Read Berik Markus 15 Bible Online

Markus 15 - Berik bible

Markus 15

¹Gwinibenersus angtane imam-imam sanbakaiserem, ane guru-guru Hukumu Nabi Musamana aa jei ne towas-towastababuwenaram, ane Safna Angtane Yahudimana Sanbak-sanbaka Seyafter Gemerserem, angtane jeiserem seyafter gemerserem tatarfer ga aa ge betwebili, ula ga aane mwangbisini Yesusfe jes ne eyebife. Jei Yesus gane taferna, ga aane aftafala, Gubernur Pilatusfe ga aane gerbana.

²Pilatus Yesus ga aa tenebana, “Aamke anggwabura Yahudimanaiserem jem Raja?” Yesus ga tamawolbana, “Ba gamam, iner imsam gutena.”

³Jepga angtane imam-imam sanbakaiserem ga aa ge gubili, Yesus Jei etam-etama kapka anesus aa jes eyebilirim.

⁴Pilatus Yesus gamjon ga tenebana, “Aamke Ijam tamawolyan? Aamke Imes towaswel angtane aaiserem jei enggam ge gubili Aamei etam-etama kapka anesus Ijes eyebili?”

⁵Jengga Yesus Jei taterisi Pilatusmana afa fas Jam tamawolbiyen, ane Pilatus ga jam bitbitwena.

⁶Tahunu jeber-jeber nunu unggwandusa bosna masar Paska, Pilatus jei angtane bwiyip aa jei gam nwinirim ga jem aftabunnuwefa. Angtane unggwanfer jei aa jes gane destabanaram jam aftannufe, Pilatus ga angtane jeiserem ga jes gam aftannu.

⁷Jes galapserem angtane aasaje bosna Barabas aa jes ne tebanaram, ane bwiyip ga aane gaataantena. Barabas jeiba angtane daamfenna angtane unggwanfer aa jei ge erabawenaram jemniwer, ane jei angtane aasaje jei ne munbono.

⁸Nunu jes jemserem angtane uskambar ga aa ge forobitye, ane Pilatus ga aane tenebana, “Aamke samfer angtane kapkaiserem is aftannu, aamei gwanan jeber-jeber igemer eyebuwenaram?”

⁹Jepga Pilatus ga tenebaabili, “Aamei ifoma gunu? Aike Raja anggwabura Yahudimanaiserem ip ke isa ajes aftamunnuf?”

¹⁰Pilatus game aa jewer tenebaabilirim, jei ga aam temawer tenebaabili, jei fwater towaswena angtane imam-imam sanbakaiserem jei Yesus enggalem temawer ne gera jei Yesus jam ne uskamswebana.

¹¹Imam-imam sanbakaiserem jei angtane seyafter gemerserem jep aa jei ge fibilirim ga enggam ne balbabinenne, “Aamei enggam isa balbabili, ‘Barabas is aftannu!’ ” Ane angtane seyafter gemerserem ga aa ge balbabili, “Barabas tefner sa aftannu!”

¹²Jepga Pilatus ga tenebaabili, “Afa ai Barabas as aftannurum, ai ga basas eyeibene Angtane aaiserem aamei ijesa jenbewenaram Raja anggwabura Yahudimaneme?”

¹³Angtane seyafter gamjon ga aa ge tetenbili, “Ti salibip sa daktanswe, jamer futu!”

¹⁴Pilatus ga tenebaabili, “Jeje bafa? Angtane aaiserem Jei kapka fwersa gam eyebili?” Jengga seyafter gamjon ga aa ge tetenbili uskambar, “Ti salibip sa daktanswe!”

¹⁵Pilatus jei angtane unggwanfer jeiserem ini jemna gam saaser-saasertabaipmif, jega jem temawer jei Barabas ga aftamunnu jebe. Ane jei Yesus ga gaarmini jam ne safsaftafe bana utuboroserem jeme, ane jam ne daktanswef ti salibibe, jamer futu.

¹⁶Jepga ginanggwa Gubernurmana Yesus ga aane aftafala jadusa Gubernurmanaiserem, tampata ginanggwamanaiserem jem gwetmanabe. Ane ginanggwa seyafter jep gemerserem ga aa ge betwebili Yesusem tarnabe.

¹⁷Ane jei fene berbere sagamana Yesusfe ga aane doksobaaniwili. Fene bwalna jeiserem raja aa gala gam kamwiwenaram. Ane jei newa utuboro ga aane egwaisona topini gamserem, ane newa utuboro jeiserem ga aane gwelebatena Yesusem dukabe, topini raja aa gala gam gweltowenaram.

¹⁸Jepga ginanggwana jei ini kabwakmer Yesus enggam ga aane bala, “Samfer, Raja anggwabura Yahudimana!”

¹⁹Jepga jei duka Yesusmana ga aane safsafulbono komol boromemme. Ane jei maka ga aane sirbesiwena. Jepga somwan dumem ga aa ge nwinbitena, Yesus akar-akarem ga aane pujitene.

²⁰Jei jam aa ge tabanwebilirim Yesus jam ne bisobalabe, jepjon ga jei fene bwalna berbereiserem ga aane soksobaasiwili, ane fene Jelemana gwanan aa jes ne soksobaasinirim, fene jeiserem gamjon ga aane kayimbene. Jepga Yesus ga aane aftafala kota sitawer jam ne daktanswena ti salibibe.

²¹Yesus aa galap ne aftafalaram, nelep jes jepserem jei ga aa ge dorwebili angtane kota Kirenemanaiserem jebar. (Bosna jemna ga Simon. Jeiba uwa Aleksander ane Rufus jemnam.) Jei onnawer fortya, ane jei safe kotanabe aa gemer kautenaram, ginanggwa Simon ga aane tergenbana salibi Yesusmana jam sutunbofe.

²²Yesus ga aane aftafala jamer tamna bosna Golgota, afa bosna afwer ga enggam “Tamna Dwak Otam”.

²³Jes jepserem jei angguru mur obatabar dupdupbuluserem Yesusfe saf jes ne gulbaf, jengga Yesus Jei baif gwebil fo angguru jam telbife.

²⁴Yesus jepga aane daktanswena ti salibibe. Ane ginanggwa jei undiana tuna bastantouya galserem ga aane jejetana enggalfe, fene Yesusmana jem gam ne syenulbof.

²⁵Nunu jeiserem jeme, jema ga sembilan Yesus ga aane daktanswena ti salibibe.

²⁶Salib sagabe tulisana ga jep ne baatultena. Kapkaiserem aa jes ne bilibenerem Yesusem temawer jei ga enggam jep ne tulistaabili, RAJA ANGGWABURA YAHUDIMANA.

²⁷Jep ga angtane komkoma nauraiserem ga Jebar ne daktabaabunwena ti salibibe, afelna Jem taasfolawer, ane afelna ga Jem gwejawer. [

²⁸Jei game aa jewer ne eyebilirim, jega enggalf etamwena taterisi aa jes tulisulum Taterisi Uwa Sanbagirmanaiserem jebe gam tabanswef enggame, angtane Jei enggam gane balf, “Angtane jeiserem Jeiba kapkaiserem Jeyam eyebili.”]

²⁹Angtane salib tarasamer aa jei ge ayebintyerem, jei Yesus ga aane imei-imeitana, duka ga aane jejetababili, enggam ga aane bala, “Yesus, Aamei enggam Im gununt, ‘Ai Jena Uwa Sanbagirmana samfer As wirulsini, ane Jena jeiserem nunu nawer-ningginfenna gamjon ga jem As gwitiri ibirmiter.’

³⁰Sya, Ina jase ireya ti salibiwer, ane Ina jase waakentaasini!”

³¹Angtane imam-imam sanbakaiserem, ane guru-guru Hukumu Nabi Musamana aa jei ne towas-towastababuwenaram, jeime Yesus gemer ga aane bisobana. Jei jen jena ga aane gitminenne, “Jei angtane nensa gam waakentaasini, jengga Jei Jen Jena Jam waakentaasiyen!”

³²Ane jei enggam ga aane bala, “Yesus Aamei enggam Im gunu, ‘Aiba Mesiasam. Aiba Raja anggwabura Israelmanaiserem.’ Afa Aamei jes gamserem Ibunar nasowelaye, gase irya salibiwer! Jepga ai Aamei Is asa damtana, ane ga Is asa tebana.” Ane angtane naura jei aa Jebar ne daktabaabunswenaram ti salibibe, jei mese Yesus ga aa ge bisobana.

³³Jema 12.00 gwere bolap aa falaram, gwere nafa fas, ane ona seyafter jep gemerserem gwini ga fal, jamer jema 3.00 dafef.

³⁴Ane jema 3.00 jes jeberserem Yesus ga uskambar gwarna, “Eloi, Eloi, lama sabaktani?” Igi jemna ga enggam, “Uwa Sanbagiri Amna, Uwa Sanbagiri Amna, Aamei Ai As Ibaf mirtene?”

³⁵Angtane jep aa jei ge fibilirim ga aane sarbana, jei ga aa ge gubili, “Gasa sarbasi! Yesus Jei Eliyas jenbewena.”

³⁶Angtane daamfenna jemniwer jei tatarfer ga nunggirfele, fenbiti ga goltetna. Jei fenbiti jeiserem angguru garsamaiserem jep ga osoltena, ane tini bwalnaiserem jep ga fwiretena. Ane Yesusem mif tarnap ga gwirinswena jam telbife. Ane angtane jeiserem ga gutena, “Nei ganma fya! Nejesa gerebafe Eliya kese fortya, jei jam tinswefe ti salibiwer.”

³⁷Jepga Yesus uskambar ga gwarna, ga tere.

³⁸Ane kain unggwan-giri aa je taannurum Uwa Sanbagirem Jenabe ga aane bitnetini nenennaber, bolawer jamer gwonabo.

³⁹Angtane sanbaka 100 ginanggwamana jebe aa jei finaram Yesusem tarnabe, jei Yesus ga sarbasini Jei jama gwarenwenaram. Ane angtane jeiserem jei Yesus ga damtana aa tererem. Ginanggwana jeiserem enggam ga gunu, “Angtane aaiserem Jeiba bunarsusfer Tane Uwa Sanbagirmanam!”

⁴⁰Jes jepserem wini ga bijauwer ge fibili, ane ga aane gaarabili seyafter aa je etamwenaram. Wini afweraiserem wini seyafter jeiserem jemniwer bosna jemna ga aas: afwer bosna Maria Magdalena; afwer bosna Salome; ane afwer bosna Maria. Maria jei iye Yakobuso Yosesmana. Yakobus jeiba tanisam.

⁴¹Wini seyafter jeiserem ga Yesus gwanan aa jei ne tikwebaatinennerem ona Galileya je, ane jes galapserem jei Yesus ga jei ne batobana. Ane wini nafis mesna Yesus aa jei ne onsobanaram jamer kota Yerusalemo, jei mese jei jep ge fibili.

⁴²Nunu angtane Yahudimana aa jem ge menetwebisiwefaram, nunu jeiserem jeiba nunu nalef nunu Sabat jam foroyan. Nunu jeiserem jeme ona safe gemer gigitswelam, angtane bosna Yusuf jei ga jela. Jeiba Arimateyam tane, ane jeiba angtane daamfenna Safna Angtane Yahudimana Sanbak-sanbaka Seyafter Gemerserem jemniwer. Jei nunu Uwa Sanbagiri Jei aa jem nwinirim anggwabura seyafter gemerserem jem Sanbakfe ga jes fibili. Yusuf jei Gubernur Pilatusminip ga sofwa, ane ga bala, “Yesusem futunuserem ap se gerba!” Yusuf jam ereyen Pilatusminip jam foryafe, aam temawer nunu Sabat gemerje jam falyan.

⁴³

⁴⁴Pilatus jei jam bitbitwena jame aa galap sararam enggame Yesus futu, ane jei angtane sanbaka ginanggwamana ga jenbene. Jei angtane jeiserem ga tenebana, “Ke bunar Yesus ke mes tere?”

⁴⁵Pilatus taterisi angtane sanbaka jeiserem jama saribenerem jemniwer enggame, Yesus bunarsusfer mesam tere. Jepga Pilatus jei Yusuf ga bala, Yesusem futunu jam tinswefe ti salibiwer enggalfe, tonmwa bitisibe gam gaarantef.

⁴⁶Jes jepserem Yusuf jei kaina waakensusu ga armantana. Ane jei Yesusem futunu ti salibiwer ga tinswena, ga taferna kaina jeiserem jeme. Jepga jei Yesusem futunu ga gaarantena tonmwa bitisibe. Bitisi jeiserem angtane ga otumton jewer ne eyebili. Jepga jei tuna nafsi unggwan-girsususerem ga aane irfifitaansowena, tuna jeiserem ga tonmwa bitisi jem mwa kawetala jem ne motolsini pintunu galserem.

⁴⁷Maria Magdalena, ane Maria Yosesem eneserem, jei nwena jeber ge folbamini, Yesus fof sene gaarantena.