Read Berik Lukas 22 Bible Online

Lukas 22 - Berik bible

Lukas 22

¹Nunu masara Roti Tanyana jes Tombaabif, masara bosna Paska, nunu jeiserem ga babitsim se fortya.

²Angtane imam-imam sanbakaiserem ane guru-guru Hukumu Nabi Musamana aa jei ne towas-towastababuwenaram, jei angtanes ne erebaabili. Jega jem temawer jei nele ga aane terelbene Yesus basyamer jam ne munbofe.

³Jepga bawasa Yudasminip ga kautena. Jemna bosna afwer Iskaryot, ane jeiba angtane daamfenna angtane dua belas Yesus aa jei ne tikwebaatinennerem jemniwer.

⁴Ane Yudas ga sofna angtane imam-imam sanbakaiserem ane angtane sanbak-sanbaka polisi Jena Uwa Sanbagirmanaiserem jemnibe enggalfe, Jei jebar gam ne nasbif fomfoma jei Yesus jep gam gaarmife.

⁵Angtane sanbaka jeiserem taterisi Yudasmana aa galap ne sarbilirim, ini jemna saaser-saasersusfer ga aa ge folbamini. Ane jei Yudas ga aane bala, “Ai doini ip asa gerbana.”

⁶Yudas ga gunu, “Sya.” Ane jei dwona ga terelbili Yesus jep jam gaarmife, angtane jam ge towaswebiyamer.

⁷Nunu gas foryal tumilgala Paskamana jem tombaabife. Nunu jes jepserem angtane Yahudimana jei domba tanna Paskamana ga aane tegila, jam tombaabife rotini tanyanaiserem jebar.

⁸Yesus Jei Petruso Yohanes ga bafsona. Jei ga gitmini, “Im ge sofwe, ane tumilgala Paska nemna jep ga is ge menetulsini!”

⁹Jei Yesus ga aa ge tenebana, “Jena ga fwersa Aamei Ijep gunurum, ai ajewer ge sofwefe tumilgala Paskamana ai ajep ge menetulsife?”

¹⁰Yesus ga tamawolmini, “Aamei kota Yerusalem saf gemer is ge kawetenaram, aamei angtane fona aa jei disultenaram jebar ga isa dorwena. Angtane jeiserem ga is ge onsobana, jamere jena jei aa jep kawetenaram jebo.

¹¹Angtane jena jam jemanserem aamei ga is ge bala jebar jam nasowefe. Ane angtane jena jam jemanserem jeiserem ga is ge bala, ‘Guru ims tenebaf enggame, mwona ga fwersa tumilgala Paskamana Ajeba tombaabife, angtane Amna Ai As jei ne tikwebaatinennerem jebar?’

¹²Jepga angtane jeiserem jei mwona unggwandusa bolap jeiserem ga is destaipmini ibe. Tikar, meja, ane kursi mes menetababisini mwona jeiserem jebe. Tumilgala Paskamana jep ga is ge menetulsini.”

¹³Angtane naura jeiserem jei ga aa ge sofwa, ane jep ga aa ge damtabili seyafter jes gemerserem Yesus aa gemer gitminirim. Ane jei tumilgala Paskamana jep ga aa ge menetulsini.

¹⁴Jema tumilgala Paskamana jem tumiliserem ga aane fitya, ane Yesus ane angtane Jei aa jei ne tikwebaatinennerem ga aa ge nwinbetena jam dwenfe.

¹⁵Yesus Jei angtane jeiserem ga balbabili, “Ini Amna Ase unggwan-girsusfer folbana Ai tumilgala Paskamana ibar nejama tombaabife, nalef angtane As jam ne tamtamtayan jamer futu.

¹⁶Ai ims towas-towastababili, Ai tumilgala masar Paskamana gamjon Ajam tumilyen, jengga masar Paskana aaiserem jem igi jam aa jep tabanswenaram, jes jepserem nunu gase fortya, nunu Uwa Sanbagiri Jei aa jep gwenaram anggwabura seyafter gemerserem jem Sanbakfe. Ane jes jepserem Ai gamjon ibar ga nesa twensa.”

¹⁷Jepga Yesus mangko fo angguruboro ga goltena, ane Uwa Sanbagiri ga bala, “Ase samfer gulbana.” Ane Yesus angtane Jei aa jei ne tikwebaatinennerem ga balbabili, “Mangko aaiserem sa teba! Fo angguru aaiserem gasa telbi, daamfen-daamfennem.

¹⁸Ai ims towas-towastababili, Ai gamjon fo angguru Ajam telbiyen, nalefe nunu Uwa Sanbagiri Jei Sanbakfe jem gwefe anggwabura seyafter gemerserem jam foroyan. Ane jes jepserem Ai gamjon ga As telbisi.”

¹⁹Jepga Yesus rotini ga goltena, ane Uwa Sanbagiri ga bala, “Ase samfer gulbana rotini aaiserem jem temawer.” Ane Jei rotini jeiserem ga bitbababisini, ane angtane Jei aa jei ne tikwebaatinennerem jep ga kitulmini. Jei ga balbabili, “Rotini aaiserem jeba tifini seyafter Amnaiserem Ai isa Ajes kitulminirim ibe. Aamei aaiserem ga jam isa eyebili enggalfe aamei Ai As igama sarbastaabonfe.”

²⁰Mangko fo angguruboro jegme gemer, jei jame aa galap ge tabanswebilirim tumilgala nafis-nafsiserem jam tombaabilibe, Yesus mangko jeiserem ga goltena, ane Jei Uwa Sanbagiri ga bala, “Ase samfer gulbana.” Ane ga balbabili, “Mangko fo angguruboro aaiserem jeba aawisi Amnaiserem As jei tenbenteyalaiserem Amniwer im temawer. Ane jega jem temawer Uwa Sanbagiri Jei taterisi ibirmiserem ga is bilipmini enggame, Jei etam-etama imnaiserem ga is wirtabaipmini, ane Jei ga aamei ga is eyebaabili enggame angtane Jelemanfe.”

²¹Yesus Jei gamjon ga balbabili, “Sa sarsi! Angtane Ai As jei geraiserem ginanggwaminibe, jei Abar seyafter ge nwini mejana aaiserem jebe.

²²Bunarsus, Ai Tane Angtanemana, Ai Ase tere Uwa Sanbagiri aa gemer gulum. Jengga galap kapka unggwandusa se etamwefa angtane Ai As jei geraram ginanggwaminibe!”

²³Jepga jei jena ga aane tenaaminenne, kapka jeiserem ga nane se eyebili.

²⁴Angtane Yesus aa jei ne tikwebaatinennerem jei jen jena ga aam temawer ge doksobana, jei nans ne balfa sanbagirsusfe gam nwinf jem tarnabe.

²⁵Yesus ga balbabili, “Raja-raja jeiserem jei negeri seyafter gemerserem ogiri aaiserem jebe, jei baabeta unggwanfer jei gane damtabili angtane seyafter gemerserem negeri jelemanaiserem jep aa jei ge nwinbenerem jem sagabe, ane jei uskamer gam eyeipmini angtane jelemanaiserem jebe. Raja-raja jei safe jes gamserem gam gane eyebili, ini rajamana unggwan-girfer enggam gangge folbamini angtane jelemanaiserem enggam ne balbabif, ‘Raja-raja jeiserem jei waakena gane eyebili. Jei nei nes jeber-jeber ne batobaabuwena.’

²⁶Jengga aamei jes gamserem game ijama gweyan. Jengga enggam isa gwena, angtane sanbagirsusu im tarnabe, jei gase gwena enggame angtane bastowaisusu galserem. Ane angtane sanbakfe aa jei nwinirim, jei awelna jam se gwena angtane awelna nafsimana aa jei gweyibenerem jei galserem.

²⁷Angtane sanbaka ga nansa, angtane aa jei gam nwinirim mejanabe jam twenfe, afa angtane tumilgala aa jei gam gwirinyelerem angtane jeiserem jebe? Bunar-bunarsus, angtane aa jei gam nwinirim mejanabe, jei sanbaksusu angtane tumilgala aa jei gam gwirnirim jemniwer. Jengga Ai As gwena im nenennabe, angtane awelna nafsimana aa jei gam gweyibenerem jei galserem.

²⁸Ai kabwaktala gwanan jam Agalap domolantam, aamei jeber-jeber kanaufer Abaner neya fibilint.

²⁹Uwa Amna Jei baabeta As mes gulbana Abe, jega Ai gam As nwini Sanbakfe angtane Uwamanaiserem jem sagabe. Jes galserem, Ai baabeta jeiserem Ai ip isAs kitulmini enggalfe,

³⁰aamei Abar negama twenf, nunu Ai Ajep gwesaram Sanbakfe anggwabura seyafter gemerserem. Ane aamei isa nontesa kursini rajamanaiserem jebe enggalfe, aamei igama nwinf tewe Israelmana dua belas jeiserem jem sanbakfe.”

³¹Yesus ga gutena, “Simon, Simon, aamei Ai As im sarbasi. Uwa Sanbagiri jei bawasa mes bili, bawasa jei samfer aamei seyafter gemerserem ga is unggwasbaabili kabwaktala uskambarsusfer jeme, jega enggalf angtane ga sege towaswebili angtane Ai aa jei ne tebanaram ga fwersa, ane angtane Ams tebayanaiserem ga fwersa.

³²Jengga Simon, Ai sembayanga Ames gwebana enggalfe, aamei ijam tikweyan Ai Asi jam tebalawer. Aamei Ai As waakenfer is tebana. Ane aamei etam-etamawer jam ijep warautnaram, aamei ilem afelen mesnaiserem ini jemna ga is kanautabaipmini.”

³³Simon Petrus ga tamawolbana, “Tuhan, ai ames menetwesini Ims onsobaf jamere bwiyip Is kawetena, ane jamere terebo.”

³⁴Yesus ga bala, “Petrus, Ai ims towastana, gwini aaiserem jeme nalef ayanga giriserem jam guteyan, aamei Ai ga Asis baanbaanwebana nawer-ningginfer.”

³⁵Jepga Yesus angtane Jei aa jei ne tikwebaatinennerem ga balbabili, “Gwanan galapserem Ai ims baftabisint, ane Ai aamei isa enggam ai balbabilint, dompet, fon, ane sandal mese safnant afa ijama erbiyen. Gwanan jes galapserem aamke imsa damtabili seyafter ijesa balbabilirim?” Jei ga aane tamawolbana, “Ai seyafter amsa damtabili.”

³⁶Yesus ga balbabili, “Jengga namwer, aamei jam isa sofwenaram, dompeta ga jam isa erbili, fon mese. Afa nombe imna fas, sya aamei fene imna ga jam isa jualtababili, jega nombeya jem gam igam armanulu!

³⁷Taterisi Uwa Sanbagirmanaiserem jep ga enggam baatultel Am temawer: ‘Angtane enggam ga sene bala, Jei angtane kapka, angtane etam-etama aa jei gam eyebilirim jes galserem.’ Ai ims balbabili, taterisi jeiserem ga Am temawer bunarfersus se etamwena. Bunarsusfer seyafter aa jes tulistababilim Am temawer Taterisi Uwa Sanbagirmanaiserem jebe, seyafter jeiserem ba jamam etamwena.”

³⁸Angtane Yesus aa jei ne tikwebaatinennerem jei Yesus ga aane bala, “Tuhan, nombe naura aare.” Yesus ga aa tamawolbaabili, “Maas, sa tikwe!”

³⁹Jepga Yesus kotana Yerusalem ga mirsotefala, ane ga sofsa taarentumu bosna Saitun, gwanan gemerserem ga gemer. Angtane Jei aa jei ne tikwebaatinennerem Yesus ga aane onsobana.

⁴⁰Jame aa galap ge forobilirim tampata Yesus jeber-jeber aa jep forowenaram jebe, Jei angtane Jei aa jei ne tikwebaatinennerem ga balbabili, “Aamei sembayanga ga jam isa gwebabuwena, jega etam-etama kapkaiserem bawasa is jes bilipminirim ibe, etam-etama jeiserem ijama eyebiyen.”

⁴¹Jepga Yesus ga gwisini jemniwer, bijauwer tuna jam firtaanulu gamserem. Ane jes jepserem Yesus ga somwan dumem ga nwintena, sembayanga ga gwebabana Uwa Sanbagirfe.

⁴²Jei ga bala, “Uwa, afa Aamei guluye, tamtamtala uskambarsus aaiserem Amniwer se golsteya. Ai bai tamtamtala aaiserem jam gwirinfe! Jengga Aamei ipsam eyebilirim Ai Ajes bilirim, jengga Uwa, Aamei Iner Ijeter bilirim, ga jeter Is eyebili.” [

⁴³Ini Yesusmana uskambarsus ga jenbana, ane jega jem temawer malaikata taman waaken-giriwer ga fortya Yesusminibe enggalfe, baabeta gam gulbaf Yesusfe. Ane Jei sembayanga ga gwebana unggwanfersus gwanan gamserem jemniwer. Ane mofa Jemna ga tenbentena onabe, aawisi jam tentela galserem.]

⁴⁴

⁴⁵Yesus sembayanga jam aa tabantanaram, Jei ga irwena, ane ga warautna angtane Jei aa jei ne tikwebaatinennerem jemnibe. Jei ga damtabili nus ge tabana. Tifini seyafter jemna ga jam ge werenswebamini, aam temawer ini jemna unggwanfer ge jenbamini.

⁴⁶Ane Yesus ga balbabili, “Aamei ibasa taabili? Jasa irwe, sembayanga ga isa gwebana, jega aamei etam-etama kapkaiserem bawasa is jes bilipminirim ibe, etam-etama jeiserem ijama eyebiyen.”

⁴⁷Yesus ga gemer nasowena, angtane unggwanfer ga aa ge forobitye. Angtane daamfenna angtane dua belas Yesus aa jei ne tikwebaatinennerem jemniwer, bosna ga Yudas, jei angtane unggwanfer jeiserem ga jei danabaabisnenne. Yudas Yesusem tarnabe ga gwina jam aalumbofe.

⁴⁸Jengga Yesus Yudas ga tenebana, “Yudas, aamei Ai Asi jewer aalumbonorom ke enggalf, Ai Tane Angtanemana aamei ijam gaarmif ginanggwafe?”

⁴⁹Angtane Yesus aa jei ne tikwebaatinennerem jei jam aa galap ne domolaram aa je etamwenaram, jei Yesus ga aane bala, “Tuhan, ai jam agma era, alem nombeyeme!”

⁵⁰Angtane daamfenna awelna imam sanbagirsususerem jem jenap aa jei gweyibenerem jei ga jep fina jem gwetmanabe. Ane angtane Yesus aa jei ne tikwebaatinennerem daamfennaiserem jemniwer jei nombeyeme imwana jemna ga targabaasini jamer te.

⁵¹Jengga Yesus ga balbabili, “Maas, sa tikwe!” Ane Yesus Jei tafna ga tosobaaniwili angtane jeiserem jem imwanabe, ane angtane jeiserem ga waakentana.

⁵²Jepga Yesus angtane unggwanfer jeiserem ga balbabili, angtane imam-imam sanbakaiserem, angtane sanbak-sanbaka polisi Jena Uwa Sanbagirmana aa jei ne gaarabisnenewenaram, ane angtane sanbaka Yahudimana jes mese. Jei ga balbabili, “Aike angtane komkoma, aamei ga nombeya bwalna ane tini bwalna unggwan-gwana, aamei Ai jem ga As ima forobatya jam tebafe?

⁵³Ai nunu jeber-jeber maga ibaner neya nwinwena Jena Uwa Sanbagirmanaiserem jebe, jengga aamei Ai jep Ase ijama tebayan. Jengga Uwa Sanbagiri Jei mes balbabili, aamei aaiserem namwer ijama eyebife. Baabeta gwinibere aa jemanem folbanaram, baabeta jemnaiserem aamei aaiserem ga ijem olema eyebili.”

⁵⁴Angtane Yesus ga aane tebana, ane ga aane aftafala jena imam sanbagirsususerem jebe. Petrus jei Yesus amnuwer onsobananna, jei bijautowaifer wofna.

⁵⁵Angtane tokwana ga aane surna ja syat nenennabe, jei jep ga aa ge nwinbene tokwa gwetmanabe. Jes jepserem Petrus jei jebar seyafter ge nwinbene.

⁵⁶Yafonsiwiri awelna angtanefe aa jei gweyibenerem jei Petrus aa jei nwinirim tokwa nafabe ga damtana. Jei Petrus ga damdamtaasini, ane angtane ga balbabili, “Angtane aaiserem jeime Yesusfar aa jei ge wofobilirim.”

⁵⁷Jengga Petrus jei ga jam baanbaanwena. Jei yafonsiwiri jeiserem enggam ga bili, “Ai teisyena Angtane jeiserem.”

⁵⁸Abakferyan angtane nafsi jei Petrus ga damtana, ane ga bala, “Aamei mese aameiba Yesusem afelnam.” Petrus ga tamawolbana, “Wowo, ai Jem afelenyan!”

⁵⁹Gamjon ga jema daamfenna, angtane nafsi jei jon ititmer ga bala, “Angtane aaiserem jei Galileyamana Yesus gemerserem. Ga jem temawer ai bunarsusferam gunu, jeiba angtane daamfenna Yesus aa jei ne tikwebaatinirim, ba jesam.”

⁶⁰Petrus ga tamawolbana, “Wowo, ai ajam towasweyan aamei ibas bili.” Jes jeberserem jei gemer nasowena, ayanga giriserem ga gutena.

⁶¹Tuhan Yesus ga irfwena, ane Petrus nwenap ga damtana. Jepga Petrus taterisi Yesus gwanan aa jes nasibenentem jebe, jei taterisi jeiserem ga saribaastabona enggame, “Gwini aaiserem jeme nalef ayanga giriserem jam guteyan, aamei Ai ga Asis baanbaanwebana nawer-ningginfer.”

⁶²Ane Petrus ga totintye, ane uskambarsus ga syena.

⁶³Ginanggwana Yesus aa jei ne gerebaasnennerem jei Yesus ga aane safsaftana, ane ga aane bisobana enggame,

⁶⁴jei nwena Yesusmana fenbitem ne faarebana jamer mat, ane ga aane safsaftana, ane enggam ga aane bala, “Sya angtane Aamei Is jei ne safsaftanaram, Aamei angtane jeiserem jem bosen se balbaipmite!”

⁶⁵Ane jei ula kapka nenes-nensaiserem Yesus jem ga aane imei-imeitana.

⁶⁶Ona jam nafwena, Safna Angtane Yahudimana Sanbak-sanbaka seyafter gemerserem jei ga aa ge betwebili. Angtane jeiserem jeiba angtane sanbaka Yahudimana, angtane imam-imam sanbakaiserem, ane guru-guru Hukumu Nabi Musamana aa jei ne towas-towastababuwenaram. Yesus ga aane aftafala mwona jelemanaiserem jebe, jei aa jep ge betwebuwefaram.

⁶⁷Jei Yesus ga aane bala, “Ai as jase towastababi, Aamke Angtane Uwa Sanbagiri bunarsus aa Jes balam Jam baftanaf enggalfe angtane gam waakentababisif?” Yesus ga tamawolbaabili, “Ai safe aamei isa jam As balbabili, aamei Ai Ase ijama tebayan.

⁶⁸Ane afa Ai aamei isa jam As tenebaabili, aamei Ase ijama tamawolbayan.

⁶⁹Jengga abakefyan, Ai Tane Angtanemana, Ai Uwa Sanbagirem taasfolawer Ase nwini, Uwa Sanbagiri Jei baabetsusu.”

⁷⁰Angtane jeiserem seyafter ga aane tenebana, “Afa ga gam, Aamke Tane Uwa Sanbagirmana?” Yesus ga tamawolbaabili, “Aamei jes gamserem bunarsusfer ima nasouna. Aiba Jesam, iner imsama gutena.”

⁷¹Jepga jener ga aane nasbili, “Nei nener nemsa saribene taterisi Jelemana. Jei enggam gunu Jei Tane Uwa Sanbagirmana. Bunarsus Jei Uwa Sanbagiri gam imei-imeitana! Nei angtane nensa gamjon nejama sarbayan.”