Read Berik Lukas 8 Bible Online

Lukas 8 - Berik bible

Lukas 8

¹Abakefyan Yesus jewer ga sofna kota-kotanabe ane taman-tamnap enggalfe, Taterisi Waakena gam nasbinennef nunu Uwa Sanbagiri Jei aa jem nwinirim anggwabura seyafter gemerserem jem Sanbakfe jem temawer. Angtane dua belas Jei aa jei ne tikwebaatinennerem,

²ane wini afweraiserem ga seyafter Yesusfaner ge sofobili. Yesus bwat kapkaiserem mes surbobili wini jeiserem jemniwer, ane bwernawer ga mes ge waakenswebili. Jei ga aas: Maria aa jes ne jenbiwenaram Magdalename, bwat kapkaiserem ga tuju gemer surboibili jemniwer;

³ane Yohana, wini Kusamana — Kusa jeiba sanbakfe jeyam nwini angtane awelna Herodesem jenap aa jei ne gwebilirim; ane Susana; ane wini unggwanfer afweraiserem jes mese. Wini jeiserem, doini jelemanaiserem jeme, jei Yesus ane angtane Jei aa jei ne tikwebaatinennerem jes mese ga jem ne batobaabili.

⁴Angtane unggwanfer ga aa ge forobuwetya Yesusminibe kota-kotana unggwanfer jewer. Angtane unggwanfer jame aa galap ge betwebilirim, Yesus Jei seisya taterisi aaiserem ga nasipmini:

⁵“Angtane makan anggwana jam gam sofnaram enggalfe twam tanna gam tonolf makanabe. Jei twam tanna jame aa galap gam fasawolnannaram, twam tanna afweraiserem ga nelep gangge janbili. Jepga angtane ga aane jubobinenne, ane junu twam tanna jeiserem ga gane tombaabili jamer bar.

⁶Ane afwer ga ona tunabaraiserem ga jep gangge janbili. Twam tanna jeiserem jame aa galap ge kokosbilirim, kokosa jeiserem ga aa ge werenswebili, aam temawer ona jeiserem foyena.

⁷Ane twam tanna afwer ga ona tini utuboroserem ga jep gangge janbili. Tini utuboroserem ga aa ge kokosbili, twam tanefaner ga aa ge kokosbili, ane twam tanna kokosa jeiserem ga matabili, ane ga aa ge aralakswebili jamer futu.

⁸Jengga afwer ga ona waakenaiserem ga jep ge janbili, ane ga aa ge kokosbili jamere aa ge unggwanswebili, jamere igi jemna 100 ga gemer ge taabili.” Taterisi jeiserem jame aa galap tabanulurum Jam nasbilibe, Yesus gamjon ititmer ga balbabili, “Afa aamei imwanabaraye, taterisi Amna aaiserem ga As jam isa saribene, ane waakensusfer ga isa towaswebili.”

⁹Angtane Yesus aa jei ne tikwebaatinennerem Yesus ga aane tenebana enggame, “Seisya taterisi jeiserem, igi jemna ga basa?”

¹⁰Yesus ga tamawolbaabili, “Taterisi nunu Uwa Sanbagiri Jei aa jem nwinirim anggwabura seyafter gemerserem jem Sanbakfe, Uwa Sanbagiri taterisi jeiserem jem igiserem Jam towasulmiyen angtanefe jamer abaka. Jengga namwer aas jepserem Uwa Sanbagiri Jei waakena Jelemanaiserem ibe is mesam kitulmini, jega enggalf aamei taterisi jeiserem jemna igiserem gam isa towaswebili. Jengga angtane Ams tikwebaatiyeneiserem, Ai seisya taterisi Ai jem Agam towas-towastababili. Ai ga jes gemerserem ga Agam towas-towastababili enggalfe, jei safe jam gangge anggabisini, jengga jei jam ne domolyan. Jei safe jam gane sarbili, jengga jei waakenfer jam ne towaswebiyen.”

¹¹Yesus Jei gamjon ga balbabili, “Seisya taterisi jeiserem igi jemna ga aas: Twam tanna jeiserem ga taterisi Uwa Sanbagirmana.

¹²Twam tanna aa jei ge janbilirim nelebe, jeiserem ga angtane taterisi Uwa Sanbagirmana aa jei ne sarbilirim; jengga bawasa jama fortyaram, ane taterisi jeiserem ga amsonmini jem iniwer, jega jei Uwa Sanbagiri fas jam ne tebayan, ane Uwa Sanbagiri Jei angtane jeiserem Jam waakentababisiyen.

¹³Twam tanna aa jei ge janbilirim ona tunabaraiserem jebe, twam tanna jeiserem ga angtanna enggalaiserem: Angtane gwanan jame aa galap ne sarbilirim taterisi jeiserem, jei ga gane taabili ini saaser-saaseremer. Jengga taterisi jeiserem ga fas jam ge tarnabarswebiyen jem inibe. Jei namwenefener gane taabili, ane unggwasbala kapkaiserem jame aa jep gam fortyaram, jei ga gane mirtebitefala.

¹⁴Twam tanna aa jei ge janbilirim ona tini utuboroserem jebe, twam tanna jeiserem ga angtane enggalaiserem: Angtane taterisi jeiserem gane sarbili. Jengga jei ini ga jam gangge eseswebamini jelem gwelem temawer, dois damtabif, ane ini unggwan-giri enggalf jei jam ne eyebif jega ini jemna saaser-saaserfer gam ge folbamif. Jega jem temawer jei taterisi Uwa Sanbagirmana ginggitfer jam ne taabiyen, ane jei waakenfer jam naaweyan.

¹⁵Jengga twam tanna aa jei ge janbilirim ona waakenaiserem jebe, twam tanna jeiserem ga angtane enggalaiserem: Angtane taterisi Uwa Sanbagirmana aa jei gane saribenerem, ini bunarsusfer waakenaiserem jeme. Ane jei safe kabwaktala jam gane domola, jengga jei taterisi Uwa Sanbagirmana ginggitfer gane taabili, ane waakenfer ga gam naawena, ane ga gane eyebili Uwa Sanbagiri Jei aa jes gam bilirim jam eyebife.”

¹⁶Yesus gamjon ga balbabili, “Angtane pelitana aa jei gam dutanaram, jei pelitana jam matasiyen burwame, afa nutar gwonap jam gaaraniwiyen. Jei fasfasus. Jengga angtanna jeiserem pelitana tampata dwafennaber gam gaarantena, jega angtane jenap aa jei gam kawetetyaram jei nafa ga gam domola.

¹⁷Taterisi Uwa Sanbagirmana namwer aas jepserem aa jes syetabaabisinirim, taterisi jeiserem angtane galap ga je sene towaswebifi. Ane taterisi angtane jam ne towaswebiyeneiserem, galap ga sene gweraulmifi.

¹⁸Ga jem temawer gasa sarbisi waakenfer, aamei taterisi Amna ga fomfom isa sarbili. Gasa sarbisi, aam temawer angtane aa jei gane sarbisinirim ini waakenaiserem jeme, ane taterisi Amna jam taayibef, angtane jeiserem jei gamjon Taterisi Waakena jem temawer gase sarbisini waakenfersus. Jengga angtane baif gwelaiserem jam sarbisife, Uwa Sanbagiri Jei taterisi bastowaifer jei aa jes towaswebilirim se amsonbana jemniwer.”

¹⁹Yesusem eneserem ane Jelem oson mesna ga aa ge forobitye Yesus ne damtafe, jengga jei ga jam ge forobiyen Jemnibe, aam temawer angtane unggwanfersus.

²⁰Ane angtane aasaje ga Yesus ga bala, “Iye mese oso Imnaiserem sitap ge fibitne, jei Ibara dorwef.”

²¹Yesus ga tamawolbaabili, “Angtane Taterisi Uwa Sanbagirmana aa jei ne sarbilirim, ane aa jei ne eyebilirim Uwa Amnaiserem Jei aa gemer gam gunurum, angtane jeiserem jei ga iye ane oso Amnaiserem, bunar-bunarsusfer ga jes.”

²²Nunu daamfenna jeme, Yesus angtane Jemna aa jei ne tikwebaatinennerem ga balbabili, “Au, nei ganma sofwe fobogana jimwer!” Jepga jei atdusap ga aa ge jubuwili, ane ga aa ge sofobili.

²³Jei aa galap ge sofobilirim, Yesus ga Jam tana. Deye sanbagiri ane arouwa ga aane forobatya foboganabe, ane atdusa jeiserem ga towaiwena fona jam bakwebife. Jes jepserem jei ga amkom fom ge albitili.

²⁴Jepga angtane Jei aa jei ne tikwebaatinennerem jei ga aa ge taabuntini Yesusminibe, ga aane irtetena. Jei ga aane bala, “Uwa, Uwa, nei nesa altil!” Yesus ga irwena, ane deye yo muru unggwanfer jeiserem ga ofsobana enggame, “Se tikwe! Jafner is fala!” Ane deye aane tiknebana, ane fobogana jeiserem ga fala jamer aarek-aareksus.

²⁵Yesus angtane Jei aa jei ne tikwebaatinennerem ga balbabili, “Jeje bafa aamei ga As ijama tebayan?” Jei ga aa ge erebili, ane ga aa ge bitbitwebili. Ane jei jena ga aane tenaaminenne, “Aaje nansa, deye yo fona aa jei ofsonaram jam ge tikwefe, ane deye yo muru taterisi ga Jemna gangge saribene?”

²⁶Jepga Yesus ane angtane Jei aa jei ne tikwebaatinennerem jei ga aa ge batobili ona Gerasa je, foboga jimwer ona Galileyawer.

²⁷Angtane bwat kapka aa jei kabwanaram jei ga jep nwini. Angtane jeiserem jei gwanan kotanap nwini, jengga jei abaksusu jenap jam nwinyen. Jei jentowai tonmwa bitis mwonap nwini, ane jei fene jam kamwiyen. Bwat kapka angtanna jeiserem ga enggam gwebawena gam tebana, gamjon bastowaifer gam aftannu, ane abakferyan gamjon gam tebana. Angtane safe waakenfer gane gerebaasnenne, ane tafna yo tufa jemna safe jam gane faarebana ranteme, jei rantena jeiserem gam tiksosini, ane bwat kapka ga gam aftafala taman dwisgiribe. Yesus atdusawer aa galap jutenaram onabe, angtane jeiserem jei ga jela Yesusminibe. Angtane jeiserem Yesus jame aa galap damtanaram, jei ga aa gwarna uskambar, ga jena Yesusem tufabe. Yesus bwat kapka jeiserem ga bili jemniwer jam totinyefe. Ane angtane jeiserem ititmer ga nasowena, “Aamei Ibas eyebifi amnibe, o Yesus, Tane Uwa Sanbagirmana, Uwa Sanbagiri angtane aa jes ne gaartenaram tagarsusube? Ai Isa enggam ai bala as Ijam tamtamtayan!”

²⁸

²⁹

³⁰Yesus Jei angtane jeiserem ga tenebana, “Imna bosna nansa?” Angtane jeiserem ga tamawolbana, “Bosna amna ‘Unggwanfer.’ ” Jei gam aa jewer gunurum, aam temawer bwat kapka ga unggwanfer ge kayibene jemnibe.

³¹Bwat kapka jeiserem Yesus ititmer ga aane bala, “Safnant as Ijam surbobiyen O Mwona girsususerem jep irefe.”

³²Otumu jes jepserem twena unggwanfersus ga jep naawena, tumilgals ne terelbaabili. Bwat kapka jeiserem jei Yesus ititmer ga aane bala jei jam ge kabwitef twena jeiserem jemnibe, ane Yesus ga gunu, “Sya.”

³³Ane bwat kapka jeiserem ga aa ge tobitintye angtane jeiserem jemniwer, jepga twenminip ga aa ge kabwitena. Ane twena jeiserem ga aa ge nunggirbili, ga aa ge janbiton obinfiwer jamer foboganabo, jepga aa ge albitini.

³⁴Angtane twena jeiserem aa jei ne gerebaabisnennerem jei aa galap domolaram jep aa jei etamwenaram, jei ga aa ge nunggirbili, ane taterisi jeiserem ga aane nasbinenne kotanap ane taman-tamnap ona jep gemerserem.

³⁵Ane angtane ga aa ge sofobuwena enggalfe aa je etamwenaram gam ne domolf. Jei Yesusminip ga aa ge jalbili, ane jep ga jei angtane jeiserem ga aane damtana. Bwat kapka jeiserem jei angtane jeiserem mes aftannu, ane angtane jeiserem ga Yesusem tof gwetmanap nwini. Jei fene gamjon ga mes kabwabili, ane ini jemna ga mes waakenswebana. Angtane aa jei ge forobityerem jei seyafter ga aa ge erebili.

³⁶Jei aa jei ne domolaram jeiserem aa je etamwenaram, jei ga angtane aa jei ge forobityerem jep ga jei ne nasipmini enggalem temawer, angtane bwat kapka aa jei kabwanaram jei jame fomfoms waakenswena.

³⁷Jepga angtane seyafter ona Gerasa je, jei Yesus ga aane bala enggalfe Yesus ona jemnaiserem Jam mirtetefalf, aam temawer jei seyafter ga jam ge erebili uskambar. Ane Yesus ga juwili atdusabe, ane gamjon ga aa ge sofobili.

³⁸Angtane bwat kapka aa jes aftannurum jei Yesus ga bala, “Ai ke samfer Isas tikwebaabitini?” Jengga Yesus ga bala,

³⁹“Safnant. Aamei jase warau ilem jenap, ane ga is nasbinenne Uwa Sanbagiri is jes eyeibenerem ibe!” Ane angtane jeiserem ga sofna, ane ga nasbinennefe kotana seyafter gemerserem jebe, seyafter Yesus aa jes eyeibenerem jebe.

⁴⁰Yesus aa galap warautnaram fobogana jimwer, angtane unggwanfer jei ini saaser-saasermer Yesus ga Jem ne tebana, aam temawer jei ga jes ne fibawena.

⁴¹Jes galapserem angtane aasaje ga jela, bosna jemna ga Yairus. Jeiba angtane sanbaksam jena angtane Yahudimana aa jep ge betwebuwefaram. Jei jener jena Yesusem tufabe, ane Yesus ga bala enggalfe Yesus gam jalf jem jenabe,

⁴²aam temawer tane yafma jemna ga amkom fom tere. Tane jemna jeiserem ga daamfen-daamfensusu, umuru jemna ga tahunu dua belas. Yesus aa gemer sofnaram Yairusem jenabe, angtane unggwanfer Yesus ga aane baftananna afwer taamwer, ane afwer taamwer.

⁴³Jes jepserem wini aasaje ga bwernabara. Aawis fwa jemna jeber-jeber domolwena tahunu dua belas, jengga angtane afa fas wini jeiserem jei jam waakenulyon. Doini jemna bar, aam temawer jei doini jemna seyafter mesam kitulbono doktorfe enggalfe jei jem waakenulf, jengga aawisi gemerje.

⁴⁴Wini jeiserem Yesus ga gwetmanwebaasini duruwer, fen fwesawer ga entewili. Aawisi jes jeberserem ga tikwebili.

⁴⁵Yesus ga tenebaabili, “Ai As nane entene?” Angtane seyafter ga jam ge baanbaanwebili. Ane Petrus ga gutena, “Uwa, angtane aare unggwanfersus Im tarnabe, angtane anesus jei Ims ne enentene, aam temawer jei Is jam ne baftananna!”

⁴⁶Jengga Yesus ga gutena, “Angtane aare Ai aa jei entenerem. Ai tousa aam temawer baabeta aa jei totintyerem Amniwer.”

⁴⁷Jepga wini jeiserem ga towaswena enggame, je aa jes eyebilirim jeiserem ba mesam ne towaswebili. Ane jei ga aa jela ga jam egegwena, ane jei jener jena Yesusem tufabe. Jes jepserem wini jeiserem ga nasowena, angtane seyafter jeiserem jem danggonawer, jeje bafa jei Yesus ga entene, ane jei Yesus jame aa galap entenerem, aawisi jemna tatarfer ga tikwebili.

⁴⁸Jepga Yesus wini jeiserem ga bili, “Am tane, aamei Ai As imes tebana waakenfer, jega jem temawer aamei gase waakenswe. Gase sofwe waakenfer.”

⁴⁹Jepga Yesus ga gemer nasowena, angtane aasaje ga jela aa jes ne baftanaram Yairusem jenawer. Jei Yairus ga bala, “Tane yafma imnaiserem futu. Safnant, aamei Guru gamjon ijam balyan im jenap jam gwife.”

⁵⁰Jengga Yesus jeiserem aa galap sarbilirim, jei Yairus ga bala, “Aamei ipsam ernerem; Amter is tebana, ane tane imna jeiserem gase waakenswena.”

⁵¹Jame aa galap ge forobilirim Yairusem jenabe, Yesus angtane afa jam balyan jei Jebar ge kawetefe, jengga Petrus tefner, Yohanes, Yakobus, ane tane jeiserem jem ene yo jeta ga Jebanefener ge kabwitena.

⁵²Angtane seyafter ga jam ge syebuwena, ane ini ga jam ge jenbamini, tane aa jei tererem jem temawer. Jengga Yesus ga gutena, “Ipsama syawenaram! Tanna jeiserem jei fas jam teryen, jei jafner tanna!”

⁵³Jei Yesus ga aane bweraltana, aam temawer jei enggam ge towaswebili tane yafma jeiserem mes tere.

⁵⁴Jengga Yesus tanna jeiserem jemna tafna ga taayimbili, ane ga bili, “Tane, jase irwe!”

⁵⁵Mafnana tane jeiserem jemna gamjon ga warautna tane jeiserem jemnibe, ane jes jeberserem jei ga irwena. Ane Yesus ga balbabili jei tumilgal sa golbi tane jeiserem jebe.

⁵⁶Tane jeiserem jem ene yo jeta ga jam ge bitbitwena, jengga Yesus ga gitmini, “Safnant, aamei aa je etamwenaram angtanefe ijama ge nasipmiyen.”