Read Berik Lukas 24 Bible Online

Lukas 24 - Berik bible

Lukas 24

¹Gwinibenersus nunu Minggunu jeiserem jeme, wini jeiserem ga aa ge sofobisi Yesusem tonmwa bitis tarnabe. Jei ti alna ninsini waakenaiserem jei aa jes ne menetababisinirim ga aane erbifele.

²Jei jame aa galap ge forobisirim tonmwa bitis tarnabe, jei tuna unggwan-girsususerem tonmwa bitis pintuf aaiserem ga aane damtasa, tuna unggwan-giri pintuf jeiserem mes ne irfifitaansowena tonmwa bitis mwonawer.

³Jei tonmwa bitis mwonap ga aa ge kabwitena, jengga jei Tuhan Yesusem futunu fas jep jam ne damtainonyan.

⁴Jei jeber ga aa ge fibiton, ane jelem iniber ga ge gubili, “Aa jei bai etamwena?”, jei aafer-aafer ga aa ge anggabili, angtane naura aa ge fyatetya jem gwetmanabe, fene ga sinsinsusu iris nafa galserem ga gala gangge kabwabili.

⁵Wini jeiserem jei uskambar ga aa ge erebili, ane duka ga aane katabaantena. Jengga angtane naura jeiserem jei ga aa ge balbabili, “Jeje bafa aamei Angtane aa Jei gwenaram ga ima terelbene, tampata angtane futunu jep gaataantelaiserem jebe?

⁶Yesus Jei aaf fas. Jei mes irwena terewer. Sa sarbistaabon Jei is mesam nasipminint ibe, gwanan Jei ibar igalaba nwinintim ona Galileya je.

⁷Gwanan jes galapserem Yesus Jei aamei is enggam balbabilint, ‘Ai, Tane Angtanemana, Ai Asene gerfa angtane etam-etamabaraiserem jemnibe, ane jei Ai ga Asene munbofo ti salibibe jamer futu. Ane nunu nawer-ningnabaraiserem Ai gamjon ga jem As irwena terewer.’ ”

⁸Ane jes jepserem jei taterisi Yesus aa jes nasbisintim, taterisi jeiserem ga aane sarbistaabona.

⁹Ane jei jame aa ge waraubitnerem tonmwa bitisiwer, jei ga aane nasipmini seyafter jeiserem sebelas rasulu jei, ane angtane aa jei ne tikwebaatinennerem afweraiserem seyafter gemerserem.

¹⁰Wini jeiserem jem bose bosna ga aas: Maria Magdalena, ane Yohana, ane Maria wini Yakobusmana. Wini nawer-ningna jeiserem, ane wini nenes-nenes mesnaiserem jebaner, jei taterisi aa jei etamwenaram ga aane towas-towastababili angtane jeiserem Yesus aa jes baftabilirim jebe.

¹¹Jengga Rasulu jeiserem jei ga enggam ge gubili taterisi jeiserem ol kabwak. Ane wini taterisi aa jes ne nasbabilirim, jei taterisi jeiserem fas jam ne tebabiyen.

¹²Jengga Petrus ga nunggiri tatarmer tonmwa bitisi jeiserem jewer. Jame aa galap fornaram, jei ga aanwesmer ga anggasnenne tonmwa bitis mwonabe. Ane jei kain tefner ga aa damtabili, kaina Yesusem futunu aa jem ne tafresinintim. Ane jei ga bitbitwena, ane ga sofwa, jei jelem iniber ga tenna aa je etamwenaram jem temawer.

¹³Nunu Minggunu jes jemerserem, angtane nawan Yesus aa jei ne tikwebaatinennerem jeme gemer ge sofna, tamna aa jei nulnaram bijauwer ga engbar sebelas kilometer kota Yerusalemminiwer. Tamna jeiserem bosna ga Emaus.

¹⁴Ane angtane nawan jeiserem jei taterisi aa je etamwenaram ga jes ge nasbinenne.

¹⁵Ane jei ga gemer ge nasowena, ane jei jen jena ga aa ge taanaaminenne, Yesus Jenfentowai ga fortya jem gwetmanabe, ane ga aa ge sofobili jebaner.

¹⁶Angtane nawan jeiserem ga aa ge damtana Jei, jengga Uwa Sanbagiri Jei ga gwemini jega enggalf jei jam ge towasweyan enggame, aaiserem jeiba Yesusam.

¹⁷Yesus ga tenaamini jei, “Aamei im ge wofnaram nelebe, ibas ge nasbinenne?” Ane jei ga aa ge tikwena, ini jemna ga jam ge janipmini, ane mirmase ga ge kabwaksweipmini seyafter aa je etamwenaram jem temawer.

¹⁸Angtane afelna bosna ga Kleyopas jei ga tamawolbana, “Angtane seyafter gemerserem kota Yerusalem je aa jei ge nwinbenerem, jei seyafter mes ge towaswebili aa je etamwenaram nunu nawer-ningna aaiserem jeme. Ga fomfoma Aamei Infentowai ke gemerje Ijam towasweyan?”

¹⁹Yesus ga tenaamini, “Bai etamwena?” Ga aa ge tamawolbana, “Aa je etamwenaram Yesusminibe, Angtane Nasaretmanaiserem. Jeiba Nabisam, ane Jei awelna baabetmer gam gwebili, ane Jei baabetmer gam nasouna. Ane seyafter jeiserem ga jem gwerauwulu enggame, Uwa Sanbagirmana ini saaser-saaserfer folbana Jebar. Ane angtane seyafter jeime, ini saaser-saaserfer gangge folbamini Jebar.

²⁰Angtane imam-imam sanbakaiserem, ane angtane amnaiserem sanbakfe aa jei ge nwinbenerem, jei Yesus mes ne gera enggalfe jei Yesus gane balf enggame Yesus gam tamtamtaf jamer futu. Ane jei Yesus mes ne munbono ti salibibe.

²¹Ai gwanan safe enggam aya gunu, Yesus Jei angtane Israelmana gam aftabunnuf ginanggwaminiwer, jengga nunu nawer-ningnabaraiserem mes ayintyent seyafter jeiserem aa jem ge etamwebilintim.

²²Ane wini afweraiserem am anggwabor mesnaiserem jei taterisi ga ai as jei ne towasulmini, ane ai ga aya bitbitwena. Ai ga aas aya bitbitwebisi: Wini jeiserem gwinibenersus ge sofobisi tonmwa bitis Yesusmana jem tarnabe,

²³jengga jei Yesusem futunu fas jam ne damtayan. Ane jei ga aa ge waraubili, ai ga as jei ne towastababili enggame, ‘Ai malaikata naura ajeba domsona. Ane jei ga ai as enggam ge balbabili, Yesus Jei mes nwinsanswena.’

²⁴Ane am afelen mesna afweraiserem, jei mes ge sofobili tonmwa bitis Yesusmana jeiserem jebe. Jengga tonmwa bitis tetens ne domola, jei Yesusem futunu jam ne damtayan. Ane jei ga aa ge gubili enggame, ‘Wini jeiserem ba bunaram ge gubili enggame, Yesusem futunu tonmwa bitisibe fas.’ ”

²⁵Ane Yesus ga angtane naura jeiserem ga gitmini, “Aamei angtane teisyena. Aamei taterisi seyafter nabi aa jes ne nasbinennelem, aamei taterisi jeiserem kwaalaamitmer igama taabili.

²⁶Bunarsus, Angtane Uwa Sanbagiri aa jes baftanaram angtanes waakentababisife, Jei gwanan tamtamtala uskambar ga Jei se domola, jepga gase nwini baabetabarsusfer Uwa Sanbagirfar taman waaken-giribe.”

²⁷Ane Yesus Taterisi Uwa Sanbagirmana gas towas-towasulmini taterisi Jelem temawer aaiserem, Jam tawawuluwer ga taterisi Nabi Musamanaiserem ga jewer, ane taterisi nabi seyafter gemerserem aa jes ne tulistababilim jes mese ga towasulmini.

²⁸Jei ga aa ge sofobili jamer aa ge gwetmanswebili tamna jame aa jes ge gitminirim jep forofe, tamna Emaus jeiserem. Ane Yesus ga angtane nawan jeiserem saf jam mirsotefalf tamna jeiserem jebe, Jei ga safe jamer ayenif.

²⁹Jengga jei unggwanfer ga aa ge bala, “Aamei aaferma nwin abaner, aam temawer ona amkom fom gigitswela.” Ane Yesus ga aa ge sofobili seyafter tamna jeiserem jebe enggalfe Jei jebar gam ge nwinbef.

³⁰Jei jame aa galap nwintenaram jebaner jam dwenfe, Jei rotini ga goltena, ane Uwa Sanbagiri ga bala, “Ase samfer gulbana.” Ane Jei rotini jeiserem ga bitabaabisini, ane ga tetmini jebe.

³¹Ane jes jepserem Uwa Sanbagiri Jei ga gwemini, jega enggalf jei gam ge towaswef enggame aaiserem Jeiba Yesusam. Jengga jes jeberserem Yesus ga asona, jam ge damtayan Jei.

³²Jei jen jena ga aa ge gitmini, “Jei maga nelebe nei neJebara nasounanna, ayata Taterisi Uwa Sanbagirmana nes mes towasulmini nebe, gwanan jes jepserem ini nemna nese saaser-saaserfersus nulamini!”

³³Ane jes jepserem jei ga aa ge irwena, ane ga aa ge warauwa kota Yerusalemwer. Jei angtane sebelas Yesus aa jei ne tikwebaatinennerem jep ga aa ge damtabili. Jei jam ge betwebili jelem afelen mesnaiserem jebar.

³⁴Ane angtane jep aa jei ge betwebilirim jei angtane naura jeiserem ga aane gitmini, “Bunarsus, Tuhan Yesus Jei gamjon mes irwena terewer! Jei Jena mes gweretana Simonminibe!”

³⁵Ane angtane nawan jeiserem jei taterisi seyafter nelep aa je etamwenantam, ga aa ge nasipmini jebe. Ane jei ga enggam ge nasipmini, “Yesus rotini aa galap bitabilirim, jes jepserem ai ga ai ge towaswena enggame Angtane jeiserem Jeiba Yesusam.”

³⁶Ane angtane naura jeiserem jei taterisi ga gemer ge nasbili, aafer-aafer Yesus Jena ga fyatetya jem nenennabe, ane ga balbabili jei, “Waakensusu se etamwena imnibe!”

³⁷Jei ga aa ge bitbitwebili, ane aa ge erebili uskambar. Jei enggam ge gubili, “Neiba ne angtane uwuserem ba nei jesma damtana!”

³⁸Jengga Yesus ga balbabili jei, “Jeje bafa aamei ga ima erne? Ane bagal temawer ini imna isar-isarmer ga is ge folbamini?

³⁹Tafna Amna gasa domsoba, ane tufa Amna aare! Ai Ana ga aare! Asa ente, ane Ai Asa damta! Angtane uwu jei nini fas, ane aalna fas. Jengga aamei Asa damta, Aiba niniberem, ane aalnabaram.”

⁴⁰Yesus jes gamserem aa gam gutenaram, Jei tafna yo tufa Jemna ga aa ge saamini jebe.

⁴¹Jes jepserem saf gemer ne bitbitwebanaram ini jemna saaser-saasera, jengga jei jam ne tebayan Yesus ba mesam irwena terewer. Ga jem temawer Yesus ga tenebaabili, “Tumilgala aaf ke fas?”

⁴²Ane jei Yesusfe jigal tokwanap gwelanela ga aane gulbana.

⁴³Yesus jigala jeiserem ga taabili, ane ga tumili jem nwenabe.

⁴⁴Yesus ga balbabili jei, “Ai gwanan ibaner seyafter negalaba nwinsintim ona Galileya je, Ai taterisi isa Amesam bilipmisint ibe, taterisi seyafter aa jei etamwebanaram Abe minggunu aaiserem jeme. Ai aamei isa enggam Ai bilipmisint: taterisi seyafter aa jes ne tulistaabilim Am temawer, seyafter jeiserem gase etamwena, seyafter aa jes ne tulistaabilim buku-bukunu Nabi Musamana, ane nabi nafsiserem jes, ane bukunu Mazmurmanaiserem jep mese.”

⁴⁵Ane Yesus ini jemna ga fertebaipmunnu enggalfe, Taterisi Uwa Sanbagirmana gam ne sarbif waakenfer.

⁴⁶Ane Yesus ga balbabili jei, “Ba enggamam nabi aa jes ne tulistaabilim Taterisi Uwa Sanbagirmanaiserem jebe: Mesias, Angtane Uwa Sanbagiri aa Jes baftanaram angtane jam waakentababisife, Jei tamtamtala uskambarsus se domolsa jamer futu, ane nunu nawer-ningnaiserem Jei gamjon ga jem se irwesa terewer.

⁴⁷Ane bosna Jemnaiserem jeme, taterisi etam-etama kapkaiserem jewer jam tikwela jam sene nasipmisi, ane taterisi Uwa Sanbagiri etam-etama jam wirtabaabif jes mese. Anggwabura seyafter gemerserem jei taterisi jeiserem ga sene sarbisini, ga kota Yerusalemwer sene towaiwulu. Nabi ba gamam tulistaabil.

⁴⁸Ane Ai ims towas-towastababili: aamei seyafter jeiserem nabi aa jes ne tulistaabilim imsama domola, ane taterisi jeiserem aamei jamer isa towas-towastabaipmini angtanefe.

⁴⁹Ane Ai ga Mafnana Uwa Sanbagirmana isAs baafulmunnu ibe, Uwa Amna Jei aa gemer bilipminirim. Jengga gwanan aamei aafe, kota Yerusalem je jeber isa nwini, jamere aamei baabeta isa taabili taman waaken-giriwer.”

⁵⁰Ane Yesus Jei aa jei ne tikwebaatinennerem ga aftabifele kotanawer jamer tamna Betanyam gwetmanabo. Jepga Yesus tafna ga tetena, ane Uwa Sanbagiri ga bala, “Uwa, Aamei waakena Ilemanaiserem Is kitulmini angtane aaiserem jebe.”

⁵¹Ane Yesus Uwa Sanbagiri aa gemer balaram, Jei ga mirtebitefala, ane ga tauna taman waaken-giribe.

⁵²Jei Yesus ga aane pujitene. Ane jei ini saaser-saasersusmer jei gamjon ga aa ge waraubili kota Yerusalemwer.

⁵³Ane jei Jena Uwa Sanbagirmanaiserem jebe jeber-jeber ge nwinbewena, Uwa Sanbagiri ga aane pujitawena.