Read Berik Lukas 13 Bible Online

Lukas 13 - Berik bible

Lukas 13

¹Jes jepserem angtane afweraiserem Yesusfe enggam ga aas ne nasibene, “Angtane Galileyamana afweraiserem jei apgal jigala Uwa Sanbagirfe aa galap ne kitulbonontom, jes galapserem Gubernur Pilatus jei angtane jeiserem ga munbobilint.”

²Yesus ga balbabili, “Ilem inip enggam ipsama gunurum, ‘Angtane Galileyamana jeiserem jes gamserem aa gemer ne munbobilintim, aam temawer angtane Galileyamana jeiserem etam-etama jemna unggwanfersus angtane Galileyamana seyafter afweraiserem jemniwer.’

³Fas, gamyan! Etam-etama jemna unggwanferyan angtane nafsiserem jemniwer. Jengga Ai ims towas-towastababili, afa aamei ijama irfweyanaye etam-etama imnaiserem jewer, aamei seyafter aafer-aafer ga isa tere angtane jeiserem jes gemerserem.

⁴Jes gemerserem aaiserem jegme gemer, angtane delapan belas jena bubwaldusa aa galap ne eyebilintim enggalfe kota Siloam jewer gam gerebaasnenef, jena bubwaldusa jeiserem angtane delapan belas jeiserem jem sagap ga jenant, ane angtane jeiserem ga jubobili, jamer futu. Aamei ilem inip enggam ipsama gunurum, ‘Angtane jeiserem aa jei ge terbilirim, etam-etama jemna unggwanfer etam-etama angtane seyafter afweraiserem jemniwer aa jei ge nwinbenerem kota Yerusalem je.’

⁵Fas, gamyan! Jengga Ai ims towas-towastababili, afa aamei ijama irfweyanaye etam-etama imnaiserem jewer, aamei seyafter aafer-aafer ga isa tere angtane jeiserem jes gemerserem.”

⁶Jewer ga Yesus seisya taterisi aaiserem ga nasbili: “Angtane aasaje jelem anggur makanabe ara tini aasaje ga jep fina. Jei makanap jeber-jeber sofwena, ara tanna masef terelbaabili.

⁷Ga jem temawer jei angtane makana jemnaiserem awelna jep aa jei gwebilirim ga bala, ‘Aiba tahunu nawer-ningna ai ajam forowelabe ara tini aaiserem ai jem igiserem ga ajes terelbaabuwena, jengga fas igi tini aaiserem afa ajam domolyan. Ja se balansi! Jei baf se fina aafe? Tini nensa tannabaraiserem samfer aaf ga jes is tonola.’

⁸Angtane awelna makanap aa jei gwebilirim ga tamawola, ‘Uwa safnant, gwanan jege ten tahunu aaiserem jeme. Ai samfer tini aaiserem as gweyini.

⁹Jei kese tena tahunu gamjon jitefweraiserem jeme. Jengga afa jei fas jam teyanaye tahunu jitefweraiserem jeme, sya aamei safis bili jam balansife.’ ”

¹⁰Nunu Sabat afweraiserem jeme, Yesus Jei angtane ga jem towas-towastababili jena afelna angtane Yahudimana aa jep ge betwebuwefaram jebe.

¹¹Jes jepserem wini aasaje ga jep nwini. Bwat kapka mes kautena wini jeiserem jemnibe, ane jega jem temawer jei bwernabara. Wini jeiserem jei bwerna jamer falbilibe tahunu ga delapan belas. Jega jem temawer jei aanwesirmer gam wofena, ane jei nornorfer masef jam fyafe.

¹²Yesus wini jeiserem jam aa galap domolaram, Jei wini jeiserem ga jenbiwili Jemnibe, ane ga bili wini jeiserem, “Iye, aamei imes ferwetini bwernawer!”

¹³Jepga Yesus ga tafna tosoniwili wini jeiserem jem sagabe, ane jes jeberserem wini jeiserem nornorfer ga fina, ane Uwa Sanbagiri ga pujitene.

¹⁴Jena angtane Yahudimana aa jep ge betwebuwefaram, angtane sanbaka jena jeiserem jei Yesus ga aa nasbana, aam temawer Yesus Jei wini aa jewer waakenulurum nunu Sabateme. Angtane sanbaka jeiserem angtane jep aa jei ge nwinbenerem ga balbabili enggame, “Nunu enam ga aare enggalfe angtane awelnap jem gwef. Nunu enam jeiserem aamei ga jem igama jela enggalfe, aamei bwernawer is jem gam ne waakentababife, jengga nunu nei nejama nwinsiwefaram jeme, safnant ijama jelyan!”

¹⁵Tuhan Yesus angtane jeiserem ga tamawolbana, “Aameiba angtane akar-akarem ijeya gwenaram! Aamei nunu nei nejama nwinsiwefaram, aamei nunu jeiserem jem ga enggam igama eyebili, aamei sapi afa keledai imna enggam igama batobaabili, aamei jam igama fertebaabisinirim kandangawer, ane ga igama aftabifele sitawer enggalfe fona gane telbebif.

¹⁶Afa aamei jes gemerserem igama eyebiliye nunu nei nejama nwinsiwefaram jeme, Ai aamei isa Ajam tenebaabili wini aaiserem jem temawer. Jeiba asal-asala Abrahammanam, ane bawas jei wini aaiserem mes taabili bwerame, abaka ga enggammer tahunu delapan belas. Ke enggam wini aaiserem jei safnant jam batobiyen jam waakenulfe nunu nei nejama nwinsiwefaram jeme?”

¹⁷Yesus Jei gam aa jewer balbabilirim, angtane Yesus aa jei ne uskamswebanaram jei ga aa ge seferswebili. Jengga angtane seyafter afweraiserem ini jemna saaser-saaserfer ge folbamini seyafter waakensususerem Yesus aa jes eyebilirim jeiserem jame aa galap ne domolaram.

¹⁸Jepga Yesus gamjon ga tenebaabili, “Ai fomfom As armansosini nunu Uwa Sanbagiri Jei aa jem nwinirim anggwabura seyafter gemerserem jem Sanbakfe? Ai seisya taterisi nunu jeiserem jem temawer Ai isa gam Age nasipmi, jega aamei waakenfer gam isa sarbili enggame angtane Uwa Sanbagirem gwonap aa jei naawelaiserem ba sege etamwebili unggwanfersus.

¹⁹Nunu jeiserem ga enggam fala taterisi aaiserem eremu tanem temawer gamserem: Angtane eremu tanna bastantouya gam goltena, ane jelem makanap ga gam tonola. Eremu tan bastantouya jeiserem ga gangge kokosbili, ane ga gam etamwena tini unggwandwasfe. Tini jeiserem jem tirnibe junu ga gola jep ga gane eyebaabili.”

²⁰Yesus gamjon ga balbabili, “Ai taterisi gamjon isa Ajes nasipmif ibe, nunu Uwa Sanbagiri Jei aa jem nwinirim anggwabura seyafter gemerserem jem Sanbakfe jem temawer, jega aamei waakenfer gam isa sarbili enggame, galap angtane taman-tamna unggwanfersus aaiserem jei Uwa Sanbagirem gwonap gase naawesa.

²¹Nunu jeiserem ga enggam se fala taterisi aaiserem roti tanem temawer gamserem: Wini roti tan bastantowaifer aa galap tetelam, ane tepungu unggwanfer ga enggammer empat pulu liter waakenfer jebaner gam dupdupbulu, roti tanna bastowaifer jeiserem tepungu unggwanfer ga je gam gwebili jam taweyafe, jepga rotif ga gam etamwena.”

²²Yesus Jei Jame aa galap sofnaram Yerusalemwer, Jei ga kota-kotasamer sofna ane taman-tamnap mese, angtane jep ga aa towas-towastababinenne.

²³Angtane aasaje ga Yesus ga tenebana, “Uwa, angtane jes waakentababisiliserem ke bastantowaifer?”

²⁴Yesus ga tamawolbaabili, “Jam isa unggwasa uskambar pintunu olosaiserem jep kautefe. Ai ga isa gam towas-towastababili jes gamserem, aam temawer angtane anesus aa jei ge unggwasbilirim pintunu olosaiserem jep kautefe, jengga jei fas jam ge kabwiteyan.

²⁵Angtane jena jam jemanserem jam aa jep gam irwenaram, ane pintunu ga gam matasini, aamei ga sitawener igama fina, ane pintunu ga igama enentewili jamer igama jenbene, ‘Uwa, pintunu as tertemisiwiye abe!’ Jengga Jei enggam ga gam tamawola, ‘Ai teisyena aamei fwermana.’

²⁶Jepga aamei ga igama bala, ‘Aiba nemsama twena Ibar; ane Aameiba angtane Imsam towas-towastababili tamna amnaiserem jebe.’

²⁷Jengga Jei gamjon ga is gam balbabili, ‘Ai teisyena aamei fwermana. Jasa gwisi Amniwer, aamei etam-etama kapka aameiya eyebuwena!’

²⁸Aamei Abraham mese Isak, Yakub, ane nabi seyafter gemerserem ga isa damtabisi taman waaken-girip aa jei ge nwinbenerem ini saaser-saasereme. Jengga aamei ijama kaweteyan jei aa jei ge nwinbenerem jebe, ane jepga aamei ga isa syenansa, ane ini imna siginsusfer ga isa entebisi, ane ini imna uskambar ga isege jenbamisi.

²⁹Angtane ga sege forobuwetya ogiri seyafter gemerserem jewer, ane jei ga sege nwinbese seyafter Uwa Sanbagirfar taman waaken-giribe. Ane jei mese ini jemanme ga sege saaser-saaserswebamisi.

³⁰Bunar-bunarsus jes jepserem angtane enggam aa jes ne balbabilirim bastantana jei ga sege danabisi, ane angtane enggam aa jes ne balbabilirim sanbaka jei amnuwer sege fibili.”

³¹Jes galapserem, angtane safna Farisimana afwer ga aa ge jalbili Yesusminibe, ane Yesus ga aane bala, “Ona aaiserem Jase mirtetefal, ane ga Is sofwa ona nensaiserem jewer, aam temawer Raja Herodes jei Ims munbof.”

³²Yesus ga tamawolbaabili, “Jasa sofwe Herodesminip, angtane afaf-afafaiserem. Ane ga isa bala Ai enggam Ai gunu, ‘Ai nunu abakferyan, Ai bwata kapkaiserem Ajes surbobif, ane angtane bwernabaraiserem Ajes waakentababif. Jeiserem taban, Ai awelna Alemana ga jem As borolsini.’ Herodes ga jes gamserem ga gam isa towastana.

³³Ai awelna Ajam gwebif nunu namwer aaiserem, ane gwirmer mese jem. Ane Aime jamer As sofwa Yerusalemwer, aam temawer bunarsus nabi jei jam ne munboyon tamna nafsiserem jebe, jengga Yerusalemwer ga jep sene munbono.”

³⁴Yesus Jei gamjon ga balbabili, “Aamei angtane kota Yerusalem ijeya nwinbenerem! Ini Amna kabwakfer folbana, aam temawer aameiba angtane nabi aameima munbobuwena, ane aameiba angtane Uwa Sanbagiri aa jes baftabilirim, angtane jeiserem aameima munbobuwena toneme. Ini Amna unggwan-girfer ga As enggam folbana, Ai isa jam dupdupbulsif Alem tarnap, ayang ga eneserem jei tanna jelemana aa gemer gam dupdupbulsinirim jelem farat gwonabe. Jengga aamei Amnip bai ijama betwefe.

³⁵Ga jem temawer, Uwa Sanbagiri Jei im nenennabe fas Jam nwinyen, ane kotana imnaiserem ga is kabwakswemisi. Ai ims towas-towastababili, aamei gamjon Ase ijama damtayan jamere Ai gamjon As forsanya. Jes jepserem aamei ga isa gutesa enggame, ‘Uwa Sanbagiri Jei waakena Jelemanaiserem ga Jei se gulbana, Angtane aa Jei fortyaram Tuhanem boseme!’ ”