Read Berik Lukas 9 Bible Online

Lukas 9 - Berik bible

Lukas 9

¹Yesus ga angtane dua belas Jei aa jei ne tikwebaatinennerem ga jenbebili, ane baabeta ga golmini jebe enggalfe bwat kapka jem gam surbobif, ane bwerna nafis-nafisem jem gam waakentababif.

²Ane Jei ga aa baftabili, jei ga aa ge sofobili enggalfe, taterisi gam ne nasbinennef Uwa Sanbagirem temawer enggame, “Uwa Sanbagiri Jei mes gwena anggwabura seyafter gemerserem jem Sanbakfe.” Ane Jei ga enggalf baftabili, angtane bwernabaraiserem jei gam waakentababif.

³Yesus ga balbabili, “Aamei ijeba sofwaram, apgal jigala safnant afa ijama erbiyen. Dumu safnant ijama erbiyen, ane funa ijama erbiyen, ane tumilgala ijama erbiyen, ane doini ijama erbiyen, ane fene naura ijama eteryen.

⁴Angtane tamnabe aamei jam is jep ne tebabilirim, aamei ga jena jemna jeiserem ga jeber isa nwini jamere aamei tamna jeiserem isa mirsotefala.

⁵Afa angtane aamei jep is jam ne tebabiyeneye, aamei kotana jeiserem ga jam isa mirsotefala, ane tufa onabaraiserem ga jam isa tentebaabisini, jega angtane tamna jeiserem jep aaiserem jei gam sege towaswebili enggame, jei etam-etama kapkaiserem ga jes ne eyebili.”

⁶Jewer ga angtane Yesus aa jei ne tikwebaatinennerem ga aa ge sofobili, ane ga aa ge wofebili taman-tamna gemerserem enggalfe Taterisi Waakena jeiserem gam ne nasbinennef, ane enggalf angtane bwernabara gam ne waakentababinenef ona seyafter jep gemerserem.

⁷Herodes, angtane sanbak ona Galileya je, jei ga sarbabili seyafter jeiserem Yesus aa jes eyebaabilirim. Ane jei teisyena jei bas bilfi Yesusem temawer, aam temawer angtane afwer jei ga aa ge gubitena enggame, Yohanes Pembaptis jei gamjon mes irwena terewer.

⁸Angtane nafsi jei ga gemer ge gubitena enggame, Nabi Eliya jei gamjon mes foryal. Afwer ga aa ge gubitena enggame, angtane nabi afwer fwatermanaiserem jei gamjon mesam warautna terewer.

⁹Jengga Herodes ga gutena, “Aiba angtane amsam baftabili enggalfe Yohanesmana duka gam targabafe. Jengga angtane aaiserem Jei nansa? Ai taterisi unggwanfer ames am sarbabili Jem temawer.” Ane Herodes ga unggwasa Yesus Jam damtafe.

¹⁰Angtane Yesus aa jes baftabilirim gamjon ga aa ge waraubitne, ane Yesusfe ga aane nasbaibene jei seyafter aa jes ne eyebaabilirim. Yesus ga angtane aa jes baftabilirim ga aftabifele, ane Jei jenfentowai jebaner ga aa ge sofobili tamna Betsaida je.

¹¹Angtane unggwanfersus jame aa galap ge sarbilirim enggame, Yesus Jei Betsaidawer ge sofobili, jei mese ga aa ge sofobili Yesus jam terelbefe. Yesus Jei seyafter ga tebabili, ane ga nasipmini nunu Uwa Sanbagirem temawer enggame, “Uwa Sanbagiri Jei ga gam se gwena anggwabura seyafter gemerserem jem Sanbakfe.” Ane Jei angtane bwernabara ga waakentababili angtane unggwanfersus jeiserem jemniwer.

¹²Ona jewer gigitswef, angtane dua belas Yesus aa jes baftabilirim ga aa ge jalbili Yesusminibe, ane ga aane bala, “Tampata aaiserem tamanfenna. Angtane unggwanfersus aaiserem waakenfer jase balbabi jei gangge sofobi, desa-desanap ane taman-tamnap ona jep gemerserem, jega jei tumilgala jep ga sene terelbaabili, ane jena nunu jep taf mese.”

¹³Jengga Yesus ga balbabili, “Tumilgala jebe aamei sa kitulmi.” Jei ga aane tamawolbana, “Rotini aman tafna gwiri tefner, ane jigala ga nawerfenna. Kakman ai ajama sofwef enggalfe tumilgala gam armantababif angtane seyafter aaiserem jebe?”

¹⁴(Angtane jep ga unggwanfersus. Anggwana jep aa jei ge betwebilirim unggwanfer ga enggammer 5.000 anggwa. Wi tane seyafter jebar jep aa jei ge betwebilirim jam ne ertebiyen.) Jepga Yesus angtane Jei aa jei ne tikwebaatinennerem ga balbabili, “Angtane aaiserem jasa balbabi gangge nwinbete safna daamfen-daamfenneme, angtane aa jei ge nwinbenerem jei ga engbar ke enggammera lima pulu aa jei ge mulumwebisinirim jeber-jeber.”

¹⁵Angtane Yesus aa jei ne tikwebaatinennerem jei ga aane eyebili Yesus aa gemer balbabilirim, ane angtane seyafter ga aa ge nwinbitena.

¹⁶Ane Yesus ga rotini tafna gwiri ane jigala naura jeiserem ga tebabili, ane jewer ga taman waaken-girip ga anggaswena, ane Uwa Sanbagiri ga bala, “Ase samfer gulbana.” Ane Jei rotini yo jigala jeiserem ga bitabaabisini, ane ga kitulmini angtane Jei aa jei ne tikwebaatinennerem jebe enggalfe, jei gam ne syenulminenef angtane unggwanfersus jeiserem jebe.

¹⁷Jei seyafter jep gemerserem ga dwena jamere unubuguf. Ane angtane Yesus aa jei ne tikwebaatinennerem, tumilgal tomna bitbitiserem ga aane dupdupbulu, burnabara ga dua belas.

¹⁸Nunu nensa jeme, Yesus sembayanga aa galap gwebanaram Jenfentowai, angtane Jemna Jei aa jei ne tikwebaatinennerem ga aa ge forobitye Jemnibe. Yesus ga tenebaabili, “Angtane nafsi jeiserem ke Ase enggam ne bala, Ai nansa?”

¹⁹Jei ga aane tamawolbana, “Angtane afwer ga enggam ge gubili Aameiba Yohanes Pembaptisam. Ane afwer ga enggam ge gubili Aameiba Eliyasam. Ane angtane nensaiserem jeime gemer ge gubili enggame, Aameiba angtane nabi afwer fwatermanaiserem aa jei irwelam terewer, Aameiba angtane jeiserem ba jesam.”

²⁰Yesus ga tenebaabili, “Jengga aamei iner Ai As ifoma bala Ai nansa?” Petrus ga tamawolbana, “Aameiba Mesiasam, Angtane Uwa Sanbagiri bunarsusfer aa Jes balam Jam baftanaf enggalfe angtane gam waakentababisif.”

²¹Ane Yesus angtane Jei aa jei ne tikwebaatinennerem ga balbabili, “Aamei taterisi jeiserem ijama nasbineneyen angtane nafsiserem jebe.”

²²Yesus gamjon ga gutena, “Ai Tane Angtanemana, Ai tamtamtalaiserem unggwanfer As gwirinfi. Ane angtane sanbaka Yahudimana, ane angtane imam-imam sanbakaiserem, ane guru-guru Hukumu Nabi Musamana aa jei ne towas-towastababuwenaram, jei Ai Asene gwebafa baife. Ane Ai ga Asene munbofo. Jengga nunu nawer-ningnaiserem Ai gamjon ga jem As irwefa terewer.”

²³Jepga Yesus ga balbabili angtane seyafter jep jeiserem, “Angtane afa aa jei gam gunurum Ams onsobafe, jei jelem temawenefener jam gweyan. Ane nunu jeber-jeber jei jamer gam menetwesiwena jam terfe aam temawer jei Ai As jewer tikwebaatinirim. Ane jei Ai jamer ga As onsobana.

²⁴Angtane afa aa jei gwenaram jelem temawenefener, jei waakenfer gwelaiserem jamer abak-abaksus jei jam domolyan. Jengga angtane aa jei gam gwenaram Am temawer, jei waakenfer gwelaiserem jamer abak-abaksus ga jei gam domola.

²⁵Aaiserem je kapka, afa angtane galgala seyafter ogirip gemerserem se tebabili, jengga jei waakenfer gwelaiserem jamer abak-abaksus jam domolyan.

²⁶Afa angtane Ai As jei seferswebanaram, ane taterisi Amnaiserem jem temawer aa jei gam seferswebanaram, Ai Tane Angtanemana, Ai jam Ajep fortyaram Alem nafabaner, ane nafa Uwamanaiserem, ane malaikata waakensususerem jes mese, Aime angtane jeiserem gemer As seferswena, jei Ai As gemer ne seferswebanaram.

²⁷Ai bunarsusfer ims towas-towastababili, aamei afwer aas ijeya finaram namwer, aamei nalef ijama teryen, aamei gwanan nunu Uwa Sanbagiri Jei aa jem nwinirim anggwabura seyafter gemerserem jem Sanbakfe, nunu jeiserem ifsa domola.”

²⁸Yesus ga tabanulu taterisi jeiserem jam towas-towastababiliwer, ane nunu gamjon ga delapan, Yesus Jei Petrus, Yohanes, ane Yakobus ga aftabifele taarenabe, ane taaren bolap ga aa ge tabwili enggalfe sembayanga gam ne gwebaf.

²⁹Jes jepserem Yesus sembayanga ga gemer gwebana jam tabantayan, mirmase Jemna nenesmer ga aa ge falibene, ane fene Jemna ga aa ge sinsinsweibene iris nafa galserem.

³⁰Aafer-aafer nabi naura, jemna bosna ga Musa yo Eliya, ga aa ge fortya nafa taman waaken-girmanaiserem jeme, ane jei Yesusfar ga aa ge nasbawena. Jei Yesusfar ga aane nasbili Yesus Jam terem temawer kota Yerusalem je. Tere Yesusmana Uwa Sanbagiri aa jes mwangbisilim, abakefyan gase tabanwena.

³¹

³²Jes galapserem Petrus ane jelem afelen naunaiserem jei nus ge tabana. Jengga jei nunuwer aa galap ge irwebilirim, jei Yesus ga aane damtana, Yesus Jei Jam bwenen-bwenenwena, ane angtane naura jeiserem ga Jebaner ge fibili.

³³Jes jepserem angtane naura jeiserem jei Yesus jam aa ge mirtetefalaram, Petrus Yesus ga bala, “Uwa, aaiserem samfersus, ai seyafter aare! Ai jatowai nawer-ningna asa eyebaabili aafe — daamfenna je Ip, daamfenna je Musaf, ane daamfenna je ga Eliyaf.” (Petrus jei jam towasweyan jei aa jes biltenaram.)

³⁴Jes jepserem Petrus aa gemer nasounaram, gara ga iretya, ane ga matabili. Ane jei gara jame aa galap mastabilirim jei ga aa ge erebili.

³⁵Ane gara jeiserem jewer ga taterisi ga aane sarbili, enggam aa jei gutenaram, “Tane aaiserem ba Amnam, Ai Ajes destabanaram. Seyafter Jei aa jes nasbilirim, aamei jam isa sarbasini!”

³⁶Taterisi jeiserem jam bitef tikwena, jes jepserem jei Yesus tefner ga aane damtana. Angtane Yesus aa jei ne tikwebaatinennerem jei ga jafner ne eganulsini seyafter jeiserem, ane jes jepserem angtane afa fas jam ne towastayan jei aa jes ne damtabilirim jem temawer.

³⁷Jem gwirmer ga, Yesus ane angtane nawer-ningna Jei aa jei ne tikwebaatinennerem jei seyafter ga aa ge irebitye taarena jeiserem jewer, ane angtane unggwanfersus ga aa ge jalbili Yesusminibe.

³⁸Angtane unggwanfersus jeiserem aa jei ge jalbilirim jem nenennabe, anggwana aasaje ga ititmer ga nasowena, “Guru, ai Aamei Isa uskambarsus bala, Aamei tane girtowai amnaiserem jes batoba. Tane amnaiserem jei ga daamfenesusu!

³⁹Bwat kapka jam gam tebanaram jei, ane jei aafer-aafer ga gam gwaren-gwarenwena unggwanfer. Ga jam gam terterwena jamere kewa aaremawer gam tenbentetya. Bwat kapka jeiserem jei tane amna gemer tamtamtana uskambar, ane jei bai jemniwer jam totinyefe!

⁴⁰Ai angtane Is jei ne tikwebaatinennerem ai uskambar amesam balbabili enggalfe, bwat kapka jeiserem jam ne surbife, jengga jei masef, jam ne domolyan jam surbife.”

⁴¹Yesus ga tamawolbaabili, “Aamei angtane namwer ijeya gwenaram, aamei Ai As ijama tebayan, ane etam-etama imna anesus. Aima ga ibar neya nwini jamere nunu anesus, jengga aamei gemerje Ai As ijama tebayan. Ai aamei isa Ajam fibabilibe nunu ga fomera enggalfe, aamei Ai As ijeba tebafe?” Jepga Yesus Jei uwa jeiserem ga bala, “Tane imna jeiserem jase aftayal aafre.”

⁴²Tane jeiserem jei aa gemer jelaram Yesusminibe, bwat kapka jeiserem ga uktoniwili, ane ga terterwena. Jengga Yesus ga bwat kapka jeiserem ga ofola, tane jeiserem ga waakenswena, ane tane jeiserem gamjon ga wartabana jetaserem jebe.

⁴³Ane angtane seyafter jeiserem jei baabeta Uwa Sanbagirmana uskambar jeiserem jame aa galap ne domolbanaram, jei ga aa ge bitbitwebili. Angtane seyafter Yesus aa jes eyebilirim ga gemer ne bitbitwebuwena, Yesus Jei angtane Jei aa jei ne tikwebaatinennerem ga balbabili,

⁴⁴“Taterisi Amnaiserem ga waakenfer isa sarbabisini: Abakefyan Ai ga Asene gerfa angtane sanbakminibe, ga Asene munbofo.”

⁴⁵Jengga angtane Yesus aa jei ne tikwebaatinennerem jei taterisi Yesus aa jes nasbilirim, taterisi jeiserem jei waakenfer jam ne sarbisiyen. Taterisi jeiserem ga jam syawulmisini angtane Jei aa jei ne tikwebaatinennerem jemniwer, ane jega jem temawer jei waakenfer jam ge sarbiyen. Ane jei jam ge erebili jei jam ne tenebafe taterisi jeiserem jem temawer.

⁴⁶Angtane Yesus aa jei ne tikwebaatinennerem jei jenjen ga aa ge doksobana, jei enggam ge nasbawena, “Nei seyafter gemerserem, sanbaksusu ga nansa?”

⁴⁷Yesus Jei tousa jei aa gam ge gubilirim jelem inibe. Jega jem temawer Yesus ga tane bastouyaserem ga gaarwili, ane Jei tane jeiserem ga gaarantena Jelem tarnabe, ane tane jeiserem jep ga fina.

⁴⁸Jepga angtane Jei aa jei ne tikwebaatinennerem ga balbabili, “Angtane Ai aa jei gam tikwebaatinennerem, afa jei tantouya bastouya aas galserem jam gam tebanaram aam temawer jei Ai As jewer gam tikwebaatinirim, gam jega angtane jeiserem jeime Ai As mes gam tebana. Ane angtane Ai As jei gam tebanaram, jei Am tefner As jam tebayan, jengga jeime Ai As Jei baftannuntum Jei mese Jes gam tebana. Bunarsusfer ga enggam, angtane im nenennabe ini aa jei gam onabertanaram enggalfe angtane bastantouya gam batobaf, angtane jeiserem jei ga sanbaka Uwa Sanbagirem nwenabe.”

⁴⁹Yohanes ga gutena, “Uwa, ai angtane asaje aya damtana, jei bwat kapkaiserem ga jes surbobili Im boseme, ane ai ga aya bala, ‘Safnant, jase tikwe!’, aam temawer jei nem safanyan.”

⁵⁰Jengga Yesus ga balbabili, “Safnant, aamei angtane jeiserem ijama uftayan jam tikwefe, aam temawer angtane aamei is jam ne nasbabiyeneiserem, angtane jeiserem jei ga safna imna.”

⁵¹Nunu ga gwetmanswebana Yesus Jam tawefe taman waaken-giribe, ane Jei enggam ga aa gunu, “Ai bunarsusfer As sofwa Yerusalemwer.” Ane jepga Jei ga sofwa.

⁵²Ane Jei angtane ga baftabili Jei aa jei ne danabafe. Angtane jeiserem aa jes baftabilirim jei ga aa ge sofobili, ane jei ga aa ge forobili tamna aasaje jebe ona Samarya je enggalfe jei Yesusfe ja mese tumilgal gam menetababisif.

⁵³Jengga angtane tamna jeiserem jep aa jei ge nwinbenerem, jei Yesus baif ne gwebana jam ne tebafe, aam temawer Jei bunarsusfer kota Yerusalemwer sofwefe.

⁵⁴Angtane naura Yesus aa jei ne tikwebaatinennerem bosna jemna ga Yakobus ane Yohanes, jei taterisi jeiserem jem temawer jame aa galap ge towaswenaram, jei ga aa ge gutena, “Tuhan, Aamke baif ke Ijam gweyan, ai tokwana gam agma gitmif jam iryafe taman waaken-giriwer enggalfe angtane aaiserem gam giranbaabisif?”

⁵⁵Yesus ga irfwena, ane ititmer ga uftabili.

⁵⁶Ane Jei ga aa ge sofobili tamna nensaiserem jewer.

⁵⁷Yesus ane angtane Jei aa jei ne tikwebaatinennerem ga gemer ge sofobili nelebe, angtane aasaje ga Yesus ga bala, “Ai Ims onsobaf Aamei Ijewer sofnaram.”

⁵⁸Yesus ga tamawolbana, “Serigala, gwalna onnemana gemerserem, jei o mwonabara, ane junu je golabara. Jengga Ai Tane Angtanemana, jena Amna fas, Ai taman nutara fas. Afa aamei Ai As jam is onsobanaram, aamei mese susana jeiserem jeter is domola.”

⁵⁹Ane Yesus ga angtane nafsiserem ga bala, “Am se onsoba.” Jengga angtane jeiserem ga enggam gutena, “Uwa, ai gwanan ajam warauwa, uwa amna ajam tirnnuf.”

⁶⁰Jengga Yesus angtane jeiserem ga tamawolbana, “Angtane Ai baife As jei ne gwebanaram jam onsobafe, jei angtane futunuserem ga jei sene tatarbaabunnu. Jengga aamei jase sofwe, ane ga is nasibenenne nunu Uwa Sanbagiri Jei aa jem nwinirim anggwabura seyafter gemerserem jem Sanbakfe jem temawer.”

⁶¹Angtane nensa jei jon ga gutena, “Uwa, ai Ims onsobaf. Jengga ai gwanan ajam warauwa enggalf, uwa mese, aya, oso, ane wini amna umwef agam damtabif.”

⁶²Yesus ga tamawolbana, “Angtane awelna aa jei gam towaiwulurum jam gwebife jem makanabe, ane jei ga gam irfwena duruwer, angtane jes galserem jei jam etamweyan angtane Uwa Sanbagiri Jem gwonap nwinfe, nunu Uwa Sanbagiri aa jep gwenaram anggwabura seyafter gemerserem jem Sanbakfe.”