Read Berik Lukas 17 Bible Online

Lukas 17 - Berik bible

Lukas 17

¹Yesus angtane Jei aa jei ne tikwebaatinennerem ga balbabili, “Angtane bunarsusfer unggwasbala ba gane domola etam-etama kapka jam eyebife. Jengga angtane, jei angtane nafsi jam aa jei gam unggwasbaabilirim kapkaiserem jam eyebife, angtane jeiserem aa jei gam unggwasbaabilirim jei tamtamtala unggwandwasusu galap se domolsa.

²Afa tuna unggwan-girsusu daran-darnaiserem jam gane tafrebaasiwilirim jem botonabe, ane jei ga gane firtaaniwili finibe enggalfe angtane jeiserem jem gam tamtamtafe, tamtamtala jeiserem bastouya. Jengga tamtamtala Uwa Sanbagirmanaiserem jei unggwandwasusu tamtamtala jeiserem jemniwer. Afa angtane jei angtane Ai ibirimfer As jei tebanaram, angtane jeiserem jei jam gam unggwasbanaram etam-etama kapka jam eyebife, Uwa Sanbagiri Jei tamtamtala unggwandwasus gase gulbasa angtane jeiserem jebe.

³Jeiserem ga jem temawer, in ina ga waakenfer isa gaaramisnenne, jega aamei angtane nafsiserem ijam unggwasbaabiyen.” Yesus Jei gamjon ga balbabili, “Afa ilem afelna kapkaiserem is jes gam eyeibenerem ibe, jei ga jam igam uftana. Afa ini jemna jam gam jenbanaram etam-etama aa jes gam eyebilirim jem temawer, aamei ga jam igam borolbana.

⁴Afa jei etam-etama kapka tuju kali imnip jam gam eyebaabilirim nunu daamfennaiserem jeme, ane jei imnibe jeber-jeber ga gam jalwena, ane ga gam gutena, ‘Ini amna ajam jenbana ai etam-etama kapkaiserem ames eyebili imnibe’, afa ga gam jes gemerserem, aamei ga etam-etama jemna jeiserem ga jam igam borolbana jeber-jeber.”

⁵Rasulu jeiserem Tuhan Yesus ga aane bala, “Tuhan, ini amna as baabetabartabaipmi, jega ai Uwa Sanbagiri ginggitfer gam asa tebana.”

⁶Tuhan Yesus ga tamawolbaabili, “Afa aamei Uwa Sanbagiri bastowaifefener isa tebana, nana tan bastantowaisusu gemerserem, aamei samfer tini unggwandusa aaiserem isa bili, ‘Aamei jase malti, ane ina finip ga is guru!’ Ane tini jeiserem ga is gam sarbana, ane jes ga gam maltini, finip jena ga gam guru.”

⁷Yesus Jei seisya taterisi aaiserem ga jes nasipmini: “Taterisi aaiserem ga ilem iniber jafner isa bilsini: Afa angtane imniwer jei angtane nafsiserem jam gam damtanaram enggalfe awelna jemnip gam gwebif, afa makanap gam gwena, afa dombas gam gerebaabisnenne, angtane jeiserem jei aa galap gam warautnaram jenabe, angtane sanbaka jemna ke enggam gam bala, ‘Au, tatarfer gas twen!’?

⁸Bunarsus fas, gamyan! Jengga sanbaka jemna jei enggam gam bala, ‘Tumilgala ap as menetabaibesi! Fene ga is kabwabili, fene awelna jenap ijebar gwebuwenaram. Ane aamei ai ga as is batobana ai ajep twenaram. Afa ai jam as twenaram jamer taban, aamei jon ga is twena.’

⁹Angtane awelna nafsimana aa jei gam gwebilirim, jei jame aa galap eyebilirim sanbaka jemnaiserem aa jes gam bilibenerem jam eyebife, sanbaka jemna jei jam balyan enggame, ‘Ase samfer gulbana.’ Wowo, gamyan.

¹⁰Taterisi jeiserem jem igiserem ga aas: Afa aamei jam igama eyebilirim seyafter is jes gane bilipminirim ibe, in ina ijama tetenanayan jeiserem jem temawer. Jengga aamei ga enggam igama gunu, ‘Aingga awelna angtane nafsiserem ai ajemna tefner aya gwebili. Aingga awelna alem sanbakmana tefner agma gweyibene jei aa jes gam bilirim jam eyebife.’ ”

¹¹Yesus aa galap sofnaram kota Yerusalemwer, Jei ga ayenni ona Samarya yo ona Galileya jem nenennabe.

¹²Jei jame aa galap fornaram tamnabe, angtane sepulu tifin bwernabara ga aa ge jalbili Yesus ne damtafe. Jei bijauwener ge fibitne,

¹³ane ga aa ge gwarenbili, “Yesus! Uwa! As nesiktababi!”

¹⁴Yesus Jei angtane jeiserem jame aa galap damtabilirim, Yesus ga balbabili, “Sya, Ai isa Ajam waakentababili. Imamminip sa sofwe. Ane jei ga isa balbabili tifni imna ga isene damdamtabaipmini.” Nomkefe aa jebar ge sofobilirim imamminibe, jemna tifin bwerna ga aa ge waakensweipmini.

¹⁵Angtane daamfenna jemniwer aaiserem, jei jen jena ga damtana, “Wa aiba amsam waakenswel!” Jepga jei gamjon ga warautna Yesusminibe, ane Uwa Sanbagiri ga pujitene, uskambar ga gowena.

¹⁶Ane jei jener ga jena Yesusem tufabe, ane ga bala, “O Yesus ase samfer gulbana. Ai ames waakenswel!” Angtane jeiserem jei angtane Samaryamana, jei angtane Yahudimanyan.

¹⁷Ane Yesus ga gutena, “Gam ke angtane sepulu ga Agam waakentababili? Angtane sembilan afweraiserem jei ga fwera?

¹⁸Jeje bafa angtane Yahudimanyan aaiserem ga jenfentowai warautya, ane Uwa Sanbagiri ga bala, ‘Asi samfer gulbana?’ ”

¹⁹Ane Yesus ga angtane jeiserem ga bala, “Gase irwe, ane ga is sofna. Aamei Ai waakenfer As imes tebana, jega jem temawer aamei gase waakenswe.”

²⁰Angtane safna Farisimana afwenefener Yesus ga aane tenebana, “Uwa Sanbagiri Jei fonggalabar se towaiwena anggwabura seyafter gemerserem jem Sanbakfe Jam gwefe?” Yesus ga tamawolbaabili, “Nunu Uwa Sanbagiri Jei aa jep gwenaram anggwabura seyafter gemerserem jem Sanbakfe, angtane jei waakenfer jam ge sarbiyen enggame nunu jeiserem mesam fortya.

²¹Angtane jei enggam jam ge gubiyen, ‘Au, gasa damta, aaiserem ga Jei!’ afa ‘Jei aaroi!’ aam temawer Uwa Sanbagiri mes towaiwena im nenennabe Sanbakfe Jam gwefe.”

²²Jepga Yesus angtane Jei aa jei ne tikwebaatinennerem ga balbabili, “Nunu jam se falaram, ini imna unggwanfer ga isege folbamini nunu daamfenna jeiserem ijama domolfe nunu afweraiserem jemniwer, nunu Ai Tane Angtanemana Ai Ajem foryalaiserem. Jengga jes jepserem aamei fas As ijama damtayan.

²³Angtane aamei ga isene balbabisi, ‘Jei aaure!’ afa ‘Jei aafre!’ Jengga safnant, aamei angtane jeiserem ijama onsobaabiyen,

²⁴aam temawer Ai Tane Angtanemana, Ai gamjon aafer-aafer Ajep forsanyaram ogiri aaiserem jebe. Ane jes jepserem angtane seyafter ga sege towaswebisi Ai Amsam fortya, angtane iris nafa jam damtala gamserem. Angtane seyafter jei samfer iris nafa gane domola jam bwertalabe winsi fwesawer jamere winsi afwer fwesabo.

²⁵Jengga Ai nalef Ajam foroyan, Ai Tane Angtanemana, Ai gwanan tamtamtalaiserem unggwanfer As gwirni. Ane angtane namwer aas jepserem aa jei naawenaram jei Ai As baif sene gwebana.

²⁶Nunu Ai Tane Angtanemana, Ai gamjon Jam Ajep forsanyaram ogiri aaiserem jebe, angtane jes jepserem jei enggam se naawesa, angtane fwatermana gamserem jei aa gemer naawelam, nunu Nabi Nuh aa galap gwelam jes gamserem.

²⁷Angtane jes galapserem ga jafner naawel, tumilgal mese fo ga jetefer ne dumilwel, ane wini yo anggwana jena ga aane detwel, jamer nunu Nabi Nuh atdusap aa ge kabwitel. Ane jepga fona ga til, angtane seyafter jepmanaiserem ga aa ge albitil.

²⁸Nunu Ai gamjon jam Ajep forsanyaram, angtane jes jepserem jei enggam se naawesa, angtane fwatermana gamserem jei aa gemer naawelam, nunu Lot aa galap gwelam jes gamserem. Angtane gwanan jes galapserem jafner naawel, ga aane dwenwel, ane galgala ga aane jualtababuwel, afwer jei jam ne armantababuwel, makan gane gwebana, ane jena gane eyebili.

²⁹Jengga nunu Lot kota Sodom aa jem mirsotefalam, nunu jes jemerserem Uwa Sanbagiri ga tokwana yo beleranga ga jem bafsunnul winsiwer, arouwa galserem. Ane angtane seyafter jepmanaiserem ga aa ge taabisil, jamer fus.

³⁰Jes gemerserem nunu Ai gamjon Ajep forsanyaram, angtane aafer-aafer ga sege wasferwebisi.

³¹Nunu jes jepserem jeme, angtane jelem ja sitawer aaiserem, jei gamjon jam ge kabwiteyan jelem jenabe enggalfe galgala gam kitultaabonfe mwonawer. Ane angtane makanap gwelaiserem jegme gemer. Jei gamjon fas jam warauyan enggalfe galgala gam ne kitultaabonf jenawer.

³²Gasa sarbistaabon ga bai etamwel wini Lotmanaiserem jemnibe! Ini jemna jam janbil galgala jelemana aa jes mirtebitefalam jem temawer, ane jei ga irfwel kotana jeiserem jes domsofe, ane jei ga ter.

³³Angtane afa aa jei gwenaram jelem galgalem temawenefener, jei waakenfer gwelaiserem jamer abak-abaksus jei jam domolyan. Jengga angtane aa jei gam gwenaram Am temawer, jei ga waakenfer gwelaiserem jamer abak-abaksus ga jei gam domola.

³⁴Ai ims towas-towastababili, gwini jeiserem Ai Ajep forsanyaram, angtane naura mwona daamfennaiserem jep aa jei gangge tanaram, malaikata Amna angtane naura jeiserem jei afelna tefner ga gane gaartesa, ane afelnaiserem jei jeber gane mirtetefalsa.

³⁵Ane wini naura tumilgala aa jei gangge eyebilirim, wini naura jeiserem malaikata Amna jei afelna tefner gane goltesa, ane afelna ga jeber gane mirultefalsa. [

³⁶Anggwa nauna makanap aa jei gangge gwenaram, jegme gemer.]”

³⁷Angtane Yesus aa jei ne tikwebaatinennerem jei Yesus ga aane tenebana, “Tuhan, jeiserem ga fwer se etamwena?” Yesus ga tamawolbaabili, “Bunar-bunarsus aamei Ai As isa damtasa Ai gamjon Ajep forsanyaram, jes gamserem junu unggwan-gwansusu bunar-bunarsus jei matau futunu gemer gam domolaram onabe, ane jep ga gangge betwebili.”