Read Berik Rasul 14 Bible Online

Rasul 14 - Berik bible

Rasul 14

¹Kota Ikonium je, Pauluso Barnabas ga aa ge kawetena jena angtane Yahudimana aa jep ge betwebuwefaram jebe, jei gwanan aa gemer ge kauwewefaram. Jep jegme waakenfer ge towas-towastababili jamere angtane Yahudimana unggwanfer mese angtane Yahudimanyan, jei Yesus ga aane tebana.

²Jengga angtane Yahudimana Taterisi Waakena baif aa jei ne gwebilirim jam taabife, jei angtane Yahudimanyanaiserem jes ne balbabili enggame, “Taterisi jeiserem safnant, ipsama taabilirim!” Jepga angtane Yahudimanyan jei angtane Kristen ga aane nasbabili.

³Pauluso Barnabas jei abaktowaifer ge nwini jebe, jei jam ge ereyen taterisi Tuhanem temawer jam ge nasbife. Tuhan Jei baabeta Jemnaiserem jes golmini enggalfe, jei bwembwema jem ge eyebif, bwembwema angtane jam ne eyebiyeneiserem, Uwa Sanbagiri tefner gam eyebili. Jei bwembwema ga aa ge eyebili, jega angtane jeiserem gam ge towaswebif enggame taterisi ini waakenaiserem Uwa Sanbagiri angtanefe aa jes golminirim jeba bunaram.

⁴Angtane unggwanfer kotanap aa jei ge nwinbenerem, jei jam ne bitnaatini nawer biti. Afwer jei angtane Yahudimana jewer ge ayebitini, afwer ga angtane Yesus aa jes bafsonaram angtane naura jeiserem jemniwer ge ayebitini.

⁵Jepga angtane Yahudimana ane angtane Yahudimanyan jeiserem, ane angtane sanbaka jelemanaiserem jebaner, jei kapkaiserem ga aane mwangbisini enggame, rasul nawan jeiserem tonem sa munmini.

⁶Rasul nauna jeiserem jame aa galap ge sararam, ga aa ge nunggiri ona bosna Likaunyawer, kota Listra yo kota Derbe, ane ona seyafter gemer falaram.

⁷Jep ga Taterisi Waakena ga aa ge nasbinenne.

⁸Kota Listra je, angtane aasaje jep nwini jemna tufa fwater derbenent. Jei jame aa galap surnuntum ga muli-mulinmer surnunt. Jei jafner nwinwena jei jam wofeyan bastantowaifer.

⁹Jei ga jep nwini, Paulus aa jes nasbilirim ga jes sarbisini. Ane Paulus nwena ga tetena, ga aa towaswena enggame, angtane jeiserem jei taterisi mesam taabili jam waakentafe. Paulus jei jeter gerabaasiwili,

¹⁰ane ititmer ga bala, “Gase irwe, nornormer ga is fina ilem tofeme!” Angtane jeiserem ga aa fagatana, ga aa irwena, ane ga wofowena enggam gam gwina, enggam gam jela.

¹¹Jes jepserem angtane unggwanfer ga aane domola Paulus aa jes eyebilirim. Jepga jei ga aa ge tetenbili Likaunyam oleme, “Anggwafwar mes ge irebitye nem nenennabe angtane numu gemerserem.”

¹²Barnabas jei enggam ne bosetana Seus, ane Paulus jei enggam ne bosetana Hermes, aam temawer jei waakenfer aa jewer ge nasewenaram.

¹³Imam Seusem jenawer ga jela. Jena Seus aa jep ne pujitawenaram kota sitawer fina. Imam jeiserem jei sapi giri gam aftabili ane bunga mese jes erbili, pintu pagarawer erbuwena. Imam ane angtane unggwanfer jeiserem sapini aa jei ne giranbaabuwenaram persembahanfe, rasul nauna ga jep ne kitulmif.

¹⁴Barnabaso Paulus jei jame aa galap ge sararam angtane jeiserem aa jes ne eyebilirim, jei fene jelemana ga aa ge bitabaabisini enggalfe, angtane jepmana gam ge towaswebif enggame jei jam ge kakalswena. Jei ga aa ge nunggiri angtane unggwanfer jepserem jem tarnabe, ga aa ge gwenanna,

¹⁵“Wai, aamei seyafter gemerserem ibafa gwena game? Angba angtanesam, aamei galaterserem. Ai enggalf ai ge nwini taterisi Uwa Sanbagirmanaiserem ip is agam ge nasipmif, jega aamei etam-etam kapkaiserem igama aafulnuf, ane gamjon ga isa warautna Uwa Sanbagirminibe. Uwa Sanbagiri aa Jei gwenaram, Jei winsi yo ona, ane fi mese, ane seyafter gemerserem aa jei falaram ga Jei eyebaabil.

¹⁶Gwanan aa jep falam Uwa Sanbagiri Jei angtane seyafter enggam balbabil, ‘Sya, saf isa eyebili ina gemer igama gunurum jam eyebife, ane Ai kapkaiserem ibe is Ajam eyeipmiyen.’

¹⁷Jengga Uwa Sanbagiri Jei jeber-jeber ip ijes gweretabaipmuwena Jelem temawer enggame, Jei waakenaiserem ip ijes eyeipminirim. Jei arouwa ip gaarmini winsiwer, ane nananis waakenfer is gam ge tenipmif muara jeber-jeber. Jei tumilgala ip kitulmini, ane Jei ga eyebili jega ini imna saaser-saaserfer is ga sege folbamini.”

¹⁸Jengga rasulu nawan jeiserem jei safe jes gamserem gemer ge nasbili, jei masef ge unggwasa angtane jeiserem jam uftabife. Angtane unggwanfer jeiserem rasulu naura jeiserem jeter ne pujisowena, ga aa ge gubili, “Sya, sapini aaiserem aima giranbaabili gamjon ai iba golmif.”

¹⁹Jengga angtane Yahudimana afweraiserem kota Antyokyawer ona Pisidya je ane kota Ikonium jewer ga jalbili. Ane taterisi jelemanaiserem angtane uskambar ga jem ne dektebili jem onsobaabife. Jepga jei Paulus ga aane erana toneme, ane jei Paulus gane tinderfele kota sita jitefwer. Jei enggam ge gubili, Paulus ba mesam tere.

²⁰Jepga angtane Yesus aa jei ne tebanaram, jei Paulusem tarnap jame aa ge fibitetyaram, Paulus ga irwena, gamjon ga kawetena kotanabe. Gwinibener Paulus Barnabasfaner ga ge sofwa kota Derbewer.

²¹Pauluso Barnabas jei ga Taterisi Waakena kota Derbe je ga jep ge nasbinenne, ane angtane unggwanfersus jei Yesus ga aane tebana. Jepga jei ga aa ge warau kota Listrawer, jep taban gamjon ga kota Ikoniumwer ga aa ge sofna. Ane jepga jei kota Antyokya ona Pisidya je jewer ga aa ge sofwa.

²²Kotana jeiserem jebe jei angtane Yesus aa jei ne tebanaram ini jemnaiserem ga jes ge kanautabaipmini. Ane jei esorola gam ge golmif, jega jei Yesus jam ne aftannuyon jam tebalawer. Ane enggam ga aa ge gubili, “Ogiri aaiserem jebe nei kabwaktala anesus nesa domolwenaram jamere nunu Uwa Sanbagiri Jei aa jem nwinirim anggwabura seyafter gemerserem jem Sanbakfe.”

²³Taman-tamna seyafter gemerserem, Pauluso Barnabas jei angtane sanbaka jemata aa jei ne tebabilirim ga jes ge destabaabinenne. Ane jei sembayanga ga aa ge gwebana, ane jei tumilgala jam ne tombaabiyen enggalfe Uwa Sanbagiri gam ne pujitef. Jei jes gamserem gam aa jewer gane eyebilirim, jei angtane sanbaka jemata jeiserem jem gane kitulbono Uwa Sanbagirfe, Uwa Sanbagiri Jei aa jes ne tebanaram.

²⁴Jei ona Pisidya seyafter jamer ge sofwa jam ge batoyan, ane propinsi Pamfilya je jep aa ge forna.

²⁵Jepga taterisi Uwa Sanbagirmana ga aa ge nasibene kota Perga je, jepga jei ga aa ge sofwa kota Atalyawer.

²⁶Jewer ga aa ge warauwa atdusame, atdusa layarabaraiserem, jamere kota Antyokyayo, kota jeiserem ga rasul nawana gwanan Uwa Sanbagirfe ga jep ne tetbel enggalfe Uwa Sanbagiri Jei waakena Jelemanaiserem gam golmif jebe, jega jei awelna Uwa Sanbagirmana gam ge gwebif. Awelna jeiserem jei mes ge tabanulu.

²⁷Jame aa galap ge forobilirim Antyokya je, jei angtane Yesus aa jei ne tebanaram ga aa ge jenbebili, ane jei seyafter ga aa ge betwebili. Jepga jei ga aa ge nasipmini seyafter Uwa Sanbagiri aa gam eyebilirim Jebar aa galap naawenaram. Ane jei gamjon ga aa ge nasipmini enggame, Uwa Sanbagiri Jei nele mes dwotana, jega angtane Yahudimanyan jei Yesus ga sene tebana.

²⁸Jepga jei abakfer ge nwinbene angtane Yesus aa jei ne tebanaram jebar.