Read Berik Lukas 10 Bible Online

Lukas 10 - Berik bible

Lukas 10

¹Jeiserem taban, Tuhan angtane tuju pulu dua Jei aa jei ne tikwebaatinennerem ga destabaabili. Ane Yesus ga angtane jeiserem ga baftabili nawer-naurem enggalfe jei gam ne danabaasif, kotana gemerserem ane tampata Jei aa jep wofefe.

²Jei ga enggam balbabili, “Angtane unggwanfersus taterisi Amna jei ne fibilirim. Angtane jeiserem jeiba enggalam nananis nuna galserem angtane jes ne fulfe. Nananis nuna jeiserem unggwanfer, jengga angtane nanansi jeiserem jam aa jei ne fulfe jei bastantowaifer. Jes gemerserem angtane taterisi Amna aa jei ne towas-towastababilirim jei ga bastantowaifefener. Aamei sembayanga uskambar isa gwebabana Tuhanfe, jega Jei angtane unggwanfer gase baftabili enggalfe taterisi Amna jei ne nasibenenef.

³Gasa sofwe! Ai imter baftabili ayanga tanna gamserem matin somolem nenennabe.

⁴Jam isa sofwaram, safnant dompeta afa ijama erbiyen, ane funa ijama erbiyen, ane sandal afwer mese ijama erbiyen. Safnant ijama tikweyan nel nenennabe enggalfe angtanefar gam nasowefe.

⁵Aamei jam is ge kawetanaram jenabe, gwanan ga enggam is ge gutena, ‘Uwa Sanbagiri Jei is eyeipmini, jega ini imna waakenfer is ga sege folbamini, angtane aa jei ge nwinbenerem jena aaiserem jebe.’

⁶Afa angtane jep aa jei gam nwinirim jei aamei waakenfer jam is gam taaminirim, taterisi imna jeiserem ga jemniber se fala. Afa angtane jei bai se gwenanaram, taterisi imna jeiserem gamjon ga is ge dekolsiwili angtane jeiserem jemniwer.

⁷Jena ga daamfennater aamei ga jeber is ge nwini. Afa tumilgala is jam sene kitulminirim ibe, tumilgala jeiserem ga jam is ge tebabili, aam temawer angtane awelna angtane nafsimana aa jei gam gweyibenerem jei fwainaiserem ga jener gam taabili. Jena jam jep igangge nwinirim, jena jeiserem safnant jewer ijam ge gwisiyen jena nafsiserem jebe.

⁸Aamei tamna nafsi jep jam is ge fornaram, ane jep ga aamei isene taamini waakenfer, tumilgala is jam sene kitulminirim ibe, ga jamer is ge tombaabili.

⁹Angtane bwernabara ga is ge waakentababili tamna jeiserem jebe. Ane angtane jepmana jeiserem aamei taterisi aaiserem jep ga jam is ge nasipmini, ‘Nunu Uwa Sanbagiri Jei aa jem nwinirim anggwabura seyafter gemerserem jem Sanbakfe, nunu jeiserem ga mes gwetmanswel imnibe.’

¹⁰Jengga aamei tamna nafsi jep jam is ge fornaram, ane tamna jeiserem angtane jemnaiserem is jam ne taamiyeneye aamei, jewer ga is ge sofna nelgiribe, ane ga is ge gutena,

¹¹‘Tamna imnaiserem jem sona aa jei ge batobilirim tufa amnaiserem jebe, ai ga as ge wirtabaabisini enggalfe, aamei gam isa towaswena enggame aamei ai baife as ijewera gweminirim, aamei jes gamserem gam as ijewera gweminirim, aamei kapkaiserem ga ijesa eyebili. Jengga aaiserem gasa towaswebi enggame: Nunu Uwa Sanbagiri Jei aa jem nwinirim anggwabura seyafter gemerserem jem Sanbakfe ga mes gwetmanswel.’ ”

¹²Yesus gamjon ga balbabili, “Ai ims towas-towastababili, nunu umwef jemserem Uwa Sanbagiri angtane aa jem waksosisirim, angtane waakenfer eyebiliserem ane kabwakfer eyebiliserem, nunu jeiserem jeme Uwa Sanbagiri angtane kota Sodommana Jei bastantowaifer gase tamtamtababisi. Ane angtane aamei baife is jei ne gwebabilirim jam tebabife tamna jemnaiserem jebe, Uwa Sanbagiri angtane jeiserem uskambarsus gase tamtamtababisi!”

¹³Yesus Jei gamjon ga balbabili, “Aamei ijeya nwinirim Korasimwer ane Betsaidawer, galap kabwaksusu unggwandusaiserem ga is etamwemisi ibe. Ai bwembwema Ames eyebili im kotanabe, jengga aamei etam-etamawer ijama tikweyan.” Ane Yesus ga enggam syesyawulu, “Bwembwema Ai jes Agam eyebilirim im kotanabe, afa Ai fwater bwembwema jeiserem jep jam Agam eyebilim kotana Tirus ane kotana Sidon je, afa ga gam jes gamserem, gam jega angtane jepmanaiserem ga aa ge tikwebil etam-etama jelemanaiserem jewer, jei ga waakenaiserem ga jes ne eyebil. Ane jei ga jam ge nwinbene fene ga enggala gane kabwabil, niw fene galserem, ane sona ga jelem dukap ne bunulnswel, jega enggalf angtane nafsi ga sege towaswebili jei etam-etamawer ba mesam ge tikwebili.

¹⁴Nunu umwef jemserem Uwa Sanbagiri angtane seyafter aa jem waksosisirim, angtane waakenfer eyebiliserem ane kabwakfer eyebiliserem, nunu jeiserem jeme Uwa Sanbagiri Jei angtane kota Tirusmana yo kota Sidonmana Jei bastowaifer se tamtamtababisi imniwer.”

¹⁵Ane Yesus gamjon ga balbabili, “Aamei angtane kota Kapernaummana, aamke enggam ima gunu, ‘Ai ana jama sa tetena jamere taman waaken-giribo’? Gamyan! Uwa Sanbagiri Jei aamei is fasawolwisi taman tokwagiribe!”

¹⁶Ane Yesus ga balbabili angtane Jemna Jei aa jei ne tikwebaatinennerem, “Angtane aamei is jei ne sarbabilirim, angtane jeiserem jei Aime Asene sarbana. Angtane aamei baife is jei ne gwebabilirim, angtane jeiserem jei Ai As baif sene gwebana. Ane angtane Ai baife As jei ne gwebanaram, angtane jeiserem jei Uwa Sanbagiri baif sene gwebana, Ai As Jei baftannuntum.”

¹⁷Angtane tuju pulu dua aa jei ne tikwebaatinennerem Yesus aa jes baftabilirim, gamjon ga aa ge waraubili ini saaser-saasermer. Jei ga aa ge gubili, “Tuhan ai uskambar aya eyebili, ane bwat kapkaiserem jes mese jei amter ne sarbabili, ai jam agalaba nasounaram Im boseme!”

¹⁸Yesus ga tamawolbaabili, “Ai bawasa Amsam damtal taman waaken-giriwer tatarmersus jentya, irsi gamserem.

¹⁹Ai baabeta isa mesam golmini ibe, jega aamei awas ufwai galserem ga igama jubistena, ane onggonggeleng mese. Ane baabeta Ai isa Ajes golminirim, baabeta jeiserem unggwandusa baabeta bawasmanaiserem jewer, ane seyafter afa fas is jam ne tamtamtababiyen.

²⁰Safe gam jes gamserem, ini saaser-saaserfer is basangge folbaminirim aam temawer bwat kapkaiserem imter ne sarbabili. Jengga waakena ga enggam, aamei ini is saaser-saaserfer sege folbamini, aam temawer bosna imna is mes tulistabaipmini bukunube, bukunu angtane waakenfer gwelaiserem jamer abak-abaksus jebe, taman waaken-giribe.”

²¹Gwanan jes jepserem ini Yesusmana ga saaser-saasersusfer folbana, aam temawer Mafnana Uwa Sanbagirmana mesam bugufswebana. Yesus Jei Uwa Sanbagiri ga bala, “Uwa, Aamei Sanbakfe Aamei nwini winsi aaiserem ane ogiri aaiserem jebe. Ai Is enggam Ai bala ‘Ase samfer gulbana’, aam temawer seyafter jeiserem Ai Ajes towas-towastababilirim, Aamei seyafter jeiserem Imes syawulsini angtane enggalaiserem jemniwer, angtane jener enggam aa jei gam gunurum, ‘Aiba angtane tousaiserem, aiba jesam.’ Jengga Aamei angtane ini jena aa jei gam onabertanaram, Aamei seyafter jeiserem ga Ijep ge saamisini. Bunar Uwa, Ai Is enggam Ai bala ‘Ase samfer gulbana’, aam temawer Aamei jeiserem ba Ineram bili, ane ini Imna ga Is jem temawer saaser-saaserswebana.”

²²Ane Yesus angtane unggwanfer jep aaiserem ga balbabili, “Uwa Amna Jei tousaiserem seyafter As mesam kitulbono Abe. Angtane afa fas Ai As jam ne towaswebayan, jengga Uwa As Jentowai towaswebana. Ane angtane afa fas Uwa jam ne towaswebayan, jengga Ai Antowai towaswebana, ane angtane Ai Ajes destabaabilirim, ga jenefener ge towaswebili.”

²³Yesus ga irfwena, ane angtane Jei aa jei ne tikwebaatinennerem jei jetefener ga balbabili, “Ini imna is waakenfer sege folbamini, aam temawer aamei imsa domola bwembwema namwer ijesa domolaram.

²⁴Ai ims towas-towastababili, nabi-nabi ane raja-raja fwatermanaiserem jei uskambar ga aa ge gubil enggalfe jeiserem jam ne domolf aamei namwer ijesa domolaram, jengga jei fas jam ne domolyan. Ane jei ga jam ne sarbisif aamei namwer ijesa sarbisinirim, jengga jei fas jam ne sarbisiyen.”

²⁵Jes jepserem guru Hukumu Nabi Musa aa jes tulistababilim aa jei towas-towastababuwenaram, jei ga jep fina enggalfe jei Yesus gam unggwasbaf jam tenebawefe, afa Yesus Jei waakenfer kese tamawolbana, afa fas. Jei Yesus ga enggam tenebana, “Guru, ai ga basas eyebili enggalfe, ai waakenfer gwelaiserem jamer abak-abaksus agam domolfe?”

²⁶Yesus ga tamawolbana, “Nabi Musa jei bas tulisul Taterisi Uwa Sanbagirmana jeiserem jebe? Aamei taterisi jeiserem ifomfom towaswebili?”

²⁷Angtane jeiserem Yesus ga tamawolbana, “Uwa Sanbagiri imnaiserem ga jetefener igam nesiktene ini ilemana seyafter gemerserem jeme, ane mafnana imna seyafter gemerserem, ane baabeta imna seyafter gemerserem. Ane angtane nafsiserem ga jam igam nesiktababili, aamei in ina gemer igam nesiktenerem.”

²⁸Yesus ga bala, “Aamei jes igam gutenaram jeiserem bunar. Ga jeiserem jeter is eyebili, ane aamei waakenfer gwelaiserem jamer abak-abaksus ga is domola.”

²⁹Jengga angtane jeiserem ga gunu jelem inibe, “Ai bai angtane nafsi enggam as jam ne towaswebafe, ai angtane nafsi ajam nesiktababiyen, taterisi Nabi Musa jep aa gemer tulisulum.” Jewer ga jei Yesus gamjon ga tenebana, “Angtane nafsiserem ga fwersa ai ajes nesiktababife?”

³⁰Yesus ga enggam tamawolbana, jega jei gas towaswena jam jes nesiktababiliserem: “Angtane Yahudimana aasaje ga iretya kota Yerusalemwer jamere kota Yerikoyo. Nel nenennabe, angtane komkomaiserem jei angtane Yahudimana jeiserem ga aane tebana. Jei fen mese apgal jigala seyafter jelemanaiserem ga aane komkomtabaibaasini. Ga aane safsaftana jamer tamtamsus. Ane neleber ga aane mirtetefala, angtane jeiserem ga amkom fom tere.

³¹Ane jes jepserem imam aasaje ga jep wofna nele jeiserem jebe. Jei angtane Yahudimana jeiserem jam aa galap damtanaram, jei ga jamfener ayebaanni nel eyewer.

³²Angtane Yahudimana nafsiserem tewe Lewimana, jei mese nele jeiserem ga jep wofna. Ane ga jela tampata angtane jeiserem aa jep falaram, ane ga damtana, jeime jamfener ga ayebaanni nel eyewer.

³³Jengga angtane ona Samaryamana ga sofwa nele jeiserem jebe, ane ga jela tampata angtane jeiserem jei aa jep falaram. (Bunar-bunarsus jes galapserem ga angtane Yahudimana ane angtane Samaryamana jei ga jena jam ne uskamswemuwena.) Jengga angtane Samaryamana jei angtane jeiserem jame aa galap damtanaram, ini ga folbana angtane jeiserem jam batobafe, aam temawer jei ga jam nesiktene.

³⁴Ane jei angtane Yahudimana jeiserem ga gwetmantaasini, ane bubwana ga wirtabaibene fo anggurume, ane ga gwebana minyakeme. Jewer ga bubwana jeiserem ga tafrebaibene fenbiteme jamere taban. Jei angtane jeiserem ga gaaranswena keledai jelemanaiserem jebe, ane ga aftafala jamere jena menetulsili angtane nafis tamnawer jelaiserem jei nomkef jep talaiserem jebo, ane ga aane waakentana.

³⁵Jem gwirmer ga, jei doi perak naura ga terbene angtane jena jeiserem aa jei taabilirim jebe. Ane ga bala, ‘Angtane aaiserem gase waakenta! Ane afa aamei doini nafsi jam is tambawulurum, ai ajep warautnaram aafe, doini ga isas gerbana fwayenfe.’ ”

³⁶Jepga Yesus taterisi jeiserem ga tabanulu, Jei guru jeiserem ga tenebana, “Angtane nawer-ningna jeiserem jemniwer, ga fwersaiserem angtane komkoma jei aa jes ne safsaftanaram, jei aa jei nesiktenerem?”

³⁷Ga tamawola, “Angtane aa jes ne safsaftanaram, jei aa jei batobanaram, angtane jeiserem ga jes.” Yesus ga bala, “Afa ga gam jes gemerserem, gase sofwe, ane ga is eyebili jes gemerserem!”

³⁸Jewer ga Yesus ane Jei aa jei ne tikwebaatinennerem ga aa ge sofobili, ane ga aa ge forobili tamnabe. Jes jepserem wini bosna ga Marta, jei Yesus ga tebana jem jenabe.

³⁹Marta jelem osona jemna bosna ga Maria. Maria jei Yeusuem gwetmanap nwini; Maria jei taterisi Yesus aa jes nasbabilirim jei ga jes sarbabisini.

⁴⁰Jengga Marta ini jemna jam janbili, ane ga bili jelem inibe, “Awelna amna jenap anesus, ai tumilgala anesusu ajes eyebaabili antowai.” Jewer ga jei Yesusminibe ga jela, ane ga bala, “Tuhan, Aamke as Ijam domolyan ini amna as jam janbili? Oso amna jei ai as jam batobiyen, ai ga awelnabe antowai gwena. Jei jase bil jei ai as gangge batobi!”

⁴¹Yesus ga tamawolbili, “Marta, Marta, ini imna ke is jam janbili? Aamei enggam im gwena, jes igam taabitetna, gamjon jes igam taabitetna.

⁴²Jengga igsusu ga daamfenna. Maria igsusu jeiserem mes sarbisini, angtane nafsi jam ne amsonbiyen jemniwer.”