Read Berik Rasul 27 Bible Online

Rasul 27 - Berik bible

Rasul 27

¹Jame aa galap ge gubilirim enggame, “Ai negeri Italyaminip aya sofwa atdusame.” Paulus ane angtane nafsi afweraiserem bwiyip aa jebar ge nwinbenerem, ga jep ne kitulbono angtane sanbaka 100 ginanggwamana, bosna jemna ga Yulius. Ginanggwana unggwanfer jeiserem jei ga ginanggwana safna Kaisarmana.

²Ai atdusa kotana Adramityumwer aa jei jelaram jep aya juswena. Atdusa jeiserem fwater mes menetwesini jam sofwefe kotana fi eyep aa jei ge folbanannaram propinsi Asya je. Ane ai ga aya sofna atdusa jeiserem jeme. Aristarkus angtane propinsi Makedonyamana, aa jei nwinirim kota Tesalonika je, jei abar seyafter aya sofna.

³Jem gwirmer ga aya batona kota Sidon je. Yulius jei Paulus waakenfer gwebana, ane ga bala, “Sya Paulus, aamei saf is sofwa ilem afelen mesna jemnibe, jega jei apgal jigala ip is ga sene gulbana aamei ijes bilirim.”

⁴Jewer ga gamjon atdusame ga aya sofna, jengga deye uskambarsus aya domsobana. Jega jem temawer atdusa ga naantei Siprus jewerserem ga jewer sofna. Naantei Siprus jem eyebe deye fas.

⁵Aya sofnaram finibe ona Kilikya ane propinsi Pamfilya jem gwetmanap, kota Mira ga aya batona propinsi Likya je.

⁶Jes galapserem angtane sanbaka 100 ginanggwamana atdusa ga aa domola jei negeri Italyaminip sofwa. Angtane sanbaka jeiserem jei ga as balbabili atdusa jeiserem jep ga aya juswena. Atdusa jeiserem ga kota Aleksanderyaminiwer jela.

⁷Ai atdusa jeiserem jeme ajamera wofelabe samem-sameme nunu jamer anesus. Ane ajamera wofelabe awelna falam, kotana Nidus jem gwetmanabe ga aya forna. Jes jepserem jep jegme deye uskambarsusfer ne gwebana. Ai nele gwanan agma jelaram, nele jeiserem jeter sofwefe, gamjon masef aya unggwasa. Jega jem temawer ai naanteya Kretam eisamer aya sofna. Ane naantiki Salmone jem gwetmanabe deye uskambarsus fas.

⁸Awelna falam ajamera wofelabe fi eisamer, jamere tampata aasaje bosna ga enggam, “Atdusa Waakenfer jep Daktabisif”. Je kota Laseyawer bijauyan.

⁹Ai agalaba fornaram nunu ga anesus gam barwena, ane nunu unggwandusa angtane Yahudimana tahunu jeber-jeber jei aa jes ne onsobuwena, nunu jeiserem mes ayintye. Nunu jes galapserem taban, angtane jei finip afa jam wofeyan, aam temawer deye unggwanfersus, atdusa waakenfer jam ge wofeyan. Jega jem temawer Paulus esorola enggam ga golmini,

¹⁰“Am afelen mesna, aamei seyafter ams isa sarbasini! Ai ames towaswena afa nei namwer atdusa aaiserem jem nesa sofwaram, nei ga nesa irfwena. Galgala atdusap seyafter gemerserem sege janbiton finibe, ane atdwas mese, ane nei nesa altini, futu.”

¹¹Jengga angtane sanbaka 100 ginanggwamana jeiserem jei esorola Paulusmana jeiserem jam saribeyen. Jengga jei angtane awelna aa jei ne gwebilirim atdusabe jem sanbaka ane angtane atdusa ata jam jemanserem, ga jes sarbabili.

¹²Tampata atdusa jep daktabisiliserem kapka, aam temawer atdusa jebe abakfer jam teyan muara deiye uskambar aa jem ne gwebawenaram. Jega jem temawer angtane atdwasmanaiserem jei ga aa ge gubili, “Sya, ganma sofwe!” Jei enggam ge gubili, “Nei kota Fenikswer ganma sofwe, ane jep ga nesa nwini jamere muara wisimi uskambar aa jem falwenaram, muara jeiserem sege barwebili.” Kotana Feniks jeiserem jebe tampata waakena atdusa jep daktabisife naanteya Kretaminibe. Kotana jeiserem fini banmawer ane fini ulfunup ga jem tarnap nulna.

¹³Bwona bastantowaifer aa galap ne fonsobanaram gwer anggasyela taasfolawer, angtane atdwasmanaiserem enggam ga aa ge gubili, “Au, nei ganma sofwe nei nejewera gunurum.” Ane besini daran-darna jeiserem ga aane dekoltena finiwer, ane ga aane gwalaniwili atdusabe. Jei ga aa ge sofobili gwer kawetenalawer naanteya Kreta jem gwetmansamer.

¹⁴Jengga jepga abakferyan, deye gamjon uskambarsus ga aane gwebana naanteyawer, deye enggame aa jes ne balbabufaram, deye gwer anggasyelmana.

¹⁵Deye jeiserem aane gwebanaram, atdusa jeiserem ga weken-wekenwena. Jega jem temawer atdusa waakenfer jam wofeyan deyep jam kawewife. Ai masef aya unggwasa jamere sikfer ajamera gwina. Ane atdusa jeiserem ga ajafnera gerabili, deye jeiserem atdusa ga gwirinfele.

¹⁶Atdusa naantei towai bosna Kauda jame aa galap gwetmantanaram, jes jepserem deye jebe uskambaryan. Tampata jeiserem jep agalaba kawewilirim, awelna amna falam atouya atdwasmanaiserem ga aya dektestena, ga aya gwetaantena atdusabe.

¹⁷Atouya jeiserem atdusabe aya gwetaantanaram, ginggitfer ga aya fwirna atdusap, newa atdwasmanaiserem jeme. Newa jeiserem ga kekelsusu, ane jei atdusa jeiserem ginggitfer jem ga aane fwirna. Angtane atdwasmanaiserem jei jam ge erebili enggame ai galap asa tarkowa tamna Sirtis jem dwisibe. Jega jem temawer jei fenbiti layarawer ga aane toinswena, ane deye jeiserem atdusa ga gwirinfele.

¹⁸Deiye uskambar ane muru unggwanfer jeiserem atdusa afwer taamwer gam sofola, afwer taamwer gam sofola. Jem gwirmer ga angtane atdwasmanaiserem galgala ga aane towaitabana finip jam fasawola.

¹⁹Nunu gamjon jem gwirmer aaiserem angtane atdwasmanaiserem jei galgala daran-darna atdwasman mesna jes mese ga aane fasawola finibe.

²⁰Nunu ga anesus ai gwer ane mato mese ajama damtabiyen, ane jeiserem ga jem temawer ai ajama towaswebiyen atdusa amna fomfom se sofwa. Ane deiye uskambar jeiserem jeme atdusa gemer baafulnonno, ane ai alem inibe ga aya gunu, “Nei waakenfer gamjon nejama gweyan, namwer nesa tere.”

²¹Jepga nunu abakfer angtane jei jam dwenyan, Paulus ga irwa, jem nenennap ga fina, ane ga balbabili, “Am afelen mesna, aamei seyafter ams isa sarbasini! Afa aamei esorola amnaiserem ase jam igma saribenenentem, ane naantei Kretawer nejama sofweyana, nei seyafter kapka aaiserem nejama domolyan, ane galgala atdwasmana finip ijama fasawolyan.

²²Jengga namwer ai isa bunarsusfer balbabili, aamei seyafter ini ise saaser-saaserfer sege folbamini, aam temawer nemniwer angtane afa jam teryen, jengga atdusa aaiserem ga jese kabwakswena.

²³Ai jes gemerserem gam ajewer gunurum, ai ga aam temawer ai gunu, gwini namwer aaiserem malaikata Uwa Sanbagirmana amnip forosanya, Uwa Sanbagiri ai as Jei gerebaasnenewenaram, ane ai ajes tebanaram.

²⁴Malaikata jeiserem ga as enggam balsa, ‘Paulus, ipsam ernerem! Aamei Kaisarminip galap is forna, ane jei ga is tener-tenertana. Uwa Sanbagirmana Jei waakena Jelemanaiserem is mes gulbana, ane angtane seyafter aaiserem aamei ijebara wofenaram afa jam teryen aam temawer aamei jebar ima wofna.’

²⁵Am afelen mesna, jega jem temawer ini imna is kanaufer sege folbamini. Ai isa gemer balbabilirim Uwa Sanbagiri Jei abe as gemer bilibenerem, jeiserem gemer se etamwena.

²⁶Jengga nei atdusabaner nesa tarkowa naantei dwisibe.”

²⁷Gwini empat belasabara aa jem falaram, deiye uskambar atdusa ga baafulu, Adarya Finibe. Gwini nenennap angtane awelna atdusap aa jei ne gwebilirim jei enggam ge gubili, “Neiba ona nemsama gwetmannul.”

²⁸Jega jem temawer jei newa tunabara ga aane dantantena finibe enggalfe jei gam ge towaswebif finigiri fomera. Fona jes jepserem jemna giri ga empat pulu meter. Jepga gamjon abakferyan newa jeiserem ga aane dantantena; fona jes jepserem jemna giri ga tiga pulu meter.

²⁹Ane jei ga aa ge erebili atdusa ton-girip galap se tarkowa. Jega jem temawer, besini daran-daransusu nawer-nauraiserem jei ga aane dantabuntena atdusa amnuwer. Jep ga aa ge gubili ona tatarmer ge nafwe.

³⁰Jengga angtane awelna atdusap aa jei ne gwebilirim, jei jena basyamer ga aane orsomunnu jam ge nunggirbif, jepga atouya ga aane dantantena jamer finibo. Jei seiseyam ga naawena besini daran-darna atdusa masnawer jam ne dantabuntef.

³¹Jengga Paulus angtane sanbaka 100 ginanggwamana ane jem safan mesna uskambar ga balbabili, “Afa angtane awelna atdusap aa jei ne gwelbilirim jei sege nunggirbilirim, aamei waakenfer ijama gweyan.”

³²Jega jem temawer, ginanggwana newa atowaimana gane tagalntena, atouya jeiserem ga janton finibe.

³³Ona gemerje jam nafweyan, Paulus ga uskambar ga balbabili janma twen. Jei enggam ga gunu, “Nunu empat belas aamei ijafnera fyawena erelbwerame, ane tumilgal ijama tombaabiyen.

³⁴Jega jem temawer ai isa uskambar balbabili jasa twen, jega aamei gamjon baabeta gam isa domola. Aamei seyafter kabwaksususerem ijama domolyan.”

³⁵Paulus jei game aa gutenaram, jei rotini ga goltena, jes jepserem Paulus Uwa Sanbagiri ga bala, “Ase samfer gulbana.” Jepga rotini ga aa bitabisini, ane ga dwena.

³⁶Jepga ini jemna seyafter ga kanautabaipmini, ane seyafter ga dwena.

³⁷Angtane atdusap jeiserem unggwanfer ga enggammer 276.

³⁸Jei seyafter jamer dwenabe unubuguf, jepga gandumu ga aane fasawola atdusa gam forelswef.

³⁹Ona jame aa galap nafwenaram, angtane awelna atdusap aa jei ne gwebilirim je ona mes ne damtana, jengga jei teisyena jes jepserem je fofa. Dwona jep kawewife ga aane domola. Jepga jei ga aa ge gubili, “Nei atdusa aaiserem ga jep nesa tarkawolsitne, afa waakenfere.”

⁴⁰Besi daran-darna jem newa seyafter jeiserem ga aane targabaabisini, ane besi daran-darna jeiserem ga aa ge albitini finibe. Gamjon ga newa naaremdwasa aaiserem ga aane fertebaabuntena. Jei gamjon layara ga aane kaawulntena atdwas masnabe, jega nindaya jam sene gwebanaram. Atdusa jeiserem gase fonola finiwer gase sofwa.

⁴¹Jengga atdusa jeiserem ga dwisip kenemwena, ane jep ga tarkowa. Masnawer ga aa tarkowa dwisibe, jam ginweyan. Ane burawer atdusa jeiserem muru unggwan-girsususerem ga je sofola, ane muru atdusa jeiserem ga aa bitabisini.

⁴²Jes jepserem ginanggwana safe enggam ne mwangbisini, angtane aa jes ne tebabilirim jei seyafter jam ne munbobif, aam temawer jei jam ge erebili angtane jeiserem galap sege janbuwili jamer tufabo, ane ga sege nunggirbili.

⁴³Jengga angtane sanbaka 100 ginanggwamana jei baif gwena Paulus jam terfe. Jega jem temawer jei safna jelemana ga balbabili, “Ipsama eyebilirim aamei ijesa mwangbisinirim.” Gamjon ga balbabili angtane fonap januwil tousaiserem, “Nabala ga aamei isa janwaton finibe, ane dwisip ga isa janiwena!”

⁴⁴Ane jei angtane afweraiserem ga balbabili, “Aamei amnup isa jenfalwena, atdwas balbalnaiserem isa tebabili, jem ga isa janiwena jamer dwisibo.” Jes gemerserem, ai seyafter waakenfer ga agma janiwena jamer dwisibo.