Read Berik Lukas 20 Bible Online

Lukas 20 - Berik bible

Lukas 20

¹Nunu daamfenna jeme, Yesus angtane ga jem towas-towastababili Jena Uwa Sanbagirmanaiserem jebe, ane Jei Taterisi Waakenaiserem ga jes nasipmini. Jes jepserem angtane imam-imam sanbakaiserem, ane guru-guru Hukumu Nabi Musamana aa jei ne towas-towastababuwenaram, ane angtane sanbaka Yahudimana, angtane seyafter jeiserem Yesusminip ga aa ge jalbili.

²Ane jei Yesus ga aane tenebana, “As jam Is balbabi, baabeta nanmana Aamei seyafter aaiserem ga Ijem eyebuwena? Baabeta Ise nane gulbana Ibe, Aamei seyafter aaiserem ga Ijem eyebuwena?”

³Yesus Jei enggam ga tamawolbaabili, “Ai gamjon ims tenebaabili. Aamei Ai jon ga As isa towasta,

⁴baabeta Yohanes aa jes domolaram angtane jam baptistababife, baabeta jeiserem ke Uwa Sanbagirminiwer jela, afa angtaneminiwer jela?”

⁵Angtane jeiserem jei jenjen ga aa ge doksobana, enggam ga aa ge gubili, “Nei afa enggam jam nesa gunurum Uwa Sanbagirminiwer, Yesus Jei nei enggam nes galap se balbabili, ‘Jeje bafa aamei Yohanes ijama tebayan?’

⁶Jengga afa nei enggam nesa gunurum angtaneminiwer, angtane seyafter galap nesene munbobili toneme, aam temawer jei mes ne taabili enggame Yohanes ba angtane nabisam, Uwa Sanbagiri aa jes baftannuntum”

⁷Ga jem temawer jei Yesus enggam ga aane tamawolbana, “Ai seyafter teisyena baabeta Yohanesmana je fwer jela.”

⁸Jepga Yesus ga balbabili, “Gam jega Aimba aamei isa Ajam towastababiyen baabeta nanmana Ai ga seyafter aaiserem ga Ajem eyebili.”

⁹Jepga Yesus seisya taterisi ga nasipmini angtane jeiserem jebe. Taterisi jeiserem ga enggam: “Angtane aasaje angguru makanap tonola. Jepga jei angtane anggur tonol tousaiserem ga enggam balbabili, ‘Ai as sofna negeri nafsiserem jewer, negeri jeiserem ai jebe abakef as nwini. Ai abakfer jewer ajebar nwinirim, aamei samfer anggur makana amna aaiserem nomkef isa armantana, angguru jep ga isa tonola, ane jem igiserem afwer galap ga ap isa kitulbono.’ Ane jena ga sofna negeri nafsibe, ane jei jep ga nwini jamer abaka.

¹⁰Nunu anggur jep fuluserem jam aa galap fortyaram, angtane anggur makana jam jemanserem jei angtane awelna jemnip aa jei gwebilirim ga baftana enggalfe, makana jeiserem jem igiserem afwer jei gam tebabif, angtane anggur makana nomkef aa jei ne armantanaram jemniwer. Jengga angtane anggur makana nomkef aa jei ne armantanaram, jei angtane aa jes baftanaram, angtane jeiserem ga aane safsaftana. Ane jei angtane jeiserem ga aane bala, ‘Se dip! Gase warau, makana jem igiserem ijam gwirinyen.’

¹¹Angtane makana jam jemanserem jei gamjon angtane awelna jemnip aa jei gwebilirim nafsi jei jon ga baftana. Jengga angtane anggur makana nomkef aa jei ne armantanaram, jei angtane jeiserem jes mese jei jon ga aane safsaftana, ane jep ga aane gwebana jamer jei aa sefersona. Ane jei angtane jeiserem ga aane bala, ‘Se dip! Gase warau, makana jem igiserem ijam gwirinyen.’

¹²Makana jam jemanserem jei angtane nawer-ningnabaraiserem jei jon ga baftana. Jengga angtane anggur makana nomkef aa jei ne armantanaram, jei angtane jeiserem jei jon ga aane safsaftana, jamere tifni jemna bubwa teten sobana. Ane ga aane firtaaniwili makana jeiserem jem jitefwer.

¹³Jepga angtane anggur makana jam jemanserem jei ga gunu, ‘Ai gamjon ga basas eyebili? Ai ga enggam as eyebili, ai tanna amna ajes nesiktenerem, ai jes as baftana. Angtane makana amna nomkef aa jei ne armantanaram, jei bunarsus tanna amna jam ne kabwaktayan.’

¹⁴Jengga angtane anggur makana nomkef aa jei ne armantanaram, jei tanna jeiserem jam aa galap ne damtanaram, jena enggam ga aane gitminenne, ‘Tanna aaiserem ba makana jei se tebana, jeta jam aa jep tererem. Au, nei tanna aaiserem ganma munbo, jega nei makan anggur aaiserem nei gam nesa tebana!’

¹⁵Ane jei tanna jeiserem ga aane aftawena anggur makan jitefwer, ane ga aane munbono.” Ane Yesus ga tenebaabili, “Angtane makana jam jemanserem jei ga base eyeipmini, angtane makana jemna nomkef aa jei ne armantanaram jebe?

¹⁶Bunar-bunarsus ga enggam, jei se jela angtane anggur makana nomkef aa jei ne armantanaram jemnibe, ane jei angtane jeiserem jei gase munbobili. Gamjon makana jeiserem angtane nafsiserem jep gase gaarmini.” Angtane jei taterisi Yesus aa jes nasbilirim jame aa galap ne sarbasinirim, jei Yesus ga aane bala, “Ai bai Uwa Sanbagiri Jei enggam gufe kapka jeiserem jam etamwefe!”

¹⁷Yesus angtane jeiserem ga gerebaabili, ane ga tenebaabili, “Afa ga gam jes gamserem, taterisi aaiserem jemna igi ga fomfoma, taterisi Am temawer aaiserem aa jes tulisulum Taterisi Uwa Sanbagirmanaiserem jebe: ‘Angtane jena aa jei ne eyebilirim, tuna jei aa jes ne taptasiwilirim, tuna jeiserem mes etamwena igsusfe.’ ”

¹⁸Ane Yesus gamjon ga balbabili, “Angtane seyafter aa jei ge janbilirim tuna jeiserem jem sagabe, jei sege wasferwebili. Ane tuna jeiserem afa angtanem sagap jam se jentyaram, tuna jeiserem jei ga angtane jeiserem gase jubono, jamere sonf se etamwena. Taterisi jeiserem ga enggam, angtane Ams tebayanaiserem Ai ga As tener-tenertababili, ane ga As tamtamtababili jamer sege wasferwebili.”

¹⁹Guru-guru Hukumu Nabi Musamana aa jei ne towas-towastababuwenaram, ane angtane imam-imam sanbakaiserem jei seyafter ga aa ge towaswebili enggame, Yesus seisya taterisi jeiserem jelem temaweram nasipmini. Jei enggam ge towaswebili jeiba angtane kapka makana nomkef aa jei ne armantanaram jes galserem, seisya taterisi Yesus jep aa jes nasbilirim. Ga jem temawer jes jepserem jei nele ga aane terelbene Yesus Jam ne tebafe. Jengga jei angtane unggwanfer jeiserem ga jes ne erebaabili.

²⁰Angtane Hukumu Nabi Musamana aa jei ne towas-towastababuwenaram, ane angtane imam-imam sanbakaiserem jes mese, jei Yesus ga aane gerbaasnenne nwebitmer enggalfe jei Yesus gam ne tebaf, afa Jei taterisi syefer jam se nasbabilirim. Jega jem temawer jei sabanggwana ga aane baftabiwili Yesusminibe enggalfe, Yesus gam ne unggwasbaf tateriseme. Angtane sanbaka jeiserem jei ga aa ge gubili, “Aamei akar-akarem ini waakenmer jam isa gwenaram, ane Yesus ga isa teneba-tenebawena! Afa aamei seyafter aaiserem jam isa eyebilirim, ai aamei ga isa as armantababili.” Angtane sanbaka jeiserem enggam ne mwangbisini, afa Yesus Jei syefer jam se tamawolaram, jei Yesus ga sene gera Gubernurminibe, angtane baabetabara aa jei nwinirim sanbakfe ona jeiserem jebe.

²¹Ane sabanggwana Yesusminip ga aa ge gubili, ane jei Yesus enggam ga aane unggwasbana, “Guru, ai amsa towaswena enggame Aamei seyafter Ijes nasbabilirim, ane Ijes towas-towastababilirim, jeiserem ba bunaram. Aamei angtane afa Ijam erebeyen. Aamei taterisi daamfennaiserem ga Ijeter nasipminenne angtane igsususerem jebe, ane angtane igyeneiserem jep jegme taterisi jeiserem Ijeter nasipminenne, nafis-nafismer Ijam nasipmineneyen. Aamei taterisi Uwa Sanbagiri aa jes bilirim, Aamei bunarsusfer ga jetefener Im nasipminenne angtane seyafter gemerserem jebe.

²²Aamei ams towastababi, Hukumu Nabi Musa aa jes tulistababilim jei fomfom gunu, aike samfer pajak doini Kaisar Romamanaiserem asa kitulbono, afa safnant?”

²³Jengga Yesus Jei ini kapka jemna mes towaswebaipmini. Yesus Jei mes towaswena enggame, “Afa Ai enggam jam As gunurum, ‘Jamer isa kitulbono’, gam jega angtane Yahudimana jei Ai As galap sene nasbana. Afa Ai enggam jam As gutenaram, ‘Safnant’, gam jega angtane pemerintamana jei As galap sene nasbana.” Jega jem temawer Yesus Jei angtane jeiserem ga balbabili,

²⁴“Doi perak As imsa sabasi Abe. Gambara yo bosna aa jei ge batobilirim doi peraka jeiserem jebe, jeje bunarsusfer nanmana?” Jei Yesus ga aane tamawolbana, “Kaisarmana, angtane sanbaksususerem Romamana.”

²⁵Jepga Yesus ga balbabili, “Afa ga gam jes gamserem, afa doi perak jemna, ane jei enggam se gunurum, ‘Ap sa gerba!’ aamei doi perak jeiserem saf isa gerbana! Ane Uwa Sanbagirmanaiserem, jegme Uwa Sanbagirfe isa gulbana!”

²⁶Angtane unggwanfer jeiserem jem nwenabe, sabanggwana taterisi syefer Yesusmana fas afa jam ne domolbayan. Jei jam ge bitbitwebili Yesus aa jes tamawolbaabilirim. Jega jem temawer jei gamjon jam ge nasbaweyan.

²⁷Angtane Yahudimana afwer jei taterisi angtane Sadukimana aa jei ne onsobilirim, ga aa ge jalbili Yesusminibe. Angtane safna Sadukimana jeiserem jei enggam ga aane towas-towastababuwena, angtane jam tereserem jei gamjon jam irweyan terewer. Jei Yesus ga aane tenebana,

²⁸“Guru, Nabi Musa jei hukumu aaiserem nebe enggam tulisulmil: ‘Afa ayanaiserem wini jam gam gularam, ane ayana jam gam tererem, ane jei tanna afa fas jam waliteyen, osona jemnaiserem jei ga saamira wini jeiserem jei gamjon ga jei gam gula, jega ayana aa jei gam tererem jem fwayenfe tanna jep gam eyebafe.’

²⁹Ai taterisi aaiserem Is ajama nasibef Ibe, ane ai Aamei ga Is asa tenebana taterisi aaiserem jem temawer. Angtane ayen oson tetena tuju ga gemer naawena. Ayansususerem jei wini gwanan ga jei gam gula. Abakferyan ayana jeiserem ga gam tere, ane jei tanna fas afa jam waliteyen.

³⁰Jepga osona ayanem malam jutelawer wini jeiserem gamjon jei jon ga gam gula. Jeime gemer ayana gemerserem ga gam tere, jengga tanna fas afa jam waliteyen.

³¹Gamjon osonem malam jutelawer wini jeiserem gamjon ga jei gam gula. Ane osona seyafter afweraiserem jeime gemer gangge etamwebili, jamere umwef ga osonsusu jegme gemer, jei umwef ga jei gam tere, jengga tanna fas.

³²Umwef ga saamira wini jeiserem jei gam tere.

³³Ai Aamei Is ajama tenebaf, angtane terewer aa jep ge irwebilirim, wini jeiserem jei gamjon ga nan anggwafar sege nwini? Ayen oson tetena tuju jeiserem jei seyafter gemerserem wini jeiserem mes gane gula.”

³⁴Yesus ga tamawolbaabili, “Angtane namwer aa jei naawenaram, jei jena sene dete.

³⁵Jengga galap angtane Uwa Sanbagiri aa jes balbabilirim jam ge irwebife terewer, ane taman waaken-girip gase naawena, angtane jeiserem jei fas jena jam ne detyen.

³⁶Jei enggammer se naawena malaikata gemerserem, ane jei fas jam ge terbiyen. Angtane jeiserem jei tane Uwa Sanbagirmana, aam temawer jei gamjon mes ge irwebili terewer.

³⁷Nabi Musa jei jener gwerauwul enggame angtane jei sege irwebisi terewer. Jeiserem ga enggalap gwerauwul, jei taterisi ti towai utuboro jeiserem aa jei ertesinirim jem temawer aa galap tulisulum. Taterisi jeiserem jebe, Nabi Musa jei ga enggam gwerauwul Abraham, Isak, ane Yakub, jei angtane gwelemana, termanyan. Abraham, Isak, ane Yakub jei safe fwater mes barwel, Nabi Musa jei ga Tuhanem temawer enggam gul, ‘Tuhan Jeiba Uwa Sanbagiri Abrahammanam, Uwa Sanbagiri Isakmanam, ane Uwa Sanbagiri Yakubmanam.’

³⁸Taterisi jeiserem jes gamserem gam aa jewer gulum, nei jep ga nesa towaswena enggame, Abraham, Isak, ane Yakub jemna mafnana jei gemer naawena, aam temawer Uwa Sanbagiri Jei angtane jam tereserem jem Uwa Sanbagirfe Jam gweyan. Fas. Uwa Sanbagiri Jeiba angtane jam gwelaiserem ga jem Uwa Sanbagirf gam gwena. Angtane seyafter gemerserem Uwa Sanbagiri aa jes balbabilirim Jelem angtanefe, tifni jemna safe mes ge terbil, jengga jemna mafnanaiserem jei gemer naawenaram, ane tifni jemna jeiserem jei galap ga sege irwebisi terewer.”

³⁹Guru-guru afwenefener Hukumu Nabi Musamana aa jei ne towas-towastababuwenaram, jei Yesus ga aane bala, “Guru, Aamei waakenfersus Im tamawola!”

⁴⁰Jega jem temawer angtane seyafter ga aa ge erebili Yesus gamjon jam ne tenebafe.

⁴¹Yesus angtane jeiserem enggam ga tenebaabili, “Fomfom gane bala, Mesias Jei asal-asala Raja Daudmana?

⁴²Raja Daud jei jener enggam mesam tulisul Mesiasem temawer buku Mazmurube: ‘Uwa Sanbagiri Jei Tuhan amnaiserem enggam bala: Se nwinte Am taasfolawer,

⁴³jamere Ai ginanggwana Imna As eyebaabili, Im tof gwonap sege nwinbitaatiwetya.’

⁴⁴Jei jes gamserem gam aa jewer gulum, Raja Daud jei jener gul Mesias Jeiba jem Tuhansam. Gam jega jeiserem ga enggam, Mesias asal-asala Raja Daudmanfenyan, jengga Jei mese Raja Daudtem Tuhansam.”

⁴⁵Angtane Yesus ga gemer ne sarbasini, Yesus angtane Jei aa jei ne tikwebaatinennerem ga balbabili,

⁴⁶“Aayai, guru-guru Hukumu Nabi Musa aa jes tulistababilim jei aa jei ne towas-towastababuwenaram! Jei ga jam wofelabe fene bwalnaiserem ga jes gane kabwabili enggalfe angtane nafsi gam ne damtabif, ane gam ne balbabife jeiba angtane sanbakam. Ini jemna saaser-saaserfer sege folbamini, afa angtane pasarap aaiserem jei bosna jemna jam sene kitulmitenaram. Jei kursini angtane sanbakmanaiserem jep gam ge nonbaantef masarabe, ane jena angtane Yahudimana aa jep ge betwebuwefaram jebe.

⁴⁷Jei wini saamirnaiserem jes gane afaf-afaftababili enggalfe galgala jemna gane tamserenbaipmif. Ane jei akar-akarem enggam gam naawena, jei sembayanga gane gwebana bubwalsusfer enggalfe angtane gam ne damtabif, ane gam ne balbabif enggame jei angtane waakena. Uwa Sanbagiri guru jeiserem uskambar se tamtamtababili angtane nafsiserem jemniwer.”