Read Berik Rasul 18 Bible Online

Rasul 18 - Berik bible

Rasul 18

¹Jeiserem taban, Paulus kota Atena ga mirsotefala, kota Korintuswer ga sofna.

²Kota Korintus je angtane Yahudimana aasaje ga jebar ga aa ge dorwena. Angtane jeiserem jemna bosna ga Akwila. Jei propinsi Pontus je surnu. Jei namwer ge fortya winabar negeri Italyaminiwer. Wini jemna bosna Priskila. Kaisar Klaudius mesam gunu enggame, angtane Yahudimana kotana Roma jam sene mirsotefala. Jega jem temawer Akwila yo Priskila jei kota Roma negeri Italya ga aa ge mirsotefala, ane jei ga aa ge jela Korintus je. Paulus ga gwina jei jam domsofe jelem jenabe.

³Ane jei jebar ga aa ge nwinbene. Jei awelna jebar seyafter ga aane gwebili enggalfe doini gam ne domolf, ane tumilgala jem armanulf. Awelna Paulusmana ga tenda jas eyebaabuwena, Akwila yo Priskila gamserem.

⁴Nunu Sabat jeber-jeber Paulus jei gam sofwa jena angtane Yahudimana aa jep ge betwebuwefaram jebe, ane jei taterisi Yesusem temawer jep ga gam nasbili. Jei uskambar gam nasbili enggalfe, angtane Yahudimana ane angtane Yunanimana jei Yesus gam ne tebaf.

⁵Silaso Timotius jame aa galap ge jelaram propinsi Makedonyawer, gwinibener jeterserem jamer ona gigit, Paulus jei taterisi Uwa Sanbagirmana jetefener nasipmiyafna. Jei bunarsusfer destabana enggame, Yesus Jeiba Mesiasam, Angtane Uwa Sanbagiri Jei bunarsus aa Jes balam Jam baftanaf enggalfe angtane gam waakentababisif.

⁶Jes jepserem angtane Yahudimana jei bai Paulus jam ne sarbafe, ane jei ga kabwakfer ne bili Paulusem temawer. Jega jem temawer Paulus jei ga fene jemna sonabara ga tensosini, ane ga balbabili, “Afa aamei Tane Uwa Sanbagiri ijama tebayana, gam jega aamei tamtamtalaiserem ga isa domola. Etam-etama jeiserem je ilemanfenna, ane aamei kabwakfer am temawer gamjon ijama nasbiyen. Namwer as sofwa anggwabura Yahudimanyanaiserem jemnibe.”

⁷Jes jepserem Paulus jei jena angtane Yahudimana aa jep ge betwebuwefaram ga mirultefala. Jei ga aa gwina jena jitefwer aa je fitnaram, jep ga kautena. Jena jeiserem angtane bosna Titius Yustus ga jemna. Jei angtane Yahudimanyan, jengga jei Uwa Sanbagiri mes tebana.

⁸Ane angtane bosna ga Krispus ga jei nwini sanbakfe jena angtane Yahudimana aa jep ge betwebuwefaram jeiserem jebe. Jei Tuhan mes tebana, ane wi tane jeman mesna, ane angtane seyafter gemerserem jem jenap aa gemer ge nwinbenerem jei mese. Ane angtane Korintusmana unggwanfersus afweraiserem jeime ne sarbisini taterisi Paulus aa jes nasbilirim. Jepga jei Yesus ga aane tebana, ane ga aane baptistababili.

⁹Gwineme Paulus jei Tuhan eserem jam damtala gamserem gam ga damtasini. Tuhan Jei Paulus ga enggam bala, “Ipsam ernerem! Taterisi Waakena jamer is nasbuwena, ane ijam tikweyan!

¹⁰Ai ibaner ge wofena, ane angtane nafsi afa fas ibe kapka ijei eyebiliserem, aam temawer angtane kotana aaiserem jebe aa jei ge nwinbenerem unggwanfer ba Amnam.”

¹¹Muara unggwanfer ga delapan belas, Paulus jei kotana Korintus propinsi Akaya jep jamer nwinibe, ane jei Taterisi Uwa Sanbagirmana ga nasbuwena angtanem nenennabe.

¹²Galiyo jam aa galap nwinirim Gubernurfe Akaya je, anggwabura Yahudimana seyafter ga aa ge betwebili daamfennaber, ane Paulus ga aane tebana, ga aane aftawena angtane sanbakminibe, angtane aa jei gam balaram angtane afa waakenfer eyebiliserem afa kabwakfer eyebiliserem.

¹³Angtane Yahudimana jei enggam ge gubili, “Angtane aaiserem jei angtane unggwanfer ini jemna gam malin-malintabaipmini Uwa Sanbagiri jam pujitefe, nele nafsi Nabi Musa aa jes tulistaabilim jemniwer.”

¹⁴Paulus jame aa galap towaiwenaram jam nasewefe, Galiyo angtane Yahudimana jeiserem ga balbabili, “Wa, aamei angtane Yahudimana, afa aamei abe as jam isa bilibenerem kapkaiserem Paulus aa jes eyebilirim, bastantouya afa unggwandusa, ai samfer isas sarbabisini jamere taban.

¹⁵Jengga ula aamei abe as ijesa bilibenerem, ula jeiserem jeba taterisi, afa bosna, afa hukum ilemanaiserem jem temawer, gam jega aamei ula aaiserem iner isa nasbabili. Ai bai ula aaiserem gamjon jam sarbife.”

¹⁶Jewer ga Galiyo angtane Yahudimanaiserem ga surbobili mwona jelemanaiserem jewer.

¹⁷Jepga angtane seyafter jeiserem jei Sostenes ga aane tebana. Jeiba angtane sanbaksam jena angtane Yahudimana aa jep ge betwebuwefaram. Jei jep ga aane tebana, ga aane safsaftana Galiyom meja tarnabe. Jengga Galiyo jei jep jam anggayan.

¹⁸Paulus jei nunu unggwanfer jam nwinibe kota Korintus je, jepga angtane Yesus aa jei ne tebanaram ga mirtebitefala. Ane jei Priskila yo anggwa jemna bosna Akwila jebar aa ge sofobili atdusa layarabaraiserem jeme propinsi Siryawer. Paulus nalefe jam jusweyan atdusa layarabaraiserem jebe pelabuhan kota Kengkereya je, jei jena ga gaarstenanna Uwa Sanbagirminiwer. Ane jega jem temawer jei nabal safna jemna ga gutunsini.

¹⁹Kota Efesus je jep jame aa ge forobilirim, Paulus jei Priskila yo Akwila ga mirsotefala jebe. Jei jentowaifener ga kautena jena angtane Yahudimana aa jep ge betwebuwefaram jebe, ane angtane Yahudimanaiserem jebar ga aa ge nasbawena.

²⁰Jepga jei Paulus ga aane bala, “Paulus, aamei abakfer is nwini aafe.” Jengga Paulus jei bai.

²¹Safe gam, nalef jei jam sofweyan, jei enggam ga gunu, “Afa Uwa Sanbagiri Jei ai jam ase balaram ai gamjon jalfe imnibe, bunar ai gamjon ga as jela imnibe” Ane jei jewer ga aa sofwa kota Efesusminiwer atdusame.

²²Paulus kota Kaisareya je jep jame aa galap fornaram, jei atdusawer ga aa iretya, ane jewer ga sofwa kota Yerusalemminibe. Ane jei ga salamma ga golmini safna Yesus aa jei ne tebanaram jebe. Jewer ga jei kota Antyokyawer ga sofna.

²³Jei kotana jeiserem jebe nwinibe jamer abaktouya, gamjon ga sofna jewer. Jepga jei propinsi Galatya ane ona Frigya jep ga wofena. Jei taterisi Uwa Sanbagirmana gamjon ga nasipminenne, jega angtane Yesus jep aa jei ne tebanaram jei kanaufer gam ne fibif.

²⁴Angtane Yahudimana jemna bosna Apolos aa jei surnurum kota Aleksanderya je, jei kota Efesus je jela. Jei waakenfer nasipminenne, ane jei unggwanfer tousa Taterisi Uwa Sanbagirmana jem igiserem.

²⁵Angtane nafsi jei nele Tuhanmanaiserem Apolosfe mes ne towas-towastabana. Ane Apolos jei baabetmer ga nasowena, ane jei angtane bunarsusfer towas-towastababili seyafter Yesusem temawer. Jengga jei baptisana Yohanesmanaiserem ga jetefener towaswebili.

²⁶Apolos jei jam ereyen jena angtane Yahudimana aa jep ge betwebuwefaram jep jam nasowefe. Jep ga Priskila ane Akwila jei taterisi Apolosmana ga aa ge saribaasini, ane jei Apolos ga aa ge aftawena jelem jenabo. Jepga jei Apolos ga aa ge towas-towastana Uwa Sanbagiri aa gam mwangbisinirim enggame Yesus Jei angtane jam waakentababisif.

²⁷Apolos jei gamjon enggam ga gunu, “Ai ajam sofwef Akayawer.” Jepga angtane Yesus aa jei ne tebanaram kota Efesus je, jei surta ga aane tulisulmini angtane Yesus aa jei ne tebanaram ona Akaya je jep aa jei ge nwinbenerem jebe. Jei surta jeiserem enggalf ne tulisulu, jega angtane Akayamanaiserem jei Apolos ga sene tebana ini waakenmer. Apolos jei Akaya je jame aa galap fornaram, jei angtane Yesus aa jei ne tebanaram ga batobaabili. Angtane jeiserem jei Yesus mes ne tebana, aam temawer Uwa Sanbagiri Jei waakena Jelemanaiserem jes kitulmini jebe.

²⁸Apolos jei angtane Yahudimanaiserem jebar uskambar ge nasbawena, jamere jei aa ge tikwebili jam ge nasbawefe. Jei gamjon jam ge nasbaweyan angtane unggwanfer jepserem jem tarnabe. Jei Taterisi Uwa Sanbagirmana ga gerabistena, ane ga aa saamini enggame Yesus Jeiba Mesiasam, Angtane Uwa Sanbagiri Jei bunarsus aa Jes balam Jam baftanaf enggalfe angtane gam waakentababisif.