Read Berik Lukas 2 Bible Online

Lukas 2 - Berik bible

Lukas 2

¹Nunu jes jepserem, angtane bosna Kaisar Agustus, jei ga jei nwini sanbakfe anggwabura seyafter aa jei naawenaram, negeri seyafter pemerinta Roma mes tebabili. Ane jei ula ga enggam baafulu, anggwabura seyafter aa jei naawenaram negeri seyafter jeiserem jebe, jei bosna jam baatulnonof, ane angtanes eterbif sensusup.

²Sensus aaiserem ga gwanansus aa jes ne baatulnonolom, Kirenius aa galap gwenaram Gubernurfe, propinsi Siryaminibe.

³Jepga angtane seyafter ga aa ge sofobili jelem tamnap, bosna gam baatulnonof.

⁴Ga jem temawer Yusuf ga sofwa tamna Nasaret ona Galileya je, jamere tamna Betlehemminiwer ona Yudeya je. Betlehem jei tamna Yusufmana, aam temawer asal-asala jemna, jemna bosna Raja Daud, jep surul.

⁵Yusuf ga aa ge sofna Mariafar, bosna gam batsotef. Maria ba mesam gununt Yusuf gaarfe. Jei udanabara,

⁶ane jei Betlehemminip aa gemer ge nwinirim, ga forobitye nunu Mariafe Tanna jewer geref.

⁷Jei girtowai Tanes gerna, usaber tane. Tane jeiserem ga taferna fene bubwalna jeme. Jepjon ga aa gaarantena ofo tumilgala tampa aa jep ne bunulmintonaram, aam temawer jei jena jam ge domolyan jep nwinfe, jena angtane aa jep ge forobuwetyaram.

⁸Gwini jeiserem angtane afweraiserem dombana aa jei ne gerebaabisnennerem, jei domba jelemana ga aane gerebaabisnenne ona kakatarabe, tamna Betlehem jem gwetmanabe.

⁹Malaikata Tuhanmana jena ga gweretana jemnibe, ane nafa Tuhanmana ga aa jertye jem eyebe. Jepga jei uskambar ga aa ge erebili.

¹⁰Jengga malaikata jeiserem ga enggam balbabili, “Ipsama ernerem, aam temawer ai ajewer jela taterisi waakena gam gwirinmiyele ibe. Angtane seyafter gemerserem ini jemna saaser-saaserfer ga sege folbamini taterisi aaiserem jem temawer.

¹¹Gwini aaiserem ga jem surnu, tamna Raja Daudmana, Angtane iJei gam waakentaasinirim. Jeiba Kristusam, Angtane Uwa Sanbagiri bunarsus aa Jes balam Jam baftanaf enggalfe angtane gam waakentababisif! Jeiba Tuhansam!

¹²Aam ga enggam isa towaswena taterisi amna ba bunaram: aamei isa damtana Tantowai fene bubwalnem tafresili, ane Jei ga gerantena ofo tumilgalem tampatabe.”

¹³Aafer-aafer jena ga aane gweresona malaikata uskambar aa jei ge forobityerem taman waaken-giriwer, malaikata gwanan aa jei danatyaram jebar. Jei Uwa Sanbagiri ga aane pujitene, ane ga aane bala:

¹⁴“Au, nei Uwa Sanbagiri nei ganma pujite uskambar; Uwa Sanbagiri Jei waakensusu; Jei taman tagarap nwini. Ane ogiri aaiserem angtane Uwa Sanbagiri aa jes nesiktababilirim, jemna ini waakenfer ga sege folbamifi.”

¹⁵Malaikata jeiserem aa galap ne mirtebitefalam jei, ane aa galap ge waraubilirim taman waaken-giribe, angtane dombana aa jei ne gerebaabisnennerem jei jena ga aane gitminenne, “Au, nei ganma sofwe tamna Betlehemwer. Ane nesa domola jep aa jei etamwenaram, Tuhan nebe nes jes bilipminirim.”

¹⁶Jei tatarfer ga aa ge sofobili, ane ga aa ge dorwebili Maria yo Yusuf jebar, ane Tantowai jeiserem aa jes gerantenaram ofo tumilgalem tampatabe.

¹⁷Angtane dombana aa jei ne gerebaabisnennerem jei Tantowai jeiserem jame aa galap ne damtanaram, jei ga aane nasipmini angtanefe, taterisi malaikata aa jes bilipminirim Tane jeiserem jem temawer.

¹⁸Angtane seyafter aa jei ne sarbisinirim taterisi angtane dombana aa jei ne gerebaabisnennerem jei aa jes ne nasbilirim, jei ga aa ge bitbitwebili.

¹⁹Jengga Maria jei taterisi seyafter gemerserem ga waakenulsini jelem inibe.

²⁰Angtane dombana aa jei ne gerebaabisnennerem aa gemer ge waraubilirim ona kakatarabe, jei Uwa Sanbagiri ga aane pujitefele, seyafter aa jes ne sarbilirim, ane aa jes ne domolaram jem temawer. Seyafter gemerserem bunarsusfer jes gamserem malaikata gwanan aa gemer balbabilirim.

²¹Jemna umuru nunu delapan jebe aa folbalam, Tane jeiserem ga aane sunattana. Ane jei ga aane bosetana Yesus, bosna malaikata aa jes ne bilibenerem, ene Jemna nalef jam udanabarsweyan.

²²Hukumu Nabi Musa aa jes tulistababilim ga enggam: Wini tane aa jes gam gernaram, jei Jena Uwa Sanbagirmana jebe jam kaweteyan. Jei jam gam fina nunu abakfer ga empat pulu, jepga Uwa Sanbagirem Jenap ga gam kawetena. Ane jep ga senai junu naura, afa jomor tanna naura Uwa Sanbagirfe gam gane giranbaibaasini. Nunu Maria junu jeiserem jem giranbaabisife jame aa galap falaram, Maria yo Yusuf jei ga Jena Uwa Sanbagirmana kota Yerusalemwer ga ge sofna enggalfe, junu jeiserem jewer gangge giranbaibaasif Uwa Sanbagirfe. Ane jei ga Yesus jewer ne aftawena enggalfe jei Uwa Sanbagiri jewer gane balf, “Tane aaiserem ba Imnam.” Ba jeweram hukumu Tuhan aa jes bilim ga enggam ge baatultel: “Seyafter usaber tane, afa ga jei girtowai tane, aamei ga tane jeiserem Tuhanminip jam is ge aftawena, ane ga is ge bala, ‘Tane aaiserem ba Imnam.’ ”

²³

²⁴

²⁵Gwanan jes galapserem, angtane bosna ga Simeon kota Yerusalem je aa jei nwinirim. Jei angtane waaken, jei seyafter Uwa Sanbagiri aa jes bilirim waakenfer sarbili ane ga eyebili. Jei ga fina Angtane Uwa Sanbagiri bunarsus aa Jes balam Jam baftanafe enggalfe, anggwabura Israel gam waakentababisif. Mafnana Uwa Sanbagirmana Jei Simeonfaner.

²⁶Mafnana Uwa Sanbagirmana mes towastana jei, “Aamei nalef ijam teryen, gwanan aamei Angtane Uwa Sanbagiri bunarsus aa Jes balam Jam baftanafe, ifas damtana ilem nweme.”

²⁷Mafnana Uwa Sanbagirmana Jei Simeon ga aftafala Jena Uwa Sanbagirmanaiserem jebe, ane ga kawetena. Gwanan jes galapserem, Yusufo Maria Yesus ga aa ge girinyele, ane ga aa ge gaataantena Jena Uwa Sanbagirmanaiserem jebe, jei Yesusfe jewer ge eyeibef, Hukumu Nabi Musa aa gam tulistaabilim.

²⁸Ane Simeon ga Tane jeiserem ga aa gaarwili tafame, ane jei Uwa Sanbagiri ga pujitene, ane ga bala:

²⁹“Namwer aas jepserem Tuhan, Aamei as Ijes bilibenentem mes etamwena. Namwer ini amna waakenfer ga as mes folbana, ane ai samfer as tere.

³⁰Nwena alemanaiserem jeme, ai Angtane jeiserem ames damtana, Jei angtane Imna aa jei waakentababisiliserem.

³¹Angtane jeiserem Aamei Imes destabana, jega Jei anggwabura seyafter gemerserem gase batobaabili.

³²Angtane jeiserem Jeiba nafsam, jega anggwabura nafsiserem jei ga sege towaswebisi nele Imna. Ane Jei anggwabura Israelmana, angtane Imna, Jei gase kitultesa.”

³³Tane jeiserem jem ene jeta ga aa ge bitbitwena, Simeon aa jes nasbilirim Tanna jeiserem jem temawer.

³⁴Simeon jei ga aa gitmini, “Uwa Sanbagiri waakenaiserem Jelemana ga is golmini.” Ane Simeon jei Maria Tane jeiserem Jem ene ga bili, “Tane aaiserem Uwa Sanbagiri mesam destabana. Jei ogiri aaiserem jebe mesam fortya, ane jega jem temawer anggwabura Israelmana unggwanfer gase tamtamtababisi, ane anggwabura Israelmana unggwanfer afweraiserem Jam se waakentababisisi. Tane aaiserem Jeiba bweneta Uwa Sanbagirmana, jengga angtane unggwanfer jei taterisi kabwakfer ga sene nasbisi Jem temawer.

³⁵Jega jem temawer angtane ga sege towaswebisi, angtane unggwanfer jeiserem jelem inip aa jes ne bilirim. Ane ini imna se janbisi uskambar, jes galserem ini nombeyem gam is tegil.”

³⁶Jep mese wini jep aa jei nwinirim, bosna jemna Hana. Jei tane Fanwelmana, asal-asala Asyermana. Jeiba nabisam, ane jei mes bakswena. Gwanan jepserem jei yafonsiwir, jei anggwana mes ne gula, ane ga jebar ge nwini tuju tahun.

³⁷Ane anggwana jemna jeiserem ga tere, ane jepga Hana ga gwena saamirawife jamere tahunu jemna delapan pulu empat, jei baksusu. Jei jeber-jeber Jena Uwa Sanbagirmana jep nwinwena. Gwinem ane gwerem jei Uwa Sanbagiri gam pujitene. Jei sembayanga gam gwebabana Uwa Sanbagirfe, ane nunu afweraiserem jei jam twenyan enggalfe Uwa Sanbagiri gam pujitefe.

³⁸Simon safe aa gemer tikwenaram nasoulawer, Hana ga jela jem gwetmanabe, ane jei ga Uwa Sanbagiri ga bala, “Asi samfer golbili”. Jei jamer ga nasipmini Tane jeiserem jem temawer, angtane unggwanfer kota Yerusalemwer aa jei ge nwinbenennerem. Jei ga aa ge fibili, nunu Uwa Sanbagiri jei aa jem waakentababisiliserem.

³⁹Yusuf ane Maria ga aa ge tabanulu jam eyebilibe taterisi seyafter hukumu Tuhanmana aa jes bilim, jei ga aa ge waraubili jelem tamnap Nasaretwer ona Galileya je.

⁴⁰Tane jeiserem ga aa unggwan-girswena, ane ga aa baabetabarswena. Jei buguf tousaiserem jeme, ane Uwa Sanbagiri Jei waakena Jelemanaiserem se gulbana Jebe.

⁴¹Tahunu jeber-jeber Yesusem ene jeta ga aa ge sofwena kota Yerusalemwer, masar Paskana gam gwebif.

⁴²Ane jepga Yesusmana umuru ga dua belas tahun, jei ga aa ge sofobili masarabe Yerusalem je, gwanan tahunu jeber-jeber gamserem.

⁴³Masara jeiserem aa barwenaram, [1] jei Yerusalem ga aa ge firtetefala, jam ge waraubif jelem tamnabe, jengga Yesus Jei jeber nwini Yerusalem je. Ene jeta Jemna jam ge towasweyan enggame Yesus Jeiba Jam sofweyan.

⁴⁴Jei enggam ge gunu, Yesus angtane aa jei ge wofebilirim ba jebaram. Jei ga aa ge wofebili nunu ga daamfenna, jepga Yesus ga aa ge terelbene jem afelen mesna jem nenennabe, ane angtane afweraiserem jem tarnabe,

⁴⁵jengga jei Yesus jam ge damtayan. Jega jem temawer jei ga aa ge warauwa Yerusalemwer enggalfe Yesus jep gangge terelbef.

⁴⁶Nunu nawer-ningna jepserem Yesus ga aa ge damtana Jena Uwa Sanbagirmanaiserem jebe, Jei guru Yahudimanabar ge nwinbene. Jei gurus sarbabisini, ane Jei gurus teneba-tenebaabuwena.

⁴⁷Angtane seyafter ula Jemna aa jei ne saribaasinirim ga aa ge bitbitwebili, Jei guru aa jes nasbilirim waakenfer sarbili, ane Jei waakenfer tamawolbaabuwena.

⁴⁸Ene yo jeta aa galap ge damtanaram, jei mese aa ge bitbitwena. Ane ene Jemna ga gunu, “Am Tane, jeje bafa Aamei enggam gas Im eyeipmini abe? Im uwa ane ai, ini amna as jam ge esesweipmini Isa galap ge terelbenerem.”

⁴⁹Yesus ga tamawolmini, “Jeje bafa aam ga Asim ge terelbene tampata nensaiserem jebe? Aamke ijangge towasweyan enggame, Ai jebas nwini Uwa Amnaiserem Jem jenabe.”

⁵⁰Jengga jei jam ge saribeyen Yesus aa jes bilirim jemnibe.

⁵¹Jepga Yesus ga jebaner ga aa ge waraubili tamna Nasaretwer, ane Jei ga aa sarbimini taterisi jemna aa jes ne bilirim. Taterisi seyafter jeiserem eneserem jelem inip ga aa waakenulsini.

⁵²Ane Yesus gamjon ga unggwan-girswena, ane tousaiserem Jemna gamjon unggwandwaswebana. Ane Uwa Sanbagiri ane angtane nafsiserem jes mese, jei Yesus jam ne nesiktene, gamjon unggwanfersus ga aane nesiktene.