Read Berik Lukas 4 Bible Online

Lukas 4 - Berik bible

Lukas 4

¹Yesus aa galap warautnaram fona Yordanwer, Jei buguf Mafnana Uwa Sanbagirmanaiserem Jeme. Mafnana Uwa Sanbagirmana Jei Yesus danabana jamer taman dwisgir tetenaiserem jebo.

²Jebe bawasa Yesus ga unggwasbana nunu abaka ga enggammer empat pulu. Nunu jes gemerserem, Jei apgal jigala afa Jam tumilyen, jega nunu jeiserem aa barwebanaram, Jei wisi ga folbana.

³Bawasa ga Yesus enggam bala, “Afa Aamei Tane Uwa Sanbagirmanaye, tuna aaiserem jese balbabi tumilgalfe gangge etamwebi.”

⁴Yesus ga tamawolbana, “Taterisi Uwa Sanbagirmanaiserem jep ga enggam baatultel: ‘Angtane tumilgalem fener jam gweyan.’ ”

⁵Ane jepga bawasa Yesus ga aftafala tampata tagarabe, ane tatarfer nwena gam nwe tuksolam galserem, bawasa ga Yesus ga gam saasini tamna seyafter ogiri jeiserem jebe.

⁶Ane jei ga Yesus ga enggam bala, “Uwa Sanbagiri seyaftersus aaiserem abe as mesam kitulbono, ane ai ga as gulbana angtane ana jes destabanaram jebe. Baabeta angtane sanbaka seyafter ogiribe aa jei ge nwinbenerem, ane apgal jigala angtane sanbakmana, seyafter jeiserem ai Is gam as kitulbono Ibe.

⁷Afa Aamei somwan dumem nwini, ams Is pujitene, ai seyafter aaiserem Ibas kitulbono.”

⁸Yesus ga tamawolbana, “Taterisi Uwa Sanbagirmanaiserem jep ga enggam baatultel: ‘Angtane jei Uwa Sanbagiri tefner gam pujitene! Ane Uwa Sanbagiri aa jes bilirim, ga jetefener igam eyebili!’ Ga jem temawer Ai is Ajam pujiteyen.”

⁹Jepga bawasa Yesus ga aftafala jamere kota Yerusalemo, ane ga gaaranswena Jena Uwa Sanbagirmanaiserem tampata tagarsususerem jebe. Ane Jemnip ga gutena, “Afa Aamei Tane Uwa Sanbagirmana, se janon aawer,

¹⁰aam temawer Taterisi Uwa Sanbagirmana jep ga enggam baatultel: ‘Uwa Sanbagiri malaikata Jemna se balbabili Im temawer, Is jei ne gerebaasnenefe waakenfer.’

¹¹Ane gamjon jep enggam baatultel: ‘Malaikata ga Isene tebaniwili tafame, jega tufa Imna Ijam juteyan tunabe.’ ”

¹²Yesus jei bawasa ga tamawolbana, “Taterisi Uwa Sanbagirmana jep ga enggam baatultel: ‘Angtane jei Uwa Sanbagiri jam unggwasbayan!’ ”

¹³Bawasa Yesus aa galap tabantanaram Jam unggwasbalawer nenes-nensa seyafteraiserem, jei Yesus ga mirtetefala, jamer nunu gamjon nensaiserem ga jem waraufaltya.

¹⁴Ane jewer ga Yesus ga warautna ona Galileya je, ane baabeta Mafnana Uwa Sanbagirmanaiserem Jei Jebaner. Taterisi seyafter Jelem temawer ga aane gwirinbenenne ona seyafter jep gemerserem.

¹⁵Jei towas-towastababili jena angtane Yahudimana aa jep ge betwebuwefaram jebe, ane angtane seyafter ga aane balbabili taterisi waakena Yesusem temawer.

¹⁶Yesus ga sofwa tamna Nasaretwer, tamna Jei aa jep unggwan-girswenaram. Gwanan gemerserem ga gemer, nunu Sabat, Yesus ga gwina jena angtane Yahudimana aa jep ge betwebuwefaram jeiserem jebe. Ane Jei ga irwa, Taterisi Uwa Sanbagirmana Jam gerabistefe.

¹⁷Ane bukunu Nabi Yesaya aa jes tulistaabilim, ga aane gulbana Yesusfe. Jei bukunu fwiresili jeiserem ga ferolsini, ane ga domola ayata enggam aa jep tulistaabilim:

¹⁸“Uwa Sanbagiri As mes destabana, Ai Taterisi Waakena aaiserem gam nasbinennef angtane galgalyenaiserem jebe. Ane Jei Mafnana As mes baafulbono, ane Mafnana jeiserem Jei Abaner. Jei Ams baftana, jega Ai angtane gam As towas-towastababili enggame: angtane aa jes ne tebabilirim, ga sene aftabunsu; angtane nwe kofa, ga sege anggabisisi; ane angtane aa jei gam naawenaram angtane nensaiserem baabeta jemnaiserem jem gwonawer, jei ga sene aftabunsu.

¹⁹Ane Ai gam towastababif enggame nunu Uwa Sanbagiri jem foryalaiserem angtane Jelemana gam waakentababisife mes foryal.”

²⁰Yesus bukunu jeiserem gamjon ga egwaiwulsini, ane gamjon ga gulbana angtane awelna jep aa jei gwebilirim jebe. Ane gamjon ga nwintena enggalfe angtane gam towas-towastababif. Angtane seyafter aa jei ge nwinbenerem jena jeiserem jebe, jei Yesus ga aane gerebana.

²¹Ane Jei ga aa balbabili, “Taterisi Uwa Sanbagirmanaiserem Nabi Yesaya aa jes tulistaabilim, namwer aaiserem bunarsus mes etamwena, aamei igalaba sarbilirim.”

²²Angtane seyafter jeiserem waakenfer ge nasbawena Yesusem temawer, ane ga aane bitbitwebili ula waakenaiserem Jei aa jes nasbilirim. Jei nabi galserem gam nasowena. Ga aane balbabili, “Angtane aaiserem maga tane Yusufmana! Jeje fomfoma enggam gase nasouna?”

²³Yesus ga balbabili, “Ai bunarsus tousa aamei ga taterisi aaiserem ga aamei As isa bala: ‘Doktor in inater is waakentana.’ Jemna igiserem ga enggam, afa Aamei bunarsusfer nabiye, se eyebi gamjon Ilem tamnap, seyafter jeiserem ajesa sarbilintim Ijes eyebilintim kota Kapernaum je.”

²⁴Yesus gamjon ga balbabili, “Ai bunarsus ims towas-towastababili, nabi afa fas jam ne tebayan tamna jelemanaiserem jebe.

²⁵Amsa sarbasi! Angtane jei Nabi Eliya jam tebayan jelem onabe, ona jeiserem bosna Israel. Gwanan Nabi Eliya aa galap gwelam ogiri aaiserem jebe, arouwa jam nyenyan abaka enggammer tahunu ga tiga setenga. Angtane uskambar ona Israel jebe seyafter gemerserem, jei ga aa ge terbil aam temawer tumilgala fas. Jes galapserem saamirawi unggwanfer ona ga jep.

²⁶Safe gam, Uwa Sanbagiri Jei Eliya Jam baftayan saamira wini daamfennaiserem ona Israel jemnip, jengga Jei Eliya gam baftal saamira wiminip tamna Sarfat, ona nafsi Israelminibe, bosna ona Sidon je.

²⁷Ane jes galserem angtane jei Nabi Elisa jam tebayan jelem onabe, ona jeiserem bosna Israel. Gwanan Nabi Elisa aa galap gwelam ogiri aaiserem jebe, angtane uskambar ona Israel je, ga bwerna unggwandusa gane domola tifinibe. Safe gam, Elisa angtane daamfenna ona jep, jei jam waakensweyan. Jengga jei angtane bosna Naman tefner, ona nafsi jep, bosna Sirya je, jei waakensona.”

²⁸Angtane seyafter aa jei ge nwinbenerem jena angtane Yahudimana aa jep ge betwebuwefaram jebe, jei ula Yesusmanaiserem aa galap ne sarbilirim, jei ga aa ge kakalswebili.

²⁹Jei Yesus jam ne munbof, ga aa ge irwebili, ane Yesus ga aane baftafala tamna sitawer. Ane Yesus gane aftafala otum bolabe, otumu tamna jep nulnaram. Jei enggam ge gubili Yesus ma dantante ona usunuwer.

³⁰Jengga Yesus Jei angtane nenennap wofena, ga sofwa.

³¹Jepga Yesus ga jutetya kota Kapernaum, ona Galileya je. Nunu Sabateme, nunu angtane Yahudimana aa jem ge nwinbisiwefaram, Yesus ga angtanes towas-towastababili.

³²Yesus aa galap towas-towastababilirim, angtane seyafter jeiserem ga jam ge bitbitwebili, aam temawer Yesus Jei enggam towas-towastababili angtane baabetabara galserem.

³³Jena angtane Yahudimana aa jep ge betwebuwefaram, angtane aasaje ga jep nwini bwat kapkaiserem aa jei kabwanaram. Jei ga jam gwarenwena uskambar,

³⁴“O Yesus angtane Nasaretmana, Aamei Ibaf fortya? Aamei abe ase basIs eyeipmini? Aamke enggalf Im fortya ai as Igam kabwaktababif? Ai amsa towaswena Aamei nansa. Aamei Angtane ini tabalbalsusu aa jemanem folbanaram, Uwa Sanbagirminiwer Ijei jelaram.”

³⁵Yesus bwat kapka jeiserem enggam jes uftana, “Se tikwe! Jase totini angtane aaiserem jemniwer!” Jes jepserem bwata kapka angtane jeiserem ga baftana jamer titikip ga jena, angtane seyafter jeiserem jem danggonawer. Ane ga totintye, apgal jigala afa jam eyebiyen angtane jeiserem jemnibe.

³⁶Angtane seyafter jep jeiserem jei ga aa ge bitbitwebili, jepga jena aane gitminenne, “Jemna ula ga fomfoma? Angtane aaiserem Jem baabetem bwat kapkaiserem ga jamfener surbili jam totinyefe, ane bwat kapka jeiserem ga aa ge sarbili, ane ga aa ge tobitintye!”

³⁷Ane taterisi Yesusem temawer ga aane gwirinbenenne ona seyafter jep gemerserem.

³⁸Yesus ga jena angtane Yahudimana aa jep ge betwebuwefaram jeiserem ga mirultefala, ga sofwa Simonem jenabe. Simonem munau tane jei bwernabara, tifin sarsar uskambar bwerai falbili. Ga aane bala Yesus jam waakenulfe.

³⁹Yesus ga gwina, ga fyatetna wini jeiserem jem tarnabe, ane tifin sarsara jeiserem ga suribili. Jepga tifin sarsara jemna ga barwebili. Wini jeiserem tatarfer ga irwena, ane tumilgala ga kitulmini angtane jeiserem jebe.

⁴⁰Ane gwere ga jam kawetenaf gwena, angtane bwerna nafis-nafsiserem ga aane aftabifelwetya Yesusminibe. Yesus tafna daamfen-daamfenneme ga tosoniwili angtane seyafter jeiserem jem sagabe, seyafter ga aa ge waakenswebili.

⁴¹Bwat kapkaiserem jes mese ga aa ge tobitintye angtane unggwanfer jeiserem jemniwer. Jame aa galap ge tobitintyerem, jei ga aa ge gwarenbuwena, “Aamei Tane Uwa Sanbagirmana!” Jengga Yesus ga uftabili, “Aamei ipsama nasowenaram!” Yesus jes gemerserem gam ga uftabili, aam temawer bwat kapka jeiserem jei mes ge towaswebili Yesus Jeiba Kristus, Angtane Uwa Sanbagiri Jei bunarsus aa Jes balam Jam baftanaf enggalfe angtane gam waakentababisif.

⁴²Gwinibenersus, Yesus Jei tamna jeiserem ga mirtetefalsa, ane ga sofsa ona taman tetenabe. Angtane Yesus ga aane terelbene. Jei Yesus jame aa galap ne damtanaram, jei enggam ge gubili, “Yesus as Ijam mirtebitefalyan.”

⁴³Jengga Yesus ga balbabili, “Nunu Uwa Sanbagiri Jei aa jem nwinirim anggwabura seyafter gemerserem jem Sanbakfe, Taterisi Waakena nunu jeiserem jem temawer ga As nasipminenne, taman-tamna nensaiserem seyafter gemerserem jes mese. Ga jem temawer Uwa Sanbagiri As baftannu ogiri aaiserem jebe.”

⁴⁴Ane Yesus gamjon ga nasipmini jena angtane Yahudimana aa jep ge betwebuwefaram, ona Yudeya seyafter gemerserem jebe.