Read Berik Rasul 28 Bible Online

Rasul 28 - Berik bible

Rasul 28

¹Dwisibe waakenfer jame agalaba fornaram, jepga aya towaswena ona jeiserem jemna naanteya bosna ga Malta.

²Angtane jepmana jei ga as waakenfersus ne tebabili. Arouwa je mes towaiwena jam nyanfe, ane wisimi ga anesus. Jega jem temawer angtane jepmana jei tokwagiri ga aane surna, ane ai ga asene balbabili, “Aamei seyafter tokwanap sa jal!”

³Jepga Paulus tini sasana ga kitulnonno. Tini jeiserem jame aa galap bunulniwilirim tokwa sagabe, ane tokwa sarsarem tini jeiserem ga ge taabili, ufwai awasa tiniwer ga totintye tokwa sarsareme. Ane awasa jeiserem tafna Paulusmana ga faarebana, ga jerbene.

⁴Angtane jepmana jame aa galap ne domolaram awasa jeiserem Paulusem tafnaber jam aa galap taannurum, jei ga jen jena ga aane gitminenne enggame, “Angtane aaiserem jei angtane nafsi gam munbono. Jei safe finip altiliwer jena mes waakentaasini, bwata jemna bosna ‘Bwata Bunarsusfer gam Gunu’ jei enggam gunu angtane aaiserem jei jam gweyan.”

⁵Jengga Paulus awasa jeiserem tokwanap ga jawolwili, ane jes jepserem awas ol bwentabe jam siginsweyan.

⁶Angtane jepmana enggam ga aa ge gubili, “Tafna jemna tatarfer namwer sene fanabana, ane Paulus gase jena onabe, gase tere futu.” Jepga abakfer ga aa ge fibili, jengga Paulus jei jena jam enteyen jam bweraswefe. Jepga jei Paulusem temawer nafismer enggam ga aa ge gubili, “Angtane aaiserem jeiba faatrew angtane gemerserem.”

⁷Tampata jeiserem jewer bijauyan, angtane sanbaka anggwabura naanteimana aasaje jep nwini. Bosna jemna ga Publiyus, jemna makana sanbagiri. Jei as waakenfer tebabili, ane ai syewal anggwafe jem jenap aya nwinirim, nunu abakfer ga nawer-ningna.

⁸Jes galapserem Publiyusem jeta ga bwernabara tifin sarsar ane unufofenna gam nababuwena, titikip gam tantena. Paulus jemnip ga gwina jam damtafe, ane sembayanga ga aa gwebabana jebe, jepga tafna jemna jem sagap ga aa tosobaanswena. Jei ga aa waakenswena.

⁹Paulus jeiserem jama eyebilirim, angtane bwernabara naanteimana seyafter gemerserem ga aa ge jalbuwena Paulusminibe. Ane seyafter ga waakentababili bwernawer.

¹⁰Jei abe apgal jigala anesus as gemer ne kitulmini. Ane ai jame agalaba sofwaram gamjon atdusame, seyafter agemera balbabilirim atdusap ga aane bunulniwili.

¹¹Muara nawer-ningna jam aa ge barwebilirim naanteya jeiserem jebe, ai jewer ga aya sofwa atdusa kota Aleksanderyamanaiserem jeme. Atdusa jeiserem ga naanteyap tena jamer muara wisimi aa jem falwenaram bar. Atdusa jeiserem jemna bosna ga “Bwata Nawer Batana”.

¹²Ai agalaba fornaram kotana Sirakusa je, ai jep ajama nwinibe nunu ga nawer-ningna.

¹³Jewer jon ga aya sofwa atdusame, kotana Regium je ga aya forna. Jem gwirmer jon, deye gamjon ga aane towainebana jam ne gwebafe gwer anggasyela taasfolawer, ane jega jem temawer ai jewer gamjon ga aya sofwa. Nunu ga naura ajamera wofelabe, tamna Putyoli jep ga aya forna.

¹⁴Kotana jeiserem jebe ai angtane Yesus aa jei ne tebanaram ga aya damtabili. Ane jei ga asene balbabili ai ajebara nwinfe nunu ga tuju. Jepga kota Romawer ga aya sofna.

¹⁵Angtane Yesus aa jei ne tebanaram kota Roma je, jei ula am temawer mes ne sarbili. Ane jei ga aa ge jalbili, jei ai ase nelep ne fibabitye. Angtane jeiserem ga aa ge jalbili jamer Pasar Apius je ga as jep ne fibabili. Ane angtane afwer jei ga aa ge jalbili jamere tamna bastantouyaserem jebo. Tamna jeiserem jemna syewal anggwa jena ga nawer-ningna. Paulus jei angtane jeiserem jame aa galap damtabilirim, jei Uwa Sanbagiri ga bala, “Asi samfer gulbana.” Ane ini Paulusmana kanaufer ga folbana.

¹⁶Kota Roma je jame agalaba fornaram, ginanggwa sanbaka jeiserem Paulus ga bala, “Sya, aamei infentowai saf is nwini, jengga ginanggwana daamfenna aamei ga is jei se gerebaasnenne.”

¹⁷Nunu unggwanfer ga nawer-ningna Paulus ga angtane sanbaka angtane Yahudimana ga aa jenbebili. Jepga jei ga aa ge betwebili, ane Paulus ga balbabili, “Am afelen mesna, ai kapka afa ajam eyeipmiyen anggwabura nemnaiserem jebe. Ane ai kapkaiserem afa ajam eyebiyen osiri angtane Yahudimanaiserem jem temawer. Ai as jafner ne tebana kota Yerusalem je, ane ga asene gera angtane Romamana jem tafnabe.

¹⁸Jei jame as galap ne tenebanaram jei safe as jam ne aftannuf, aam temawer ai kapkaiserem afa ajam eyebiyen, jega ai as jem temawer ne tamtamtafe jamer futu.

¹⁹Jengga angtane Yahudimana jei bai as jam ne aftannufe, jega jem temawer ai jamer ai gunu jam gwife Kaisarminibe. Jengga ai ajam guyon angtane Yahudimana jei kapkaiserem jes ne eyebili.

²⁰Seyafter jeiserem ga enggalf ai aamei isa gam damtabif, ane ai ibar negama nasowef. Angtane Israelmana jei Mesias ne fibana, ane jega jem temawer ai aaf as nwini, ai as mes ne tebana, ane ai as mes ne daferna ranteme.”

²¹Jepga angtane Yahudimana Paulus ga aane bala, “Ai surta afa ajama domolyan ona Yudeyaminiwer im temawer. Ane angtane jewer aa jei ge jalbuwenaram, jei taterisi kapkaiserem im temawer fas afa jam ne nasbiyen.

²²Jengga ai ajama sarbif taterisi aamei ijes taabilirim, aam temawer aimba amsama sara angtane unggwanfer jei aa jes ne nasbilirim taterisi kapka safna aamei ijes onsobilirim jem temawer.”

²³Jepga jei Paulusfar nunu daamfenna ga gane bili jem dorwefe. Nunu jeiserem jeme, angtane unggwanfersus gamjon ga aa ge forobitye Paulus aa jep nwinirim jebe. Paulus gwinibener towaiwulmini taterisi jam nasipmilibe, ane jei taterisi nasipmini jamer ona dafwel. Jei nunu Uwa Sanbagiri Jem gwelaiserem anggwabura seyafter gemerserem jem Sanbakfe ga jes nasipmini. Ane jei taterisi gamjon uskambar ga nasbili enggalfe angtane jeiserem jei Yesus gam ne tebaf. Bukunu Nabi Musa aa jes tulistababilim, ane buku nabi-nabi nafsiserem jei aa jes ne tulistababilim, ayat-ayata jep aaiserem jeme Paulus jei Yesus angtanef ga jem ge saamisini.

²⁴Angtane afwer aaiserem jei taterisi Paulus aa jes nasbilirim mes ne taabili, jengga angtane afweraiserem jei jam ne taabiyen.

²⁵Jei jewer ge tobitinyef, ane jei jenjen aarememfener ga aa ge doksobana. Jes jepserem Paulus jei enggam ga nasouna, “Bunaram Mafnana Uwa Sanbagirmana Jei asal-asala imnaiserem enggamam balbabil, taterisi Nabi Yesayamanaiserem jeme:

²⁶‘Gasa sofwe angtane aaiserem jemnip, ane ga isa balbabili: Aamei iner isa sarbisini jamer abaksusu, jengga aamei ijama towaswebiyen; Aamei iner isa anggasini jamer abaksusu, jengga aamei ijama damtabiyen.

²⁷Angtane jeiserem jemna ini kanaufer jam ge folbamiyen; imwana jemna mat, jei bai jam ge sarbife; nwena jemna kof, jei bai jam ne damtabife. Afa nwena jemna jam ne matabaasiyeneye, jei ga sege anggabisini; afa jei imwana jam ne matabaasiyeneye, jei ga sege sarbili; afa ini jemna kanaufer sege folbaminirim, jei ga sege towaswebili. Jei ga sege waraubitne Amnibe, ane Ai angtane jeiserem ga As waakentababili.’ ”

²⁸Jepga Paulus taterisi jei aa jes nasbilirim, jei taterisi jeiserem enggam tabanulsini, “Am afelen mesna, aamei jam isa towaswena enggame Taterisi Waakenaiserem Uwa Sanbagirminiwer angtane gam waakentaasini. Taterisi jeiserem ai amsam nasbinenne angtane Yahudimanyanaiserem jemnibe. Ane jei mes ne sarbili!” [

²⁹Paulus game aa gutenaram, angtane Yahudimana jeiserem jewer ga aa ge sofobili, jepga jei jen jena aarememfener unggwanfer ga aane nasmini.]

³⁰Tahunu ga naura Paulus jei kota Roma je jep jam nwinibe, jena jei jener nomkef aa jes armanulurum jebe. Ini jemna saaser-saasera angtane seyafter jemnibe aa jewer ge forobuwetyaram.

³¹Ane jei jam ereyen taterisi jam nasbife, taterisi Uwa Sanbagiri aa jem gwelaiserem anggwabura seyafter gemerserem jem Sanbakfe jem temawer. Jei taterisi Tuhan Yesusem temawer mese gemer nasipmini. Paulus jei taterisi jeiserem jame aa nasipminirim, angtane enggam afa jam ne balyan jas tikwe.