Read Berik Rasul 5 Bible Online

Rasul 5 - Berik bible

Rasul 5

¹Jepga anggwana bosna Ananiyas, ane jemna wini bosna ga Safira, jei obiti jemna jam ge jualtana.

²Ona aa jes ge jualtanaram, doini jeiserem afwer jam ge waakentaasini, ane afwer ga rasulf ge gaarmini, ane jei enggam ga gunu, “Doini seyafter ga aare.” Ananiyas jei winabar jenfentowai ge towaswena.

³Petrus ga enggam bala, “Ananiyas, jeje bafa bawasa ini imna is mes tebabana, jamer aamei Mafnana Uwa Sanbagirmana im afaf-afaftana? Ane doini ona ijes ge jualtanantam, doini afwer ga im ge waakentaasini.

⁴Ona jeiserem gwanan nalef ijam ge jualtayan galapserem, ona jeiserem imna. Ane ona jeiserem jam im ge jualtanantam, doini jeiserem jeme ilemana. Gam jega, jeje bafa aamei ilem inibe ga im gunu kapkaiserem ijam eyebife? Aamei gam ke angtane tefner im afaf-afaftababili, jengga aamei Uwa Sanbagiriserem Jes mese iJes afaf-afaftana.”

⁵Ananiyas jei taterisi jeiserem jam aa galap sarbilirim, jei onnap ga jena, ane ga aa tere, futu. Angtane seyafter jep gemerserem bwembwema jeiserem jam aane sarbilirim, jei ga aa ge erebili.

⁶Jepga tansi ga aa ge forobitye, ane Ananiyasem futunu ga aane daferna, ga aane totintye bitisip jam ne tirnnufe.

⁷Jema nawer-ningna safe gemer ayintyerem, wini Ananiyasmana ga aa fortya, jengga jei teisyena aa je etamwenaram.

⁸Petrus enggam ga taanaabili, “Aamei ai as im bala, aamke ona ilem anggwafar ijes ge jualtanantam, jemna doini ke enggamfener?” Wini jeiserem ga enggam tamawola, “Bunar ba gemeram.”

⁹Petrus ga bili, “Jeje bafa aamei ane anggwana ilemanaiserem Mafnana Uwa Sanbagirmana ga im ge unggwasibene? Gase sar! Angtane mes ge waraubitne, anggwana imna jem futunuserem aa jei ne tirnunurum, ane jeime im futunuserem isene totini.”

¹⁰Jes jeberserem wini jeiserem ga jena Petrusem tof tarnabe, ane ga aa tere, futu. Ane tansi jeiserem ga aa ge kabwitena, jei wini jeiserem jem futunu ga aane domola, jepga jei ga aane gwirinfele, ane ga aane dornunu bitisibe annaiserem jem tarnabe.

¹¹Jepga angtane seyafter Yesus aa jei ne tebanaram, ane angtane nenes mesna bwembwema jeiserem aa jei ne sarbilirim, jei seyafter ga aa ge erebili uskambar.

¹²Rasulu jei bwembwema anesus aane eyebilirim, ane angtane uskambar mes ne domola. Ane angtane afweraiserem Yesus aa jei ne tebanaram, jei ini daamfennaber ge betwebili, mwona bosna Salomo Jena Uwa Sanbagirmanaiserem jebe.

¹³Angtane kotana jeiserem jep aa jei ge nwinbenerem jei enggam ge gubili, “Angtane Yesus aa jei ne tebanaram jei angtane waakena.” Safe gam, angtane afweraiserem Yesus aa jei ne tebanaram, jei jam ge erebili seyafter jam ge betwebife, angtane Jena Uwa Sanbagirmanaiserem jep aa jei ge betwebuwefaram jebar.

¹⁴Safe gam, angtane Yesus aa jei ne tebanaram jep ga aa ge unggwanswebili, anggwa mese, ane wi.

¹⁵Jei ga aa ge unggwanswebili, aam temawer rasulu jei bwembwema anesus aane eyebilirim. Angtane jes jepserem jei angtane bwernabara ga aane erbifele, nelebe ga aane bunulntena titik sagabe ane tikarap. Petrus jep aa galap ayintyerem, angtane bwernabara jep aa jei ge tabanaram, jei uwu Petrusmanaiserem ga aane domolbana, ane ga aa ge waakenswebili.

¹⁶Jes jepserem angtane unggwanfersus ga aa ge forobitye taman-tamnawer, kota Yerusalemem gwetmanap aa gemer ge folbanannaram. Jei angtane bwernabaraiserem ane angtane bwat kapkabaraiserem ga jes ne erbifelwetya enggalfe gam waakentababif bwernawer. Ane angtane seyafter bwernawer ga aane waakentababili.

¹⁷Jepga imam sanbagirsususerem ane angtane jei aa jei ne tikwebaatinennerem, angtane jeiserem jei angtane safna Sadukimana, jei rasul-rasul jam ne uskamswebabili.

¹⁸Ane rasulu jeiserem ga aane tebabili, ane bwidusabe ga aane katabuntena.

¹⁹Jengga gwini jeiserem malaikata Tuhanmana bwi mwona jeiserem ga aa tertebabisnenne, ane rasulu jeiserem ga aa tosobaabistena, ane ga balbabili,

²⁰“Gasa sofwe Jena Uwa Sanbagirmanaiserem jewer, jep ga isa fitna, ane jepga angtanefe waakenfer gwelaiserem jamer abak-abaksus ga isa nasipmini.”

²¹Rasulu jeiserem jei ga gemer naawena malaikata aa gemer balbabilirim. Gwirmerem gwinibenersus ga aa ge sofobisi Jena Uwa Sanbagirmanaiserem jebe, ane jep ga aane towaiwulu angtane jam ne towas-towastababife. Jes galapserem imam sanbagirsususerem ane angtane jei aa jei ne tikwebaatinennerem ga aa ge forobitye, jepga jei ga aa ge betwebili Safna Angtane Yahudimana Sanbak-sanbaka Seyafter Gemerserem. Ane jepga angtane ga aane balbabili jam sofwefe, rasulu jeiserem jam kitulifenefe bwiyiwer enggalfe jemnip gam ge forobiyef.

²²Jengga angtane aa jes ne baftabilirim, jei bwi tarnabe jam aa galap ge forobilirim, jei rasulu jeiserem jam ne damtabiyen jebe. Angtane jeiserem jei aa galap ge waraubilirim, ula jeiserem ga Angtane Sanbak-sanbaka jeiserem aa jei ge betwebilirim jep ga aane nasipmini enggame,

²³“Ai bwiyibe jam agalaba fornaram, bwi mwona seyafter jam matabaabisnenele waakenfer ge falbili, ane ginanggwana jei seyafter jeber ge fibili bwi mwonabe. Jengga bwi mwona jame aa galap ne tertebabisnennerem, angtane jebe afa ajama damtayan mwonabe.”

²⁴Jepga angtane sanbaka angtane Jena Uwa Sanbagirmana aa jei ne gerabisnennerem, ane angtane imam-imam sanbakaiserem taterisi jeiserem jame aa galap ne sarbilirim, jepga jei enggam ge gubili jelem inibe, “Rasulu jeiserem jei fwer ge gubili? Jei fomfom ge tobitintye bwiyi aaiserem jewer?”

²⁵Jepga angtane daamfenna ga jela, jei taterisi aaiserem ga nasipmini, “Imsa sarsi, angtane aamei ijesa tebabilintim ane bwiyibe ga ima katabuntenant, jei namwer Jena Uwa Sanbagirmanaiserem angtane unggwanfer ga jep ne towas-towastababili.”

²⁶Angtane sanbaka angtane Jena Uwa Sanbagirmana aa jei ne gerabisnennerem ane angtane jam aa jei ne tikwebaatinennerem, jei ga aa ge sofobili rasul-rasulu gam ne kitulifenefe. Jei rasul jam ne tergenbaabiyen, jengga jei samem-samem ne tebabili, aam temawer jei angtane unggwanfer jep jeiserem jes ne erebaabili. Jei enggam ge gubili jelem inibe, “Angtane jeiserem jei tonem nes ne munbobili.”

²⁷Rasulu jeiserem ga aane aftabifele Safna Angtane Yahudimana Sanbak-sanbaka Seyafter Gemerserem jem tarnabe, ane imam sanbagirsususerem ga aa tenebaabuwena.

²⁸Enggam ga balbabili, “Ai ititmer aamei isa amsama balbabilint, aamei taterisi afa bosna Angtane jeiserem jem temawer angtane ijama towas-towastababiyen. Jengga ga imsa domol aamei afa ibasa eyebili! Aamei taterisi jeiserem ga angtane seyafter kota Yerusalemmana jei aa gemer ge nwinbenerem ga igemera nasipminenne. Ane aamei ga ima balbabili enggame Angtane jeiserem Jemna tere ga aya eyeibenent.”

²⁹Petrus ane rasulu nensaiserem jei ga aa ge tamawolbili enggame, “Ai Uwa Sanbagiri ai jeter aya sarbana, ane angtane ajama sarbabiyen.

³⁰Aamei Yesus ti salibibe aameima daktanswenant jamer futu. Uwa Sanbagiri asal-asala nemnaiserem, Jei Yesus gamjon mes irtestenant terewer.

³¹Ane Uwa Sanbagiri Jei ga Yesusfe taman nwini Jelem taasfolawer mes gulbana, ane Jei baabeta unggwandusa Jep mes gulbana. Jei Sanbakfe nei neJebara nwinfe waakenfer, ane Jei ga nei nes mes waakentababisini. Jei gam ajewer eyebilirim, ga enggalf eyebili anggwabura Israelmana Jei gam ne tebaf, ane ga sege irfwebitne jelem etam-etamawer, ane gasa wirtabaabili.

³²Ai Yesus amsama damtana, ane taterisi Jemna mesna amsama sarbili. Ai mese ane Mafnana Uwa Sanbagirmanaiserem jes mese Uwa Sanbagiri aa jes golminirim angtanefe, angtane Uwa Sanbagiri aa jei ne sarbanaram, ai taterisi jeiserem ga aya nasbili.”

³³Jepga Safna Angtane Yahudimana Sanbak-sanbaka Seyafter Gemerserem jei taterisi jeiserem jame aa galap ne sarbilirim, jei ga aa ge kakalswebili, ane ula ga aane tagalsini daamfennaber enggalfe rasulu jeiserem jam ne munbobif.

³⁴Jengga jes jepserem angtane safna Farisimana, bosna jemna ga Gamaliyel, jei guruf mesam gwena Hukumu Nabi Musa aa jes tulistababilim, ane angtane seyafter jes ne sarbana. Jepga jei ga irwena Safna Angtane Yahudimana Sanbak-sanbaka Seyafter Gemerserem jem nenennabe, ane ga balbabili, “Rasul aaiserem gasa tosobiste abakefyan!”

³⁵Ane jei ga aa balbabili, “Am afelen mesna anggwabura Israelmana! Aamei waakenfer isa eyebili angtane aaiserem jem temawer.

³⁶Gwanan galapserem Teudas jei mes fortyant, enggame jena aa jei balantam, ‘Ai angtane unggwan-giri’, ane jepga angtane unggwanfer 400 jei ga aane tikwebaatinint. Jengga jei aane munbonont jamer futu, ane angtane jei aa jei ne tikwebaatinennerem jei ga aa ge irwalwebilint, ane jemna awelna bar.

³⁷Jes jepserem taban, gamjon safe gemerserem sensus aa galap ne gwebanantam, angtane bosna Yudas ga fortyant, angtane Galileya teu. Ane jemna tateris nasbilint waakena, ane angtane anesus ga jei ne tikwebaatinennent. Jengga jei mese, mes ne munbonont jamer futu, ane angtane jei aa jei ne tikwebaatinennentem seyafter ga jam ge irwalwebilint.

³⁸Ga jem temawer, esorola amna ga enggam, angtane aaiserem jebe kapkaiserem ijama eyeipmiyen, je safnant. Afa osiri jemna jei aa jes ne eyebuwenaram angtanemanaye, gam jega jemna osiri gase barwemini.

³⁹Jengga afa osiri jemna jeiserem ga Uwa Sanbagirmanaye, gam jega aamei masef jei ijama jubobiyen, aam temawer aamei Uwa Sanbagiriserem ga ijesa nasbana.” Ane esorola Gamaliyelmana jeiserem, Safna Angtane Yahudimana Sanbak-sanbaka Seyafter Gemerserem jeiserem ga aane taayibene.

⁴⁰Jepga rasulu jeiserem ga aane jenbebili, ane ga aane saftabana, ga aane balbabili, “Taterisi Yesusem temawer gamjon afa ijama nasbiyen.” Ane jepga rasul jeiserem ga aane aftabunnu.

⁴¹Rasul-rasulu jeiserem Safna Angtane Yahudimana Sanbak-sanbaka Seyafter Gemerserem jame aa galap ne mirtebitefalaram, jemna ini saaser-saasersus ga aa ge folbamini, aam temawer Uwa Sanbagiri Jei mes gunu, “Angtane aaiserem jei samfer sege fibili kanaufer Yesusem temawer jei jame aa jep ne imei-imeitababilirim.”

⁴²Ane jei jepga nunu jeber-jeber Jena Uwa Sanbagirmanaiserem ane angtanem jenap, jei angtane jep ga aane towas-towastababuwena. Ane Taterisi Waakenaiserem enggam ga aane nasipmuwena Yesusem temawer: Yesus Jeiba Mesiasam, Angtane Uwa Sanbagiri Jei bunarsus aa Jes balam Jam baftanaf enggalfe angtane gam waakentababisif.