Read Berik Rasul 9 Bible Online

Rasul 9 - Berik bible

Rasul 9

¹Jes galapserem Saulus ga jeber-jeber enggam nasowena, “Ai angtane Yesus aa jei ne tikwebaatinennerem ga as munbobili.” Saulus jei imam sanbagirsususerem jemnip ga gwina,

²ane jei surta ga bili imam sanbagirsususerem jemniwer. Surta jeiserem ga Saulus se gwirinwef angtane sanbakef jena angtane Yahudimana aa jep ge betwebuwefaram kota Damsik je. Surta jeiserem ga enggalf gwirni, jega afa jei angtane nele Yesusmana aa jei ne onsobanaram jam se damtabilirim, anggwa mese wi, angtane jeiserem gase tebabitne, gase aftabuwena kota Yerusalemwer.

³Kota Damsikwer aa galap ge gubilirim, kotana jeiserem jame aa galap ne gwetmansonaram, nafa winsiwer aafer-aafersus ga iretya. Nafa jeiserem ga jam bwere-bwerewena.

⁴Saulus ga jena onabe, jepga taterisi enggam ga sarbili, “Saulus, Saulus, aamei kapka Ap As ibaf eyeibene?”

⁵Saulus ga tamawola, “Aamei nansa, Tuhan?” Ane jei taterisi jeiserem gamjon ga sarbili enggame, “Aiba Yesusam, aamei kapkaiserem ijep eyeibenerem.

⁶Gase irwe, ane kotanap ga is sofwa, jep ip ga isene towasulbono aamei ijes eyebiliserem!”

⁷Jelem afelen mesna Saulusfar aa jei ge sofobilirim, jei jafner ge fibili, jam ge gubiteyan, aam temawer jei taterisi jeiserem mes ne sarbili, jengga angtane afa fas jam ne damtayan.

⁸Saulus ga irwena ane ga fina, nwena ga fersona, jengga apgal jigala afa fas jam domolyan. Jepga Saulus ga jam ne tebastowena jamere kota Damsiko.

⁹Nunu abakfer ga nawer-ningna, Saulus jam anggayan. Ane nunu nawer-ningna jeiserem jeme jei jam twenyan, fona jam telbiyen.

¹⁰Kota Damsik je, angtane Yesus aa jei tikwebaatinirim jemna bosna Ananiyas ga jep nwini. Ananiyas jei Tuhan eserem jam tala gamserem gam ga damtana, ane Tuhan Jei Ananiyas ga jenbene enggame, “Ananiyas!” Ananiyas ga tamawola, “Tuhan, ai aare!”

¹¹Tuhan ga aa bala, “Gase gwi jamere nele bosna ‘Nele Nornora’ jebo. Nele jeiserem ga jes is onsobana jamere Yudasem jenabo. Ane angtane kota Tarsusmana ga jep is terelbene, jemna bosna Saulus. Jei sembayangs gwebana.

¹²Saulus jei angtane eserem jam tala gamserem ga gam damtana, angtane jeiserem jena Saulus aa jep nwinirim ga jep kawetetya. Angtane jeiserem aa jei fortyaram jemna bosna Ananiyas. Jei tafna jem sagap ga tosobaanswena enggalfe gamjon gam anggasife.”

¹³Ananiyas ga tamawola, “Tuhan, ai angtane jeiserem jem temawer amsam sara enggame, angtane jeiserem jei kabwakfer eyeipmini angtane Imnaiserem kota Yerusalem je.

¹⁴Ane namwer ga mes jela kota Damsik aaiserem jebe. Imam-imam sanbakaiserem jei baabeta mes ne gulbana, angtane seyafter gam tebabif sembayanga Ibe Is jei ne gwebabanaram.”

¹⁵Tuhan Jei Ananiyas enggam ga bala, “Se sofwe angtane jeiserem jemnip, aam temawer Ai jei Amsam destabana enggalfe awelna Amna As jei gweyibef. Jei bosna Amna As jei se nasibenenne angtane Yahudimanyanaiserem jebe, ane raja-raja jemnaiserem jes mese, ane anggwabura Israelmanaiserem jep mese.

¹⁶Ai Aner As ge sabasini jebe kapkaiserem jei jes domolaiserem Am temawer.”

¹⁷Ananiyas ga gwina, jena jeiserem jep ga kawetena. Jei tafna ga tosobaanswena Saulusem sagabe, ga bala, “Saulus, am afelna, Tuhan Yesus aamei ijes damtanantam nelebe aamei igalap sofwetyaram, ai ga ase Jei bala imnip jalfe, jega enggalf aamei gamjon igam anggasif, ane Mafnana Uwa Sanbagirmana imnip gam jalf.”

¹⁸Ane jes jeberserem jigal sabala galserem Saulusem nwenawer ga jenbatya, ane jei gamjon waakenfer ga anggasini. Jepga jei ga aa irwena, ane ga aane baptistene.

¹⁹Ane aa twena jamer taban, jepga jei baabeta gamjon ga enola. Nunu unggwanferyan Saulus aa nwinirim kota Damsik je, angtane Yesus aa jei ne tikwebaatinennerem jebar.

²⁰Jes jepserem jei ga aa wofna jena angtane Yahudimana aa jep ge betwebuwefaram aa gemer denennerem jebe, ane jep ga towas-towastababinenne enggame, Yesus Jeiba bunaram Tane Uwa Sanbagirmanam.

²¹Angtane seyafter ula jeiserem jame aa galap ne sarbilirim, jei ula jeiserem ga jam ne bitbitwebili, jei ga aa ge gubili, “Angtane aaiserem jeiba angtane Yesus aa jei ne tebabanaram jeyam munbobuwena Yerusalem je. Jei aafe enggalf fortya, angtane jes galserem jes tebabif, ane gase aftabifele angtane imam-imam sanbakaiserem jem tarnabe!”

²²Jengga Saulus jei taterisi Yesusmana waakenfersus towas-towastababili, jamere angtane gamjon anesus Yesus aa jei ne tebanaram. Jei waakenfersus towas-towastababili enggame Yesus ba Mesiasam, Angtane Uwa Sanbagiri Jei bunarsus aa Jes balam Jam baftanaf enggalfe angtane gam waakentababisif. Jengga angtane Yahudimana aa jei ge nwinbenerem Damsik je, jei enggam ge gubili, “Taterisi jeiserem je ol kabwak.” Jengga jei Saulus afa jam ne tamawolbayan.

²³Jes jepserem nunu unggwanfer jam aa ge ayebintyerem, angtane Yahudimana jei ga Saulus ga aane mwangbisini jam ne munbofe.

²⁴Jengga Saulus jena mes towaswena angtane Yahudimana jei aa jes ne mwangbisinirim jam ne munbofe. Gwin gwer angtane Yahudimana jei pagara tunawer eyemiliserem, kotana aa jem ne isinmisnennerem jem mwa totiyelep jep ne fibawena, Saulus jam ne munbofe.

²⁵Jengga gwinem, jem afelen mesna jei Saulus ga aane gaataantena karanjana unggwandusaiserem jebe, ane ga aane tebastaatyene pagara kotana aa jem ne isinmisnennerem jem jitefwer jamer onabo.

²⁶Saulus jame aa galap fornaram kota Yerusalem je, jei ga angtane Yesus aa jei ne tikwebaatinennerem seyafter jebar ge nwinbef. Jengga angtane Yesus aa jei ne tikwebaatinennerem, jei seyafter jam ge erebili Saulusfar jam ge nwinbefe. Jei jam ge erebili, aam temawer jei jelem inibe enggam ge gubili Saulus jei Yesus gemerje waakenfer jam tebayan.

²⁷Jes galapserem Barnabas jei Saulusminip ga fortya, ane Saulus ga aftawena rasulminibe, ane taterisi enggam ga aa nasipmini, “Saulus jei Tuhan nelep damtanant, ane Tuhan Jei jebar ge nasowenant. Ane Saulus jei Taterisi Waaken Yesusem temawer baabetfer ga aa towas-towastababilint kota Damsik je.”

²⁸Barnabas jes gemerserem gam jama nasminirim, rasul-rasulu jeiserem ini jemna waakenfer ga aa ge folbamini Saulusem temawer. Jepga Saulus jei seyafter ga aa ge nwinbene jebar. Ane jei baabeta ge domola enggalfe, bosna Yesusmana gam nasibenenefe kota Yerusalem seyafter gemerserem jebe.

²⁹Ane jegme angtane Yahudimanaiserem Yunani olem aa jei ge nasbawenaram jebar ga aa ge nasbawena unggwanfer. Jengga jei ga enggammer ge gubili, “Saulus jamer nesa munbono.”

³⁰Jengga angtane Yesus aa jei ne tikwebaatinennerem jei taterisi jeiserem jame aa galap ge towaswebilirim, Saulus ga aane aftawena kota Kaisareyaminibe, ane jewer ga aane baftana kota Tarsuswer jam sofwefe.

³¹Jepga safna Yesus aa jei ne tebanaram seyafter ona Yudeya yo Galileya ane Samarya je, seyafter waakenfer ge nwinbene, ane angtane nafsiserem jebe kapkaiserem afa fas jam ne eyeipmiyen. Mafnana Uwa Sanbagirmana jems batobaabili, ane angtane Yesus aa jei ne tikwebaatinennerem kanaufer ga aa ge fibili, ane angtane unggwanfer Yesus ga aane tebana. Ane angtane waakenfer ga naawena ane Tuhan ga aane erebene.

³²Jes galapserem Petrus ga jep wofowena. Nunu daamfenna jei jem ga gwina angtane Uwa Sanbagirmana aa jep ge nwinbenerem tamna Lida je.

³³Jep ga angtane ga damtana bosna ga Eneyas, jongolawer tere. Nutarawer jam irweyan, jamere tahunu delapan.

³⁴Petrus Eneyas ga bala, “Eneyas, Yesus Kristus ga ijewer waakentaf. Gase irwe nutarawer, tikara ga is egwaiwulsini!” Angtane jeiserem jei tatarmer ga irwena.

³⁵Angtane tamna Lidamana ane ona Saron jep aa jei ge nwinbenerem jei mese, jei seyafter jame aa galap ne damtanaram enggame Eneyas mes waakenswena, jepga jei mese Tuhan ga aane tebana.

³⁶Wini Yesus aa jei tikwebaatinirim aasaje kota Yope ga jep nwini, bosna jemna Tabita. Bosna jemna Yunani olem ga enggam gane bili Dorkas, bosna jeiserem jem igiserem ga rusa. Wini jeiserem jei nunu jeber-jeber waakensusfer eyebuwena, jei angtane galgalyenaiserem jes batobaabuwena.

³⁷Jes galapserem jei bwerna ga falbili, jamere aa tere. Wini jeiserem jem futunu jam aa galap ne wirulurum jamer taban, ga aane gwalanswena titikabe mwona bolap aa je falaram.

³⁸Tamna Lida je gwetmanfer nulna kota Yopefar. Angtane Yesus aa jei ne tikwebaatinennerem Yope je, jei jame aa galap ge sarbilirim enggame Petrus jei tamna Lida je jep nwini, jei angtane naura ga aane bafsona jemnibe. Angtane naura jeiserem jei Petrus enggam ga aa ge bala, “Tatarfersus se gwi Yopewer!”

³⁹Petrus ga aane gaariufenne, gamjon jebaner seyafter ga aa ge waraubili jamere aa ge forobili Yope je. Jame aa galap ge forobitnerem, jei ga aa ge tabwili mwona bolap jeiserem jebe. Ane saamirawi seyafter jep gemerserem, jei ga aa ge jalbili Petrus gunabener ga aane goronwebana wini jeiserem jem futunu jepserem. Ane baju mese fen seyafter Dorkas gwanan aa jes tatarbaabilintim ga aane saibene.

⁴⁰Petrus jei wini seyafter ga balbabili, “Sa totini!” Ane Petrus somwan dumem ga aa nwintena, sembayanga ga aa gwebana. Taban, gamjon ga irfwena wini futunu jeiserem jemniwer, ga bili, “Tabita, jase irwe!” Tabita nwena ga fersona, Petrus ga damtana, jes jeberserem jeber ga nwini.

⁴¹Petrus tafnawer ga taabili, ane ga goltena wini jeiserem ga irwena. Jepga Petrus angtane Yesus aa jei ne tebanaram ane saamirawi mese ga jenbebili, ane ga saamisini enggame wini jeiserem jei gamjon mes fersontyo.

⁴²Ula jeiserem ga aane nasbinenne kota Yope je, ane angtane unggwanfer Tuhan ga aane tebana.

⁴³Jes jepserem Petrus ga abaktowaifer nwini Yope je, Simonem jenabe. Awelna Simonmana ga enggam, jei sapi tifin mese, ane kambing tifin gwerep gam bunulu jamer sasan.