Read Berik Lukas 1 Bible Online

Lukas 1 - Berik bible

Lukas 1

¹Ai taterisi aaiserem ai ip tulisulbono, Teofilus, angtane waakensusu. Angtane unggwanfer mesam ge unggwasbilint taterisi waakenfer jam ne tulisulfe, taterisi nei seyafter bunarsusfer nejesa towaswebilirim aa jei etamwenantam Yesusem temawer nem nenennabe.

²Angtane gwanan nabala aa jei ne domolaram jelem nweme, seyafter Yesus aa jes eyebilirim, jei taterisi jeiserem Yesusem temawer angtanefe ga jes ne nasipmini. Ane jei Taterisi Waakena nep nes mes ne nasipminenne. Ane angtane unggwanfer jei taterisi jeiserem ga jes ne bilint jam tulistaabife.

³Jes gamserem ai taterisi seyafter jeiserem ai amesam terelbilint, towaiwuluwer jamer tabanabo. Ane ai enggam ai gunu, jeba waakenam afa ai taterisi seyafter jeiserem isa jam as tulisulminirim ibe, daamfen-daamfenneme.

⁴Ai taterisi jeiserem ai enggalf tulisulu aamei gam isa towaswena enggame, taterisi bunarsusfer aaiserem gwanan ibe is jes ne towas-towasulminirim, seyafter jeiserem jeba bunaram.

⁵Gwanan Herodes aa galap gwenantam Rajafe ona Yudeya je, imam bosna ga Sakarya ga jep nwinint. Jei imam safna Abyamanaiserem ga jep kauna. Wini jemna bosna ga Elisabet; asal-asala jemnaiserem jes mese jeiba imamsam.

⁶Sakarya ane Elisabet jei nawersamer waakenfer ge gwena Uwa Sanbagirem nwenabe. Jei hukumu Tuhanmana ane seyafter Tuhan aa jes bilirim, jei seyafter jeiserem waakenfer ga aa ge sarbili ane ga ge eyebili.

⁷Jengga tane jemna fas, aam temawer Elisabetmana tane gola je mes ne matnebili, ane jei nawersamer baknauna.

⁸Nunu nensa jeme, nunu safna Abyamanaiserem awelna aa galap ne gwebilirim Jena Uwa Sanbagirmana jebe, Sakarya jei awelna imamfe ga gwebili Uwa Sanbagirem tarnabe.

⁹Jei aa jes ne eyebilirim jes galserem jeber-jeber sene eyebili ton towaiyeme bosna ga undian. Ane Sakarya ga aane destabana jei ton touya jeiserem jame aa galap ne gin-gintababilirim, ane Sakaryasmana ga jenbana. Jei ga aane destabana enggalfe, jei mwona waakenaiserem Uwa Sanbagirmana jep kautef, ane wili galserem ga aa gwalansini.

¹⁰Jema jei awelna wili galserem jep gwalansif aa galap ne fityaram, Sakarya ga kawetena mwona jeiserem jebe, ane angtane uskambar sitawer aa jei ge betwebilirim sembayanga ga aane gwebana.

¹¹Gwanan jes galapserem malaikata Tuhanmana jena ga gweretal Sakaryaminibe, jei taasfolawer fina mejana wili galserem aa jep ne giranbaabisiwenaram jebe.

¹²Sakarya jei malaikata aa galap damtanaram, jei ga aa bitbitwena, ane ga erne.

¹³Jengga malaikata jeiserem ga bala, “Sakarya, ipsam ernerem! Uwa Sanbagiri sembayanga imna is mesam sarbabanant. Wini imna Elisabet jei se gerefa tane girtowai, ane tane jeiserem jemna bosna ga enggam is jenibene Yohanes.

¹⁴Ini imna ga saaser-saasera, ini imna bunarsus saaser-saaserfersus se folbafa jem temawer. Ane angtane uskambar jei ini saaser-saaserfer sege folbamifi, tane jeiserem jame aa jep surnurum.

¹⁵Uwa Sanbagiri Jei tane jeiserem awelna igsusu ga jep se gulbafa. Jei fo angguru afa fona aa jem ge mwalswebiwenaram jei fas jam telbiyen. Ene jemna udanabara galapserem, tane jeiserem jei se bugufswena Mafnana Uwa Sanbagirmanaiserem jeme.

¹⁶Jei ga anggwabura Israel uskambar gase gwebabili, jega jei ga sege irfwebisi Tuhanminibe, Uwa Sanbagiri jemanserem.

¹⁷Yohanes jei jese danna Tuhanfe, ane jei gase domola mafnana ane baabeta Nabi Eliya gamserem. Jei gas gwebabili uwa mese tane, jei gamjon waakenfer gase naawena daamfennaber. Jei gas gwebabili angtane jam eyebiyeneiserem Uwa Sanbagiri aa jes gam bilirim, jei ga sege irfwebisi nele ini bunarsusfer aa gam gunurum jebe. Jei angtane gas menetababisisi Tuhanfe.”

¹⁸Sakarya ga malaikata jeiserem ga aa tenebana, “Ai fomfom as towaswena taterisi aaiserem jeba bunaram? Ai ames bakswena, ane wini aman mesna jei mes bakswena.”

¹⁹Malaikata jeiserem ga aa tamawolbana, “Aiba Gabriyelsam. Ai Uwa Sanbagirem tarnap ayam fina. Jei ai aJeyam baftana ibar gam nasowef, ane ai isas nasibene taterisi waakena aaiserem.

²⁰Ams se sarba! Taterisi amna ai ajes bilirim, jeiserem se etamwefa nunu jam ajep folbanaram. Aamei as ijam tebayanaye, jega jem temawer aamei ijam domolyan jam nasowefe. Aamei mukmukf is etamwena jamere ai ajes bilirim jeiserem se etamwefa.”

²¹Nomkef jes jepserem angtane ga Sakarya ga aane fibana, ane jei ga aa ge bitbitwebili, ga ge gubili, “Jeje bafa Sakarya jei abakef mwona waakenaiserem Uwa Sanbagirmana jebe?”

²²Jame aa galap totintyerem, Sakarya jei jam nasoweyan jemnibe. Jei tafamfener atalbisini, jengga jei mukmukmer fina. Angtane ga aa ge towaswebili enggame, jeiba taterisi Uwa Sanbagirminiwer mesam domola, mwona waakenaiserem Uwa Sanbagirmana jebe.

²³Jame aa galap tabanwebanaram awelna jemna Uwa Sanbagirem Jenabe, Sakarya ga aa warautna jelem jenabe.

²⁴Jepga abakefyan jewer ga, wini jemna Elisabet ga udanabarswena. Ane jepga jei jenap fener ga nwinwena abaka ga enggammer muara ga tafna gwiri.

²⁵Jei ga gunu, “Tuhan Jei waakenfer eyebili amnibe. Angtane jei ai as mes ne imei-imeiwulu, aam temawer ai tane fas. Jengga Uwa Sanbagiri Jei as mes wirulbisini imei-imeiya amna.”

²⁶Elisabet jei tanna jamer tingnabe muara ga enam, ane jepga Uwa Sanbagiri ga malaikata bosna Gabriyel ga aa baftana jam gwife tamna Nasaretwer, ona Galileya je.

²⁷Uwa Sanbagiri Gabriyel ga baftana yafonsiwir, bosna jemna Maria. Jeiba mesam gununt anggwa bosna Yusuf jam gaarfe. Yusuf jei ga asal-asala Raja Daudmana.

²⁸Malaikata jeiserem ga fortya Mariaminibe, ane ga bili, “Ini imna is saaser-saaserfer se falbili! Tuhan Jeiba ibaneram. Jei waakena Jelemanaiserem is mes golbili ibe.”

²⁹Maria taterisi malaikatmana aa galap sarbilirim, ini jemna kabwakfer ga falbili. Jei jelem inip ga gunu, “Taterisi aaiserem ga fomfoma?”

³⁰Jengga malaikata Maria ga bili, “Ipsama ernerem Maria, aam temawer Uwa Sanbagiri Jei waakena Jelemanaiserem is mes golbili ibe.

³¹Ams se sarba! Aamei is udanabarswefa, ane ga is gerefa tanna girtowai. Ane aamei bosna Jemna ga enggam is jenibene Yesus.

³²Jei gase etamwena Sanbagirfe, ane Uwa Sanbagiri angtane aa jes ne gaartenaram tagarsusube, Jei Tane jeiserem gase jenbene Tane Jelemanfe. Tuhan, Uwa Sanbagiri nemna, Jei Yesus gase etamtaasisi rajafe, Raja Daud galserem, asal-asala Jemna.

³³Jepga Yesus Jei gase etamwesa rajafe anggwabura Israel jamer abak-abaksus. Nunu Jei aa jep gwenaram anggwabura seyafter gemerserem jem Sanbakfe, nunu jeiserem jam barwebayan.”

³⁴Maria jei malaikata jeiserem ga tenebana, “Taterisi aaiserem ga fomfom se etamwena? Ai gemerje anggwafar ajam ge tayan.”

³⁵Malaikata jeiserem ga aa tamawolbili, “Mafnana Uwa Sanbagirmana se iretya imnibe, ane Uwa Sanbagiri angtane aa jes ne gaartenaram tagarsusube, baabeta Jemna ga is motolfa. Jega jem temawer Tane jeiserem jam se surnurum, ga sene bala Jei waakensususerem, ane ga sene jenbene Tane Uwa Sanbagirmana.

³⁶Se sarbistaabon Elisabet, ilem afelna jeiserem. Angtane jei enggam ge gubili jei tane jam gereyan, jengga jei safe baka jei mesam udanabarswenant muara ga enam.

³⁷Uwa Sanbagiri Jei seyafter aa jes gam bilirim, jeba gam etamwena.”

³⁸Maria ga tamawolbana, “Ai awelna Uwa Sanbagirfe ayam gwebene. Aamei ijes bilirim amnibe, seyafter jeiserem se etamwena.” Jepga malaikata jeiserem Maria ga mirultefala.

³⁹Abakefyan Maria galgala jemna ga menetababisini, ane tatarfer ga sofwa tamnabe ona Yudeya je, ona otumuboro.

⁴⁰Jei Sakaryam jenap kawetena, salamma ga aa golbili Elisabetfe.

⁴¹Elisabet jam bitef sarbili salamma Mariamana, Elisabet tanna aa jes tingnaram ga aa gin-ginwena. Ane Elisabet Mafnana Uwa Sanbagirmana jamer bugufswebili.

⁴²Ane jei uskambar ga nasowena enggame, “Uwa Sanbagiri Jei waakenaiserem Jemna is mes golbili uskambar ibe, ane ini imna waakenfer is gase falbili. Waakenaiserem uskambar Jei Jam golbiyen wini nafsiserem jebe! Ane Uwa Sanbagiri waakena Jelemanaiserem jese gulbana Tane jeiserem ijep gernaram.

⁴³Ai ajam bitbitwebili, aam temawer waakenaiserem amnip mes etamwena, iye Tuhan amnaiserem jei amnip jela.

⁴⁴Ai ims towasulu, ai salamma imna jam bitef sarbili, tane amna ajes tingnaram jemna ini saaser-saaserfer folbana, ane jei ga aa gin-ginwena.

⁴⁵Ini imna ga is waakenfer se falbili, aam temawer aamei enggam imes taabili waakenfer, taterisi Tuhan aa jes bilirim jam etamwefe.”

⁴⁶Maria ga gutena: “Ini amna Tuhan gam pujitene! Ai enggam ai bala, Tuhan Jei sanbaka!

⁴⁷Ini amna ga as saaser-saaserfer falbili, aam temawer Uwa Sanbagiri as mes waakenulsini.

⁴⁸Ai safe sanbakyan, Uwa Sanbagiri Jei ai ase waakenfer gaarabisnenne, ane ai awelna Jemna ai gweyibene. Uwa Sanbagiri Jeiba baabetabaram, ane Jei ap as unggwandusa gam eyebili. Ga jem temawer, namwer aa jei tawawenaram, anggwabura seyafter ga enggam sege gubili, Uwa Sanbagiri Jei waakenaiserem Jemna ap as mes golbili. Bosna Jemna ba waakensusum.

⁴⁹

⁵⁰Uwa Sanbagiri Jei angtanes nesiktababili, ane ga batobaabili, angtane ini uskambar Uwa Sanbagirminibe aa jei ge folbaminirim, malam jutelap ane jem malam jutelap seyafter jes gemerserem.

⁵¹Uwa Sanbagiri Jei baabetabara, ane Jei angtane jena aa jei ne tetenannaram, Jei ga aa ge irwalwebili.

⁵²Angtane sanbaka baabeta unggwanfer aa jei ne domolaram, Uwa Sanbagiri Jei baabeta jemna gas taayipmini, jengga angtane sanbakyan, ini aa jei ne onabertanaram, Jei gase kitultena.

⁵³Uwa Sanbagiri Jei unggwanfer waakena seyafter gemerserem se kitulmini angtane galgalyenaiserem jebe, jengga Jei angtane galgalabaraiserem se surbobili galgalyanmer.

⁵⁴Gwanan-gwanansus Uwa Sanbagiri ga asal-asala nemnaiserem ga jes balbabil, ‘Ai Abraham ane jem ausan mesnaiserem Ai As nesiktababili, ga As batobaabili, jamer abak-abaksus.’ Uwa Sanbagiri ga sarstaabonsant Jei aa jes bilipmisintim, ane Jei ga nes mes batobaabili.”

⁵⁵

⁵⁶Maria jei Elisabetfar ge nwini jamere muara ga nawer-ningna, ane jepga jei gamjon ga warautna jelem jenabe.

⁵⁷Ga forobitye nunu Elisabetfe tane jewer geref, jei girtowai tanes gerna.

⁵⁸Angtane aa jei ge nwinbenerem Elisabetem gwetmanabe, ane jem teu mesna ga aane sarbili Tuhan Jei Jemna nesikteleiserem unggwanfer mes golbili Elisabetfe, ane ini jemna jebar saaser-saaserfer ga aa ge folbamini.

⁵⁹Tantowai jeiserem umuru ga enggammer nunu delapan, jei ga aa ge jalbili enggalfe tane jeiserem jam ne sunattaf. Jei enggam ge gubili, tane jeiserem enggam ne jenbef Sakarya, jetamana bosna gamserem.

⁶⁰Jengga ene jemnaiserem ga gunu, “Wowo, gamyan! Jei bosna enggam sa jenibene Yohanes.”

⁶¹Jei ga aane bili, “Elisabet, enggame im tewe bosna gam afa jam folbayan.”

⁶²Jepga angtane jei Sakarya tafamfener ga aane atalbisini enggalfe jei gam towaswef tane jeiserem jemna bosna ga fomfom sa jenibene.

⁶³Sakarya jei kertasa ga aa bili, ane enggam ga tulisulbono, “Bosna jemna ga Yohanes.” Angtane seyafter ga aa ge bitbitwebili!

⁶⁴Jes jeberserem Sakarya jei gamjon jep ga nasowena, ane Uwa Sanbagiri ga pujitene.

⁶⁵Angtane seyafter aa jei ge nwinbenerem jem gwetmanabe ga aa ge bitbitwebili, ane taterisi jeiserem ga aane nasbinenne ona seyafter gemerserem otumube ona Yudeya je.

⁶⁶Angtane seyafter taterisi jeiserem aa jei ne sarbilirim enggam ga aa ge gubili unggwanfer jelem inibe, “Tane aaiserem baf se etamwena?” Jei ga enggam ge towaswebili baabeta Tuhanmana ba jemnibam.

⁶⁷Sakarya, Yohanesem jeta, jei Mafnana Uwa Sanbagirmanaiserem Jeme mes bugufswebana, ane jei taterisi Uwa Sanbagirmana ga aa nasibenenne. Taterisi aaiserem Angtane nei jei waakentababilirim jem temawer ga enggam:

⁶⁸“Au, nei Tuhan, Uwa Sanbagiri anggwabura Israelmanaiserem nei waakenfer ganma pujite, aam temawer Uwa Sanbagiri Jei mesam jela enggalfe angtane Jelemanaiserem gam batobaabif, ane jei gam aftabunnuf.

⁶⁹Uwa Sanbagiri nebe nese gaarmini Angtane baabetsusu, ane Jei nei nes gam se waakentababisini. Angtane jeiserem jei asal-asala Raja Daudmana.

⁷⁰Gwanan-gwanansus jepserem Uwa Sanbagiri ga nasowel nemnibe. Jei taterisi Jelemanaiserem ga nabi ini tabalbalaiserem ga jep kitulmil.

⁷¹Jei enggam gul, ‘Ai isAs waakentababisi ginanggwana imnaiserem jemniwer, ane baabetawer angtane is jei ne nasbabilirim kakalmer.’

⁷²Uwa Sanbagiri enggam gul asal-asala nemnaiserem jemnibe, ‘Ai isAs nesiktababisi, ane Ai As sarbistaabonsa taterisi Ai ibe isa Ajes bilipminirim.’

⁷³Uwa Sanbagiri Jei Abraham, asal-asala nemna, ga jes gaarstenanal taterisi jebe aa jes bilibelem.

⁷⁴Jei enggam bunar-bunarsusferam bal, Jei waakenfer nei nes tebabili baabeta ginanggwana nemnaiserem jemniwer, jega ini nemna nejam ge erebaamiyen nei Uwa Sanbagiri neJeba tikwebaatinennerem,

⁷⁵ane jega nei nejama eyebiyen, Uwa Sanbagiri aa jes bilirim, ‘Enggam ijama eyebiyen.’ Ane Uwa Sanbagiri aa jes bilirim jam eyebife, nei ga jes nesa eyebili jamere nei nesa tere.”

⁷⁶Ane Sakarya jem tane Yohanesem temawer ga enggam gunu: “Uwa Sanbagiri angtane aa jes ne gaartenaram tagarsusube, Jei aamei is gase jenbese nabi Jelemanfe. Aamei ise danna Tuhanminibe, aamei nele Tuhanmana ise sartasini.

⁷⁷Aamei angtane Jemnaiserem jep ga is nasipmini, Uwa Sanbagiri Jei etam-etama kapka jemna gase wirtabaipmini, ane ga jem temawer Jei angtane gase waakentababisini.”

⁷⁸Ane Sakarya gamjon ga gunu, “Uwa Sanbagiri nemna, Jei nems nesiktababili, ini Jemna waakensusu, ane ga jem temawer Uwa Sanbagiri Jei Angtane taman waaken-giriwer nei nes Jei waakentababiliserem gase baftatna. Jei enggam gwere jam tauweyela gamserem.

⁷⁹Angtane jeiserem nafa se golmini angtane seyafter gemerserem aa jei naawenaram gwinibe, ane tere aa jei ne erebilirim. Ane Jei nei nes gas aftabifele nele samfer aa jei folbanaram.”

⁸⁰Sakaryamana tane jeiserem ga aa unggwan-girswebana, ane mafnana jeman mesna ga baabetswebana. Jei taman dwisgirip nwini, jamere nunu Uwa Sanbagiri awelna aa jep bilibenerem jam towaiwulfe anggwabura Israelem tarnabe.