Read Berik Lukas 23 Bible Online

Lukas 23 - Berik bible

Lukas 23

¹Jepga Safna Angtane Yahudimana Sanbak-sanbaka seyafter gemerserem ga aa ge irwebili, ane Yesus Gubernur Pilatusminip ga aane aftafala enggalfe jei Yesus gam teneba-tenebawef.

²Jes jepserem jei ga aane tawawulbono taterisi kapkaiserem jam ne nasbabife Yesusem temawer. Jei ga aa ge gubili enggame, “Angtane aaiserem Jei angtane Yahudimana kabwakfer Jeyam towas-towastababiwena, jamere jei taterisi pemerintamana baife ga aane gweyipmini. Jei enggam gunu, angtane Yahudimana jei safnant Kaisarfe pajak doi jam ne armanulyon. Ane Jei enggam gunu Jeiba Angtane Uwa Sanbagiri bunarsusfer aa Jes balam Jam baftanafe, Jeiba Rajasam. Jei jes gamserem aa gemer gunurum, jeba kapkam.”

³Pilatus Jei Yesus ga tenebana, “Aamke anggwabura Yahudimanaiserem jem Raja?” Yesus ga tamawolbana, “Iner imsam gutena.”

⁴Jepga Pilatus ga balbabili angtane imam-imam sanbakaiserem ane angtane unggwanfer jep aaiserem jes mese, “Ai ajam towasweyan Angtane aaiserem kapka daamfennaiserem afa fas Jam eyebiyen jega ai jeme gam as tamtamtana.”

⁵Jengga seyafter gamjon ga aa ge gubili uskambar, “Jei angtane seyafter aa jei ge nwinbenerem ona Yudeya seyafter gemerserem, Jei kabwakfer ga jes towas-towastababiwena, jamere jei taterisi pemerintamana baife ga aane gweyipmini. Jei ona Galileyawer towaiwulu jamer aafo, kota Yerusalem je.”

⁶Gubernur Pilatus taterisi jeiserem jame aa galap sarbilirim, jei angtane Yesus aa jei ne kakalswebanaram ga tenebaabili, “Angtane aaiserem Jei ke angtane Galileyamana?”

⁷Ga aane tamawolbana, “Bunar, Jeiba Galileyamanam.” Pilatus Yesus ga jem temawer baftana Raja Herodesminibe, aam temawer jes jepserem Herodes sanbakef nwin ona Galileya je. Jes jepserem Herodes jeiba jebam nwini kota Yerusalem je.

⁸Herodes bwembwema Yesus aa jes eyebaabuwenantam jem temawer fwater mesam sarbaibaasiwenant. Jega jem temawer safe fwater jei Yesus jam damtaf. Jei enggam gunu jelem inibe, “Bwembwema Yesus aa jes eyebilirim ajam domolf.” Jega jem temawer, nunu jeiserem Herodes Yesus jame aa galap damtanaram, jemna ini saaser-saaserfer ga folbana.

⁹Jei Yesus uskambar tenebawena. Jengga Yesus Jei taterisi Herodesmana afa fas Jam tamawolbiyen.

¹⁰Angtane imam-imam sanbakaiserem ane guru-guru Hukumu Nabi Musamana aa jei ne towas-towastababuwenaram, jei seyafter jep ge fibili, jei Herodes ga aane bala ini kakalmer, “Yesus Jei angtane kabwakfer ga Jei towas-towastababiwena, jamere jei taterisi pemerintamana baife ga aane gweyipmini.”

¹¹Jepga Herodes mese ginanggwa jelemanaiserem jei Yesus ga aane bisobana, ga aane imei-imeitana. Ane jei fene waaken-waakensusu ga aane doksobaaniwili enggalfe jei akar-akarem gane balf Jeiba Rajasam, ane jem temawer gamjon ga sene bisobana. Ane Herodes jei Yesus ga warautana Pilatusminibe.

¹²Herodeso Pilatus jei jena gwanan jam ge nasmiwena, jengga nunu jes jepserem, jei jep ga aa ge waakenswena.

¹³Gubernur Pilatus angtane ga jenbebili, angtane imam-imam sanbakaiserem, ane angtane Yahudimana sanbakfe aa jei ge nwinbenerem, ane angtane unggwanfer gemerserem.

¹⁴Ane jei angtane seyafter jeiserem ga balbabili, “Aamei Yesus imsa aftafaltya amnibe. Aamei enggam ima gunu, Jei angtane kabwakfer towas-towastababiwena, jamere angtane jeiserem jei taterisi pemerintamana jam ne onsobaabiyen. Ai Yesus ames teneba-tenebawena im nwenabe, ane ai kapka daamfenna Jemnibe afa fas ajam domolbayan aamei ijesa bilibenerem enggame, Jei kapka gam eyebili.

¹⁵Raja Herodes mese jei Yesus jame aa galap teneba-tenebawenaram, jei kapkaiserem afa jam domolbayan Yesusminibe. Jega jem temawer jei Yesus ga warautatna nemnibe. Bunar-bunarsus Yesus Jei kapkaiserem fas afa Jam eyebiyen nei Jei jem temawer ga nesa munbono.

¹⁶Ga jem temawer, ai ginanggwana amnaiserem ga as balbabili jei Yesus ga jafner sene safsaftana, jepga ai Yesus as aftannu.” [

¹⁷Masara Paska jeber-jeber jam gam falaram, Pilatus jei angtane daamfenna ga jem gam aftannu, angtane bwiyip aa jei gam nwinirim.]

¹⁸(Angtane bosna Barabas jei mes gaataantena bwiyibe, aam temawer jeiba angtane daamfenna angtane unggwanfer jemniwer, kapkaiserem aa jei ne eyebilirim kotana jeiserem jebe. Angtane unggwanfer jeiserem taterisi unggwanfer ga aane nasipminenne enggalfe angtane kotana jepmanaiserem jei taterisi pemerintamana baife gam ne gweyipmife. Ane jei aa galap ge erabanantam, jei angtane mes ne munbono.) Pilatus jei jame aa galap gunurum Yesus Jam aftannufe, angtane unggwanfer jeiserem seyafter ga aa ge tetenbili taterisi daamfenmer, “Yesus Jei jasa munbo! Barabas ga ap is aftamunnu!”

¹⁹

²⁰Jengga Pilatus jei Yesus jewer aftannuf. Jega jem temawer jei gamjon ga nasowena angtane unggwanfer jeiserem jemnibe.

²¹Jengga jei uskambar ge tetenbili, “Ti salibip sa daktanswe jamer futu! Ti salibip sa daktanswe!”

²²Pilatus nawer-ningginfer ga jam tenebaabili enggame, “Jeje bafa? Angtane aaiserem Jei kapka fwersa gam eyebili? Ai kapka daamfenna afa fas ajam domolbayan Jei aa jes eyebilirim nei Jei jem temawer ga nesa munbono. Jega jem temawer, ai ginanggwana amnaiserem ga as balbabili jei Yesus ga jafner sene safsaftana, jepga as aftannu.”

²³Jengga jei gamjon uskambarsus ga aa ge tetenbili, taterisi uskambarsus jeme, “Yesus ti salibip sa daktanswe jamer futu!” Ane umwef aa jes ge tetenbilirim, tetene jeiserem igibere.

²⁴Ane Pilatus ga gunu Yesus Jam terfe ti salibibe, jei aa gemer ge gubilirim.

²⁵Ane Pilatus jei aa jes ne balaram jam aftannufe, jei angtane jeiserem ga aftannu. Angtane jeiserem jei bwiyip nwini, aam temawer jei angtane unggwanfer kotana jeiserem jep aa jei ge nwinbenerem taterisi aa jewer nasipminennerem, jamere angtane jei taterisi pemerintamana baife ga aane gweyipmini, ane angtane mes ne munbono. Ane Pilatus Yesus ga gaarmini jebe, jei gam ne eyebife jei jener jena aa gam ge gubilirim.

²⁶Ginanggwana Yesus safe aa gemer ne aftafalaram Jam munbofe, jei ga aa ge dorwebili angtane kota Kirenemana jebar, bosna jemna ga Simon. Jei onnawer fortya, ane jei safe kotanabe aa gemer kautenaram, ginanggwana Simon ga aane tebana. Ane jei salibi Yesusmanaiserem Simonem malmap gane tosobaaniwili. Ane jei Simon ga aane tetgenbana salibi Yesusmana jam sutunbofe Yesusem amnuwer.

²⁷Angtane unggwanfer Yerusalemwer jei Yesus ne onsobananna, wi mese ga gemer ne onsobananna, jei Yesus ne syebananna.

²⁸Yesus ga irfwena, ane wini jeiserem ga balbabili, “Wini kota Yerusalem je aa jei ge nwinbenerem, aamei Ai As ijama syebayan! Jengga aamei in inater isa syemuwena, ane tane imnaiserem ga jes isa syebabuwena,

²⁹ aam temawer nunu se fortya kabwaktala unggwandusaiserem gase etamwesa. Nunu jes jepserem angtane ga sege gubisi, ‘Wini tane gol mata, wini tane gereyanaiserem, ane wini muma tanef gerbayanaiserem, wini jeiserem ini jemna saaser-saasermer sege folbamini, aam temawer jei tane jemna fas kapka jeiserem jam ne domolyan. Jengga jei kapka jener sene domolsa.’

³⁰Ane angtanna ga sege gubisi, ‘Ai kabwaktala aaiserem bai ajama domolfe! Jengga waakenfer ga enggam, afa ginirdusa jese fortyaram enggalfe taarena gam gintef nem sagap gase jentya, ane otumu ga nes matabili, jega nei ga nesa tere.’ ”

³¹Ane Yesus gamjon ga balbabili, “Ai safe kapkaiserem Ajam eyebiyen, jengga angtane kabwaksususerem jei Ap ne eyeibene. Afa ga gam jes gamserem, gam jega angtane kapkaiserem aa jei ne eyebuwenaram jep ga bas sene eyeipmisi?” [4]

³²Anggwa nawana nafsi, jei nawersamer kakal nauna, jei Yesusfaner ne aftabifele jam tamtamtababif jamer futu.

³³Jei aa galap ge forobilirim taman bosna “Dwak Otam” jebe, jei Yesus jep ga aane daktanswena ti salibibe. Anggwa kakala nauraiserem ga Jebar ne daktabaabunswena ti salibibe, afelna Jem taasfolawer, ane afelna ga Jem gwejawer.

³⁴Yesus sembayanga ga gwebana, “Uwa, etam-etama jemna se wirtabaipmi! Jei jam ge towaswebiyen jei aa jes ne eyebilirim.” Ane ginanggwana jei olgulup ga naawena tuna bastantouyaserem jeme, bosna undian, fene Yesusmana ga jem ne syenulf.

³⁵Angtane jep aa jei ge fibilirim, ga jam ne gerabaabili. Ane angtane Yahudimana sanbakfe aa jei ge nwinbenerem, jei Yesus ga aane bisobana. Jei ini kabwakmer Yesusem temawer ga aane bala, “Jei angtane nensa gam waakentaasini. Afa Jeiba Kristuse, Angtane Uwa Sanbagiri bunarsus aa jes destabalam angtane Jei waakentababisife, Jei Jena gase waakentaasini!”

³⁶Ginanggwa mese ga aa ge jalbili, jei Yesus enggam ga aane bisobana, Jei fo angguru syelabara jafner ga aane sabana.

³⁷Ane ginanggwana jeiserem jei ga aane bala, “Afa Aamei Raja angtane Yahudimanaye, In Inater Is waakentaasini!”

³⁸Yesusem salib sagap jep ga tulisan ga aane baatulwili, tulisana jeiserem jep ga enggam ne tulistababili, ANGTANE AAISEREM JEIBA RAJA ANGGWABURA YAHUDIMANAM.

³⁹Ane kakal anggwana daamfennaiserem jep aa jes ne salibtenerem, jei Yesus enggam ge imei-imeitana, enggam ga aa nasowena, “Aamke Angtane Uwa Sanbagiri Jei bunarsus aa Jes balam Jam baftanaf enggalfe angtane gam waakentababisif? Afa gameye, In Ina Im waakentaasi, ane ai mese ai as Is waakensosini!”

⁴⁰Jengga kakal anggwana afelnaiserem, jei afelna ga uftana. Jei ga enggam bala, “Aamke Uwa Sanbagiri ke ijam erebeyen? Nei nawer-ningginsamer nes mesane tamtamtababili jamer amkom nefoma tere.

⁴¹Tamtamtala nemna nei nejesne domolaram, tamtamtala aaiserem ga aam temawer nei etam-etama kapkaiserem nei jes ne eyebuwenaram. Jengga Angtane aaiserem Jei kapkaiserem fas Jam eyebiyen.”

⁴²Jepga jei Yesus ga bala, “Yesus, ai as jam Is sarbastaabona, ane waakena Imnaiserem ap ga as Is gulbana, Aamei gamjon Ijep fortyaram anggwabura seyafter gemerserem jem Sanbakf Ijep gwenaram.”

⁴³Yesus ga tamawolbana, “Ai bunarsus ims towastana, nunu namwer aaiserem aamei Abar nes ne nwini tamna abakfer gwelaiserem jebe.”

⁴⁴Engbar jema 12.00 gwere bolap aa falaram, gwere nafa fas, ane ona seyafter jep gemerserem gwini ga fal, jamer jema 3.00 dafef.

⁴⁵Ane kain unggwan-giri aa je taannurum Uwa Sanbagirem Jenabe ga aane bitnetini nenennaber.

⁴⁶Yesus uskambar ga gwarna, “Uwa, mafnana Amna ga Is Ajam gulbana.” Jes gamserem gam Jama gutenaram, Jei ga tere.

⁴⁷Angtane sanbaka 100 ginanggwamana jep jeiserem, jei seyafter jep aa je etamwenaram ga aa domola, ane Uwa Sanbagiri ga pujitene. Ane ga bala, “Bunarsus Angtane aaiserem Jeiba Angtane waaken-waakensusum. Jei kapkaiserem Jam eyebiyen.”

⁴⁸Angtane seyafter jep aa jei ge betwebilirim jam gerebafe, jei aa je etamwenaram ga aane domola. Ane jei ga aa ge waraubili jelem jenabe, ini ga aa ge jenbamini.

⁴⁹Ane Yesusem afelen mesna, ane wi mese Jei aa jei ne tikwebaatinennerem ona Galileyaminiwer, jei ga aa ge fibili bijauwer, seyafter ga aane gerebaabili.

⁵⁰Angtane aasaje bosna Yusuf, jei tamna Arimateya tane, ona Yudeya je. Jei angtane waakensusu, ane jei Uwa Sanbagiri aa jes gam bilirim, ga jetefener gam eyebili. Jei nunu Uwa Sanbagiri jem gwelaiserem anggwabura seyafter gemerserem jem Sanbakfe ga jes fibili. Yusuf safe angtane daamfenna Safna Angtane Yahudimana Sanbak-sanbaka Seyafter Gemerserem jemniwer, jei jam guyon jei aa gam ge gubilirim, ane jei aa jes ne eyeibenerem Yesusfe.

⁵¹

⁵²Jei Gubernur Pilatusminip ga sofwa, ane Pilatus ga bala, “Yesusem futunu ap se gerba!”

⁵³Jepga Yesusem futunu ga tinswena ti salibiwer, ga taferna kain waakensusu jeme. Ane jei Yesusem futunu ga gaarantena, tonmwa bitisi ibirmiserem jebe. Tonmwa bitisi jeiserem angtane futunu nafsi afa jam ne gaataanteyan jebe.

⁵⁴Nunu jeiserem ga nunu Jumat, ane nunu Sabat, nunu angtane Yahudimana aa jem ge nwinbisiwefaram ga babitsim fom tawaiwela.

⁵⁵Wini Yesusfar aa jei ge jalbilirim ona Galileyaminiwer, wini jeiserem jei Yusuf ga aane onsobana, ane tonmwa bitisi jeiserem ga aane domola. Ane ga Yesusem futunu jam ne damtaf angtane fomfom ne gaarantena.

⁵⁶Jepga gamjon ga aa ge waraubili jelem jenabe, ane ti alna yo minyaka ninsini waakenaiserem ga aane menetababisini enggalfe, Yesusem futunu gam gwebaf. Nunu Sabateme jei awelna jam ne gwebiyen, jes gemerserem Hukumu Nabi Musamana jep aa gemer tulistaabilim.