Read Berik Rasul 11 Bible Online

Rasul 11 - Berik bible

Rasul 11

¹Rasulu ane angtane Yesus aa jei ne tebanaram ona Yudeya jeiserem jebe, jei enggam ge sarbili, angtane Yahudimanyanaiserem jei jam ne sunattababiyene, jei jegme taterisi Uwa Sanbagirmanaiserem mes ne taabili.

²Petrus jame aa galap fornaram kota Yerusalem je, angtane Yahudimana jam sunattababiliserem Yesus aa jei ne tebanaram, jei Petrus ititmer ga aane tenebana enggame,

³“Jeje bafa aamei angtane jam sunattababiyeneiserem jem jenap ga im kawetena? Ane jeje bafa aamei jebaner seyafter ga ima twena? Jeiserem kapka.”

⁴Jei Petrus aa jewer ne tenebanaram, Petrus ga seyafter aa je etamwenantam jemnibe jeiserem ga aa nasipmini.

⁵Jei enggam nasipmini, “Ai sembayanga agalap gwebanantam kota Yope je, winsiwer aa je iretyaram eserem gemerserem gam ga ai domolant. Jeiserem ga enggam ai domolant, kaina unggwandusa galserem aa je jerwentetyaram gumu nawer-naura winsiwer ga iretyant, jamere am tarnabo.

⁶Kain namsini jeiserem ai jep ga ai anggatenant, ane jep ga enggammer ge falbiton, twena ane twen galserem seyafter tufa nawer-naurabara gemerserem; ane twena onnemana gemerserem; ane awasa galserem uftonem wofelaiserem; ane junu onnemana galserem; seyafter ai damtabitenant.

⁷Jepga taterisi enggam ga ai sarbilint aa je gutenaram, ‘Petrus gase irwe, jeiserem daamfenna ga is tegila, ane ga is tombana!’

⁸Jengga enggam ai balant, ‘Wowo Tuhan, ai gemerje ajam tumilyen tumilgala Nabi Musa aa jes bilim angtane Yahudimana jam ne tumilyeneiserem, afa tumilgala angtane enggame aa jes gane bilirim jam tumilyene, jeiserem jam kaweteyan am aaremabe.’

⁹Ai taterisi gamjon ai sarbilint taman waaken-giriwer enggame, ‘Tumilgala Uwa Sanbagiri enggam aa jes bilirim namwer angtane saf gane tombaabili, angtane enggam jam guyon, tumilgal aaiserem jam tumilyen.’

¹⁰Taterisi jeiserem ai ajamer sarbilibe unggwanfer ga nawer-ningginfer, jepga kaina jeiserem ga aa dekolstetyant seyafter winsibo.

¹¹Ane jes jeberserem angtane nawer-ningna aa jes ne baftabilirim kota Kaisareyawer, jei ga aa ge forobityent jena ai nomkef ajep nwinintim.

¹²Jepga Mafnana Uwa Sanbagirmana ga as balant, ‘Se sofwe jebaner, baif ijam gweyan!’ Ane angtane enam aaiserem ga ajebara sofwant jamer Kaisareyaminibo. Ga aya kawetenant Korneliusem jenabe.

¹³Ane Kornelius jei ga as nasipminint enggame, jei malaikata mes damtanant jelem jenabe, ga aa balant, ‘Angtane se baftabi kota Yopewer, Simon jei ne gaariufenefe, jemna bosna afwer ga Petrus.

¹⁴Taterisi Waakena ga is jei se bilibene enggame, Yesus Jei is waakentaasini, ane wi tane imna seyafter gemerserem jes mese.’

¹⁵Ane ai jame agalap tawawenantam ajam nasewefe, Mafnana Uwa Sanbagirmana ga iretyant angtane jeiserem jemnibe, Mafnana nemnip gwanan aa gemer iresanyantam.

¹⁶Jepga ai sarbistaabonant taterisi Tuhan aa jes bilintim enggame, ‘Yohanes jei fom baptistene, jengga aamei Mafnana Uwa Sanbagirmana is Jem se baptistababili.’

¹⁷Uwa Sanbagiri Jei Mafnana Jelemanaiserem angtane Yahudimanyan jep golmini, gwanan gamserem Jei Mafnana Jelemanaiserem nep nes Jes golmini, nei Tuhan Yesus Kristus negalaba tebanantam. Jega jem temawer ai baabeta fas Uwa Sanbagiri jem wemtafe.”

¹⁸Angtane ula jeiserem jame aa galap ne sarbilirim, jei gamjon Petrus jam ne nasbayan. Jepga jei Uwa Sanbagiri ga aane pujitene, jei ga ge gubili enggame, “Afa gam jes gamserem, gam jega Uwa Sanbagiri Jeime angtane Yahudimanyan nele se gaarmini enggalfe, jei etam-etam kapkaiserem jewer jam ge tikwebife, ane waakenfer gwelaiserem jamer abak-abaksus ga sene domola.”

¹⁹Angtane gwanan Estefanus jam aa galap ne munbonontom, jei kapka gane eyeipmini angtane Yesus aa jei ne tebanaram jebe, ane jewer jon ga aane surbobili. Jei ga aa ge sofobuwena ona Fenisyawer, naantei Siprus, ane kota Antyokyawer. Ane jei Taterisi Waakena anggwabura Yahudifefener jep ga aane nasipminenne.

²⁰Jengga angtane daamdema Yesus aa jei ne tebanaram, jei naantei Sipruso kota Kireneminiwer ge jalbili, ane jei kota Antyokyawer ge gubili. Ane jei ga angtane Yahudimanyanaiserem ga jebar ge nasbawena. Taterisi Waakenaiserem ga jes ne nasbili enggame, Yesus Jeiba Tuhansam.

²¹Ane baabeta Tuhanmanaiserem je angtane jeiserem jebar seyafter ge nwinbene, ane jega jem temawer angtane unggwanfer jei Tuhan gane tebana. Jei ga ge gubili, “Tuhan Jei namwer am Sanbaka.”

²²Angtane safna Yesus aa jei ne tebanaram kota Yerusalem je, jei taterisi jeiserem aa galap ne sarbilirim, jepga Barnabas ga aane baftawili kota Antyokyawer.

²³Barnabas jame aa galap forotnaram kota Antyokya je, jepga aa anggana Uwa Sanbagiri Jei waakena Jelemanaiserem mes golmini jebe, jepga ini Barnabasmana saaser-saasersusmer folbana. Jei enggam ga balbabili, “Aamei angtane Tuhan ga waakenfer isa tebana ini imna seyafter gemerserem jeme, ane aamei ijama tikweyan Tuhan jam onsobalawer.”

²⁴Barnabas jei angtane waakena. Jei Mafnana Uwa Sanbagirmana mes taabili, ane jei Yesus uskambarsus tebana, ane jega jem temawer angtane unggwanfer Tuhan ga aane tebana.

²⁵Jewer ga Barnabas ga gwina kota Tarsuswer, Saulus jam terelbefe.

²⁶Ane jei Saulus jame aa galap damtanaram, jei Saulus ga kota Antyokyawer ga aftawena. Barnabaso Saulus jei tahunu daamfenna safna Yesus aa jei ne tebanaram jebar jamer ge betwebuwelabe, ane jei angtane unggwanfer ga aa ge towas-towastababuwena. Angtane Antyokyamana jei Yesus aa jei ne tikwebaatinennerem, angtane jeiserem jei jep nabal-nabalsusu enggam ga jes ne balbabili, angtane Kristen.

²⁷Jes galapserem nabi-nabi Yerusalemwer ge jalbili kota Antyokyaminip.

²⁸Angtane jemniwer daamfenna aasaje bosna Agabus. Agabus Mafnana Uwa Sanbagirmanaiserem jeme enggam ga gunu, “Ogiri aaiserem seyafter gemerserem wisdusa sene domolsa, tumilgala jam ne damtabiyen abaka.” (Taterisi jeiserem ga mes etamwena Kaisar Klaudius jei aa galap gwenaram.)

²⁹Jega jem temawer angtane seyafter Yesus aa jei ne tikwebaatinennerem jener ga aane nasbili tumilgala yo doini jes ne dupdupbulfe, jelem baabet mwongga jeberserem. Ane jeiserem ga sene kitulmini jelem afelen mesna Yesus aa jei ne tebanaram jebe aa jei ge nwinbenerem ona Yudeya je.

³⁰Barnabaso Saulus ga aane destamini tumilgala yo doini aa jes ne dupduptababilirim, jei jes ge erbifelfe angtane jematabe sanbakef aaiserem jep gam kitulmife.