Read Berik Lukas 15 Bible Online

Lukas 15 - Berik bible

Lukas 15

¹Nunu nafsi jeme angtane pajak doini aa jei gane tebabinennerem, jei doini jeiserem pemerintafe ga gane kitulmini, ane angtane etam-etamabara afweraiserem jei Yesusminibe ga aa ge forobuwetya enggalfe Yesus gane sarbasif.

²Ane angtane safna Farisimana ane guru-guru Hukumu Nabi Musamana aa jei ne towas-towastababuwenaram, jei Yesusem temawer ga aa ge gubili ini kabwakeme. Jei ga enggam ne bala, “Angtane aaiserem Jei angtane etam-etamabara gam tebabili, ane Jei jebar seyafter ne dwena. Jeiserem kapka!”

³Angtane jeiserem gam aa jewer ge gubilirim, Yesus ga jem temawer seisya taterisi jepga nasipmini. Seisya tateris jeiserem ga aas:

⁴“Afa angtane imniwer dombana jemna 100, ane daamfenna ga gam sofna bijuaber jamer tatait, angtane jeiserem ga bas gam eyebili? Bunar-bunarsus jei dombana 99 afweraiserem jam gam firtebitefala tampata jelemana kakatarabaraiserem jebe, ane ga gam sofna dombana daamfenna aa jei gam sofnaram bijuaber ga jes gam terelbene, jamere dombana jeiserem gam damtana.

⁵Jei dombana jeiserem jam aa jep gam damtanaram, ini jemna ba gam saaser-saaserswebana. Ane jei dombana jeiserem ga gam tinggina malmabe,

⁶ane ga gam girinfeltye jamere jenabo gangge fortya. Jewer ga jei jelem afelen mesna ane angtane jena jem gwetmanfer aaiserem angtane jepmana ga gam jenbebili, ane ga gam balbabili, ‘Dombana amna aa jei sofnaram bijuabe ai ames damtana! Ini amna as saaser-saasersusfer folbana! Au, nei ini seyafter nes gangge saaser-saaserswebami, ane masara ga nesa eyebili!’ ”

⁷Ane Yesus gamjon aaiserem ga nasipmini, “Ane jes gemerserem aaiserem jegme gemer. Ai ims towas-towastababili, Uwa Sanbagiri ane malaikata taman waaken-giribe ini jemna saaser-saasersusfer gangge folbamini angtane daamfenna jei jam gam tikwenaram etam-etamawer, angtane 99 afweraiserem jemniwer jei aa jei ge gubilirim enggame, ‘Ai etam-etama fas, ai safnant ai ajama tikweyan etam-etamawer.’ ”

⁸Yesus Jei gamjon ga balbabili, “Afa enggam wini aasaje doini jemna sepulu perak, [3] ane daamfenna ga gam anggabisini, wini jeiserem ga bas gam eyebili? Jei pelitana ga gam dutana, ane jena ga gam gwisirni, ane doi perak daamfenna jeiserem aa jes gam anggabisinirim samem-samem ga gam terelbili jamere doini jeiserem gamjon gam domola.

⁹Jei doini jeiserem jam aa jep gam domolaram, jei jelem afelen mesna, ane angtane jena jem gwetmanfer aaiserem angtane jepmana ga gam jenbebili, ane ga gam balbabili, ‘Doini amna ajes anggabasinirim ai ames domola. Ini amna as saaser-saasersusfer falbili! Au, nei ini seyafter nes gangge saaser-saaserswebami, ane masara ga nesa eyebili!’ ”

¹⁰Ane Yesus gamjon taterisi aaiserem ga nasipmini, “Ane jes gemerserem aaiserem jegme gemer. Ai ims towas-towastababili, malaikata Uwa Sanbagirmanaiserem ini jeman jegme gemer gangge saaser-saaserswebamini, afa angtane daamfenna jei jam gam tikwenaram etam-etamawer.”

¹¹Yesus Jei gamjon ga balbabili, “Angtane aasaje tanna jemna girtowai naura.

¹²Osonaiserem jei jeta ga bala, ‘Uwa, aamei jam is tererem, ai alem ayafar galgala seyafter imnaiserem ai ga as ge waksosini. Amnaiserem ajas kitulbo namwener.’ Ane jetaserem jei galgala jelemana jeiserem ga waksomini tannawan jelemana jeiserem jebe.

¹³Nunu abakefyan tanna osonaiserem galgala jelemana jeiserem ga jualtababili, ane ga sofna negeri bijauwabe. Jep ga jei doini jelemana ga bartana gwela kapkaiserem jeme.

¹⁴Doini jemna seyaftersus aa galap bartanaram, wisi unggwandusa ga etamwena negeri jeiserem jebe, angtane negeri jeiserem seyafter amkom fom ge terbili. Ane tanna jeiserem apgal jigala fas afa jam domolyan.

¹⁵Ane tanna jeiserem ga sofna angtane negeri jeiserem jepmanaiserem jemnibe, jega enggalf awelna jemnip gam gwebif. Angtane jeiserem jei tanna jeiserem ga baftana makanabe, twena gam gerebaabisnenef.

¹⁶Jei wisi uskambarsus jame aa galap folbanaram, jei ini ga folbana tumilgal tomna twenmana jeiserem gam tombaabif, jengga angtane afa fas tumilgala jep jam ne gulbayan.

¹⁷Umwef ga, jei ini waakena gamjon ga damtana, ane jes jepserem jei enggam ga gunu, ‘Ai kapka gam eyebili ane kabwaktala amna uskambar.’ Ane jei ga sarstaabona, ‘Angtane awelna uwaminip aa jei ne gwebilirim tumilgala jemna ga anesus, jengga ai aafe amkom afom tere wisefe!

¹⁸Waakenfer ai jam age sofwe namwer, uwaminip as warauwa. Ane uwa ga as bala: Uwa, ai etam-etama anesus ames eyebili, Uwa Sanbagirminip ane imnip mese.

¹⁹Ga jem temawer ai gamjon as jam ne balyan im taneme. Ai ga ase enggam isa bala ai awelna imna gam gweyibef, angtane afweraiserem awelna imna aa jei ne gweyibenerem jes galserem.’

²⁰Ane jei ga sofna, gamjon ga warauwa jetaserem jemnibe. Jenawer ga bijaususu, jetaserem jei tane jeiserem fwater damtana. Jetaserem jei tanna jeiserem unggwanfersus ga nesiktene, ane ga nunggirwena taneminibe enggalfe jei jewer gangge dorwef. Ane jei tafna ga taayibene, ane ga bala, ‘Isamfer fortya.’

²¹Tanna jelemana jeiserem jeta ga bala, ‘Uwa, ai etam-etama anesus ames eyebili, Uwa Sanbagirminip ane imnip mese. Ga jem temawer ai gamjon as jam ne balyan im taneme.’

²²Jengga jelem jeta jeiserem angtane awelna jemna aa jei ne gweyibenerem jei ga jenbebili, ane ga balbabili, ‘Tatar! Fene waakensusuter fen sagap kamwiliserem isa tetena, ane ga isa kaiyimbene jebe! Cincingi ga isa gerebaawili tafnabe, ane sepatunu ga isa kaiyimbene tufabe!

²³Seyafter jeiserem jame aa jep tabanulurum, sapi tanna telebere ga isa gaartena, ane ga isa tegila, jega nei jes nesa tombana, ane masara ga nesa eyebili!

²⁴Seyafter jeiserem isa eyebili, aam temawer tane amnaiserem jei jam tere gamserem ga gam sofwel, jengga namwer jei gamjon mes waraufaltya terewer. Jei mesam sofwant bijuabe, jengga namwer gamjon nemsa damtana.’ Ane jei masara ga aane towaiwulu.

²⁵Tanna osonaiserem jei aa galap fortyaram, jes jepserem tanna ayanaiserem jei awelna ga makanap gwebili. Awelna taban, jei gamjon ga warauwa jamer ja gwetmanabo. Jei ga uru yo gitar tisna jep ga sarbabili, ane aa jes ne tesarabilirim jem tisan mesna ga sarbabili.

²⁶Jei tane taini afwer aaiserem ga jenbene, ane ga tenebana, ‘Uru yo gitar tisna jenap aaiserem jeje bafa?’

²⁷Tane taini jeiserem ga tamawolbana, ‘Im oso mes waraufaltya! Ane uwa imnaiserem ga ase jei balbabili sapi tanna telebereiserem jes tegilfe, aam temawer uwa jei tanna gamjon mes damtana tifni waakenmer.’

²⁸Tanna ayanaiserem ga kakalswena. Ga jem temawer jei bai jenabe jam kawetefe. Ane jetaserem ga totintye, ane ga malin-malintene jam kawetefe.

²⁹Jengga jei jetaserem ga bala, ‘Uwa, aike namwer awelna imna uskambar isa jamer gweyibowelabe tahunu ane-anesus? Ai fasfasus aamei awelna as jes igam bilibenerem abe, ai isa jam saribaasiyen. Ai seyafter jes igam bilirim, ai agam eyebili. Jengga Uwa, aamei gemerje ayang tefner abe as ijam gerbayan enggalfe, ai masara ajam eyebif alem afelen mesnaiserem jebar!

³⁰Jengga tane imna jeiserem, jei galgala imna is jei barbarulbono wini maaryen-maaryenaiserem jebar! Ane jei jame aa galap warautnaram imnibe, aamei ga sapi tanna telebereiserem ga im gerbana jebe!’

³¹Jetaserem ga tamawolbana, ‘Am tane, aamei nunu jeber-jeber aamei abar nei seyafter nes nwinwena. Galgala amna seyafter aaiserem jeba imnam.

³²Jengga nei ga masars nesa eyebili, ane ini nemna ga nese saaser-saaserfer sege folbamini, aam temawer im oso jeiserem jei jam tere gamserem ga gam sofwel, jengga namwer jei gamjon mes waraufaltya terewer. Jei gwanan mesam sofwant bijuaber, jengga namwer nei nemsa damtana.’ ”