Read Berik Lukas 11 Bible Online

Lukas 11 - Berik bible

Lukas 11

¹Nunu nafsi jeme, Yesus Jei sembayanga ga Jem gwebana tampata nafsiserem jebe. Sembayanga aa galap tabantanaram Jam gwebalabe, angtane Jei aa jei ne tikwebaatinennerem daamfennaiserem ga bala, “Tuhan, ajon se towas-towastababi sembayangs gwebafe, Yohanes angtane jei aa jei ne tikwebaatinennerem aa gemer towas-towastababilirim sembayangs gwebafe.”

²Jepga Yesus ga balbabili, “Aamei sembayang jam isa gwebanaram, ga enggam isa gwebana, ‘Uwa, ai bunarsusfer Is enggam aya bala, angtane bosna Imnaiserem ga Isene gulbatena. Aamei abakefyan anggwabura seyafter gemerserem jem Sanbakfe ga Is gwena.

³Aamei nunu jeber-jeber tumilgala ap Is kitulmuwena.

⁴Etam-etama kapka amna seyafter gemerserem ga Is wirtabaabili, gamjon jeiserem Ijam sarbistaabonyan, aam temawer ai kapkaiserem angtane abe aa jes ne eyeipminirim, jeiserem ai ajama borolmini, gamjon ajama sarbistaabonyan. Ase Ijam aftabifelyen unggwasbala kapkaiserem jebe.’ ”

⁵Jepga Yesus ga Jei aa jei ne tikwebaatinennerem ga balbabili, “Aamei taterisi aaiserem jafner isa sarbisnenne ilem inibe: Afa ga enggam, angtane imniwer jam gam gwinaram jelem afelnem jenabe gwini nenennap, ane jelem afelna jeiserem enggam gam bala, ‘Am afelna, rotini nawer-ningna abas kitulbo nomkef.

⁶Am sarabosom aa jei sofwetyaram, namwer se foryal am jenabe, ane ai tumilgala fas jei ajem taayinfe!’

⁷Ane aamei ilem inibe aaiserem ga jafner isa sarbisnenne, afa jelem afelna jem jenap enggam gam tamawolbanaram, ‘Safnant, jas warau! Aamei ibas forobitye amnibe? Pintunu ames matasini, ane ai tane amnaiserem jes mese ai jebar ajama tanna. Ai ajam irweyan ane apgal jigala fas is ajam gulbayan ibe.’ ”

⁸Yesus gamjon ga balbabili, “Ane jewer ga fomfoma? Ai enggam Ai gunu, angtane jeiserem safe jem afelna, jei bai jam irwefe ane tumilgala jam gulbafe jebe. Jengga afa angtane jeiserem jam sefersweyan enggalfe jei jam aberwebafe, gam jega jelem afelna ga gam irwena, ane ga gam gulbana jebe apgal jigala jes gam aberweibenerem jelem afelna jeiserem jemniwer.

⁹Ga jem temawer, Ai aamei isa enggam Ai balbabili, Uwa Sanbagirminiwer ga jamer isa balwena, ane Jei ga is golmini ibe. Uwa Sanbagirminiwer ga jamer isa terelbili, ane Jei ga is eyeipmini jega aamei ijesa terelbuwenaram jeiserem ga isa domola. Pintunu Uwa Sanbagirmana ga jamer isa enentabaiwena, ane Uwa Sanbagiri Jei pintunu ip ga is gam tertemisiwitye.

¹⁰Angtane apgal jigala aa jei gam bilirim Uwa Sanbagirminiwer, jei gam domola aa jes gam bilirim. Angtane aa jei gam terelbilirim Uwa Sanbagirminiwer, jei gam domola jei aa jes gam terelbilirim. Angtane pintunu aa jei gam enentenerem, Uwa Sanbagiri Jei pintunu gam terterbaasiwitye jebe.

¹¹Aamei uwaf ijeya gwenaram, afa tane imna jigala jam gam aberwebilirim, aamke awas igama gulbana?

¹²Afa ayang sui gam aberwebili, aamke onggonggelengs igama gulbana?

¹³Aamei angtane awelna kabwakfer jemanserem, jengga aamei tousa apgal jigala tane imnaiserem jep ga waakenater igama kitulmini. Uwa Sanbagiri, Uwa imna taman waaken-girip aa Jei nwinirim, Jei waakensusu imniwer; Jei Mafnana Jelemana gam golmini, angtane Jei aa jei gane balaram.”

¹⁴Nunu nafsi jeme, Yesus Jei bwat kapka ga jem surbili angtaneminiwer, bwat kapka jam nasouyanaiserem. Bwat kapka jeiserem jame aa galap totintyerem, angtane jeiserem ga towaiwena jam nasowefe. Angtane unggwanfer jep ga aa ge bitbitwebili.

¹⁵Jengga angtane unggwanfer jeiserem afwenefener ga enggam ge gubili, “Belsebul jei sanbaka bwat kapka seyafter gemerserem jemniwer, ane jei baabeta Yesusfe ga jei gulbana, jega jem temawer Yesus ga bwat kapka jeiserem ga jem surbobili.”

¹⁶Angtane nensa afweraiserem jei baabeta Yesusmana jam ne unggwasibef. Jega jem temawer, jei Yesus enggam ga aane bala, “Aamei bwembwem ap se eyeipmi enggalfe, ai agma towaswef Aameiba Uwa Sanbagirminiweram jela.”

¹⁷Yesus Jei itana jemna mes towaswebaipmini, ane ga balbabili, “Angtane negara daamfennaiserem jep aa jei ge nwinbenerem, afa jei jam gangge syensyanwebilirim safna nafis-nafismer, ane safna jeiserem jei ga jena gane uskamswemini ane jei ga gangge erabana, negara jeiserem ga gam kabwaknowa. Ane angtane jena daamfennaber aa jei gangge nwinbenerem, afa jei seyafter jam gangge wokwakwebilirim ane jei ga gangge erabana, angtane jena jeiserem jep aa jei gangge nwinbenerem ga gangge kabwakswebili.

¹⁸Taman-giri bawasmanaiserem ga gemer jes gemerserem. Afa safna daamfenna jei jam gangge erabanaram safna afweraiserem jebar bawasem tamnabe, taman-giri bawasmana jeiserem ga gane kabwaknowa. Aamei enggam ima gunu ilem inibe, Belsebul jei baabeta jemna Ap mes gulbana enggalfe, Ai bwat kapka jem Agam surbobif. Afa ga gam, Belsebul jei safna afweraiserem bawasem tamnabe ga jebar gangge erabana.

¹⁹Afa Ai bwat kapka jam As surbobilirim Belsebulem baabeteme, afa ga gam jes gamserem, baabeta ga nanmana angtane aamei is jei ne onsobaabilirim, bwat kapka ga jem sene surbobili? Jei tousa jei bwat kapka fas jam ne surbobiyen Belsebulem baabeteme. Ga jem temawer, jeimba mesam ge towaswebili enggame, Ai bwat kapka Ajam surbobiyen Belsebulem baabeteme. Aamei is jei ne tikwebaatinennerem jei game aa jewer ge gubilirim, jei jena ga mes ne gweraasona aamei syefer ga ima nasowena Am temawer.

²⁰Jengga Ai bwat kapka ga baabeta Uwa Sanbagirmanaiserem ga Ajem surbobili. Ga jem temawer aamei imsa towaswena nunu Uwa Sanbagiri Jei aa jem nwinirim anggwabura seyafter gemerserem jem Sanbakfe mes fortya imnibe.

²¹Angtane baabetabara jei jena jelemana jam gam gaarabisnennerem ulumu yo ginna jeme enggalfe, apgal jigala jelem jenap aaiserem jam ne erbifelyen, waakenfer jeber gangge falbili. Jei ga enggam gam gunu, ‘Ai ulumu ginnabara gam etersini, jega jem temawer ai waakenfer ga ai nwini.’

²²Jengga angtane baabetabarsususerem jei jam gam fortyaram, jei angtane jena ulumu yo ginna jem aa jei gam gaarabisnennerem jebar ga gangge erna, ane angtane jeiserem jei jam gam tafernaram. Ane angtane baabetabarsususerem jei ulumu yo ginna jena aa jem gam gaarabisnennerem jeiserem ga gam amserentabana. Ane jei apgal jigala seyaftersus jena jeiserem jebe ga gam komkomtababisini, ane ga gam syentabaibene. Bawasa ga enggala, angtane baabetabara jena jelemana aa jei gam gaarabisnennerem jes galserem. Ane Ai ga enggala, angtane baabetabarsusu jeiserem jes galserem.

²³Afa angtane As jam ne tikwebaatiyeneiserem, angtane jeiserem jei ginanggwana Amna. Angtane afa Ai As jam ne batobayanaye enggalfe angtane nensa Amnip gam jam betbetulfe, angtane jeiserem jei ga enggalf gane eyebili angtane Amniwer gam ge nunggirbef.”

²⁴Yesus Jei gamjon ga balbabili, “Bwat kapka angtane jame aa galap mirtetefalaram, bwat kapka jeiserem ga wofena ona serteraiserem jebe enggalfe tampata jep nwiniserem ga jes terelbili, jengga jei masef, tampata fas jam domolyan. Ga jem temawer, jei ga gutena, ‘Ai gamjon jam age warau jena gwanan ai ajes miruluntum jebe.’

²⁵Jei jame aa galap fornaram jena jeiserem jebe, jei jena jeiserem ga domola, jena jeiserem waakensusu, oltunu fas.

²⁶Jepga jei ga sofna, bwat kapka ga tuju afweraiserem jes kitulnonofe, ane ga aftabifeltye. Bwat kapka afwer jeiserem jei kakalsusu jemniwer. Ane jepga jei seyafter ga aa ge kabwitena angtane jeiserem jem inibe, ane jep ga aa ge nwinbene. Angtane jeiserem gwela jemnaiserem gwanan jes jepserem je kapka, jengga gamjon aas jepserem gwela jemnaiserem je kabwak-kabwaksusu.”

²⁷Yesus ga gemer nasowena, angtane unggwanfer jeiserem jem nenennabe, wini aasaje Yesus uskambar ga bala, “Wini Aamei Is jei geresantam, ane momem Aamei Is jei tainwesantam, ini jemna waakenfer falbili!”

²⁸Jengga Yesus ga tamawola, “Bunar, jengga angtane taterisi Uwa Sanbagirmana aa jei ne saribenerem, ane ga gam eyeibene, angtane jeiserem ini jemna waakensusfer ga jemanem sege folbamini.”

²⁹Jepga angtane unggwanfersus gamjon ga aa ge betwebili Yesusem gwetmanabe, ane Yesus ga gutena, “Aamei ijeya gwenaram namwer aa jep falaram, aamei angtane kabwaksusu. Aamei taterisi Amna As ijama onsoibeyen, ane aamei etam-etamawer ijama tikweyan. Aamei As enggam ima bala Ai bwembwems eyebif, jengga Ai Ajam eyebiyen. Aamei bwembwema daamfenna tefner isa domola, bwembwema fwater aa jei etamwelam Nabi Yunusminiwer.

³⁰Jeiserem aa jei etamwebalam Nabi Yunusfe, bwembwema jeiserem mesam etamwel enggalfe, angtane kota Niniwe je aa jei ge nwinbelem jei gam ge towaswebif Uwa Sanbagiri Jei Nabi Yunus mes baftal. Jes gamserem bwembwema Ap jegme se etamwebafa enggalfe aamei namwer ijeya gwenaram aamei igama towaswef enggame Uwa Sanbagiri Jei Amsam baftannunt.

³¹Fwater-fwatersus wini sanbakfe aa jei nwinim negeri Selatanminiwer, jei ga enggalf sofna bijaususube taterisi Raja Salomomanaiserem jeiserem gam sarbif. Taterisi jemna waakensusu, jei seyafter towaswel. Wi sanbaka jeiserem jei taterisi Raja Salomomana ga sarbil ane ga onsobil. Ane namwer aas jepserem Ai aare, Aiba igsusum Raja Salomominiwer. Jengga aamei namwer ijeya gwenaram, aamei taterisi Amna ijama onsobiyen. Jega jem temawer, nunu umwef jemserem Uwa Sanbagiri angtane aa jem waksosisirim, angtane waakenfer eyebiliserem ane kabwakfer eyebiliserem, nunu jeiserem jeme wi sanbaka jeiserem terewer ibaner ga isa irwesa, ane aamei ga is balbabisi, ‘Aameiba angtane etam-etamabaram, etam-etama kapka imnaiserem je unggwanfersus.’

³²Gwanan-gwanansus gamjon jepserem, angtane kota Niniwe je aa jei ge nwinbelem, jei aa galap ne sarbilim taterisi Nabi Yunus aa jes nasbilim, angtane Niniwemana ga aa ge tikwebil etam-etamawer, jei ga waakenaiserem ga jes ne eyebil. Ane namwer aas jepserem Ai aare, Aiba igsusum Nabi Yunusminiwer. Jengga aamei namwer ijeya gwenaram, aamei taterisi Amna imsa sarbili, jengga aamei etam-etamawer ijama tikweyan. Jega jem temawer nunu umwef jemserem Uwa Sanbagiri angtane aa jem waksosisirim, angtane waakenfer eyebiliserem ane kabwakfer eyebiliserem, nunu jeiserem jeme angtane kota Niniwemana jei terewer ga sege irwebisi ibaner, aamei ga isene balbabisi, ‘Aameiba angtane etam-etamabaram, etam-etama kapka imnaiserem je unggwanfersus.’ ”

³³Yesus Jei gamjon ga balbabili, “Angtane pelitana aa jei gam dutanaram, jei pelitana jeiserem jam syetasiyen, afa jei burwa gwonap jam gaataaniwiyen. Jengga angtane pelitana aa jam gam dutanaram, jei pelitana jeiserem tampata dwafennaber ga gam gaarantena nafa gam folbafe, jega angtane jenap aa jei gangge kabwitenaram jei nafa ga gane domola.

³⁴Nwena imna ga lampunu galserem tifini imna seyafter gemerserem jebe. Afa nwena imna nafabara, tifni imna seyafter gemerserem ga is gam ge nafabarswebamini. Jes gamserem aaiserem jegme gemer, afa aamei taterisi Uwa Sanbagirmana jam isa taabilirim, ane taterisi jeiserem ga isa onsobili, gam jega aamei nafaber ga isa gwena. Jengga afa nwena imna is jam sege kabwakswebaminirim, tifni imna seyafter gemerserem ga isege gwinibersweipmini. Jes gamserem aaiserem jegme gemer, afa aamei taterisi Uwa Sanbagirmana ijama taabiyen, ane ijama onsobiyen, aamei gwiniber ga isa gwena.

³⁵Ga jem temawer, ga seger-segermer aamei in ina waakenfer isa gaaramisnenne, jega enggalf aamei nafaber gam isa gwena, ane aamei ijama gweyan gwinibe.

³⁶Afa aamei taterisi Uwa Sanbagirmana seyafter jam isa taabilirim, ane ga isa onsobili, ane aamei taterisi nafsi bastowaifer ijama taabiyen, gam jega aamei nafaber ga isa gwena. Nafap gwela jes gamserem, lampu nafa gamserem imnibe.”

³⁷Yesus Jame aa galap tabanwenaram jam nasowelabe, angtane safna Farisimana Yesus ga bala Jam twenfe jem jenabe. Jepga Yesus ga kautena jem jenabe enggalfe gam twenf.

³⁸Angtane safna Farisimana osiri agama jemna ga enggam, angtane jam twenfe gwanan ga tafas gam wirsona, jengga Yesus Jei tafna Jam wirsoyan Jei nalef Jam twenyan. Angtane safna Farisimana jeiserem jame aa galap damtanaram Yesus Jei tafna Jam wirsoyan, jei ga bitbitwena.

³⁹Ga jem temawer Tuhan Yesus angtane safna Farisimana jeiserem ga bala, “Bunarsus aamei angtane safna Farisimana, aamei numu daamfenna diwir mese ane pirin galserem, duruwerfener gane wirulu, jengga aaremap je oltunuboro. Aamei osiri imnaiserem waakenfer igama onsobili enggame, aamei tafna ga jam igama wirtabaabili, jengga ini imna is uskamer gangge folbamini, ane ini imna kapkaiserem buguf imnibe.

⁴⁰Aamei angtane teisyena! Aamke ijama towasweyan enggame Uwa Sanbagiri Jei tafna yo tifni imna sagap aaiserem Jei is mesam eyebaipmini, ane Jei mese Jeimba ini imna ane tifni imna orolap aaiserem Jei is mes eyebaipmini?

⁴¹Diwiri yo pirni imna jeiserem jep aa jei ge falbitonom, jeiserem angtane galgalyenaiserem jep isa kitulmini, jega jes gemerserem ini imna is ga sege waakenswebamini.

⁴²Aamei angtane safna Farisimana, galap kapka unggwandusa is etamwemisi ibe! Aamei Hukumu Nabi Musa aa jes tulistababilim, Hukumu jeiserem ga ima onsobili. Ane safe Hukumu Nabi Musamana jam guyon, aamei bumbunu ijeya damtabilirim, bumbunu jeiserem ga ima syentabaabili, ane afwer Uwa Sanbagirf ga ima kitulbono. [2] Jengga aamei kabwaksususerem ga ijesa eyeipmini angtane nafsiserem jebe, ane aamei Uwa Sanbagiri ijama nesikteyen. Kabwakfer eyebiyeneiserem angtane nafsiserem jebe, ane Uwa Sanbagiri ga jam igama nesiktene, jeiserem ga igsusu aamei ijesa eyebife, ane bumbunu jeiserem afwer ga isa kitulbono Uwa Sanbagirfe.

⁴³Aamei angtane safna Farisimana galap kapka unggwandusa is etamwemisi ibe! Aamei in ina igama tetena. Ini imna kapka ga enggam, ini imna unggwan-giri ga is enggalf ge folbamini, aamei kursini angtane sanbakmanaiserem jep igama nwinfe, jena angtane Yahudimana aa jep betwebuwefaram jebe. Ane ini imna saaser-saasera ga enggalf is gangge folbamini angtane pasarap aa jei gangge wofobilirim, jei enggam isa gane balbabife, ‘Gwinibener angtane sanbak.’

⁴⁴Galap kapka unggwandusa is etamwemisi ibe! Aamei ga enggala bitisi jam syawulsili galserem. Angtane aa jei gangge wofebilirim bitisi jam syawulsiliserem jem sagabe, jei jam ge towaswebiyen jei bitisip ge wofobili. Jes gemerserem aaiserem jegme gemer, aamei taterisi kapka ijesa eyebilirim ga ijama syawulsini, ane angtane jam ge towaswebiyen enggame aameiba angtane kapkam.”

⁴⁵Guru daamfenna Hukumu Nabi Musa aa jes tulistababilim aa jei towas-towastababuwenaram, jei Yesus ga bala, “Guru, Aamei jes Igam nasounaram, Aamei ai mese as Igemer imei-imeitababili.”

⁴⁶Yesus ga tamawolbana, “Aamei guru-guru Hukumu Nabi Musamana ijeya towas-towastababuwenaram, galap kapka unggwandusa is etamwemisi ibe! Aamei Hukumu Nabi Musamana ima nasipmuwena angtanefe, ane aamei taterisi angtanemana jes mese ga ima nasipmuwena. Aamei ga enggam ima nasipmuwena, angtane ga nawersamer sene tikwemitini, jengga angtane masef ne unggwasbili seyafter jeiserem jam tikwebitife. Ane aamei iner bastowaifer fas ijama batobaabiyen, jega angtane seyafter jeiserem ga sene tikwebitini aamei ijesa bilirim.

⁴⁷Galap kapka unggwandusa is etamwemisi ibe! Asal-asala ilemana jei nabi fwatermana mesam munbobil. Ane namwer aamei bitis jena waakensusu yo unggwandwasusu ga ima eyebaipmini toneme, bitisi nabi jeiserem jem tarnabe.

⁴⁸Aamei ijewera eyebilirim, aamei iner ima balbabili enggame, ‘Asal-asala nemna aa jes ne eyebilim jei waakena.’ Asal-asala imna jei nabi fwatermana jam ne sarbabiyen, ane ga aane munbobil. Aamei asal-asala imna galserem; aamei bitis jena waakena ga ima eyebili, jengga aamei mese nabi fwatermana aa jes ne bilim, jeiserem aamei ijama sarbabiyen.

⁴⁹Jega jem temawer, Uwa Sanbagiri seyafter aa jes towaswebabilirim, Jei ga enggam gunu, ‘Ai nabi ibirmi ane rasulu mese As baftabisi jemnibe. Afwer ga sene munbobisi, ane afwer ga sene tamtamtababisi.’

⁵⁰Ga jem temawer Uwa Sanbagiri Jei angtane namwer aa jei naawenaram se tamtamtababisi, nabi seyafter gwanan aa jewer ne munbobilim jem temawer, Uwa Sanbagiri ogiri aaiserem jam aa galap eyebalam,

⁵¹Habel aa galap ne munbolom jes jepserem ga jep towaiwel, maga gemer ne munbobuwel, jamere umwef Sakarya aa galap ne munbolom jebo. Sakarya jei jep ne munbol sitawer Jena Uwa Sanbagirmana, aawer ga mejana Uwa Sanbagirmanaiserem ga jem nenennap ne munbol. Ai bunarsusfer ims towas-towastababili, aamei ijeya gwenaram namwer aa jep falaram, Uwa Sanbagiri ga is tamtamtababisi, nabi seyafter aa jei ne munbobilim jem temawer.

⁵²Aamei guru-guru Hukumu Nabi Musamana ijeya towas-towastababuwenaram, galap kapka unggwandusa is etamwemisi ibe! Aamei taterisi Uwa Sanbagirmana kabwakfer ima towas-towastababili, ane jega jem temawer ini angtanemana ijeya sarbaipminirim, ini jemna jam ferwetiyeneiserem enggalfe taterisi Uwa Sanbagirmana waakenfer jewer gam sarbif. Aamei taterisi Uwa Sanbagirmana iner ijama taabiyen, ane angtane aa jei gam gunurum jei taterisi Uwa Sanbagirmana jam ne taabife, aamei angtane jeiserem ga ijama uftabili, ane jei taterisi Uwa Sanbagirmana jam ne taabiyen.”

⁵³Yesus tampata jeiserem aa galap mirultefalaram, guru-guru Hukumu Nabi Musamana aa jei ne towas-towastababuwenaram, ane angtane safna Farisimanaiserem jes mese, jei Yesus uskambar ga aane nasbana. Ane jes jepserem jei ga aa towaiwena Yesus uskambar ne teneba-tenebawena taterisi nenes-nensaiserem jem temawer,

⁵⁴enggalfe jei Yesus jam ne unggwasbaf. Afa Yesus taterisi syefer jam se nasbabilirim, angtane jeiserem enggam ga sege gubili, “Yesus Jei kapka.”