Read Berik Lukas 5 Bible Online

Lukas 5 - Berik bible

Lukas 5

¹Nunu daamfenna jeme, Yesus Jei fobogana Genesaret ga jem eyep fina, ane angtane unggwanfer jena ga aane bafsona jamere Yesusem tarnabo enggalfe Taterisi Uwa Sanbagirmana gam ne sarbisif.

²Jei atdwas naura ga foboga eyep domsona. Angtane jigal aa jei ne terelbaabilirim jei atdwas nauna jeiserem ga aane mirsotefala, ane jei jalna jelemanaiserem ga jes ne wirtabaabili.

³Yesus ga juwili atdusa daamfennaiserem jebe, atdusa jeiserem ga Simonmana. Jei Simon ga bala, “Atdwas aaiserem jase baafulwi, bijautowaifer tufawer.” Jepga Yesus ga nwintena atdusa jeiserem jebe, ane angtane unggwanfer ga towas-towastababili.

⁴Jame aa galap tabanulurum jam towas-towastababilibe, Jei ga Simon ga bala, “Enggam se gwebisowe fobogana giriwer. Jalna imna jep ga isa aftabaabuntetna enggalfe jigala jep ga sege tarbitini.”

⁵Simon ga tamawolbana, “Uwa, ai awelna gwineme uskambar masef aya gwebisi, jigala afa jam ge tarbitiyen! Jengga aam temawer ase Aamei bala, sya, ai jalna gamjon ga ajam aftabuntena.”

⁶Ane jeiserem ga aane eyebili. Jei jigala uskambarsus ga aane damtabili, jamere jalna jelemana ga aa towaiwemini jam ne bitfarwefe.

⁷Jega jem temawer jei jelem afelen mesna awelna seyafter aa jebar ne gwebiwenaram atdusa afelnaiserem jewer, jei tafamfener ga aane jenbebuwili jam ge jalbif enggalfe jei gam ne batobaabif. Ane jelem afelen mesna jeiserem ga aa ge jalbili, ane jei seyafter atdwas nawana jeiserem ga aane boksona jigaleme, jamer fata. Atdwas nauna jeiserem ga aa ge towaiwena jam ge nwintefe.

⁸Simon jame aa galap domolaram jeiserem, jei ga nwintena somwan dumeme Yesusem danggonawer, ane ga gutena, “Ai ajase mirtetefal, Tuhan! Ai angtane etam-etamabara.”

⁹Simon ane angtane seyafter jebaner atdusa jeiserem ga aa ge bitbitwebili, jigala uskambarsus aa galap ne damtabilirim jei aa jes ne towanbilirim.

¹⁰Angtane awelna aa jebar ne gwebilirim, Yakobus ane Yohanes, tannawan Sebedeusmana, jei mese jeime aa ge bitbitwena. Yesus Jei Simon ga bala, “Ipsam ernerem! Aamei ga namwer is towaiwena enggalfe, aamei angtanes towanbife jega jei Ai As gam sene onsobana, jigala igemer towanbinennerem.”

¹¹Simon ane jelem afelen mesna jebar, atdwas jeiserem ga aane deksostena tufabe, jepga jei seyafter ga aane mirtebitefala, ane Yesus ga aane onsobana.

¹²Yesus aa galap nwinirim kotana daamfennaiserem jebe, jep ga angtane tifin bwernabaraiserem ga fortya; jemna tifini ga jamer mat bubwame. Yesus jame aa galap damtanaram, jei jener ga nwintena somwan dumeme, ane jei Yesus ga balbalwena enggame, “Uwa, afa Aamei jam Is gunurum, Aamei baabetabara ams Is waakentana!”

¹³Jewer ga Yesus Jei tafna ga tetena, ane ga tosobaantena angtane tifni bwernabara jeiserem jem sagabe. Ane Yesus ga bala, “Sya, se waakenswe!” Jes jeberserem tifin bwerna jemna ga waakenswebana.

¹⁴Yesus Jei angtane jeiserem ititmer ga bala, “Aamei ijam nasbineneyen taterisi aaiserem angtane nensaiserem jebe! Jengga jase sofwe imamminip, jeiba angtane taterisi angtanemana Uwa Sanbagirfe aa jei gwirinbefelwenaram. Jei aamei jam is damtanaram enggame aamei imsam waakenswena. Jepga is eyebili Nabi Musa fwater aa gemer nasbilim: se gulba Uwa Sanbagirfe apgal jigala jeiserem Nabi Musa aa jes bilim. Jepga angtane ga sege towaswebili enggame aamei bunar-bunarsusfer imsam waakenswena.”

¹⁵Jengga taterisi Yesusem temawer aaiserem, ga aane nasbinenne jamer bijau-bijausus. Angtane unggwanfer ga aa ge forobitye Jemnibe enggalfe jei gane sarbif, ane enggalf jam waakentababif mese bwerna jelemanaiserem jewer.

¹⁶Jengga Yesus Jei jeber-jeber sofwena tampata tamanfennaiserem jebe, ane Jei jep ga sembayanga ga gam gwebana.

¹⁷Nunu daamfenna jeme Yesus Jei angtane aa galap towas-towastababilirim, angtane safna Farisimana afwer, ane guru-guru Hukumu Nabi Musa aa jes tulistababilim, ga jep ge nwinbene. Jei kota Yerusalemwer ge jalbili, ane ona Yudeyawer, ane tamna jeber-jeber ona Galileya je ga jewer ge jalbili. Baabeta Tuhanmanaiserem jei Yesusminip, ane jem temawer Jei angtane bwernabaraiserem jem gam waakentababili.

¹⁸Jes galapserem angtane ga aa ge jalbili angtane muli-mulni ga aane girinyele, ga tikarap tantena. Jei angtane jeiserem jam girinfelf jenabe, jega gam gaarantefe Yesusem tarnabe.

¹⁹Jengga angtane jebe uskambarsus, jei jam ne katanteyan. Jega jem temawer jei ga aane tauna ja bolabe. Jena jeiserem aareka, ane bolawer ga tonem ne eyebili. Angtane ga tuna jeiserem ga aane kwirulsini, ane angtane muli-mulni jeiserem ga jelem titik touyap tantena jebaner ga aane katantetya Yesusem tarnabe, angtane uskambar jeiserem jem nenennabe.

²⁰Yesus Jei tousa enggame, “Angtane aaiserem jei As mes ne tebana ginggitfer.” Jepga Yesus angtane muli-mulni jeiserem ga bala, “Am tane, etam-etama kapka imnaiserem Ai is Ames wirulbono.”

²¹Guru-guru Hukumu Nabi Musa aa jes tulistababilim, ane angtane safna Farisimana ga aa ge towaiwebili jen jena jam ge gubitefe jelem inibe, “Ai nansa Angtane aaiserem aa Jei nasounaram Jena aa Jei gaartenaram Uwa Sanbagiri gamserem game? Angtane afa fas etam-etama kapka jei wirulfe, jengga Uwa Sanbagiri Jentowaifener Jei etam-etama angtanemana gam wirulbono!”

²²Yesus ba mesam towaswena jei aa gam ge gubilirim jelem inibe, ane Jei ga aa balbabili, “Jeje bafa aamei gam ga ima gunu ilem inibe?

²³Masef unggwasbiliserem ga fwersa Ai angtane muli-mulinfe jes eyeibefe: afa Ai enggam jam As gunurum, ‘Etam-etama kapkaiserem imna is Ames wirulbono.’ afa Ai enggam jam As gunurum, ‘Se irwe, ga is wofena!’?

²⁴Ai nawersamer samfer As eyemini. Namwer aas jepserem Ai ibe isa Ajam gwerauwulmif enggame Ai Tane Angtanemana, baabeta Amna uskambar ogiri aaiserem jebe enggalfe, angtanemana etam-etama kapka seyafter Ajem wirtabaipmife. Jega aamei jeiserem gam isa towaswebili, Ai angtane aaiserem As waakentana.” Jepga Yesus ga bala angtane muli-mulni jeiserem, “Ai ims bala, jas irwe, tikar imna ga is tetena, ane ga is warauwa ilem jenabe!”

²⁵Ane jes jeberserem angtane jeiserem ga irwena, angtane seyafter jeiserem jem tarnabe, ane tikar ga tetena gwanan aa jep tanaram, ane ga warauwa jelem jenabe Uwa Sanbagiri ga pujitene.

²⁶Seyaftersus ga aa ge bitbitwebili, ane Uwa Sanbagiri gane pujitene. Ane ini ereleber, ga aa ge gubili, “Nei bwembwema waakensusu nei jesa domolaram nunu namwer aaiserem!”

²⁷Jeiserem taban, Yesus ga totintye, ane angtane ga damtana, bosna ga Lewi. Jeiba angtane pajak doini aa jei gam tebabilirim enggalfe pemerintafe gam kitulmini; jei ga jelem kantorap nwini. Yesus jei ga aa bala, “Aamei Ams onsoba!”

²⁸Lewi ga irwena, ane seyafter jeiserem ga mirtebitefala, ane Yesus ga onsobana.

²⁹Jepga Lewi ga masara unggwandusa ga eyebili jelem jenabe, Yesusfe. Angtane pajak doini aa jei gane tebabinennerem jeme uskambar, ane angtane nenes-nensaiserem jei seyafter Jebaner ne dwena.

³⁰Jengga angtane safna Farisimana afweraiserem, ane guru taterisi Farisimana aa jei ne towas-towastababuwenaram, jei angtane Yesus aa Jei ne tikwebaatinennerem ga aane balbabili ini kabwakeme, “Jeje bafa aamei seyafter jebaner ga ima twena, ane fona ga ima telbebili, angtane pajak doini aa jei gane tebabinennerem ane angtane etam-etamabara? Gam je kapka!”

³¹Yesus ga tamawolbaabili, “Angtane bwerayanaiserem jei jam gwiyan doktorminibe, jengga angtane bwernabara tefner jei ga gam gwina.

³²Ai ke enggalf Ai fortya angtane jena enggam aa jei gane gitminirim, ‘Maa, ames waakenswena, etam-etama amna fas,’ gam ke jes jenbebif. Jengga Ai enggalf Ai fortya, angtane etam-etamabaraiserem jei jam ge tikwebif jelem etam-etamawer, ga jes jenbebif, jega jei etam-etama jelemanaiserem jewer ga jam ge tikwebif, ane jei ga As ne onsobana.”

³³Angtane Yesus ga aane bala, “Angtane Yohanes aa jei ne tikwebaatinennerem, ane angtane safna Farisimana aa jei ne tikwebaatinennerem ga galap-galap jam ne dwenyan enggalfe Uwa Sanbagiri gam gane pujitefe, ane jei sembayanga gane gwebana. Jes gamserem je waakensusu. Jengga angtane Is jei ne tikwebaatinennerem ga jam ne dwena, ane fona ga aane telbebili, nunu jeber-jeber gemerserem. Jeiserem kapka. Angtane nafsi jei waakena gane eyebili, jeje bafa angtane Is jei ne tikwebaatinennerem, jei waakena gam jam ne eyebiyen?”

³⁴Yesus ga tamawolbaabili Jelem temawer, “Masar anggwana wini jep gam gularam, anggwana wini jei golfe jei jebar aa gemer ge nwinbenerem masara jeiserem jebe, angtane masara jeiserem aa jei ne onsobilirim, bunarsus jei ga sene dwena ini saaser-saasermer.

³⁵Jengga se fortya nunu anggwana wini jei gulaiserem, anggwana jeiserem ginanggwana jemna ga sene gaariufenne jemniwer. Jes jepserem jei ga jam ne dwenyan, aam temawer ini jemna jam ge jenbamini, ane jei sembayanga gane gwebana Uwa Sanbagiri jam pujitefe. Jes gemerserem aaiserem jegme gemer, angtane aa jei ne tikwebaatinennerem Amna, afa Ai jebaner Agma nwini aafe, jei jamer dwenwena nunu jeber-jeber ini saaser-saasermer.”

³⁶Jepga Yesus ga jebe seisya taterisi aaiserem ga nasipmini, jega angtane sege towaswebili jei taterisi waakena ibirmiserem Yesus aa jes nasbilirim, jei jam ne dupdupbulyon osiri fwatermanaiserem jebar, taterisi angtane safna Farisimana ane guru aa jes ne nasbilirim. Seisya taterisi ga aas: “Angtane afa fas jei bajunu ibirmi jam bitultefe enggalf, bajunu fwatermana jem waakensof. Afa ga gam, bajunu ibirmi jeiserem jam gam bitsosinirim. Ane sofbiti ibirmi jeiserem jei numu daamfenyan, bajunu fwatermanaiserem jebar.

³⁷Ga jes gamserem aaiserem jegme gemer: Angtane afa fas fo angguru ibirmi jam suwulntefe, kambing tifin fon fwatermanaiserem jebe. Ga aam temawer fo angguru ibirmi jeiserem ga jese gwebili kambing tifin fon jeiserem ga sene bitnetini, fo angguru gase suwetini, ane kambing tifin fon jeiserem gase kabwakswena.

³⁸Wowo, gamyan! Jengga enggam, fo angguru ibirmi ga kambing tifin fon ga ibirmiter gane suwulntena, ga jep gane bokola.

³⁹Jes gemerserem aaiserem jegme gemer, angtane fo angguru fwatermana aa jei telbilirim, jei bai fo angguru ibirmiserem jam telbife. Jes galserem, angtane osiri fwatermanaiserem aa jei ne onsobilirim, jei bai tatarfer taterisi ibirmi Amnaiserem jam ne onsobife.”