena gam gam enolaram jes galserem.

⁹Aamei ina ga waakenfer isa gaaramisnenne, aam temawer aamei galap isene tebabisi, ane ga isene aftabifelse angtane sanbak-sanbakaiserem jem tarnabe. Angtane nafsi ga isene saftabasa, jena angtane Yahudimana aa jep ge betwebuwefaram jep. Ane aamei isene aftabifelse angtane sanbak-sanbaka afweraiserem jemnip ane raja-rajaminip enggalem temawer, aamei Ai As ijewera tikwebaatinirim. Jeiserem ga waakensusu, aam temawer jes jepserem aamei ga dwena jep isa domola taterisi Am temawer jebe ga isa nasipmini.

¹⁰Gwanan Taterisi Waakena Uwa Sanbagirmana jamer sene nasibenenne anggwabura seyafter gemerserem aa jei ge nwinbenerem ogiri aaiserem jebe.

¹¹Aamei is jam sene tebabisirim, ane ga isene aftabifelse angtane sanbakem tarnabe enggalfe aamei is gam ne teneba-tenebaabuwef. Jengga jei nalef is jam ne aftabifelyen, aamei ijama ereyen ijesa nasbiliserem jem temawer. Jeter isa biltena ula Uwa Sanbagiri ijes golminirim, aam temawer jeke aamei isa nasowena, jengga Mafnana Uwa Sanbagirmanaiserem Jei aamei ula ip ga is Jei se golmini aamei ijesa nasbiliserem jemnibe.

¹²Jepga isa anggasa ayana jei osona jena gam gera jam ne munbofe. Osona jei ayana gam gera, jeta tane jemna gam gera. Ane tantantane jegme ene jeta gam nasmini, ga gam dete jam ne munbobife.

¹³Angtane seyafter gemerserem aamei isene nasbabisi kakalmer, aam temawer aamei Ai As ijewera tebanaram. Jengga angtane Ai kanaufer As jei tebanaram jamere nunu Uwa Sanbagiri aa jep bilirim jep se falsa, angtane jeiserem ga jes waakentaasisi.”

¹⁴Yesus gamjon ga balbabili, “Aamei angtane galap isa damtasa, jei Jena Uwa Sanbagirmanaiserem jep se fisa. Angtane jeiserem enggam ga sene jenbebuwena ‘Kabwaksusu jei Tamtamtababiliserem’. (Aamei angtane aaiserem ijeya gerabistenaram, waakenfer isa sarbili!) Jepga angtane ona Yudeya je aa jei ge nwinbenerem, jei otumup sege nunggirbese.

¹⁵Jes jepserem angtane jelem ja sitawer aaiserem, jei gamjon jam ge kabwiteyan jelem jenabe enggalfe, galgala jam ne kitultaabonfe mwonawer, aam temawer jei tatarfer gam ge nunggirbef.

¹⁶Ane angtane awelna makanap gwebiliserem jegme gemer. Jei gamjon fas jam warauyan enggalfe fene jam ne kitultefe.

¹⁷Jes jepserem jam aa jep etamwesaram, wini udanabaraiserem ane wini tanna momem taayiniserem, jei kabwaktala unggwandusa ga sene domolsa.

¹⁸Aamei sembayanga Uwa Sanbagirfe gamjon jam isa gwebabana, jega aamei ijama nunggiryen nunu angtane jem ge wofobiyeneiserem. Nunu jeiserem ga aas: nunu gwere kabwakfer jem gam fertenerem, nunu arouwa uskambar aa jem gam nyenaram, ane deye wisimi aa jem gam falaram.

¹⁹Sembayanga jes gemerserem ga gam isa gwebabana, aam temawer jes jepserem angtane tamtamsusu sene domolsa, gwananmana jepserem jepyan. Gwanan jepserem Uwa Sanbagiri seyafter gemerserem aa galap eyebaabilim jamer namwer aas jepserem, tamtamsusu jes galserem fas. Ane jeiserem jamer taban, gamjon jes galserem jam etamweyan jamer abak-abaksus.

²⁰Jengga Uwa Sanbagiri mes toforolsini nunu jem tamtamuluserem. Afa Jam toforolsiyeneye, angtane seyafter gemerserem futu. Jengga Jei nunu jeiserem mes toforolsini, aam temawer jei angtane Jelemanaiserem jes nesiktababili, angtane Jei aa jes destabaabilirim enggalfe Ai As jei ne tebaf.

²¹Jes jepserem afa angtane aamei enggam is jam sene balbabisirim, ‘Se damta! Mesias, Angtane Uwa Sanbagiri bunarsus aa Jes balam Jam baftanaf enggalfe angtane gam waakentababisif, Jei aare!’ afa angtane nafsi jei enggam sege gubisirim, ‘Imsa damta! Jeiba jesam!’ angtane jeiserem ijama sarbabiyen!

²²Taterisi jemnaiserem ijama tebabiyen, aam temawer angtane ol kapkaiserem jei sege forobisenye, ane ga sege gubisi, ‘Aiba Mesiasam.’ Ane nabi ol kapkaiserem jei sege forobisenye. Ane jei tandana ane bwembwema ga sene eyebaabisi enggalfe angtane gam ne afaf-afaftababif, jega enggalf jei gam ne tikwebitif. Ane jei angtane Uwa Sanbagiri aa jes destabaabilirim, jei ga jes ne unggwasbaabif jam afaf-afaftababif enggalfe jei taterisi ol kapkaiserem gam ne taabif.

²³Ga jem temawer, aamei ina waakenfer isa gaaramisnenne, Ai As imsa sarbasini! Ai gwanan aamei isa mesam towas-towastababili taterisi jeiserem jem temawer, jega taterisi jeiserem nalef jam etamweyan, aamei towasmer gam isa nwini.”

²⁴Yesus gamjon ga balbabili, “Abakefyan nunu jem tamtamuluserem aa tabanwenaram, nunu jeiserem aa jep falsaram, gwere je gwin se etamwesa, jem muar mese nafa fas.

²⁵Ane matona winsiwer ga sege janbisinye, ane winsip seyafter gemerserem ga sege gin-ginwebisi.

²⁶Jepga angtane jei ga Ai Tane Angtanemana, ga Asene damtasa. Ai winis sinsinibaner As iresanya, nafabaner ane baabeta unggwandusaiserem jeme.

²⁷Ane jepga Ai malaikata Amna gas baftabisi enggalfe, jei angtane Uwa Sanbagiri aa jes destabaabilirim jei ga sene dupdupbulsisi. Malaikata jeiserem jei angtane ga sene dupdupbulsisi ogiri seyafter gemerserem jewer, ane winis seyafter gemerserem jewer.”

²⁸Yesus gamjon ga balbabili, “Au, ara tini sa gaarabi, ane taterisi Amna sa sarbisi! Afa tirni ikikini, ane ese jemna jam negma domolaram, nei ga negma towaswena ossana babitsim gase fala.

²⁹Ga gemer jes gemerserem aaiserem jegme gemer: Afa aamei taterisi Ai Ajes nasbilirim jam isa damtabisirim jam sege etamwebisirim, aamei ga isa towaswesa enggame Ai babitsim As fortya.

³⁰Ai bunarsusfer ims towas-towastababili, angtane namwer aa jei naawenaram jei nalefe jam ge terbiyen, taterisi aaiserem seyafter gemerserem Ai Ajes nasbilirim ga sege etamwebisi.

³¹Winsi yo ogiri aaiserem je sege barwesa, jengga taterisi Amnaiserem je jam barweyan.”

³²Yesus gamjon ga balbabili, “Nunu yo jema Ai Tane Angtanemana, Ai Ajem forolaiserem, nunu jeiserem angtane jei jam ne towaswebiyen. Malaikata taman waaken-girip jeiserem, jei teisyena. Ai Tane Uwa Sanbagirmana, Ai teisyena. Jengga tousa ga Uwa Sanbagiri Jenfentowai.

³³Jega jem temawer, aayai samem-samem, aamei ina ga jeber-jeber ga waakenfer isa gaaramisnenne! Aamei seyafter teisyena nunu Ai gamjon Ajem foryalaiserem.

³⁴Nunu jeiserem ga enggam: Angtane bijuap jam sofwela gamserem, angtane jeiserem nalef jam sofweyan, jei gwan ga angtane awelna jemnip aa jei gane gwebilirim ga jes gam jenbebili enggalfe, awelna gam syenulmif. Jei angtane jeiserem daamfen-daamfennem gam balbabili jei aa jes ne eyebaabiliserem. Angtane pintunu jei gerebaasnennerem, angtane jeiserem bala, ‘Aamei ijam tayan!’

³⁵Aamei mese ijama tayan, aam temawer aamei teisyena jena jemanserem fonggalabar se fortya, ke dafef, afa ke gwini nenennap, ke jema ayang giri aa jep gam gunurum, ke gwinibenersus.

³⁶Enggam kapka, afa Ai aafer-aafer As warautnaram, ga isAs damtabitye aamei nus is tana.

³⁷Ai is Agemer balbabilirim, Ai angtane seyafter gemerserem jep As balbabili, ‘Ijama tayan! Aamei jeber-jeber waakenfer ga jam isa gaaramisnenne!’ ”