Read Berik Rasul 10 Bible Online

Rasul 10 - Berik bible

Rasul 10

¹Kota Kaisareya je angtane aasaje ga jep nwini, jemna bosna Kornelius. Jeiba angtane sanbaka 100 ginanggwa Romamana, aa jes ne jenbenerem “Koramil negeri Italyamana”.

²Jei angtane waakena, jei ane angtane jelem jenap seyafter gemerserem Uwa Sanbagiri gane erebene, ane jei galgala anggwabura Yahudimana galgalyenaiserem jep ne kitulmini. Jei sembayanga jeber-jeber ne gwebawena Uwa Sanbagirfe.

³Nunu daamfenna jema engbar nawer-ningna dafefe jei eserem jam tala gamserem gam ga damtana. Jei enggam damtana, jei malaikata Uwa Sanbagirmana waakenfer damtana aa kauwityerem jelem jenabe, ga aa bala, “Kornelius!”

⁴Kornelius jei malaikata jeiserem ga erelmer gerebana, ane ga bala, “Uwa basa?” Malaikat jeiserem ga tamawolbana, “Uwa Sanbagiri Jei sembayanga imnaiserem is mes sarbabana, ane waakenaiserem ijes eyebilirim Uwa Sanbagiri is mes towasweibene, jega jem temawer Jei ga ims sarbastaabona.

⁵Namwer aas jepserem angtane gasa baftabi jei gam ge gubi kota Yopewer enggalfe, angtane bosna Simon jei ga sene gaariufenne. Jemna bosna afwer ga Petrus.

⁶Petrus jei angtane bosna Simon ga jem jenap nwini. Simon jei kambing tifni gwerep aa jei bunulwenaram jamere sasan, ane jei fi eyep nwini.”

⁷Jepga malaikata Korneliusfar aa jei ge nasowenaram, ga mirtetefala. Kornelius angtane naura awelna jelem jenap aa jei ge gweyibenerem, jei angtane jeiserem ga aa jenmini. Ane jeime ginanggwa daamfenna aa jenbene, ginanggwa jeiserem Kornelius aa jei batobawenaram, ane Uwa Sanbagiri aa jei pujitawenaram.

⁸Kornelius ga nasipmini jebe seyafter aa je etamwenaram, enggam ga balbabili, “Aamei kota Yopewer sa gwi!”

⁹Nunu jeiserem jem gwirmer ga, angtane nawer-ningna jeiserem jei ga aa ge sofobili jamere nele nenennap, kota Yope gwetmanap. Ane jes jepserem Petrus ga tawena ja sagabe sembayanga jewer gwebaf.

¹⁰Petrus jei wisi ga folbana, jei jam twenf. Tumilgala aa jeber ne menetabaibaasinirim, Petrus ga eserem jam domola gamserem aaiserem gam ga domola.

¹¹Jei winsi ga damtana aane bitnetinirim, ane jewer ga enggalem iretya kaina unggwandusa galserem aa je jerwentetyaram gumu nawer-naura, aa je iretyaram jamer jenabo.

¹²Kaina jeiserem jebe ga enggammer ge falbiton, twena ane twen galserem seyafter tufa nawer-naurabara gemerserem, ane awasa galserem, uftonem wofelaiserem; ane junu onnemana.

¹³Petrus jei taterisi enggam ga sarbili, “Petrus, se irwe, jeiserem daamfenna ga is tegila, ane ga is tombana!”

¹⁴Petrus enggam ga tamawola, “Wowo Tuhan, ai gemerje ajam tumilyen tumilgala Nabi Musa aa jes balbabilim angtane Yahudimana jam ne tumilyen, afa matauwa angtane Yahudimana enggam aa jes gane bilirim jam tumilyen.”

¹⁵Gamjon jei taterisi enggam ga sarbili, “Tumilgala Uwa Sanbagiri enggam aa jes bilirim namwer angtane saf gane tombaabili, angtane enggam jam guyon tumilgal aaiserem jam tumilyen.”

¹⁶Taterisi jeiserem jamere nawer-ningna jam gutalabe, ane kaina unggwandusa gamjon ga aa tauna winsibe.

¹⁷Petrus jelem inipfener ga tenna, “Eserem jam domola gamserem ai ajes domolantam, jem igiserem je basa?” Jes jepserem angtane Kornelius aa jes baftabilirim jei ga aa ge forobitye. Jei jena Simonmana jam aane domolbanaram, jem mwa totiyelebe jep ga aa ge fibitena.

¹⁸Jei angtane ga aane tenebaabili, “Simon Petrus ke aaf nwini?”

¹⁹Ane jes jepserem Petrus ga eserem jam domola gamserem jei aa jes domolantam ga sarbistaabona, ane Mafnana Uwa Sanbagirmanaiserem ga bala, “Petrus, angtane nawer-ningna ims ne terelbene.

²⁰Se irwe, ga is irtena ane angtane jeiserem jebaner seyafter ga isa sofwa! Ini kapka is jam folbayan jebar jam sofwefe, aam temawer angtane jeiserem Ai Aner baftabili.”

²¹Petrus ga iretya, ane ga aa sofwa angtane jeiserem jemnibe, ga balbabili, “Aba jesam ijesa terelbenerem. Aamei ibafa jela amnibe?”

²²Jei ga aane tamawolbana, “Ai ase Kapten Kornelius se balbabili imnip jam jalfe. Ini jemna waakena, ane jei Uwa Sanbagiri gam erebene, ane jei enggam ne balwena waakensusu anggwabura Yahudiminibe. Malaikata Uwa Sanbagirmana Kornelius enggam ga bala, aamei jam is gwina Korneliusem jenap, jega Kornelius jei taterisi imna is gase saribaasini.”

²³Petrus ga angtane jeiserem ga balbabili, “Aamei sa kautya, aaf isa tana.” Nunu jeiserem jeme jeber ge tabatisini, ane jem gwinibener Petrus jebaner ga aa ge sofobili seyafter. Ane angtane afweraiserem Yesus aa jei ne tebanaram kota Yope je, jei jebaner ge sofobili.

²⁴Ane nunu gamjon jeiserem, jeime kota Kaisareya je jep ga aa ge forobili. Kornelius ane jelem afelna mesna ane jelem saraboson mesna jelem jenap aa jei ge betwebilirim, jei ga jes ne fibabili.

²⁵Petrus jame aa galap kautenaram, Kornelius ga jela ane Petrusem tof tarnap ga aa nwintena Petrus gam sembataf.

²⁶Jengga Petrus Kornelius ga gaartena, ga bala, “Se irwe, ai aimba angtanesam.”

²⁷Ane Petrus jebar ga aa ge nasowena jei jama kautenaram jenabe, ane angtane unggwanfer aa jei ge betwebilirim ga damtabili.

²⁸Jepga Petrus angtane jeiserem ga balbabili, “Aamei seyafter imsa towaswena enggame, agama Yahudimana ga enggam, angtane Yahudimana jam kaweteyan jena angtane Yahudimanyanaiserem jebe, afa jebar jam ge betwebiyen. Jengga Uwa Sanbagiri Jei as mes towastana enggame, ai angtane afa ajam balyan enggam jei kapka.

²⁹Jega jem temawer, Tuhan jame as galap balaram ai ajam jalfe, ai baife ajam gweyan. Namwer aas jepserem, ai ga ajam towaswef, jeje bafa aamei ga as ima bala ajam jalfe?”

³⁰Kornelius ga bala, “Nunu nawer-ningna gwanan jeiserem, engbar enggalfar jema namwer aas jepserem jema nawer-ningna, ai sembayanga agalap gwebanantam jenabe. Aafer-aafer angtane aasaje ga ai damtanant am tarnabe, angtane jeiserem fene jei aa jes kamwinirim jam ne bwenen-bwenenwena.

³¹Jei ai ga as balant, ‘Kornelius, Uwa Sanbagiri Jei sembayanga imna is mes sarbabana, ane awelna waakena imnaiserem is mes saribestaabona.

³²Angtane se bafta Yopewer, Simon jei gaariufenefe, jemna bosna afwer ga Petrus. Jei Simonem jenap nwini, angtane kambing tifni gwerep aa jei bunulwenaram, finip aa jei nwinirim.’

³³Jega jem temawer ai angtane tatarfer ga ai baftabilint ims jenbefe, ane ini imna waakena aamei im jela amnibe. Namwer ai aas aya nwini seyafter Uwa Sanbagirem tarnap, ajesa sarbisif seyafter Uwa Sanbagiri aa jes bilirim, aamei ap is bilipmini.”

³⁴Petrus jei taterisi ga towaiwulu jam nasipmife, “Ai namwer bunarsus enggam ai towaswena, Uwa Sanbagiri Jei angtane seyafter enggam damtabili armanaber nafis-nafismeryan.

³⁵Angtane seyafter Uwa Sanbagiri aa jei ne erebenerem, ane waakena aa jei ne eyebilirim, Uwa Sanbagiri Jei enggam gunu, ‘Angtane jeiserem saf gam jela Amnibe.’ Enggam Jei Jam balyan, ‘Aam jei fwermana.’

³⁶Aamei seyafter imsa towaswebili taterisi igi Uwa Sanbagiri aa jes bilipminirim angtane Israelfe. Taterisi jeiserem je Taterisi Waakena Yesus Kristusem temawer. Jei mes tere, ane jega jem temawer Uwa Sanbagiri Jei etam-etama kapka nemnaiserem jem temawer nei nes jam nasbabiyen. Nei waakenfer nesa nwini, ane Jeiba angtane seyafter gemerserem jem Tuhansam.

³⁷Aamei imsa towaswebili seyafter gemerserem aa je etamwenantam ona Yudeya je. Seyafter jeiserem ga mes towaiwena ona Galileyawer, nunu jes jepserem Yohanes Pembaptis aa galap tabanuluntum taterisi baptisanem temawer aa jes nasbilirim.

³⁸Aamei imsa towaswebili Uwa Sanbagiri Jei Yesus Angtane tamna Nasaretmana mesam destabana, ane Uwa Sanbagiri Jei Mafnana Jemnaiserem, ane baabeta unggwandusa jes mese mesam tetbene. Yesus Jam aa galap wofenantam taman-tamna seyafter gemerserem jebe, Jei waakena gam eyeipminenne angtanefe, ane angtane bawasa aa jes tebabilirim jes waakentababinenne. Yesus Jei seyafter aa eyebili, aam temawer Uwa Sanbagiriserem Jei Jam mirtetefalyan jamer gerebaasnenne.

³⁹Ai seyafter gemerserem amsama damtabili seyafter aa jes eyebaabilintim ona angtane Yahudimanaiserem jebe, ane kota Yerusalem je. Angtane Jei ga aane daktanswenant ti salibibe, ga aane munbonont.

⁴⁰Jengga nunu nawer-ningnabaraiserem Uwa Sanbagiri Jei ga jem irtestenant terewer, ane Jei ga angtanef ga aa ge saaminint.

⁴¹Jengga angtane afweraiserem jei jam ne damtayan, jengga apfener saamisini ai Uwa Sanbagiri as jes destabaabilirim. Jame aa galap irwenantam angtane jam tereserem jemniwer, jepga aya twena ane fo mese aya telbebilint Jebaner.

⁴²Ane Jei ai ga as balbabili, ai Taterisi Waakena ajema nasipminennefe angtane seyafter gemerserem jebe. Ane Jei ai gamjon ga as balbabili, ai angtane ajama towas-towastababife enggame, Yesus Jeiba Angtane Uwa Sanbagiri aa jes destabanaram enggalfe, Jei angtane gemer nwiniserem ane angtane jam tereserem jes teneba-tenebaabuwef.

⁴³Nabi seyafter gemerserem jei taterisi Jem temawenefener nasbinennel. Jei enggam ne nasbinennel, angtane seyafter Yesus aa jei ne tebanaram, Uwa Sanbagiri etam-etam kapka jemna Jei se wirtabaipmini ane gamjon jam sarbaipmistaabonyan, baabeta bosna Yesusmanaiserem jeme.”

⁴⁴Jes jepserem Petrus jei gemer nasowena, Mafnana Uwa Sanbagirmana ga iretya angtane seyafter jep gemerserem taterisi jeiserem aa jei ne sarbisinirim jemnibe.

⁴⁵Angtane Yahudimana Yesus aa jei ne tebanaram Petrusfaner aa jei ge jalbilirim kota Yopewer, jei ga aa ge bitbitwebili aam temawer Uwa Sanbagiri Jei Mafnana Jelemana aa jewer golminirim angtane Yahudimanyanaiserem jebe.

⁴⁶Jei angtane jeiserem mes ne sarbabisini ula nafis-nafsiserem jei jam ne towaswebiyen jem aa jei ge nasbawenaram. Ane jei Uwa Sanbagiri ga aane pujitene, jei enggam ge gubitowena, “Uwa Sanbagiri Aameiba sanbagirsusum!” Petrus ga gunu,

⁴⁷“Mafnana Uwa Sanbagirmana mes fortya jemnibe, Mafnana gwanan aa gam fortyantam nemnibe. Gamjon ga angtane enggam jam guyon angtane aaiserem jei fome jam baptistababiyen.”

⁴⁸Jepga Petrus ga balbabili, jei ga jam sa baptistababili bosna Yesus Kristusmanaiserem jeme. Jepga jei Petrus ga aane bala, jebar nomkef jam ge nwinbefe.