Read Berik Markus 9 Bible Online

Markus 9 - Berik bible

Markus 9

¹Jepga Yesus angtane aa jei ne tikwebaatinennerem ga aa balbabili, “Bunar-bunarsus aamei afwer aas ijeya finaram namwer, aamei nalef ijama teryen, aamei gwanan nunu Uwa Sanbagiri Jei aa jem nwinirim anggwabura seyafter gemerserem jem Sanbakfe, nunu jeiserem ifsa domola baabetem se fortya.”

²Nunu gamjon ga enam, Yesus Jei Petrus, Yakobus, ane Yohanes ga aftabifele taaren bwalnaiserem jem bolabe. Angtane nensa fas jebe, jei jenfentowai ga jep. Jepga tifini Yesusmana nenesmer ga aa folbana jem nwenabe.

³Ane fene Jemna ga aa ge bwenen-bwenenweibene, numuserem ga sinsinsusu. Fene gala afa fas ogiribe.

⁴Jepga angtane nawer-ningna jeiserem jei Eliya yo Musa, nabi fwatermana, aa ge damtabili, Yesusfar ga aa ge nasbawena.

⁵Petrus Yesus ga bala, “Guru, aaiserem samfersus, ai seyafter aare! Ai jatowai nawer-ningna asa eyebaabili aafe — daamfenna Ip, daamfenna Musaf, ane daamfenna ga Eliyaf.”

⁶Jei teisyena jei bas nasbili, aam temawer jei uskambar jam ge erebili.

⁷Jepga gara ga aa matabili, ane gara jeiserem jewer ga taterisi ga aane sarbili enggame, “Tane aaiserem ba Amnam, Ai Ajes nesiktenerem. Seyafter Jei aa jes nasbilirim, aamei jam isa sarbasini!”

⁸Jepga tatarfer ga aa ge gaarabisnenne, jengga jes jepserem angtane afa fas jam ne damtayan, jengga Yesus Jenfentowai fina.

⁹Yesus ane angtane Jei aa jei ne tikwebaatinennerem taarenawer aa galap ge irebityerem, Yesus ga aa balbabili ititmer, “Aamei aaf ijesa domolaram, angtane nafsiserem jebe ijama nasipmineneyen, jamere Ai Tane Angtanemana, Ase irwena terewer.”

¹⁰Angtane Yesus aa jei ne tikwebaatinennerem jei seyafter Yesus aa jes bilirim jeter ga aane onsobili, jengga jei jen jena ga aane taanaaminenne, “Taterisi Yesus aa jes bilirim Jei jam irwalaiserem terewer jem temawer, taterisi jeiserem jem igiserem jeje fomfoma?”

¹¹Jepga Yesus ga aane tenebana, “Guru-guru Hukumu Nabi Musa aa jes tulistababilim aa jei ne towas-towastababuwenaram, jeje bafa jei enggam ga aa ge gubili, Nabi Eliya nabala ga jei se fortya?”

¹²Yesus enggam ga balbabili, “Bunar, Eliya jei nabala ga jei fortya enggalfe, apgal jigala seyafter gemerserem gam waakentababili. Aamei ipsama dirinswebilirim nabi fwatermana aa jes ne tulistaabilim Tane Angtanemanaiserem jem temawer. Jei enggam ne tulistababil, Tane Angtanemana Jei tamtamtalaiserem ga jes domolsa, ane angtane baif sene gwebasa.

¹³Jengga Ai aamei isa balbabili enggame, bunar Eliya mesam fortya. Ane angtane jebe mes ne eyeibenent, kapkaiserem ini jemna aa gemer folbaminirim jam eyebife, jes gamserem nabi fwatermana jei aa gemer ne tulistababilim.”

¹⁴Yesus, Petrus, Yakobus ane Yohanes aa galap ge waraubilirim angtane aa jei ne tikwebaatinennerem afweraiserem jemnibe, jei angtane unggwanfer ga aane damtabili jep aa gemer ge betwebilirim. Ane guru-guru Hukumu Nabi Musamana aa jei ne towas-towastababuwenaram, jei angtane Yesus aa jei ne tikwebaatinennerem jebar ga aa ge doksobana.

¹⁵Angtane uskambar jeiserem Yesus jame galap ne damtanaram, jei ga aa ge bitbitwebili, ane jei seyafter ga aa ge nunggirbuwena Yesusminibe, Yesus ga aane bala, “Gwerem.”

¹⁶Jepga Yesus angtane Jei aa jei ne tikwebaatinennerem ga tenebaabili, “Aamei jebar ibasa doksobili?”

¹⁷Angtane daamfenna angtane uskambar jeiserem jemniwer ga tamawolbana, “Guru, tane amna aaiserem Imnip as aftawena, bwata kapkaiserem ga jei mukmuktaasini.

¹⁸Ane bwat kapka jeiserem jam gam fortyaram, tane ga gam uktoniwili onabe, ane ga gam egegwena jamere kewa aaremawer gane denbentetya, ulbata ga jam gane egegnebana, ane tifni jemna ga kekelfer gam folbana. Ai angtane Is jei ne tikwebaatinennerem ames balbabili bwat kapkaiserem taneminiwer jam ne surbife, jengga jei masef, jam ne domolyan jam surbife.”

¹⁹Yesus ga aa tamawolbaabili, “Wa, aamei angtane namwer ijeya gwenaram, aamei Ase ijama tebayan. Aima ga ibar neya nwini jamere nunu anesus, jengga aamei gemerje Ai Ase ijama tebayan. Ai aamei isa Ajam fibabilibe nunu ga fomera enggalfe, aamei Ai As ijeba tebafe? Tane girtowai jeiserem jase aftayal Amnip!”

²⁰Tane jeiserem Yesusfe ga aane aftabawena. Bwat kapka Yesus jam aa galap damtanaram, jei tane jeiserem ga uktoniwili, ane jei ga terterwena, ga aane irfifitene, ane aaremawer kewa ga aane denbentetya.

²¹Yesus tane jeiserem jem jeta ga aa tenebana, “Nunu fomera tane aaiserem bwerna aa domolantam?” Jetaserem ga tamawolbana, “Bastantowaisamer galapserem ga galap domolant.

²²Bwat kapka tane jeber-jeber unggwasbawena fonap jam dantantef, afa tokwanap taptasiwif enggalfe jei gam terf. O Yesus afa Aamei baabeta Ijam domolaye ai Is ajam batomife, sya ai as nesikso, ane ga asIs batomini, tane alemanaiserem jebar.”

²³Yesus ga tane jeiserem jem jeta ga aa tamawolbana, “Wa, jeje bafa jes gamserem gam ga im gunu, afa Ai baabeta Ajam domolaye? Uwa Sanbagiri Jei samfer seyafter gam eyebili, afa angtane jei jam gane tebanaram.”

²⁴Tane jeiserem jem jeta tatarfer ga aa gwarna, “O Yesus, ai Ims tebana bastantowaifer. As batoba, jega ai Aamei uskambar Is gam as tebana!”

²⁵Jes jepserem Yesus angtane unggwanfer jam aa galap damtabilirim, jei aa ge towaiwebilirim jam ge jalbuwefe jem gwetmanabe, Yesus ga bwat kapkaiserem ga aa uftana, enggam ga aa gutena, “Aamei bwata kapka, tane aaiserem ga aamei kabwaktana, jei jam saryan, jei jam nasoweyan. Ai aamei enggam isAs bala, se totini jemniwer! Gamjon ijam kauteyan tane aaiserem jemnibe!”

²⁶Jepga bwat kapka jeiserem ga gwarna, tane jeiserem ga gin-gintene uskambar, ane ga mirtetefala. Tane jeiserem jei ga enggam etamwena anggwa futunu gamserem. Ane jepga angtane uskambar jeiserem ga aane balbabili, “Tane aaiserem maa, futu.”

²⁷Jengga Yesus tane jeiserem ga batobana, tafnawer ga aa tebatena jam gaartefe, ane tane jeiserem ga gaartena jener ga aa fina.

²⁸Yesus ane angtane Jei aa jei ne tikwebaatinennerem jei jenfentowai jam aa galap ge nwinbenerem jenabo jepga aane tenebana, “Jeje bafa bwat kapka jeiserem ai ajama surbiyen?”

²⁹Yesus ga aa tamawolbaabili, “Bwat kapka aas galserem nele nafsiserem jem jam surbiyen, jengga sembayangemfener gane surbili.”

³⁰Yesus ane angtane Jei aa jei ne tikwebaatinennerem jewer ga aa ge sofobili, ane ona Galileyastamer ga aa ge ayebinni. Ane Yesus Jei bai angtane nafsi jam ne towaswebafe enggame Jei aare,

³¹aam temawer Jei angtane Jei aa jei ne tikwebaatinennerem jes towas-towastababif. Jei enggam balbabili, “Ai Tane Angtanemana, Ai ga Asene gera angtane sanbakminibe. Ga Asene munbofo, ane ga As tere, jengga nunu nawer-ningginfenna Ai gamjon ga As irwena terewer.”

³²Angtane Yesus aa jei ne tikwebaatinennerem jei Yesusmana taterisi jeiserem jam ne towaswebiyen, jengga jei jam ge erebili jei jam ne tenebafe taterisi jeiserem jem temawer.

³³Yesus ane angtane Jei aa jei ne tikwebaatinennerem jam aa galap ge forobilirim kota Kapernaum je, ane jei jenap aa galap ge nwinbenerem, Yesus ga angtane aa jei ne tikwebaatinennerem ga tenebaabili, “Aamei nelebe afa ibasa doksobili?”

³⁴Jengga Yesus jam ne tamawolbayan, aam temawer jei nelebe taterisi aaiserem jem temawer ge doksobana, “Nei seyafter, nemna sanbaka ga nansa?”

³⁵Yesus ga nwintena, ane angtane dua belas aa jei ne tikwebaatinennerem ga aa jenbebili. Yesus ga aa balbabili, “Angtane aa jei gam gunurum sanbakef jam etamwefe, jei gwanan ga angtane bastowaif gam gwena, ane angtane nafsiserem awelna ga jemnip gam gwebili.”

³⁶Jepga Yesus tane bastouya ga gaarwili, ane ga gaarantena jem nenennabe. Ane Yesus tane towai jeiserem ga jam murmurtaasini, ane angtane aa jei ne tikwebaatinennerem ga aa balbabili,

³⁷“Angtane Ai aa jei gam tikwebaatinirim, afa jei tantouya bastouya aas galserem jam gam tebanaram aam temawer jei Ai As jewer gam tikwebaatinirim, gam jega angtane jeiserem jei Ai As mes gam tebana. Ane angtane Ai aa jei tebanaram, angtane jeiserem jei Am tefner As jam tebayan, jengga jeime Ai As Jei baftannuntum Jei mese jes gam tebana.”

³⁸Yohanes Yesus ga aa bala, “Guru, ai angtane asaje aya damtana, jei bwat kapkaiserem ga jes surbobili Im boseme. Ane ai ga aya bala, ‘Safnant, jase tikwe!’ aam temawer jei nem safanyan.”

³⁹Jengga Yesus ga aa balbabili, “Safnant, aamei angtane jeiserem ijama uftayan jam tikwefe! Angtane bwembwema aa jei gam eyebilirim Am boseme, angtane jeiserem jei galap taterisi kapka Am temawer jam nasbiyen.

⁴⁰Angtane nems nasbabiyeneiserem, angtane jeiserem ga safna nemnam.

⁴¹Ipsama dirinswenaram! Bunar-bunarsus afa angtane aasaje fona diwiribere ibe is jei golminirim aam temawer aamei Ai As ijewer onsobanaram, jei fwaina galap se taabili Uwa Sanbagirminiwer.”

⁴²Yesus gamjon ga balbabili, “Afa tuna unggwan-girsusu daran-darnaiserem jam gane tafrebaasiwilirim angtanem botonabe, ane jei ga gane firtaaniwili finibe enggalfe angtane jeiserem jem gam tamtamtafe, tamtamtala jeiserem bastouya. Jengga tamtamtala Uwa Sanbagirmanaiserem jeba unggwandwasusu tamtamtala jeiserem jemniwer. Afa angtane jei angtane namwer Ai ibirimfer As jei tebanaram, jei jam gam unggwasbanaram etam-etama jam eyebife, Uwa Sanbagiri jei tamtamtala unggwandwasus ga jese golmisi angtane jeiserem jebe.

⁴³Afa tafna imna etam-etama kapkaiserem jem igam eyebilirim, tafna jeiserem ga jam igam tiksosini. Waakenfer ga enggam, afa aamei taman waaken-giribe jam igam fornaram, tafna daamfennaiserem safe jebar igam forna. Jengga aaiserem je kapka, afa aamei tafna nawersamer jebar igam fornaram taman tokwagiribe, tokwana jeiserem gemer sene ertesini jamer abak-abaksus. [Tampata jeiserem jebe gulana angtane jei dumalaiserem jam barweyan, ane tokwana ga gemer sene ertesini jamer abak-abaksus.]

⁴⁴

⁴⁵Afa tufa imna etam-etama kapkaiserem jem igam eyebilirim, tufa jeiserem ga jam igam tiksosini. Waakenfer ga enggam, afa aamei tufa daamfennaiserem safe jebar igam forna taman waaken-giribe. Jengga aaiserem je kapka, afa tufa nawersamer aamei is jebar ne firtaaniwiliserem taman tokwagiribe. [Tampata jeiserem jebe gulana angtane jei dumalaiserem jam barweyan, ane tokwana ga gemer sene ertesini jamer abak-abaksus.]

⁴⁶

⁴⁷Afa nwena imna afwenefener kabwakfer jem igam gaarasinirim, ane aamei etam-etama kapkaiserem jem ga igam eyebili, afa ga gam jes gemerserem, nwena jeiserem ga jam igam fotolsini. Waakenfer ga enggam aamei nwena daamfennaiserem jebar igam forna taman waaken-giribe. Jengga aaiserem je kapka, afa aamei nwena nawersamer is jebar ne firtaaniwiliserem taman tokwagiribe.

⁴⁸Tampata jeiserem jebe gulana angtane jei dumalaiserem jam barweyan, ane tokwana ga gemer sene ertesini jamer abak-abaksus.

⁴⁹Angtane seyafter gemerserem tokwam sene waakentababili, tumilgala garanem waakenulu gamserem.

⁵⁰Garna ba waakenam, afa tumilgal sagap jam igam tuwulnuwilirim. Jengga afa garna jam gam etamwenaram bwekbwekswefe, angtane jei garna jeiserem gamjon jam ne eyebiyen garanfe jam falfe. Aamei ga enggala, garna waakena galserem. Aamei ga enggam isa gwena, Uwa Sanbagirfer Jebar waakenfer isa gwena. Ane aamei ga waakenfer sa gwena angtane nafsiserem jebar.”